Maakanabʼ xtaqenkil li Jesús naq ak xkubʼeek aahaʼ

1, 2. Chanru nachaabʼiloʼk xyuʼam junaq naq nakubʼeek xhaʼ?

NAQ junaq nakubʼeek xhaʼ, naʼokenk saʼ li xjunkabʼal li Jehobʼa. Sahil chʼoolejil aʼin! Li nekeʼwank saʼ tzʼaqal amiiwil rikʼin li Jehobʼa nekeʼxye joʼ laj David: «Us xaq re li sikʼbʼil ru aabʼaan [Jehobʼa], aʼ li nakakʼam aawikʼin re taawanq saʼ laamuhebʼaal» (Sal. 65:5).

² Abʼanan, li Jehobʼa moko naxkanabʼ ta naq yalaq ani t-oq saʼ li xmuhebʼaal. Joʼ xqil saʼ li tzolom rubʼelaj, aʼan najilok chixkʼatq li nekeʼxkʼutbʼesi naq nekeʼraj wank choʼq ramiiw (Sant. 4:8). Naq nekeʼxqʼaxtesi li xyuʼam chiru li Jehobʼa ut nekeʼkubʼeek xhaʼ, nekeʼwank saʼ tzʼaqal amiiwil rikʼin. Li Jehobʼa naxyeechiʼi rehebʼ: Teekʼe reetal naq naabʼal li osobʼtesihom tinkʼe eere ut maakʼaʼ tpaltoʼq eere (Mal. 3:10; Jer. 17:​7, 8).

3. Kʼaru li kʼanjel tenebʼanbʼil saʼ qabʼeen chiqajunilo li ak xqaqʼaxtesi li qayuʼam chiru li Yos ut xkubʼeek qahaʼ? (Eclesiastés 5:​4, 5).

³ Naq taakubʼeeq aahaʼ, aʼan xtiklajik laakʼanjel chiru li Jehobʼa. Chiqajunilo joʼ aj paabʼanel tenebʼanbʼil saʼ qabʼeen xbʼaanunkil li xqayeechiʼi usta tqanumsi ebʼ li chʼaʼajkilal ut tyaleʼq rix li qapaabʼal (yaabʼasi Eclesiastés 5:​4, 5). Joʼkan ajwiʼ, tento naq junelik tqakʼam qe rikʼin li Jesús ut li xtaql (Mat. 28:​19, 20; 1 Ped. 2:21). Li tzolom aʼin tooxtenqʼa re xbʼaanunkil.

JUNELIK TAQE LI JESÚS USTA WANK LI CHʼAʼAJKILAL UT LI AALEEK

4. Kʼaru naraj xyeebʼal naq joʼ xtzolom li Jesús tento tqakʼulubʼa li rahobʼtesiik? (Lucas 9:23).

⁴ Maakʼoxla naq maakʼaʼ li chʼaʼajkilal taataw saʼ xkʼabʼaʼ naq ak xkubʼeek aahaʼ. Li Jesús kixye bʼan naq li junjunq chi xtzolom «tento tixkʼulubʼa li rahobʼtesiik» (yaabʼasi Lucas 9:23). Ma kiraj xyeebʼal li Jesús naq li nekeʼtaqenk re junelik teʼrahobʼtesiiq? Inkʼaʼ. Li kiraj xyeebʼal aʼan naq us ta teʼxkʼul ebʼ li osobʼtesihom, teʼxkʼul ajwiʼ naabʼal li chʼaʼajkilal, wiibʼ oxibʼ rehebʼ qʼaxal ra xnumsinkil (2 Tim. 3:12).

5. Kʼaru ebʼ li osobʼtesihom kixyeechiʼi li Jesús rehebʼ li wank nekeʼxkanabʼ xbʼaan li Awabʼejilal?

⁵ Maare ak xikʼ xat-ileʼk xbʼaan jun rehebʼ laakomon malaj tento xaakanabʼ laajunkabʼlal xbʼaan naq xaakʼe li Xʼawabʼejilal li Yos chiʼubʼej (Mat. 6:33). Wi joʼkan, chʼolchʼooq chaawu naq li Jehobʼa naxnaw chixjunil li xaabʼaanu saʼ xkʼabʼaʼ (Heb. 6:10). Maare ak xaakʼe reetal naq tzʼaqal yaal li aatin li kixye li Jesús: «Li kixkanabʼ rochoch, ras ut riitzʼin, ranabʼ, xnaʼ, xyuwaʼ, ralal xkʼajol malaj xchʼochʼ saʼ inkʼabʼaʼ ut saʼ xkʼabʼaʼ li chaabʼil esil tixkʼul anaqwan, saʼebʼ li kutan aʼin, jun siʼeent sut chik saʼ xbʼeen chiru li kixkanabʼ chaq: rochoch, ras ut riitzʼin, ranabʼ, xnaʼ, ralal xkʼajol ut xchʼochʼ usta yooq li rahobʼtesiik, ut saʼ li kutan li yook chi chalk tixkʼul li junelik yuʼam» (Mar. 10:​29, 30). Chʼolchʼo naq chixjunil li ak xaakanabʼ bʼabʼay chiru chixjunil li osobʼtesihom li yookat xkʼulbʼal (Sal. 37:4).

6. Kʼaʼut junelik taayal aaqʼe rikʼin «li naxrahi ru li tibʼelej» naq ak xkubʼeek aahaʼ?

⁶ Naq ak xkubʼeek aahaʼ, junelik taayal aaqʼe rikʼin «li naxrahi ru li tibʼelej» (1 Juan 2:16). Xbʼaan naq moko tzʼaqal ta re ru laayuʼam. Maare wank sut nakaawekʼa aawibʼ joʼ laj Pablo naq kixye: «Relik chi yaal naq linchʼool nawulak chiru li xchaqʼrabʼ li Yos. Abʼan saʼ lintibʼel nawil jun chik li chaqʼrabʼ li nayalok rikʼin li xchaqʼrabʼ linkʼaʼuxl ut nikinxkʼe rubʼel xwankil li xchaqʼrabʼ li maak li wank saʼ lintibʼel» (Rom. 7:​22, 23). Maare nachʼinaak aachʼool xbʼaan naq inkʼaʼ nakatruuk xkanabʼankil li yibʼru aj naʼlebʼ. Abʼan xnaʼlebʼankil rix li xaayeechiʼi re li Jehobʼa naq xaaqʼaxtesi laayuʼam chiru tixkʼe aametzʼew re xnumsinkil ebʼ li aaleek. Li xaayeechiʼi re, naq xaaqʼaxtesi laayuʼam chiru tixbʼaanu naq inkʼaʼ tchʼaʼajkoʼq chaawu xnumsinkil junaq li aaleek. Kʼaʼut naqaye aʼin?

7. Kʼaʼut tooxtenqʼa wank saʼ tiikilal naq ak qʼaxtesinbʼil chik li qayuʼam chiru li Jehobʼa?

⁷ Naq junaq naxqʼaxtesi li xyuʼam chiru li Jehobʼa inkʼaʼ chik nawank re xbʼaanunkil li naraj. Aʼin naraj xyeebʼal naq tento tixtzʼeqtaana chixjunil li inkʼaʼ nawulak chiru li Jehobʼa (Mat. 16:24). Joʼkan naq, naq naqanumsi junaq li aaleek, moko tento ta tqakʼoxla kʼaru tqabʼaanu. Choʼq qe, jun ajwiʼ li naʼlebʼ tqabʼaanu: tiikaq qachʼool chiru li Jehobʼa. Chʼolchʼo chiqu naq naqaj xsahobʼresinkil xchʼool. Naq xqaqʼaxtesi li qayuʼam chiru li Jehobʼa, xqatzʼeqtaana li junchʼol chik chi naʼlebʼ. Tqakʼam qe rikʼin laj Job, usta kixnumsi naabʼal li chʼaʼajkilal kixye chi anchal xchʼool: «Usta tinkamq maajunwa tintzʼeqtaana li Jehobʼa» (Job 27:​5, TNM).

8. Kʼaʼut xnaʼlebʼankil rix li xqayeechiʼi re li Jehobʼa tooxtenqʼa chi xtzʼeqtaanankil ebʼ li aaleek?

⁸ Xnaʼlebʼankil naq xqayeechiʼi re li Jehobʼa naq tqabʼaanu li rajom tixkʼe qametzʼew re xtzʼeqtaanankil yalaq kʼaru li aaleek. Jun eetalil, ma tqabʼitʼbʼitʼi qibʼ rikʼin anihaq li ak sumsu? Chʼolchʼo naq inkʼaʼ! Naq xqaqʼaxtesi li qayuʼam chiru li Jehobʼa xqaye naq maajoqʼe tqabʼaanu aʼin. Saʼ xkʼabʼaʼ naq saʼ xtiklajik inkʼaʼ xqakanabʼ naq li yibʼru aj naʼlebʼ txeʼinq saʼ qachʼool, inkʼaʼ tchʼaʼajkoʼq chiqu xtzʼeqtaanankil moqon. Tqanajtobʼresi qibʼ chi junajwa rikʼin «li inkʼaʼ usebʼ xnaʼlebʼ» (Prov. 4:​14, 15).

9. Kʼaʼut xnaʼlebʼankil rix li xqayeechiʼi re li Jehobʼa tooxtenqʼa chi xkʼebʼal chiʼubʼej li qakʼanjel chiru li Yos?

⁹ Ut wi teʼxyeechiʼi qe junaq li kʼanjel li tixram chiqu wulak saʼ chixjunil ebʼ li chʼutam? Chʼolchʼo chiqu li tqabʼaanu. Naq toj maajiʼ xeʼxyeechiʼi qe li kʼanjel ak chʼolchʼo chiqu naq inkʼaʼ tqakʼulubʼa. Joʼkan naq inkʼaʼ tqakʼulubʼa li kʼanjel ut moqon yooqo xsikʼbʼal chanru tqakʼe li Jehobʼa chiʼubʼej saʼ li qayuʼam. Li xʼeetalil li Jesús naru tooxtenqʼa. Joʼ chanru chʼolchʼo chiru li Jesús naq naraj xsahobʼresinkil xchʼool li Xyuwaʼ laaʼo ajwiʼ tqatzʼeqtaana saʼ junpaat ut chi chʼolchʼo ru chixjunil li xikʼ naril li Yos (Mat. 4:10; Juan 8:29).

10. Chanru tooxtenqʼa li Jehobʼa re naq junelik tqataqe li Jesús naq ak xkubʼeek qahaʼ?

¹⁰ Ebʼ li chʼaʼajkilal ut ebʼ li aaleek naxkanabʼ naq tqakʼutbʼesi naq naqaj xtaqenkil li Jesús. Ut naqanaw naq li Jehobʼa tooxtenqʼa re xbʼaanunkil aʼin xbʼaan naq li Santil Hu naxye: «Li Yos naxbʼaanu li naxye ut inkʼaʼ tixkanabʼ naq texʼaaleeq wi inkʼaʼ texruuq xkuybʼal. Ut naq texʼaaleeq, li Yos tixsikʼ xyaalal re naq texruuq xkuybʼal» (1 Cor. 10:13).

KʼARU TATRUUQ XBʼAANUNKIL RE XTAQENKIL JUNELIK LI JESÚS

11. Kʼaru ebʼ li naʼlebʼ tatruuq xbʼaanunkil re naq junelik taataqe li Jesús? (Chaawil ebʼ li jalam u).

¹¹ Li Jesús kikʼanjelak chi anchal xchʼool chiru li Jehobʼa ut saʼ xkʼabʼaʼ li tij nachʼ kiwank rikʼin (Luc. 6:12). Jun rehebʼ li naʼlebʼ li qʼaxal chaabʼil re xtaqenkil junelik li Jesús naq ak xkubʼeek aahaʼ aʼan naq junelik taabʼaanu wiibʼ oxibʼ li naʼlebʼ li tatxjilosi chixkʼatq li Jehobʼa. Li Santil Hu naxye: «Maakʼaʼ naxye joʼnimal ak xookʼiik saʼ xkʼanjel li Yos, inkʼaʼ tqakanabʼ wank chiʼus saʼ li bʼe aʼin» (Filip. 3:16). Wank sut taawabʼi resil ebʼ li hermaan li xeʼxkʼe xkomon saʼ li xkʼanjel chiru li Jehobʼa. Maare xkohebʼ saʼ li Tzolok chirix li Xʼawabʼejilal li Yos malaj xeʼqʼaxonk saʼ junaq li naʼaj bʼarwiʼ naʼajmank li tenqʼ re puktesink. Ma naxkʼe ribʼ chaawu xbʼaanunkil aʼin? Wi joʼkan, bʼaanu! Ebʼ laj kʼanjel chiru li Jehobʼa junelik nekeʼxsikʼ chanru xkʼebʼal xtzʼaqobʼ li xkʼanjel (Hech. 16:9). Abʼan, ut wi saʼ xkʼabʼaʼ laawanjik inkʼaʼ nakatruuk xbʼaanunkil? Maakʼoxla naq maakʼaʼ nakat-ok wiʼ chiruhebʼ li nekeʼruuk xbʼaanunkil. Li jwal wank xwankil saʼ li qakʼanjel chiru li Yos aʼan li kuyuk (Mat. 10:22). Misach saʼ aachʼool naq li Jehobʼa nasahoʼk xchʼool naq nakaakʼe li qʼaxal chaabʼil aʼ yaal laawanjik ut laaseebʼal. Chi joʼkan junelik tatruuq xtaqenkil li Jesús naq ak xkubʼeek aahaʼ (Sal. 26:1).

12, 13. Kʼaru tatruuq xbʼaanunkil wi nakaakʼe reetal naq moko sa ta chik aachʼool chi kʼanjelak chiru li Jehobʼa? (1 Corintios 9:​16, 17; chaawil li kaaxukuut «Kʼaru tatruuq xbʼaanunkil re naq inkʼaʼ taakanabʼ aanilak»).

¹² Ut wi nakaakʼe reetal naq juntaqʼeet ebʼ laatij malaj juntaqʼeet li kʼaynaqat xbʼaanunkil ut inkʼaʼ chik nakaayal xsahil li puktesink ut rilbʼal li Santil Hu joʼ junxil? Wi nakaakʼul aʼin naq ak xkubʼeek aahaʼ, maakʼoxla naq moko wank ta chik aawikʼin li xsantil musiqʼej li Jehobʼa. Saʼ xkʼabʼaʼ naq laaʼo aj maak, ak re naq wank sut nachʼinaak qachʼool. Wi nakaakʼe reetal naq moko sa ta chik aachʼool chi kʼanjelak chiru li Jehobʼa, naʼlebʼa rix li xʼeetalil li apóstol Pablo. Usta naxkʼe xqʼe re xkʼambʼal re rikʼin li Jesús, naxnaw naq wank sut tchʼaʼajkoʼq chiru xbʼaanunkil li us (yaabʼasi 1 Corintios 9:​16, 17). Kixye: «Usta inkʼaʼ nawaj xbʼaanunkil, aʼin jun li kʼanjel li ak xtenebʼaak saʼ inbʼeen». Ebʼ li aatin aʼin naxkʼutbʼesi naq chʼolchʼo chiru laj Pablo naq tixbʼaanu li xkʼanjel aʼ yaal chanru narekʼa ribʼ saʼebʼ li hoonal aʼan.

¹³ Joʼkan ajwiʼ, maakanabʼ naq li nakaawekʼa tixbʼeresi li nakaasikʼ xbʼaanunkil. Junelik bʼan chʼolchʼooq chaawu naq taabʼaanu li us usta moko aʼan ta li nakaawaj xbʼaanunkil. Timil timil laabʼaanuhom t-okenq chirix li nakaawekʼa. Wi ak xaqabʼanbʼil li taabʼaanu saʼ xkʼanjel li Yos, junelik tatruuq xtaqenkil li Jesús naq ak xkubʼeek aahaʼ. Naq ebʼ li hermaan nekeʼxkʼe reetal naq junelik nakatkʼanjelak chiru li Jehobʼa nekeʼwaklesiik xchʼool (1 Tes. 5:11).

«MEEKANABʼ XTZʼILBʼAL RIX LEEYUʼAM»

14. Kʼaru us taatzʼil rix joqʼeqil ut kʼaʼut? (2 Corintios 13:5).

¹⁴ Naq ak xkubʼeek aahaʼ, aajel ru naq taatzʼil rix laayuʼam ut li kʼaynaqat xbʼaanunkil (yaabʼasi 2 Corintios 13:5). Jun eetalil, kʼe reetal wi yookat chi tijok rajlal kutan, nakaawil ut nakaatzol li Santil Hu, nakatxik saʼebʼ li chʼutam ut nakatpuktesink. Sikʼ chanru xtawbʼal rusilal ebʼ li naʼlebʼ aʼin ut xyalbʼal xsahil. Kʼoxla aʼin: «Ma ninruuk xchʼolobʼankil li naxye li Santil Hu? Ma wank kʼaru tinbʼaanu re xyalbʼal xsahil linkʼanjel chiru li Yos? Ma chʼolchʼo ru li ninye saʼebʼ lintij ut naxkʼutbʼesi naq ninkʼojobʼ inchʼool rikʼin li Jehobʼa? Ma ninkʼe inchʼool re wulak saʼ chixjunil ebʼ li chʼutam? Kʼaru tinruuq xbʼaanunkil re xtawbʼal rusilal ebʼ li chʼutam ut re naq chaabʼil tinsumenq?».

15, 16. Kʼaru naxkʼut chaawu li kixkʼul laj Robert?

¹⁵ Us ajwiʼ naq taatzʼil rix bʼar wank li naʼlebʼ li nachʼaʼajkoʼk chaawu. Qilaq jun eetalil li naxkʼutbʼesi naq wank xwankil xbʼaanunkil aʼin. Laj Robert jun hermaan naxye: «Naq wank tana junmay chihabʼ we, wank jun linkʼanjel bʼarwiʼ inkʼaʼ ninkʼe chixjunil linhoonal. Saʼ jun kutan naq xinraqeʼk chi kʼanjelak, li wechkʼanjel xinxbʼoq saʼ rochoch. Kixye naq xbʼaan naq wanqo qajunes tooruuq wank saʼ wiibʼal junpaataq. Saʼ xtiklajik xinye re wiibʼ oxibʼ li aatin, abʼan moqon xinye re naq inkʼaʼ ut xinchʼolobʼ chiru kʼaʼut». Laj Robert kixnumsi li aaleek ut aʼin jwal chaabʼil. Abʼan moqon kixkʼoxla rix li kikʼulmank ut kixkʼulubʼa naq kichʼaʼajkoʼk bʼayaq chiru. Naxye: «Inkʼaʼ xinʼaatinak chi chʼolchʼo ru ut saʼ junpaat joʼ kixbʼaanu laj José rikʼin li rixaqil laj Potifar (Gén. 39:​7-9). Moko nawoybʼeni ta naq tchʼaʼajkoʼq chiwu xyeebʼal naq inkʼaʼ. Li xinkʼul xinxtenqʼa chi rilbʼal naq tento tinkawubʼresi linʼamiiwil rikʼin li Jehobʼa».

¹⁶ Qayeehaq naq xaataw jun li aaleek ut xaatzʼeqtaana. Usta joʼkan, kʼaʼut inkʼaʼ nakatnaʼlebʼak joʼ laj Robert? Kʼoxla aʼin: «Ma kichʼaʼajkoʼk chiwu xtzʼeqtaanankil li aaleek?». Wi nakaakʼe reetal naq wank ebʼ li naʼlebʼ li tento tchaabʼilobʼresi, michʼinaak aachʼool. Kʼoxla bʼan naq jwal us naq xaakʼe reetal bʼar wank li naʼlebʼ li nachʼaʼajkoʼk chaawu. Aatinan chirix aʼin rikʼin li Jehobʼa ut bʼaanu ebʼ li naʼlebʼ li tixbʼaanu naq junelik tat-abʼinq chiru (Sal. 139:​23, 24).

17. Joʼ naʼilmank rikʼin li kixkʼul laj Robert, chanru naʼokenk li qatiikilal rikʼin li xkʼabʼaʼ li Jehobʼa?

¹⁷ Abʼan toj wank xkomon li kixkʼul laj Robert. Aʼan naxye: «Naq xintzʼeqtaana li xbʼoqom li wechkʼanjel, aʼan kixye we “Xaanumsi li aaleek”. Xinpatzʼ re kʼaru kiraj xyeebʼal. Kixye we naq jun li ramiiw li kiwank joʼ aj Testiiw, kixye re naq chixjunilebʼ li saaj aj Testiiw wiibʼ ru li xyuʼamebʼ ut naq tixkʼe ribʼ chiruhebʼ xbʼaanunkil li inkʼaʼ us moko teʼxkʼoxla ta wiibʼ sut re xbʼaanunkil. Joʼkan naq aʼan kixye re li ramiiw naq tixyal wix. Jwal xsahoʼk inchʼool xbʼaan naq inkʼaʼ xintzʼajni li xkʼabʼaʼ li Jehobʼa!».

18. Kʼaru chʼolchʼo chaawu xbʼaanunkil naq ak xkubʼeek aahaʼ? (Chaawil li kaaxukuut «Wiibʼ li naʼlebʼ li jwal chaabʼil»).

¹⁸ Naq nakaaqʼaxtesi laayuʼam chiru li Jehobʼa ut nakubʼeek aahaʼ, nakaakʼutbʼesi naq nakaawaj xsantobʼresinkil li xkʼabʼaʼ aʼ yaal li tkʼulmanq. Ut chʼolchʼooq chaawu naq li Jehobʼa naxnaw li chʼaʼajkilal li yookat xnumsinkil ut ebʼ li aaleek li nakaatzʼeqtaana. Aʼan naxkʼe reetal naq nakaakʼe aaqʼe re naq tiikaq ru laachʼool ut tatxrosobʼtesi xbʼaan aʼin. Chʼolchʼooq chaawu: rikʼin li xsantil musiqʼej tixkʼe aametzʼew re xbʼaanunkil li us (Luc. 11:​11-13). Rikʼin xtenqʼ li Jehobʼa, junelik tatruuq xtaqenkil li Jesús naq ak xkubʼeek aahaʼ.