TZOLOM 40
Kʼaru tqabʼaanu re naq saqaq ru li qayuʼam chiru li Jehobʼa?
Kʼoxla jun li chaabʼil naʼbʼej li yook xkawresinkil li xyum li ak xik re saʼ li tzolebʼaal. Naxkʼe reetal ma kiʼatink, ma saq ru xtʼikr ut ma chʼinaʼus naʼilok. Aʼin naxkʼut chiruhebʼ li junchʼol naq naraheʼk xbʼaan li xnaʼ xyuwaʼ ut naq inkʼaʼ tyajerq. Li Qayuwaʼ Jehobʼa li qʼaxal nokooxra, naraj ajwiʼ naq saqaq li qajunxaqalil ut li qachʼool. Naqataw rusilal naq saq ru li qayuʼam ut naqasahobʼresi xchʼool li Jehobʼa.
1. Kʼaru tqabʼaanu re naq saqaq ru li qajunxaqalil?
Li Jehobʼa naxye qe: «Santaqex» (1 Pedro 1:16). Re naq santaqo tento naq saqaq ru li qajunxaqalil ut li qachʼool. Naqakʼutbʼesi naq saq ru li qajunxaqalil naq rajlal nokooʼatink, saq ru li qatʼikr, naqasaabʼesi malaj naqayamlesi li qochoch ut li qabʼelebʼaal chʼiichʼ. Nokootzʼaqonk ajwiʼ chi xsaabʼesinkil li Chʼutlebʼaal Kabʼl. Ebʼ li junchʼol nekeʼxkʼe xloqʼal li Jehobʼa naq saq ru li qajunxaqalil (2 Corintios 6:3, 4).
2. Kʼaru li naʼlebʼ tento tqatzʼeqtaana re naq saqaq ru li qayuʼam?
Li Santil Hu naxye: «Qachʼajobʼresiiq qibʼ, qisihaq chixjunil li tzʼajnil wank chiqix ut li xtzʼajnil li musiqʼej» (2 Corintios 7:1). Joʼkan naq naqatzʼeqtaana chixjunil li naru naxtzʼajni li qajunxaqalil ut li qakʼaʼuxl. Xbʼaan naq naqaj xsahobʼresinkil xchʼool li Jehobʼa naqayal qaqʼe re xtzʼeqtaanankil chixjunil li yibʼru aj kʼaʼuxej (Salmo 104:34). Joʼkan ajwiʼ naqayal qaqʼe re naq chaabʼilaq li qaatin (yaabʼasi Colosenses 3:8).
Kʼaru chik li naʼlebʼ truuq xtzʼajninkil li qajunxaqalil ut li qakʼaʼuxl? Wi nokoomayibʼk, wi naqatoqʼoni li xxaq li coca malaj junelik yooko roksinkil junaq li bʼan li moko yeebʼil ta qe xbʼaan jun laj bʼanonel. Chixjunil aʼin naru naxtzʼajni li qajunxaqalil. Abʼan, wi tqatzʼeqtaana ebʼ li naʼlebʼ aʼin inkʼaʼ tooyajerq ut tqoxloqʼi li qayuʼam. Joʼkan ajwiʼ re naq saqaq ru li qakʼaʼuxl naqayal qaqʼe re xtzʼeqtaanankil li yibʼ aj naʼlebʼ joʼ xtiqwasinkil li qatzʼejwal qajunes qibʼ ut rilbʼal li nekeʼxkʼut ribʼ chi tʼustʼu (Salmo 119:37; Efesios 5:5). Maare tchʼaʼajkoʼq chiqu xtzʼeqtaanankil ebʼ li naʼlebʼ aʼin, abʼan li Jehobʼa naru nokooxtenqʼa (yaabʼasi Isaías 41:13).
QASIKʼAQ XCHAMAL LI NAʼLEBʼ
Qilaq chanru naxkʼe xloqʼal li Jehobʼa naq saq ru li qajunxaqalil ut kʼaru ttenqʼanq qe chi xkanabʼankil li yibʼ aj naʼlebʼ.
3. Naq naqasaabʼesi qibʼ naqakʼe xloqʼal li Jehobʼa
Naq naqil li chaqʼrabʼ li kixkʼe li Jehobʼa re li tenamit Israel, naqataw ru naq wank xwankil chiru li Jehobʼa naq saqaq ru li qayuʼam. Cheeyaabʼasi Éxodo 19:10 ut 30:17-19 ut chexʼaatinaq chirix ebʼ li patzʼom aʼin:
Kʼaru naqatzol saʼebʼ li raqal aʼin chirix li naxkʼoxla li Jehobʼa chirix xsaabʼesinkil li qajunxaqalil?
Kʼaru li chaabʼil naʼlebʼ nokooxtenqʼa re naq junelik saqaq qu?
Li saabʼesink naxkʼam hoonal abʼan chiqajunilo tqakʼe qaqʼe chi xbʼaanunkil maakʼaʼ naxye bʼar wanko ma bʼihomo malaj nebʼaʼo. Cheerilaq li BʼIDEO ut chexʼaatinaq chirix li patzʼom aʼin:
Kʼaʼut naq ebʼ li kristiʼaan teʼroxloqʼi li Jehobʼa wi nekeʼril naq saq li kʼaru qe?
4. Kanabʼ xbʼaanunkil li yibʼ aj naʼlebʼ
Li Jehobʼa nokooxtenqʼa chi xqʼaxbʼal ru junaq li yibʼ aj naʼlebʼ.
Wi nakatmayibʼk, junelik nakaawoksi li bʼan li moko yeebʼil ta aawe xbʼaan laj bʼanonel malaj nakaawoksi li bʼan li nakanobʼresink u nakaanaw naq chʼaʼaj xkanabʼankil li yibʼ aj naʼlebʼ aʼin. Wi nakaakʼoxla li rahilal li naxkʼam chaq saʼ laayuʼam, aʼin tatxtenqʼa chi xkanabʼankil li naʼlebʼ aʼin. Cheeyaabʼasi Mateo 22:37-39 ut chexʼaatinaq chanru naq li mayibʼk, roksinkil li bʼan li nakanobʼresink u malaj yalaq kʼaru li kʼaynaqat roksinkil naxchʼaʼajki...
... laaʼamiiwil rikʼin li Jehobʼa.
... laajunkabʼal ut ebʼ li junchʼol.
Kʼoxla kʼaru tatruuq xbʼaanunkil re xkanabʼankil junaq li yibʼ aj naʼlebʼ.a Cheerilaq li BʼIDEO.
Cheeyaabʼasi Filipenses 4:13 ut chexʼaatinaq chirix ebʼ li patzʼom aʼin:
Ma truuq jun li kristiʼaan xjalbʼal li xyibʼ aj naʼlebʼ wi kʼaynaq chi tijok, rilbʼal xsaʼ li Santil Hu ut xikʼ saʼebʼ li chʼutam? Kʼaʼut nakaaye chi joʼkan?
5. Yal aaqʼe chiru xkʼoxlankil ut xbʼaanunkil li yibʼ aj naʼlebʼ
Cheeyaabʼasi Colosenses 3:5 ut chexʼaatinaq chirix ebʼ li patzʼom aʼin:
Chanru naqanaw naq li Jehobʼa xikʼ naril li nekeʼxkʼut ribʼ chi tʼustʼu, li sexteo malaj sexting ut li nekeʼxtiqwasi li xtzʼejwal xjunes ribʼ?
Ma wank tawiʼ xyaalal naq li Jehobʼa naxye qe naq saqaq ru li qachʼool ut li qakʼaʼuxl? Kʼaʼut?
Kʼe reetal kʼaru tqabʼaanu re naq tqaqʼax ru ebʼ li tzʼaj ru aj kʼaʼuxl. Cheerilaq li BʼIDEO.
Li Jesús kixkʼe jun li eetalil li naxkʼutbʼesi kʼaru tento tqabʼaanu re naq saqaq ru qachʼool ut li qakʼaʼuxl. Cheeyaabʼasi Mateo 5:29, 30 ut chexʼaatinaq chirix li patzʼom aʼin:
Li Jesús moko kiraj ta xyeebʼal naq tqarahobʼtesi qibʼ, kiraj bʼan xyeebʼal naq tqabʼaanu chixjunil li wank saʼ quqʼ re xkanabʼankil li yibʼ aj naʼlebʼ. Kʼaru tento tixbʼaanu junaq li kristiʼaan re naq tixtzʼeqtaana chi junajwa li yibʼ aj kʼaʼuxl?b
Wi yookat xkʼebʼal aaqʼe re naq inkʼaʼ taakʼoxla li yibʼ aj naʼlebʼ chʼolchʼooq chaawu naq oxloqʼ chiru li Jehobʼa li nakaabʼaanu. Cheeyaabʼasi Salmo 103:13, 14 ut chexʼaatinaq chirix li patzʼom aʼin:
Wi yookat xyalbʼal aaqʼe chiru jun li yibʼ aj naʼlebʼ, ma naru tatxtenqʼa ebʼ li raqal aʼin re naq tatruuq xqʼaxbʼal ru?
Maakanabʼ xyalbʼal aaqʼe
Wi tattʼaneʼq wiʼ chik saʼ laapaltil saʼ junpaat tatruuq xkʼoxlankil «xinbʼaanu wiʼ chik, maajunwa tinruuq xqʼaxbʼal ru». Kʼoxla aʼin. Wi jun laj aanilanel natʼaneʼk aʼin moko naraj ta xyeebʼal naq ak xtzʼeqok malaj tento tsutqʼiiq bʼarwiʼ kixtikibʼ chaq. Joʼkan ajwiʼ, wi laaʼat nakattʼaneʼk wiʼ chik saʼ laapaltil aʼin moko naraj ta xyeebʼal naq ak xattzʼeqok chi junajwa. Chi moko naraj ta ajwiʼ xyeebʼal naq maakʼaʼ aj e li ak xaabʼaanu. Chʼolchʼo naq naru tattʼaneʼq naq yookat xkʼebʼal aaqʼe. Joʼkan naq michʼinaak aachʼool! Li Jehobʼa ttenqʼanq aawe chi xqʼaxbʼal ru yalaq kʼaru li tzʼaj aj naʼlebʼ.
WIIBʼ OXIBʼ NEKEʼXYE: «Ak re naq joʼkan linnaʼlebʼ moko tinruuq ta xkanabʼankil».
Kʼaru xraqal li Santil Hu tatruuq roksinkil re xkʼutbʼesinkil re li kristiʼaan aʼan naq truuq xkanabʼankil li xyibʼ aj naʼlebʼ?
LI AK XQATZOL
Naqasahobʼresi xchʼool li Jehobʼa naq saq ru li qajunxaqalil, li qakʼaʼuxl ut li qanaʼlebʼ.
Qajultikaq
Kʼaʼut aajel ru naq saqaq ru li qayuʼam?
Kʼaru tento tqabʼaanu re naq saqaq ru li qajunxaqalil?
Kʼaru tento tqabʼaanu re naq saqaq ru li qakʼaʼuxl ut li qanaʼlebʼ?
SIKʼ XKOMON LI NAʼLEBʼ
Usta nebʼaʼo, kʼaru tooruuq xbʼaanunkil re naq saqaq ru li qajunxaqalil?
Tzʼil rix wiibʼ oxibʼ li naʼlebʼ li truuq aatenqʼankil re xkanabʼankil li mayibʼk.
Kʼaru li rahilal naxkʼam chaq rilbʼal li nekeʼxkʼut ribʼ chi tʼustʼu?
Tzol kʼaru kitenqʼank re jun li winq re naq inkʼaʼ chik trilebʼ li nekeʼxkʼut ribʼ chi tʼustʼu.
«Naabʼal sut xintʼaneʼk abʼan xinʼelk chiʼubʼej» (Laj Kʼaakʼalehom, ajl 4 2016)
a Saʼ li naʼlebʼ «Chanru xkanabʼankil li mayibʼk» li natawmank saʼ li kaaxukuut «Sikʼ xkomon li naʼlebʼ» naxye kʼaru ttenqʼanq aawe re xkanabʼankil junaq li yibʼ aj naʼlebʼ.
b Re naq tatruuq xqʼaxbʼal ru li yibʼ aj naʼlebʼ re xtiqwasinkil laatzʼejwal aajunes, chaawil li tzolom «Ma tinruuq tawiʼ xkanabʼankil xtiqwasinkil lintzʼejwal?» (Li nekeʼxpatzʼ ebʼ li saaj. Xsumenkil [tasal 1], tzolom 25).