Kʼaru taabʼaanu re naq sahaq saʼ xchʼool laajunkabʼal? (tasal 2)

Ebʼ li alal kʼajolbʼej aʼan xmaatan li Jehobʼa. Aʼan naraj naq li naʼbʼej yuwaʼbʼej teʼrilebʼ chiʼus ut naxkʼe rehebʼ li chaabʼil naʼlebʼ re naq teʼruuq xbʼaanunkil. Naxye ajwiʼ rehebʼ li kokʼal kʼaru teʼxbʼaanu re naq sahaqebʼ saʼ xchʼool saʼ li xjunkabʼal.

1. Kʼaru ebʼ li naʼlebʼ naxkʼe li Jehobʼa choʼq rehebʼ li naʼbʼej yuwaʼbʼej?

Li Jehobʼa naraj naq ebʼ li naʼbʼej yuwaʼbʼej teʼxrahebʼ li ralal xkʼajol ut naq teʼxkʼe chixjunil li hoonal li teʼruuq re wanq rikʼinebʼ. Naraj ajwiʼ naq teʼxkolebʼ chiru li chʼaʼajkilal ut naq teʼxtzolebʼ rikʼin li naʼlebʼ li naxkʼe li Santil Hu (Proverbios 1:8). Li Yos kixkʼe li naʼlebʼ aʼin choʼq rehebʼ li nekeʼjolomink re li junkabʼal: «Chekʼiiresihebʼ bʼan rikʼin xtzolbʼalebʼ […] joʼ naraj li Qaawaʼ» (yaabʼasi Efesios 6:4). Nasahoʼk xchʼool li Jehobʼa naq ebʼ li naʼbʼej yuwaʼbʼej nekeʼxkʼiresi li xkokʼal joʼ naraj aʼan ut inkʼaʼ nekeʼxkanabʼ naq jalan chik tkʼiresinq rehebʼ.

2. Kʼaru li naʼlebʼ naxkʼe li Jehobʼa choʼq rehebʼ li alal kʼajolbʼej?

Li Jehobʼa naxye rehebʼ li alal kʼajolbʼej «chexʼabʼinq chiru leenaʼ leeyuwaʼ» (yaabʼasi Colosenses 3:20). Wi ebʼ li kokʼal nekeʼabʼink ut nekeʼroxloqʼi li xnaʼ xyuwaʼ teʼxsahobʼresi xchʼoolebʼ ut teʼxsahobʼresi ajwiʼ xchʼool li Jehobʼa (Proverbios 23:22-25). Naq toj kachʼin chaq li Jesús kixkʼe jun chaabʼil eetalil, usta tzʼaqal re ru li xyuʼam junelik kiroxloqʼi ut kiʼabʼink chiru li xnaʼ xyuwaʼ usta aj maakebʼ (Lucas 2:51, 52).

3. Kʼaru naru nekeʼxbʼaanu ebʼ li junkabʼal re naq teʼwanq choʼq ramiiw li Jehobʼa?

Wi wankebʼ laakokʼal chʼolchʼo naq taawaj naq teʼxra li Jehobʼa joʼ nakaara laaʼat. Tatruuq xbʼaanunkil aʼin wi taayuʼami li naʼlebʼ li naxkʼe li Santil Hu: «Chʼik saʼ xkʼaʼuxebʼ [li Raatin li Jehobʼa] laawalal aakʼajol, seeraqʼi rehebʼ saʼ laawochoch joʼ ajwiʼ naq wanqat chiru aabʼe» (Deuteronomio 6:7). Li aatin chʼik naraj xyeebʼal naq junelik taaye rehebʼ li naʼlebʼ li taawaj xkʼutbʼal. Ak nakaanaw tana naq junelik tento taaye rehebʼ laakokʼal junaq li naʼlebʼ re naq inkʼaʼ tsachq saʼ xchʼoolebʼ. Li raqal aʼin naraj xyeebʼal naq chiru li kutan taasikʼ chanru tat-aatinaq chirix li Jehobʼa rikʼinebʼ laakokʼal. Joʼkan ajwiʼ, aajel ru naq ebʼ li junkabʼal teʼxxaqabʼ junaq li kutan chiru li xamaan re xloqʼoninkil ru li Jehobʼa joʼ junkabʼal. Usta maakʼaʼebʼ laakokʼal tento taatzol li Santil Hu rajlal xamaan xbʼaan naq aʼin tatxtenqʼa.

QASIKʼAQ XCHAMAL LI NAʼLEBʼ

4. Chaatzolebʼ laakokʼal rikʼin rahok

Chʼaʼaj xtzolbʼalebʼ li kokʼal. Chanru truuq aatenqʼankil li Santil Hu? Cheeyaabʼasi Santiago 1:19, 20 ut chexʼaatinaq chirix ebʼ li patzʼom aʼin:

• Chanru teʼruuq li naʼbʼej yuwaʼbʼej xkʼutbʼal naq nekeʼxra li xkokʼal naq nekeʼaatinak rikʼinebʼ?

• Kʼaʼut naq maajunwa taaqʼusebʼ laakokʼal naq yook aajosqʼil?a

5. Chaakolebʼ laakokʼal

Re naq taakolebʼ laakokʼal aajel ru naq tat-aatinaq rikʼinebʼ chirix li wank saʼ wiibʼal. Yaal, maare tatxutaanaq chi xbʼaanunkil aʼin. Cheerilaq li BʼIDEO ut chexʼaatinaq chirix ebʼ li patzʼom aʼin:

BʼIDEO: Qakolaq li qakokʼal chiru «li inkʼaʼ us» (2:58)

• Kʼaʼut wankebʼ li naʼbʼej yuwaʼbʼej li nekeʼchʼaʼajkoʼk chiru aatinak rikʼinebʼ li xkokʼal chirix li wank saʼ wiibʼal?

• Kʼaru kitenqʼank rehebʼ wiibʼ oxibʼ li naʼbʼej yuwaʼbʼej re naq teʼaatinaq rikʼinebʼ li xkokʼal chirix aʼin?

Joʼ ak yeebʼil chaq saʼ li Santil Hu, kʼajoʼ xyibʼal ru xnaʼlebʼebʼ li kristiʼaan saʼ li ruuchichʼochʼ li naxjolomi laj Tza. Cheeyaabʼasi 2 Timoteo 3:1, 13 ut chexʼaatinaq chirix ebʼ li patzʼom aʼin:

• Wiibʼ oxibʼ li kristiʼaan li naʼaatinak wiʼ li raqal 13 nekeʼxmux ru ebʼ li kokʼal. Joʼkan naq, kʼaʼut aajel ru naq ebʼ li naʼbʼej yuwaʼbʼej teʼxkʼe xnaʼlebʼ li xkokʼal chirix li wank saʼ wiibʼal? Ut, kʼaru teʼxbʼaanu re xkolbʼalebʼ chirix li nekeʼmuxuk kokʼal?

Ma nakaanaw?

Ebʼ laj Testiiw nekeʼxkʼubʼ naabʼal li naʼlebʼ re xtenqʼankilebʼ li naʼbʼej yuwaʼbʼej re naq teʼaatinaq rikʼinebʼ li xkokʼal chirix li wank saʼ wiibʼal ut re naq teʼxkol ribʼebʼ chiru li nekeʼmuxuk kokʼal. Aʼin wiibʼ oxibʼ rehebʼ:

• Kolomaq leekokʼal (bʼideo)

• Aprendamos del Gran Maestro, tzolom 10 ut 32, (maakʼaʼ saʼ qʼeqchiʼ)

• «Chanru texʼaatinaq rikʼinebʼ leekokʼal chirix li wank saʼ wiibʼal» (Ajsi aawu!, ajl 5 2016)

6. Chaawoxloqʼi laanaʼ laayuwaʼ

BʼIDEO: Chanru tat-aatinaq rikʼin laanaʼ laayuwaʼ? (2:19)

• Kʼaʼut naq wank xwankil naq ebʼ li alal kʼajolbʼej teʼroxloqʼi li xnaʼ xyuwaʼ naq teʼaatinaq rikʼinebʼ?

• Chanru teʼruuq xbʼaanunkil aʼin?

Cheeyaabʼasi Proverbios 1:8 ut chexʼaatinaq chirix li patzʼom aʼin:

• Chanru teʼnaʼlebʼaq li alal kʼajolbʼej naq li xnaʼ xyuwaʼ teʼxye rehebʼ kʼaru teʼxbʼaanu?

7. Cheeloqʼoni ru li Jehobʼa joʼ junkabʼal

Ebʼ laj Testiiw rajlal xamaan nekeʼxxaqabʼ jun li kutan re xloqʼoninkil ru li Jehobʼa joʼ junkabʼal. Kʼaru nekeʼxbʼaanu? Cheerilaq li BʼIDEO ut chexʼaatinaq chirix ebʼ li patzʼom aʼin:

BʼIDEO: Li loqʼonink joʼ junkabʼal: li xchʼaʼajkilal ut li rusilal (8:04)

• Kʼaru ttenqʼanq rehebʼ re naq rajlal xamaan twanq li loqʼonink joʼ junkabʼal?

• Kʼaru teʼxbʼaanu li naʼbʼej yuwaʼbʼej re naq wanq rusilal li loqʼonink joʼ junkabʼal ut re naq sahaqebʼ saʼ xchʼool naq teʼxbʼaanu? (Taawil li jalam u saʼ xtiklajik).

• Ma wank kʼaru nakatxchʼaʼajki re naq taabʼaanu li loqʼonink joʼ junkabʼal?

Saʼ najter qʼe kutan, li Jehobʼa naroybʼeni naq ebʼ laj Israel teʼaatinaq chirix li Santil Hu. Cheeyaabʼasi Deuteronomio 6:6, 7 ut chexʼaatinaq chirix li patzʼom aʼin:

• Chanru taayuʼami li naʼlebʼ aʼin?

Wiibʼ oxibʼ li naʼlebʼ re loqʼonink joʼ junkabʼal:

• Chextzoloq chirix li t-ilmanq saʼebʼ li chʼutam.

• Cheeyaabʼasi ut chexʼaatinaq chirix jun li eetalil li wank saʼ li Santil Hu li twulaq chiru li junkabʼal.

• Wi toj kachʼinebʼ laakokʼal, kubʼsi malaj isi chi huhil ebʼ li kʼanjel rehebʼ li kokʼal saʼ jw.org.

• Wi saajebʼ laakokʼal sikʼ li naʼlebʼ, ebʼ li saaj saʼ jw.org.

• Cheebʼaanuhaq jun li kʼutbʼesink chirix junaq li eetalil li wank saʼ li Santil Hu.

• Cheerilaq malaj chexʼaatinaq chirix junaq li bʼideo li wank saʼ jw.org.

LI AK XQATZOL

Li Jehobʼa naraj naq ebʼ li naʼbʼej yuwaʼbʼej teʼxra, teʼxtzolebʼ ut teʼxkolebʼ li ralal xkʼajol. Naraj ajwiʼ naq ebʼ li alal kʼajolbʼej teʼroxloqʼi ut teʼabʼinq chiru li xnaʼ xyuwaʼ ut naq joʼ junkabʼal teʼxloqʼoni ru li Jehobʼa.

Qajultikaq

• Kʼaru teʼxbʼaanu ebʼ li naʼbʼej yuwaʼbʼej re xtzolbʼalebʼ ut xkolbʼalebʼ li ralal xkʼajol?

• Kʼaru teʼxbʼaanu ebʼ li alal kʼajolbʼej re xkʼutbʼesinkil naq nekeʼroxloqʼi li xnaʼ xyuwaʼ?

• Kʼaru rusilal taataw wi tatloqʼoninq joʼ junkabʼal?

SIKʼ XKOMON LI NAʼLEBʼ

Kʼaru ebʼ li naʼlebʼ ttenqʼanq rehebʼ laawalal aakʼajol naq teʼninqanq?

«Waqibʼ li tzolom li tento teʼxtzol li kokʼal» (Ajsi aawu!, ajl 2 2019)

Tzol kʼaru li naʼlebʼ naxkʼe li Santil Hu choʼq rehebʼ li nekeʼril li xnaʼ xyuwaʼ li ak cheekebʼ chik.

«Ma naraj li Jehobʼa naq tqilebʼ li qanaʼ qayuwaʼ li ak cheekebʼ chik?» (Li naʼlebʼ re jw.org)

Chaawil chanru jun li winq kixtzol xkʼirisinkilebʼ li ralal xkʼajol.

Li Jehobʼa kixkʼut chiqu xtzolbʼalebʼ li qakokʼal (5:58)

Tzol kʼaru teʼxbʼaanu li yuwaʼbʼej re naq sa teʼxkʼam ribʼ rikʼinebʼ li ralal.

«Kʼaru teʼxbʼaanu ebʼ li yuwaʼbʼej re naq junelik wanqebʼ saʼ amiiwil rikʼinebʼ li ralal?» (Laj Kʼaakʼalehom, 1 re noviembre 2011)