Li Yos naraj aatenqʼankil
SAʼ LI Santil Hu naqataw li naʼlebʼ li qʼaxal chaabʼil xbʼaan naq chalenaq rikʼin li Yos. Yaal naq moko aʼan ta jun li hu li naʼaatinak chirix chanru toobʼaneʼq, abʼan naxkʼe qanaʼlebʼ re xqʼaxbʼal ru li nakʼehok ut napoʼok re li qakʼaʼuxl, li nakʼehok re xrahil qachʼool ut li nakʼehok re xyajel li qajunxaqalil.
Li Santil Hu naxkʼut ajwiʼ jun li naʼlebʼ li jwal wank xwankil: naq li Jehobʼaa Yos naxtaw ru li naqakʼoxla ut li naqekʼa. Aʼan naraj naq us wanqo ut naxkʼe xchʼool chiqix naq naqakʼul junaq li rahilal. Joʼ eetalil, kʼoxla li naxye wiibʼ xraqal li Santil Hu li tixwaklesi aachʼool.
«Nachʼ wank li Qaawaʼ rikʼinebʼ li nekeʼmaynak xchʼool: aʼan naxkolebʼ li maakʼaʼ chik roybʼenihomebʼ» (SALMO 34:19).
«Xbʼaan naq laaʼin li Qaawaʼ, laaYos, chapchookat chawuqʼ inbʼaan. Laaʼin ninyehok aawe: “Matxiwak, laaʼin nintenqʼank aawe”» (ISAÍAS 41:13).
Joʼkan naq, chanru tooxtenqʼa li Jehobʼa chi xqʼaxbʼal ru ebʼ li xyajel li qakʼaʼuxl? Saʼ li junchʼol chik tzolom tqil naq li Jehobʼa naraj qatenqʼankil, joʼkan naq naxkʼe naabʼal li qatenqʼ.
a Li xkʼabʼaʼ li Yos aʼan Jehobʼa (Salmo 83:18, TNM).