Ma traqeʼq li pleetik saʼ jun kutan?
Li Santil Hu naxkʼut naq li Yos tsachoq re li pleetik saʼ ruuchichʼochʼ ut maawaʼ ebʼ li winq (Salmo 46:10).
LI YOS TIXSACH LI XʼAWABʼEJILAL LI WINQ
Li Yos tixsach li xʼawabʼejilal li winq rikʼin jun li yalok li naxkʼabʼaʼi li Santil Hu Armagedón (Apocalipsis 16:16).a Naq twulaq li hoonal aʼan «ebʼ li awabʼej re chixjunil li ruuchichʼochʼ» teʼchʼutubʼaaq «re li yalok li twanq saʼ xnimal xkutankil li Nimajwal Yos» (Apocalipsis 16:14). Rikʼin li Armagedón li Yos tixsach chixjunil li pleetik.
Li Xʼawabʼejilal li Yos tkanaaq saʼ xnaʼaj li xʼawabʼejilal li winq. T-awabʼejinq saʼ choxa ut maajunwa tjukʼmanq (Daniel 2:44). Li Yos kixsikʼ ru li Jesús, li Ralal re naq wanq joʼ Awabʼej (Isaías 9:6, 7; Mateo 28:18). Aʼin li Awabʼejilalb li kixkʼut li Jesús chiruhebʼ li xtzolom naq teʼxpatzʼ saʼebʼ li xtij (Mateo 6:9, 10). Ut chixjunil li kristiʼaan teʼwanq saʼ junajil rubʼel li xʼawabʼejilal li Jesús.
Li Jesús inkʼaʼ troksi li xwankilal choʼq re xjunes joʼ nekeʼxbʼaanu ebʼ li xʼawabʼejilal li winq. Xbʼaan naq aʼan jun Awabʼej tiik xchʼool ut inkʼaʼ nasikʼok u. Ebʼ li kristiʼaan inkʼaʼ chik teʼrahobʼtesiiq xbʼaan xbʼonol xtibʼelebʼ, li xwanjikebʼ ut li xtenamitebʼ (Isaías 11:3, 4). Li Jesús tixkʼe xchʼool chirix chixjunil li kristiʼaan. «Aʼan taakoloq re li nebʼaʼ li yo chi tzʼaamank, aʼ li toqʼobʼ ru li inkʼaʼ natenqʼaak xbʼaan anihaq […]. Aʼan taaʼisinq rehebʼ saʼ li raasa ut li rahobʼtesiik» (Salmo 72:12-14).
Li Xʼawabʼejilal li Yos tixsach li pleetik li naxkamsi naabʼal li kristiʼaan (Miqueas 4:3). Tixsach ajwiʼ ebʼ li kristiʼaan li inkʼaʼ nekeʼxkanabʼ pleetik ut nekeʼxkʼe saʼ xiwxiwal xyuʼamebʼ li junchʼol (Salmo 37:9, 10). Ebʼ li winq, li ixq ut ebʼ li kokʼal maakʼaʼ chik teʼxxiwa ut teʼwanq saʼ tuqtuukilal (Ezequiel 34:28).
Rubʼel li xʼawabʼejilal li Yos chaabʼilaq chik li qayuʼam. Maakʼaʼaq chik li chʼaʼajkilal li naxrahobʼtesihebʼ li kristiʼaan joʼ li nebʼaʼil, li weʼej ut li xmaakʼaʼil li ochoch. Wanq naabʼal li tzekemq ut li kristiʼaan wanqebʼ rochoch bʼarwiʼ sahaqebʼ saʼ xchʼool (Salmo 72:16; Isaías 65:21-23).
Naq li Xʼawabʼejilal li Yos yooq chi Awabʼejink saʼ xbʼeen li Ruuchichʼochʼ tixsach chixjunil li kixkʼam chaq li pleetik. Moko kaʼaj tawiʼ li kixrahobʼtesi li qajunxaqalil, trisi bʼan li xrahil qachʼool ut chixjunil li yibʼru aj naʼlebʼ li naʼuxmank saʼ li pleetik. Ut chixjunilebʼ li ak xeʼkamk teʼwakliiq chi yoʼyo saʼ Ruuchichʼochʼ (Isaías 25:8; 26:19; 35:5, 6). Ebʼ li junkabʼal teʼwanq wiʼ chik saʼ komonil. Chixjunil li kʼaru xkʼulmank ut li kixkʼam chaq li pleetik inkʼaʼ chik tjultikamanq (Apocalipsis 21:4).
LI YOS TIXSACH LI MAAK
Li Xʼawabʼejilal li Yos tixbʼaanu naq ebʼ li kristiʼaan teʼxloqʼoni ru li Jehobʼac, li tzʼaqal Yos, «li Xyosil li rahok ut li tuqtuukilal» (2 Corintios 13:11). Ebʼ li kristiʼaan teʼxtzol wank saʼ tuqtuukilal (Isaías 2:3, 4; 11: 9). Li nekeʼxyuʼami li xeʼxtzol teʼkoleʼq chiru li maak (Romanos 8:20, 21).
LI YOS TIXSACH LAJ TZA UT EBʼ LI MAAʼUS AJ MUSIQʼEJ
Li Xʼawabʼejilal li Yos tixsach laj Tza ut ebʼ li maaʼus aj musiqʼej ut inkʼaʼ chik teʼruuq xtaqlankilebʼ li kristiʼaan re naq teʼpleetiq (Apocalipsis 20:1-3, 10). Naq maakʼaʼaqebʼ chik aʼan «kʼajoʼaq li tuqtuukilal» (Salmo 72:7).
Chʼolchʼooq chaawu naq li Yos naraj risinkil li pleetik xbʼaan naq aʼan naru xbʼaanunkil.
Li Yos wank xwankil re risinkil li pleetik ut li maaʼusilal. Aʼan naxnaw xbʼaanunkil ut maakʼaʼ chʼaʼaj chiru (Job 9:4; 42:2).
Li Yos xikʼ naril naq nekeʼrahobʼtesiik li kristiʼaan (Isaías 63:9). Ut «xikʼ naril li narahink re li raaxiikʼ» (Salmo 11:5).
Li Yos junelik naxbʼaanu li naxyeechiʼi ut inkʼaʼ natikʼtiʼik (Isaías 55:10, 11; Tito 1:2).
Li Yos tixkʼam chaq li tuqtuukilal li twanq chi junelik.
a Sikʼ saʼ jw.org li naʼlebʼ «Kʼaru li Armagedón?».
b Sikʼ saʼ jw.org li bʼideo «Kʼaru li Xʼawabʼejilal li Yos?».