Li tooxtenqʼa chi xtzolbʼal li Santil Hu rajlal xamaan
MA NACHʼAʼAJKOʼK chaawu xtzolbʼal li Santil Hu rajlal xamaan? Ma nakattitzʼk chi xbʼaanunkil? Naabʼalo naqakʼul aʼin. Abʼanan, wank naabʼal li naʼlebʼ li naqabʼaanu rajlal usta naxkʼam hoonal, joʼ li atink. Abʼan, naq nokooʼelk chi atink jwal sa naqekʼa qibʼ. Joʼkan ajwiʼ nakʼulmank naq tojeʼ xqatzol li Santil Hu (Efes. 5:26). Li naʼlebʼ aʼin tatxtenqʼa chi xtzolbʼal li Santil Hu rajlal xamaan:
Kʼubʼ li taabʼaanu chiru li xamaan. Li tzolok saʼ junesal aʼan jun li naʼlebʼ li maajunwa tixkanabʼ xbʼaanunkil jun laj paabʼanel xbʼaan naq aʼan li «qʼaxal wank xwankil» (Filip. 1:10). Re naq inkʼaʼ tsachq saʼ aachʼool xbʼaanunkil li xaakʼubʼ, tzʼiibʼa saʼ jun li hu ut kʼe saʼ jun li naʼaj bʼarwiʼ tatruuq rilbʼal malaj kʼe jun li alarma saʼ laaselular re naq tixjultika aawe joqʼe tattzoloq.
Sik li tkʼanjelaq chaawu. Wankebʼ nekeʼwulak chiru tzolok chiru naabʼal hoonal ut wankebʼ chik chiru jun kʼamok ajwiʼ. Kʼoxla chiʼus aʼin naq taakʼubʼ chanru tattzoloq. Ut wi inkʼaʼ nakaawaj tzolok naq nawulak li hoonal, kʼaʼut inkʼaʼ nakattzolok chiru lajeebʼ kʼasal? Usta chanchan naq bʼabʼay ajwiʼ, abʼan naru nakaatzol naabʼal li naʼlebʼ ut maare moqon taawaj tzolok jun kʼamokaq chik (Filip. 2:13).
Chaakʼubʼ rubʼelaj li kʼaru taatzol. Wi toj naq tattzoloq taasikʼ li taawaj xtzʼilbʼal rix moko yookat ta roksinkil «chiʼus li hoonal» (Efes. 5:16). Naru taatzʼiibʼa ebʼ li naʼlebʼ li twulaq raj chaawu xtzolbʼal. Ut naq tchalq junaq laapatzʼom, tzʼiibʼa. Ut wi naq yookat xtzolbʼal li Santil Hu nachalk saʼ aachʼool wiibʼ oxibʼ chik li naʼlebʼ li taawaj xtzʼilbʼal rix, tzʼiibʼa bʼarwiʼ xaatzʼiibʼa li junchʼol chik chi naʼlebʼ.
Wi aajel ru naru taajal li xaakʼubʼ xbʼaanunkil. Li nakaawaj aʼan tzolok rajlal xamaan. Joʼkan naq wi aajel ru, jal li kutan, li hoonal, joʼkʼihal taatzol ut li naʼlebʼ li taatzʼil rix.
Naq rajlal taatzol li naxye li Santil Hu taataw naabʼal rusilal: tatnachʼoq chixkʼatq li Jehobʼa, taasikʼ chiʼus li taabʼaanu ut sa taawekʼa aawibʼ (Jos. 1:8).