Ma naʼalaak saʼ aachʼool xqʼaxtesinkil laayuʼam chiru li Jehobʼa?

1, 2. Kʼaru tento taabʼaanu naq toj maajiʼ nakubʼeek aahaʼ?

SAʼ LI oobʼ chihabʼ li ak xnumeʼk numenaq jun miyon li kristiʼaan xeʼkubʼeek xhaʼ re wank joʼ aj testiiw re li Jehobʼa. Naabʼalebʼ xeʼxtzol li yaal saʼ xkachʼinal joʼ laj Timoteo (2 Tim. 3:​14, 15). Junchʼol chik xeʼxnaw ru li Jehobʼa naq ak ninqebʼ malaj cheekebʼ chik. Wiibʼ oxibʼ chihabʼ rubʼelaj, jun li ixq li naxtzol li Santil Hu rikʼinebʼ laj Testiiw kikubʼeek xhaʼ naq wank 97 chihabʼ re.

² Ma yookat xtzolbʼal li Santil Hu? Malaj laanaʼ laayuwaʼ ebʼ aj Testiiw ut yookebʼ xkʼutbʼal chaawu li yaal? Aʼ yaal li nakʼulmank, maare yookat xkʼoxlankil naq taakubʼeeq aahaʼ. Ut aʼin qʼaxal chaabʼil! Abʼan wank tento taabʼaanu naq toj maajiʼ nakubʼeek aahaʼ ut aʼan xqʼaxtesinkil laayuʼam chiru li Jehobʼa. Li tzolom aʼin tixchʼolobʼ kʼaru naraj xyeebʼal xqʼaxtesinkil laayuʼam chiru li Yos. T-aatinaq ajwiʼ chirix kʼaʼut inkʼaʼ tatxiwaq re xqʼaxtesinkil laayuʼam chiru li Yos ut naq taakubʼeeq aahaʼ wi ak kawresinbʼilat.

KʼARU NARAJ XYEEBʼAL XQʼAXTESINKIL LAAYUʼAM CHIRU LI YOS?

3. Ye resil wiibʼ oxibʼ li kristiʼaan li qʼaxtesinbʼilebʼ chiru li Yos saʼ najter qʼe kutan.

³ Saʼ li Santil Hu, li naxqʼaxtesi li xyuʼam chiru li Jehobʼa nasikʼeʼk ru re xbʼaanunkil jun li loqʼlaj kʼanjel. Li tenamit Israel qʼaxtesinbʼil chiru li Jehobʼa. Abʼan wiibʼ oxibʼ aj Israel qʼaxtesinbʼilebʼ re jun li kʼanjel li jwal oxloqʼ. Jun eetalil, li Jehobʼa kixsikʼ laj Aarón re naq twanq joʼ xyuwaʼil aj tij. Joʼkan naq chiru li xpeekem naxkʼam li perpokil chʼiichʼ re oor, aʼ «li loqʼlaj reetalil li xkʼanjel» (Lev. 8:9). Ebʼ laj nazareo qʼaxtesinbʼilebʼ ajwiʼ chiru li Jehobʼa. Li aatin nazareo li chalenaq saʼ li aatin nazír saʼ hebreo, naraj xyeebʼal «qʼaxtesinbʼil». Li Xchaqʼrabʼ laj Moisés naxye naq tento teʼxyuʼami wiibʼ oxibʼ li naʼlebʼ (Núm. 6:​2-8).

4. a) Kʼaru naraj xyeebʼal choʼq qe xqʼaxtesinkil li qayuʼam chiru li Jehobʼa? b) Kʼaru naraj xyeebʼal naq inkʼaʼ chik toowanq joʼ naqaj? (Chaawil li jalam u).

⁴ Choʼq qe, xqʼaxtesinkil li qayuʼam naraj xyeebʼal xsikʼbʼal wank joʼ xtzolom li Jesús ut xkʼebʼal xbʼeenwa saʼ li qayuʼam li rajom li Yos. Ut aʼin kʼaru naraj xyeebʼal? Li Jesús kixye: «Li naraj wank choʼq intzolom, inkʼaʼ chik twanq joʼ naraj aʼan» (Mat. 16:24). Li aatin saʼ griego «inkʼaʼ chik twanq joʼ naraj aʼan» natawmank ajwiʼ ru joʼ «inkʼaʼ chik yoʼyo re xbʼaanunkil li naraj». Naq taaqʼaxtesi laayuʼam chiru li Jehobʼa tento taatzʼeqtaana chixjunil li xikʼ naril li Yos (2 Cor. 5:​14, 15). Saʼ xyanq aʼin wank xtzʼeqtaanankil li naraj li tibʼelej joʼ li muxuk ibʼ (Gál. 5:​19-21; 1 Cor. 6:18). Ma aal tawiʼ xbʼaanunkil? Inkʼaʼ, wi nakaara li Jehobʼa ut chʼolchʼo chaawu naq li xnaʼlebʼ aʼan li us choʼq aawe (Sal. 119:97; Is. 48:​17, 18). Laj Nicholas jun li hermaan naxye: «Naru taawil li xnaʼlebʼ li Jehobʼa joʼ li xchʼiichʼul jun li tzʼalam, li inkʼaʼ nakatxkanabʼ xbʼaanunkil li nakaawaj malaj joʼ xchʼiichʼul li xnaʼaj ebʼ li xul, li nakatxkol chiruhebʼ li kaqkoj».

5. a) Chanru naq junaq naxqʼaxtesi li xyuʼam chiru li Jehobʼa? b) Kʼaru xjalanil xqʼaxtesinkil laayuʼam chiru li Jehobʼa ut naq taakubʼeeq aahaʼ? (Chaawil ebʼ li jalam u).

⁵ Chanru naq junaq naxqʼaxtesi li xyuʼam chiru li Jehobʼa? Naq naxbʼaanu jun li tij bʼarwiʼ naxyeechiʼi naq kaʼajwiʼ aʼan tixloqʼoni ru ut naq li qʼaxal wank xwankil saʼ li xyuʼam aʼan xbʼaanunkil li rajom. Yook xyeechiʼinkil re li Jehobʼa naq junelik tixra chi anchal xchʼool, chi anchal xyuʼam, chi anchal xkʼaʼuxl ut chi anchal xmetzʼew (Mar. 12:30). Aʼin nabʼaanumank saʼ junesal, kaʼajwiʼ laaʼat ut li Jehobʼa nanawok re. Abʼan li subʼeʼk saʼ haʼ nabʼaanumank chiru naabʼalebʼ li kristiʼaan, re naq teʼxnaw naq laaʼat ak xaaqʼaxtesi laayuʼam chiru li Jehobʼa. Xyeechiʼinkil li qayuʼam chiru li Jehobʼa jwal wank xwankil. Chʼolchʼo naq nakaawaj xbʼaanunkil li xaayeechiʼi ut aʼan ajwiʼ naroybʼeni li Jehobʼa naq taabʼaanu (Ecl. 5:​4, 5).

KʼARU T-EKʼASINQ AAWE RE XQʼAXTESINKIL LAAYUʼAM?

6. Kʼaru naʼekʼasink re junaq re naq tixqʼaxtesi li xyuʼam chiru li Jehobʼa?

⁶ Laarahom chirix li Jehobʼa aʼan li qʼaxal t-ekʼasinq aawe re xqʼaxtesinkil laayuʼam chiru. Li rahok aʼin moko yal numel ta, yook bʼan chi kʼiik naq xaatzol chirix li Jehobʼa ut xaataw «li nawom» li tzʼaqal re ru ut «li tzʼaqal naʼlebʼ» (Col. 1:9). Naq xaatzol li Santil Hu xchʼolaak chaawu naq 1) li Jehobʼa yoʼyo, 2) kixmusiqʼa li Santil Hu ut 3) wank jun li xmolam ut naroksi re xbʼaanunkil li rajom.

7. Kʼaru tento tixbʼaanu junaq li tixqʼaxtesi li xyuʼam chiru li Jehobʼa?

⁷ Wi junaq tixqʼaxtesi li xyuʼam chiru li Jehobʼa, tento naq ak tixnaw li naʼlebʼ li wank saʼ li Santil Hu, naq yooq xyuʼaminkil li xnaʼlebʼ li Yos ut naq yooq chi aatinak rikʼinebʼ li junchʼol chirix li xpaabʼal aʼ yaal chanru tixkʼe ribʼ chiru (Mat. 28:​19, 20). Joʼkan ajwiʼ, qʼaxal naxra li Jehobʼa ut naraj chi anchal xchʼool xloqʼoninkil ru. Ma naru nayeemank aʼin chaawix? Wi nakaara li Jehobʼa rikʼin chixjunil laametzʼew, moko taakʼoxla ta xqʼaxtesinkil laayuʼam chiru li Yos ut naq taakubʼeeq aahaʼ kaʼajwiʼ re xsahobʼresinkil xchʼool li naxkʼe aatzolom. Ut wi toj saajat moko taabʼaanu ta aʼin xbʼaan naq nakaawaj xsahobʼresinkil xchʼool laanaʼ laayuwaʼ malaj xbʼaan naq ebʼ laawamiiw yookebʼ ajwiʼ chi kubʼeek xhaʼ.

8. Kʼaru xjuntaqʼeetalil wank li bʼanyoxink rikʼin xqʼaxtesinkil laayuʼam? (Salmo 116:​12-14).

⁸ Wi nakaakʼoxla chixjunil li ak xbʼaanu li Jehobʼa chaawix, li bʼanyoxink t-ekʼasinq aawe re xqʼaxtesinkil laayuʼam chiru (yaabʼasi Salmo 116:​12-14). Li Santil Hu naxye naq «chixjunil li chaabʼil maatan ut chixjunil li maatan li tzʼaqal re ru» nachalk rikʼin li Jehobʼa (Sant. 1:17). Li maatan li qʼaxal loqʼ li xkʼe qe aʼan li xyuʼam li Ralal, aʼ li Jesús. Xbʼaan aʼin nakatruuk wank choʼq ramiiw li Yos ut wank chi junelik (1 Juan 4:​9, 10, 19). Jun li naʼlebʼ re xbʼanyoxinkil li xrahom ut chixjunil li xbʼaanu chaawix aʼan xqʼaxtesinkil laayuʼam chiru (Deut. 16:17; 2 Cor. 5:15). Chirix aʼin naʼaatinak li tasal hu Sahaq laachʼool!, saʼ li tzolom 46, naʼlebʼ 4, bʼarwiʼ natawmank ajwiʼ jun li bʼideo re oxibʼ kʼasal li naxkʼabʼaʼi Kʼaru li maatan tooruuq xkʼebʼal re li Jehobʼa?

MA KAWRESINBʼILAT RE XQʼAXTESINKIL LAAYUʼAM UT NAQ TAAKUBʼEEQ AAHAʼ?

9. Kʼaʼut naq maaʼani trekʼa naq minbʼil ru re xqʼaxtesinkil li xyuʼam chiru li Jehobʼa?

⁹ Maare nakaakʼoxla naq toj maajiʼ kawresinbʼilat re xqʼaxtesinkil laayuʼam chiru li Yos ut naq taakubʼeeq aahaʼ. Maare toj taajal wiibʼ oxibʼ li naʼlebʼ saʼ laayuʼam re abʼink chiru li Jehobʼa malaj toj naʼajmank xkawubʼresinkil laapaabʼal (Col. 2:​6, 7). Jultika naq moko chixjunilebʼ ta juntaqʼeet nekeʼkʼiik saʼ li xpaabʼal. Ut moko chixjunilebʼ ta li saaj kawresinbʼilebʼ re xqʼaxtesinkil li xyuʼam chiru li Yos ut naq teʼkubʼeeq xhaʼ. Joʼkan naq, kʼe reetal chanru wank laawanjik ut maajuntaqʼeeta aawibʼ rikʼinebʼ li junchʼol (Gál. 6:​4, 5).

10. Kʼaru tatruuq xbʼaanunkil wi nakaakʼe reetal naq toj maajiʼ kawresinbʼilat re xqʼaxtesinkil laayuʼam chiru li Yos ut naq taakubʼeeq aahaʼ? (Chaawil li kaaxukuut «Wi laanaʼ laayuwaʼ ebʼ aj Testiiw»).

¹⁰ Wi nakaakʼe reetal naq toj maajiʼ kawresinbʼilat re xqʼaxtesinkil laayuʼam chiru li Yos, maakanabʼ xkʼebʼal aaqʼe re xtawbʼal li nakaawaj. Tzʼaama re li Jehobʼa naq tatxtenqʼa re xjalbʼal li naʼlebʼ li naʼajmank (Filip. 2:13; 3:16). Chʼolchʼooq chaawu naq aʼan trabʼi laatij ut tixsume (1 Juan 5:14).

KʼAʼUT WIIBʼ OXIBʼ TOJ MAAJIʼ NEKEʼRAJ XBʼAANUNKIL

11. Kʼaru tixbʼaanu li Jehobʼa re qatenqʼankil re naq toowanq chi tiik ru qachʼool chiru?

¹¹ Wiibʼ oxibʼ ak kawresinbʼilebʼ re xqʼaxtesinkil li xyuʼam chiru li Yos ut naq teʼkubʼeeq xhaʼ abʼan toj maajiʼ nekeʼraj xbʼaanunkil. Maare nekeʼxiwak xbʼaanunkil jun li nimla maak ut naq teʼisiiq saʼ li chʼuut. Abʼan li Santil Hu naxye naq li Jehobʼa tixkʼe rehebʼ laj kʼanjel chiru chixjunil li naʼajmank re naq li teʼxbʼaanu tixkʼe xloqʼal «ut chi joʼkan sahaq xchʼool» rikʼinebʼ (Col. 1:10). Joʼkan naq, chʼolchʼooq chaawu naq li Jehobʼa tixkʼe aawe li metzʼew li naʼajmank re xbʼaanunkil li us. Aʼan ak xbʼaanu aʼin rikʼin naabʼalebʼ (1 Cor. 10:13). Aʼin jun xyaalal kʼaʼut moko kʼihebʼ ta nekeʼisiik saʼ li chʼuut. Rikʼin xtenqʼ li Jehobʼa tooruuq wank chi tiik ru qachʼool chiru.

12. Kʼaru tooxtenqʼa re naq inkʼaʼ tqabʼaanu jun li nimla maak?

¹² Xbʼaan naq laaʼo aj maak, ak re naq wank sut nachalk saʼ qachʼool xbʼaanunkil li inkʼaʼ us (Sant. 1:14). Abʼan, naq nakʼulmank aʼin moko naraj ta xyeebʼal naq tootʼaneʼq chisaʼ, laaʼo yal qe li tqabʼaanu ut li inkʼaʼ tqabʼaanu. Usta wiibʼ oxibʼ li kristiʼaan nekeʼxye naq inkʼaʼ nokooruuk xkuybʼal qibʼ, aʼin moko yaal ta. Naru naqatzol xkuybʼal li naqekʼa ut li naqabʼaanu. Wank naabʼal li naʼlebʼ li truuq qatenqʼankil: tijok chiru li Jehobʼa wulaj wulaj, tzolok saʼ junesal, xik saʼebʼ li chʼutam ut puktesink. Wi junelik naqabʼaanu aʼin, wanq qametzʼew re xbʼaanunkil li xqayeechiʼi naq xqaqʼaxtesi li qayuʼam chiru li Yos. Misach saʼ qachʼool naq moko wanko ta qajunes, li Jehobʼa wank qikʼin (Gál. 5:16).

13. Kʼaru chaabʼil eetalil kixkanabʼ qe laj José?

¹³ Moko tchʼaʼajkoʼq ta chiqu wank chi tiik ru qachʼool chiru li Jehobʼa wi ak xqakʼoxla rubʼelaj kʼaru xbʼaanunkil chiru jun li aaleek. Saʼ li Santil Hu naqataw resil xyuʼamebʼ li kristiʼaan li joʼkan xeʼnaʼlebʼak ut aʼanebʼ aj maak joʼ laaʼo. Qakʼoxlaq li xʼeetalil laj José. Li rixaqil laj Potifar rajlal sut kixpatzʼ re naq tyoklaaq rikʼin. Aʼan chʼolchʼo chiru li tixsume. Li Santil Hu naxye naq «inkʼaʼ kiraj» ut kixye re: «Chan put ru naq tinbʼaanu li nimla maaʼusilal aʼin ut tinmaakobʼq chiru li Yos?» (Gén. 39:​8-10). Chixjunil aʼin naxkʼutbʼesi naq laj José ak naxnaw kʼaru tixbʼaanu usta toj maajiʼ naʼaaleek xbʼaan li rixaqil laj Potifar. Joʼkan naq, naq kikʼulmank aʼin moko kichʼaʼajkoʼk ta chiru xqʼaxbʼal li aaleek.

14. Chanru tqatzol xtzʼeqtaanankil chixjunil li xikʼ naril li Jehobʼa?

¹⁴ Chanru tooruuq xkʼambʼal qe rikʼin laj José ut naq chʼolchʼooq chiqu naq junelik tiikaq qachʼool? Xkʼoxlankil chalen anaqwan chanru toonaʼlebʼaq naq tqataw junaq li aaleek. Tento tqatzol xtzʼeqtaanankil saʼ junpaat li xikʼ naril li Jehobʼa, chi inkʼaʼ ta tqakʼoxla bʼayaq (Sal. 97:10; 119:165). Aʼin tooxtenqʼa re naq inkʼaʼ tqabʼaanu junaq li nimla maak. Naq tqataw junaq li aaleek, ak tqanaw kʼaru xbʼaanunkil, chʼolchʼooq chiqu chanru toonaʼlebʼaq.

15. Chanru tatruuq xkʼutbʼesinkil naq laaʼat jun rehebʼ «li nekeʼxkʼe xchʼool chi xloqʼoninkil ru» li Jehobʼa? (Hebreos 11:6).

¹⁵ Maare nakaanaw naq xaataw li yaal ut nakaawaj kʼanjelak chiru li Jehobʼa chi anchal aachʼool. Abʼan, ma wank junaq li naʼlebʼ li naxram chaawu xqʼaxtesinkil laayuʼam chiru li Yos ut naq taakubʼeeq aahaʼ? Naru taabʼaanu li kixbʼaanu li awabʼej David ut xtzʼaamankil re li Jehobʼa: «At Qaawaʼ, chatzʼili wix ut chawil chanru linchʼool; chayal wix re xnawbʼal chixjunil li naweekʼa. Chakʼe reetal, mare anchal xinkanabʼ li chaabʼil bʼe; chinaabʼeres taxaq saʼ li junelik yuʼam» (Sal. 139:​23, 24). Naq nakaakʼe aaqʼe chi xqʼaxtesinkil laayuʼam chiru li Yos ut naq taakubʼeeq aahaʼ yookat xkʼutbʼesinkil naq chi anchal aachʼool nakaasikʼ li Jehobʼa. Ut li Santil Hu naxye naq aʼan narosobʼtesi li nekeʼbʼaanunk re aʼin (yaabʼasi Hebreos 11:6).

MAAKANABʼ JILOK CHIXKʼATQ LI JEHOBʼA

16, 17. Chanru naxkʼam chaq li Jehobʼa saʼ li chʼuut li ralal xkʼajol ebʼ laj Testiiw? (Juan 6:44).

¹⁶ Li Jesús kixye naq li Jehobʼa naxkʼam chaq ebʼ li kristiʼaan saʼ li xtenamit (yaabʼasi Juan 6:44). Qʼaxal chʼinaʼus aʼin! Ma ak xaakʼoxla kʼaru naraj xyeebʼal aʼin? Li Jehobʼa naril li xchaabʼil naʼlebʼ li junjunq chi kristiʼaan li naxkʼam chaq saʼ li xtenamit. Choʼq re, jwal wank xwankil li junjunq aj kʼanjel chiru (Deut. 7:6). Ut saʼ xyanq aʼin wankat laaʼat.

¹⁷ At saaj, wi laanaʼ laayuwaʼ yookebʼ xkʼutbʼal chaawu li yaal maare taawekʼa naq wankat saʼ li chʼuut moko xbʼaan ta naq li Jehobʼa xkʼamok chaq aawe, xbʼaan naq laanaʼ laayuwaʼ nekeʼkʼamok aawe. Abʼan kʼe reetal li naxye li Santil Hu: «Jilonqex chixkʼatq li Yos ut aʼan tjiloq cheekʼatq» (Sant. 4:8; 1 Crón. 28:9). Aʼin naraj xyeebʼal naq wi laaʼat xbʼeenwa nakatjilok rikʼin, aʼan tjiloq aawikʼin. Li Jehobʼa moko naxkʼoxla ta naq laaʼat yal junat chik saʼ xyanqebʼ li junchʼol. Chixjunilebʼ li wankebʼ saʼ li chʼuut wankebʼ aran xbʼaan naq li Jehobʼa kixkʼamebʼ chaq chi junjunqal. Saʼ xyanqebʼ wank ebʼ li ralal xkʼajol ebʼ laj Testiiw. Naq junaq najilok chixkʼatq li Jehobʼa aʼan ajwiʼ najilok chixkʼatq joʼ naxye Santiago 4:8 (juntaqʼeeta li naʼlebʼ aʼin rikʼin 2 Tesalonicenses 2:13).

18. Kʼaru tqil saʼ li jun chik tzolom? (Salmo 40:9).

¹⁸ Naq li Jesús kikubʼeek xhaʼ, chi anchal xchʼool kixkʼe ribʼ chiru li Xyuwaʼ re xbʼaanunkil chixjunil li tpatzʼeʼq re (yaabʼasi Salmo 40:9; Heb. 10:7). Naq taaqʼaxtesi laayuʼam chiru li Jehobʼa ut taakubʼeeq aahaʼ, yooqat xkʼambʼal aawe rikʼin li Jesús. Li jun chik tzolom tatxtenqʼa re naq tatkʼanjelaq chiru li Jehobʼa chi tiik ru aachʼool naq ak xkubʼeek aahaʼ.