TZOLOM 60
Maakanabʼ wank chixkʼatq li Jehobʼa
Rikʼin laatzolbʼal ak naabʼal chik nakaanaw chirix li Jehobʼa. Joʼkan naq xkʼiik laarahom chirix ut maare ak xaaqʼaxtesi laayuʼam chiru ut xkubʼeek aahaʼ. Wi toj maajiʼ nakaabʼaanu maare ak wank saʼ laachʼool xbʼaanunkil. Abʼan naq tkubʼeeq aahaʼ maakanabʼ kʼiik saʼ laapaabʼal. Relik chi yaal naru nakaachaabʼilobʼresi laaʼamiiwil rikʼin li Jehobʼa junqʼe junqʼe kutan. Qilaq chanru.
1. Kʼaʼut tento naq yooqat xchaabʼilobʼresinkil laaʼamiiwil rikʼin li Jehobʼa?
Tento tookʼanjelaq chi kaw re xchaabʼilobʼresinkil li qamiiwil rikʼin li Jehobʼa. Kʼaʼut? «Re naq inkʼaʼ toosachq» ut tqanajtobʼresi qibʼ rikʼin (Hebreos 2:1). Kʼaru ttenqʼanq qe re naq maajunwa tqakanabʼ kʼanjelak chiru li Jehobʼa chi anchal qachʼool? Laatzʼaq qu chi xyeebʼal li chaabʼil esil ut xsikʼbʼal kʼaru chik tooruuq xbʼaanunkil saʼ xkʼanjel li Jehobʼa (yaabʼasi Filipenses 3:16). Kʼanjelak chiru li Jehobʼa aʼan li qʼaxal chaabʼil saʼ li qayuʼam! (Salmo 84:11).
2. Kʼaru chik tatruuq xbʼaanunkil?
Usta ak yook chi raqeʼk laatzolbʼal, laayuʼam joʼ aj paabʼanel tojaʼ yook chi tiklaak. Li Santil Hu naxye: «Akʼobʼresinbʼilaq leeyuʼam» (Efesios 4:23, 24, Wy). Wi inkʼaʼ nakaakanabʼ xtzolbʼal li Santil Hu ut wulak saʼebʼ li chʼutam, taatzol chiʼus chanru xnaʼlebʼ li Jehobʼa. Kʼoxla chanru tatruuq xkʼambʼal aawe rikʼin li Jehobʼa wulaj wulaj ut maakanabʼ xjalbʼal laayuʼam re xsahobʼresinkil xchʼool li Jehobʼa.
3. Chanru tatxtenqʼa li Jehobʼa re naq tatkʼiiq saʼ laapaabʼal?
Li Santil Hu naxye: «Li Yos taatzʼaqobʼresinq eere eeru, tixkʼe xkawubʼ eechʼool, taawaklesinq ut taaxaqabʼanq eere» (1 Pedro 5:10). Chiqajunilo naqakʼul li aaleek, abʼan li Jehobʼa nokooxtenqʼa re xqʼaxbʼal ru (Salmo 139:23, 24). Li Jehobʼa tixkʼe aawe li metzʼew ut tixbʼaanu naq t-alaaq saʼ laachʼool naq maajunwa taatzʼeqtaana (yaabʼasi Filipenses 2:13).
QASIKʼAQ XCHAMAL LI NAʼLEBʼ
Qilaq kʼaru tatruuq xbʼaanunkil re naq inkʼaʼ taakanabʼ kʼiik saʼ laapaabʼal ut chanru tatrosobʼtesi li Jehobʼa.
4. Junelik chat-aatinaq ut chaawabʼi laawamiiw
Tijok ut rilbʼal xsaʼ li Santil Hu tatxtenqʼa re naq tatwanq choʼq ramiiw li Jehobʼa. Ma naru nakatxtenqʼa li naʼlebʼ aʼin re naq tatjiloq chixkʼatq li Jehobʼa? Chanru taabʼaanu?
Cheeyaabʼasi Salmo 62:9 ut chexʼaatinaq chirix li patzʼom aʼin:
Xchaabʼilobʼresinkil laatij tatxkʼe saʼ tzʼaqal amiiwil rikʼin li Jehobʼa. Chanru tatruuq xbʼaanunkil aʼin?
Cheeyaabʼasi Salmo 1:2 ut chexʼaatinaq chirix li patzʼom aʼin:
Xkʼebʼal aahoonal ut aachʼool chi xyaabʼasinkil li Santil Hu tixchaabʼilobʼresi laaʼamiiwil rikʼin li Jehobʼa. Chanru taabʼaanu aʼin?
Chanru tatruuq xtawbʼal rusilal naq nakaatzol li Santil Hu aajunes? Re xtawbʼal wiibʼ oxibʼ li naʼlebʼ cheerilaq li BʼIDEO. Moqon chexʼaatinaq chirix ebʼ li patzʼom aʼin:
Kʼaru ebʼ li naʼlebʼ li xaawil saʼ li bʼideo tatruuq xbʼaanunkil?
Kʼaru ebʼ li naʼlebʼ taawaj raj xtzolbʼal saʼ li Santil Hu?
5. Kʼoxla kʼaru tatruuq xbʼaanunkil re xkʼebʼal xtzʼaqobʼ laakʼanjel chiru li Jehobʼa
Xkʼoxlankil chanru tatkʼanjelaq chiru li Jehobʼa tatxtenqʼa chi kʼiik saʼ laapaabʼal. Cheerilaq li BʼIDEO ut chexʼaatinaq chirix li patzʼom aʼin:
Kʼaru kitenqʼank re li xCameron chi xkʼebʼal xtzʼaqobʼ li xkʼanjel chiru li Jehobʼa?
Moko chiqajunilo ta nokooruuk chi xik saʼ junaq chik chi tenamit re xkʼebʼal chi naweʼk li chaabʼil esil. Abʼan naru naqasikʼ chanru xkʼebʼal xtzʼaqobʼ li qakʼanjel chiru li Jehobʼa. Cheeyaabʼasi Proverbios 21:5 ut chexʼaatinaq chanru tatruuq xkʼebʼal xtzʼaqobʼ laakʼanjel...
... saʼ li chʼuut.
... saʼ li puktesink.
Chanru truuq aatenqʼankil li raqal aʼin re xtawbʼal li nakaawaj saʼ li xkʼanjel li Yos?
Kʼaru naru nakaabʼaanu
Xchaabʼilobʼresinkil laatij.
Xyaabʼasinkil chixjunil li Santil Hu.
Xnawbʼalebʼ ru chixjunilebʼ li hermaan saʼ li chʼuut.
Xtikibʼankil xtzolbʼal junaq li kristiʼaan rikʼin li Santil Hu.
Xkʼebʼal 30 malaj 50 hoonal saʼ li puktesink.
Ebʼ li winq naru nekeʼxkʼe xqʼe re kʼanjelak joʼ aj tenqʼanel saʼ li chʼuut.
6. Sahaq aachʼool chi junelik!
Cheeyaabʼasi Salmo 22:27 ut chexʼaatinaq chirix li patzʼom aʼin:
Kʼaru taabʼaanu re naq sahaq saʼ laachʼool anaqwan ut chi junelik?
LI AK XQATZOL
Maakanabʼ xchaabʼilobʼresinkil laaʼamiiwil rikʼin li Jehobʼa ut xkʼebʼal xtzʼaqobʼ laakʼanjel chiru. Chi joʼkan wanq aayuʼam chi junelik!
Qajultikaq
Kʼaʼut chʼolchʼo chaawu naq li Jehobʼa tatxtenqʼa re naq maajunwa taakanabʼ kʼanjelak chiru?
Kʼaru tatruuq xbʼaanunkil re xchaabʼilobʼresinkil laaʼamiiwil rikʼin li Jehobʼa?
Re naq tatkʼiiq saʼ laapaabʼal, kʼaʼut aajel ru naq taakʼe xtzʼaqobʼ aakʼanjel chiru li Jehobʼa?
SIKʼ XKOMON LI NAʼLEBʼ
Kʼaru wank xwankil chiru li Jehobʼa: ma naq tqabʼaanu junaq li naʼlebʼ yal re xkʼutbʼesinkil naq naqaloqʼoni ru malaj naq rajlal kutan tqakʼutbʼesi naq inkʼaʼ naqatzʼeqtaana?
Jun chaabʼil aj kʼanjel chiru li Jehobʼa naru nachʼinaak ajwiʼ li xchʼool. Kʼe reetal chanru tixtaw wiʼ chik li sahil chʼoolejil.
Chanru xintaw wiʼ chik xsahil linchʼool kʼanjelak chiru li Jehobʼa (5:25)
Kʼaru tatruuq xbʼaanunkil re xkʼebʼal xtzʼaqobʼ aakʼanjel chiru li Jehobʼa ut xbʼaanunkil?
Chaawil kʼaru tatruuq xbʼaanunkil re naq kawaqat saʼ laapaabʼal.