2 | «Li xkʼojobʼankil li qaanm naxkʼe li Santil Hu»
LI SANTIL HU NAXYE: «Joʼchʼinal joʼnimal kitzʼiibʼaak chaq junxil, re qatzolbʼal naq kitzʼiibʼaak chaq, re naq rikʼin li xkawubʼ qachʼool ut li xkʼojobʼankil li qaanm naxkʼe li Santil Hu chiwanq xnimal qoybʼenihom chi junelik» (ROMANOS 15:4).
Kʼaru naraj xyeebʼal?
Li naʼlebʼ li wank saʼ li Santil Hu naru naxkawubʼresi li qachʼool naq yook qakʼaʼuxl. Naxye ajwiʼ naq li rahil chʼoolej chi seebʼ t-isiiq chi junajwa.
Chanru nokooxtenqʼa?
Ak re naq chiqajunilo wank sut narahoʼk malaj nachʼinaak qachʼool, abʼan li nekeʼnumtaak xkʼaʼuxl xbʼaan li rahil chʼoolej junelik nekeʼrekʼa ribʼ chi joʼkaʼin. Chanru teʼtenqʼanq xbʼaan li Santil Hu?
Saʼ li Santil Hu wank naabʼal li chaabʼil naʼlebʼ li naru naxqʼax ru li xkʼaʼuxl wiʼ qachʼool (Filipenses 4:8). Saʼ xkʼabʼaʼ aʼin, nokooruuk xnujobʼresinkil li qakʼaʼuxl rikʼin li chaabʼil naʼlebʼ li naxkʼe xtuqtuukilal qachʼool ut nokooxtenqʼa re naq sa tqekʼa qibʼ (Salmo 94:18, 19).
Li Santil Hu naru nokooxtenqʼa re naq tqakanabʼ xkʼoxlankil naq maakʼaʼ nokooʼok wiʼ (Lucas 12:6, 7).
Saʼ li Santil Hu wank naabʼal li eetalil li naxkʼut chiqu naq moko wanko ta qajunes ut naq li Yos, laj Yobʼtesinel qe, naxtaw ru chiʼus li naqekʼa (Salmo 34:19; 1 Juan 3:19, 20).
Li Santil Hu naxye ajwiʼ naq inkʼaʼ chik tqajultika chixjunil li naqakʼul ut li naxkʼe xrahil qachʼool (Isaías 65:17; Apocalipsis 21:4). Wi yooko xkʼebʼal qaqʼe chi risinkil saʼ qachʼool junaq li naʼlebʼ li naxkʼe qakʼaʼuxl, li yeechiʼom aʼin naru naq tixkʼe qametzʼew re naq tooʼelq chi’ub’ej.