TZOLOM 46
Kʼaʼut tqaqʼaxtesi li qayuʼam ut tkubʼeeq qahaʼ?
Naq junaq naxqʼaxtesi li xyuʼam chiru li Jehobʼa natijok ut naxye re, naq kaʼajwiʼ aʼan tixloqʼoni ru ut li tixkʼe chiʼubʼej saʼ li xyuʼam aʼan kʼanjelak chiru (Salmo 40:9). Naq nakubʼeek xhaʼ naxkʼutbʼesi chiruhebʼ li junchʼol naq ak kixqʼaxtesi li xyuʼam chiru li Jehobʼa. Li naʼlebʼ li qʼaxal wank xwankil naq tqabʼaanu, aʼan xqʼaxtesinkil li qayuʼam re li Jehobʼa. Relik chi yaal li naʼlebʼ aʼin tixjal laayuʼam chi junajwa. Kʼaru ttenqʼanq aawe re naq tatruuq xbʼaanunkil aʼin?
1. Kʼaru t-ekʼasinq qe re naq tqaqʼaxtesi li qayuʼam chiru li Jehobʼa?
Li qarahom chirix li Jehobʼa naxbʼaanu naq tqaqʼaxtesi li qayuʼam chiru (1 Juan 4:10, 19). Li Santil Hu naxye: «Taara li Qaawaʼ laaYos chi anchal aachʼool, chi anchal aawaanm, chi anchal aakʼaʼuxl ut chi anchal aametzʼew» (Marcos 12:30). Naqakʼutbʼesi naq naqara li Jehobʼa rikʼin li naqaye ut li naqabʼaanu. Joʼ jun li sumal li nekeʼxra ribʼ nekeʼraj sumlaak, joʼkan ajwiʼ li qarahom chirix li Jehobʼa naxbʼaanu naq t-alaaq saʼ li qachʼool xqʼaxtesinkil li qayuʼam chiru ut naq tkubʼeeq qahaʼ.
2. Chanru narosobʼtesihebʼ li Jehobʼa laj kʼanjel chiru li ak xeʼkubʼeek xhaʼ?
Naq tkubʼeeq aahaʼ tat-okenq saʼ li xjunkabʼal li Jehobʼa bʼarwiʼ taataw li sahil chʼoolejil. Ut taakʼe reetal ajwiʼ chanru nakatxra ut aʼin tixbʼaanu naq tatjiloq chixkʼatq (yaabʼasi Malaquías 3:16-18). Moko kaʼaj tawiʼ twanq li Jehobʼa joʼ Aayuwaʼ, ebʼ laawech aj paabʼanel ajwiʼ teʼwanq choʼq aawamiiw li nakateʼxra ut nekeʼxra li Jehobʼa (yaabʼasi Marcos 10:29, 30). Abʼanan toj wank kʼaru taabʼaanu naq toj maajiʼ nakubʼeek aahaʼ. Tento taatzol chirix li Jehobʼa, taara ut taapaabʼ li Ralal. Tojaʼ naq taaqʼaxtesi laayuʼam chiru li Jehobʼa. Wi nakaabʼaanu chixjunil aʼin naru nakubʼeek aahaʼ ut naru taataw li junelik yuʼam. Li Santil Hu naxye: Xbʼaan «li kubʼihaʼ kolbʼilex wiʼ laaʼex anaqwan» (1 Pedro 3:21).
QASIKʼAQ XCHAMAL LI NAʼLEBʼ
Qilaq kʼaʼut aajel ru naq taaqʼaxtesi laayuʼam chiru li Jehobʼa ut tkubʼeeq aahaʼ.
3. Chiqajunilo tento tqasikʼ ani tqaloqʼoni ru
Saʼ li najter Israel keʼwank kristiʼaan li keʼxkʼoxla naq naru nekeʼxloqʼoni ru li Jehobʼa ut li bʼalaqʼil yos Baal. Abʼan moko joʼkan ta. Li Jehobʼa kixtaqla li propeet Elías chi xyeebʼal rehebʼ naq moko us ta yookebʼ chi naʼlebʼak. Cheeyaabʼasi 1 Reyes 18:21 ut chexʼaatinaq chirix li patzʼom aʼin:
Kʼaru tento raj teʼxbʼaanu ebʼ laj Israel?
Joʼ keʼxkʼul chaq ebʼ laj Israel, laaʼo ajwiʼ tento tqasikʼ ani tqaloqʼoni ru. Cheeyaabʼasi Lucas 16:13 ut chexʼaatinaq chirix ebʼ li patzʼom aʼin:
Kʼaʼut inkʼaʼ naru naqaloqʼoni ru li Jehobʼa ut xloqʼoninkil ajwiʼ junaq li kristiʼaan malaj kʼaʼaq re ru?
Chanru tooruuq xkʼutbʼesinkil re li Jehobʼa naq kaʼajwiʼ aʼan tqaloqʼoni ru?
4. Kʼoxla joʼkʼihal nakatxra li Jehobʼa
Li Jehobʼa ak kixkʼe qe naabʼal li maatan. Ut laaʼo, kʼaru tooruuq xkʼebʼal re? Cheerilaq li BʼIDEO.
Chanru naxkʼutbʼesi li Jehobʼa naq nakatxra? Cheeyaabʼasi Salmo 104:14, 15 ut 1 Juan 4:9, 10 ut chexʼaatinaq chirix ebʼ li patzʼom aʼin:
Bʼar wank jun rehebʼ li maatan li naxkʼe li Jehobʼa li qʼaxal oxloqʼ chaawu?
Naq nakaakʼoxla aʼin, kʼaru nakaawekʼa chirix li Jehobʼa?
Wi ani naxkʼe qe jun li maatan li nawulak chiqu, naqaj xkʼutbʼesinkil re, naq oxloqʼ chiqu. Cheeyaabʼasi Deuteronomio 16:17 ut chexʼaatinaq chirix ebʼ li patzʼom aʼin:
Naq nakaakʼoxla li naxkʼe aawe li Jehobʼa, peʼyaal naq nakaawaj xkʼebʼal re junaq li maatan? Kʼaru raj taakʼe re?
5. Wi taaqʼaxtesi laayuʼam re, aʼan tatrosobʼtesi
Naabʼalebʼ nekeʼxkʼoxla naq wi teʼnaweʼq ru, chaabʼilaqebʼ xkʼanjel ut wanqebʼ xtumin sahaqebʼ saʼ xchʼool. Abʼan, ma yaal aʼin? Cheerilaq li BʼIDEO ut chexʼaatinaq chirix ebʼ li patzʼom aʼin:
Usta nawulak chaq chiru li bʼolotz-oq malaj li bʼalikʼ, kʼaʼut naq kixkanabʼ?
Aʼan kixqʼaxtesi li xyuʼam chiru li Jehobʼa ut inkʼaʼ chiru li bʼatzʼunk. Ma nakaakʼoxla naq us kixbʼaanu? Kʼaʼut?
Naq toj maajiʼ naʼok joʼ aj paabʼanel laj Pablo us yook chaq chi elk saʼ li xyuʼam. Kitzolok chirix li xchaqʼrabʼ laj Judiiy rikʼin jun li winq nawbʼil ru. Abʼan naq kiʼok joʼ aj paabʼanel kixkanabʼ chixjunil. Ma ra kirekʼa naq kixkanabʼ chixjunil? Cheeyaabʼasi Filipenses 3:8 ut chexʼaatinaq chirix ebʼ li patzʼom aʼin:
Kʼaʼut kixye laj Pablo naq «yal mul» aj chik naril chixjunil li kixbʼaanu chaq?
Kʼaru li osobʼtesihom kixkʼul?
Ma tchaabʼiloʼq laayuʼam wi tatkʼanjelaq chiru li Jehobʼa? Kʼaʼut nakaaye chi joʼkan?
Naq laj Pablo kiʼok joʼ aj paabʼanel naabʼal li osobʼtesihom kixkʼul chiru li xkanabʼ chaq.
WIIBʼ OXIBʼ NEKEʼXYE: «Ninnaw naq aʼin li yaal, abʼan toj maajiʼ nawaj naq tkubʼeeq inhaʼ».
Kʼaru nakaakʼoxla, ma wank tawiʼ rusilal xqʼaxtesinkil laayuʼam re li Jehobʼa? Kʼaʼut?
LI AK XQATZOL
Li qarahom chirix li Jehobʼa narekʼasi li qachʼool chi xqʼaxtesinkil li qayuʼam chiru ut naq tkubʼeeq qahaʼ.
Qajultikaq
Kʼaʼut xkʼulubʼ li Jehobʼa naq tqara chi anchal qachʼool ut tqaloqʼoni ru?
Kʼaru li maatan naxkʼe li Jehobʼa rehebʼ laj kʼanjel chiru li ak kubʼenaqebʼ xhaʼ?
Ma twulaq raj chaawu xqʼaxtesinkil laayuʼam chiru li Jehobʼa?
SIKʼ XKOMON LI NAʼLEBʼ
Kʼe reetal kʼaʼut jun aj bʼichanel ut jun aj bʼatzʼunel keʼxqʼaxtesi li xyuʼam chiru li Jehobʼa.
Tzol xkomon laanaʼlebʼ chirix xqʼaxtesinkil laayuʼam chiru li Jehobʼa.
«Kʼaʼut tento tqaqʼaxtesi li qayuʼam chiru li Jehobʼa?» (Laj Kʼaakʼalehom, 15 re enero 2010)
Kʼe reetal saʼ li bʼideo aʼin chanru naq sahebʼ saʼ xchʼool li nekeʼxqʼaxtesi li xyuʼam chiru li Jehobʼa.
Kʼe reetal kʼaʼut jun li ixq kixtzʼil rix kʼaru wank xwankil saʼ li xyuʼam saʼ li resil xyuʼam «Kʼaru aj e naq wanko arin».
«Li Santil Hu kixjalebʼ xyuʼam» (Laj Kʼaakʼalehom, 1 re noviembre 2012)