Yanuari

Bansadi yonso ya kwikama ya Nzambi fwete zaba mutindu bo lenda “lungisa mbote-mbote” kisalu yina bo me pesaka bo. (2 Tim. 4:5) Kisalu yai kele mfunu mpi yo fwete salama nswalu kuluta konso kisalu yina. Ata mpidina, yo lenda vanda mpasi na kusamuna mingi mutindu beto ke zola. Bisalu ya nkaka ya mfunu ke lombaka ntangu mpi kikesa. Beto lenda lutisa ntangu mingi na kisalu ya kinsuni sambu na kulungisa bampusa na beto mosi mpi ya dibuta na beto. Beto fwete nwana ti bampasi, mu mbandu kulungisa mikumba ya nkaka ya dibuta, maladi, kuniokwama na mabanza, bampasi ya nkaka mpi kinunu. Kana mambu ya luzingu ke pesa beto ve nzila ya kusala mingi na kisalu ya Yehowa, beto fwete lemba ve nitu. Yezu zabaka nde beto yonso ta buta ve mbuma ya Kimfumu kiteso mosi. (Mat. 13:23) Yehowa ke bakaka na mbalu mambu yonso ya beto ke salaka na kisalu na yandi kana beto ke sala yo na luzolo yonso.—Baeb. 6:10-12. w19.04 2 § 1-3

Malongi ya luvunu ya Satana sambu na bafwa ke fingisaka Yehowa. Dilongi ya ke tubaka nde bafwa ke niokwamaka na tiya kele na kati ya malongi ya luvunu ya Satana. Malongi yai ke fingisaka kibeni Nzambi! Inki mutindu? Yo ke ndimisaka bantu kibeni nde Nzambi ya zola kele nku bonso Diabulu. (1 Yoa. 4:8) Nge ke kudiwaka nki mutindu? Ebuna yandi mosi Yehowa ke kudiwaka nki mutindu? Yehowa ke mengaka mambu yonso ya nku. (Yer. 19:5) Malongi ya luvunu ya Satana sambu na lufwa ke monisaka nde kimenga ya Kristu kele mfunu ve. (Mat. 20:28) Luvunu ya nkaka ya Satana kele nde bantu ke vandaka ti moyo yina ke fwaka ve. Kana yo vandaka mutindu yina, bantu yonso zolaka kuzinga kimakulu. Kristu zolaka ve kupesa luzingu na yandi bonso kimenga sambu beto baka luzingu ya mvula na mvula. Beto fwete vila ve nde kimenga ya Kristu kele mutindu mosi ya kuluta nene yina Nzambi me monisilaka bantu zola. (Yoa. 3:16; 15:13) Yindula mutindu Yehowa ti Mwana na yandi ke kudiwaka sambu na malongi yina ya luvunu ya ke monaka mpamba dikabu yai ya mfunu. w19.04 14 § 1; 16 § 8-9

Na wapi bo sonikaka malongi ya Yezu? Baevanzile iya ke tubila mambu mingi yina Yezu tubaka mpi salaka awa na ntoto. Masonuku ya nkaka ya Kigreki ke sadisa beto na kubakisa mabanza ya Yezu sambu mpeve santu sadisaka bantu yina sonikaka yo mpi sambu bo vandaka “ti mabanza ya Kristu.” Malongi ya Yezu ke sadisaka beto na mambu yonso. Yo yina “nsiku ya Kristu” ke twadisaka beto na mambu yina beto ke salaka na nzo, na kisalu, na nzo-nkanda mpi na dibundu. (Bag. 6:2) Beto ke longukaka nsiku yina ntangu beto ke tangaka Masonuku ya Kigreki ya Bukristu mpi ke yindulaka yo mingi. Beto ke lemfukaka na nsiku yina ntangu beto ke sadilaka bansiku, bantuma mpi minsiku yina kele na Masonuku ya santu. Ntangu beto ke lemfukaka na nsiku ya Kristu, beto ke lemfukaka na Yehowa, Nzambi na beto ya zola, yina kele Nto ya malongi yonso ya Yezu.—Yoa. 8:28. w19.05 3 § 6-7

Yo kele mawa sambu bantu mingi ke salaka mambu yina ke sepedisaka Diabulu. Kansi, Yehowa ke zabaka mambu yonso ya Satana ke salaka. Yandi ke zabaka mbote bampasi na beto mpi yandi ta pesa beto kikesa yina beto kele na yo mfunu. Beto ke vandaka na kiese sambu beto ke sadilaka “Nzambi yina ke lembikaka bantu yonso; yandi ke lembikaka beto na bampasi na beto yonso, sambu beto kuka kulembika bantu ya nkaka na bampasi ya mutindu na mutindu ti kulembika yina beto ke bakaka na Nzambi.” (2 Bak. 1:3, 4) Bana yina bibuti me yambulaka bo to bayina bantu ya kuzabana me bebisaka kele na mfunu ya kikesa. Muyimbi-bankunga Davidi bakisaka nde Yehowa me fwana kibeni na kupesa kikesa. (Nk. 27:10) Davidi ndimaka nde Yehowa ke yambaka bantu yina mabuta na bo me buyaka bo. Inki mutindu? Yandi ke sadilaka bansadi na yandi ya kwikama. Bansadi ya Yehowa kele bantu ya dibuta na beto ya kimpeve. Mu mbandu, Yezu tubaka nde bantu yina vandaka kusambila Yehowa, vandaka bampangi na yandi ya babakala, ya bankento mpi mama na yandi.—Mat. 12:48-50. w19.05 15-16 § 8-9

Inki kele mambu ya kuluta mfunu sambu na beto? Beto fwete longuka Ndinga ya Nzambi konso kilumbu. Na manaka ya Lukutakanu Luzingu mpi Kisalu ya Bukristu, bo me fiotunaka ntalu ya baverse ya lutangu ya mposo sambu beto zwa ntangu ya kuyindula mingi mambu ya beto ke tanga mpi kusala bansosa. Beto fwete suka ve kaka na kutanga baverse kansi beto fwete bika nde malongi ya Biblia kusimba bantima na beto sambu beto kuma banduku ya Yehowa. (Nk. 19:14) Beto ke longukaka Biblia na nzila ya Kulonguka ya Nzozulu ya Nkengi. Yo yina, tula dikebi ya mingi na baverse ya Biblia, mingi-mingi yina bo ta tanga ntangu beto ta longuka Nzozulu ya Nkengi na dibundu. Tula mpi dikebi ya mingi na bangogo ya mfunu to na bansa ya baverse yina ke monisa ngindu ya mfunu ya paragrafe. Diaka, baka ntangu ya kuyindula mingi baverse yina nge ke tanga mpi mutindu nge ta sadila yo.—Yoz. 1:8. w19.05 27 § 5; 28 § 9

Yezu pesaka mbandu ya kuluta mbote sambu na kisalu ya kusamuna. Kusamuna nsangu ya Kimfumu ya Nzambi vandaka diambu ya mfunu na luzingu na yandi. Yandi tambulaka mingi sambu na kulonga bantu. Yandi sadilaka mabaku mingi sambu na kulonga bisika yina bantu vandaka mingi mpi na banzo na bo. Yezu tulaka kisalu ya kusamuna na kisika ya ntete. Beto lenda landa mbandu ya Kristu kana beto ke sadila mabaku yonso sambu na kulonga nsangu ya mbote konso ntangu mpi konso kisika yina kana mpila kele. Beto ke kuditambikaka sambu na kisalu ya kusamuna. (Mar. 6:31-34; 1 Pie. 2:21) Bampangi ya nkaka ke salaka kisalu ya kimupasudi-nzila nsadisi, ya ntangu yonso to ya nene. Bampangi ya nkaka ke longukaka ndinga ya nkaka to ke kwendaka kisika yina mpusa kele mingi. Kansi, bansamuni ya kikesa ke salaka mingi kisalu ya kusamuna. Ata mpidina, Yehowa ke lombaka beto ve mambu yina beto ta kuka ve kusala. w19.04 4 § 7-8

Kudiyula nde: ‘Keti na ntima na mono, mono kele diaka ti mwa kikalulu ya kulula to ya kimpala?’ (1 Pie. 2:1) ‘Keti mono ke vandaka diaka ti mwa lulendo na mutindu mono yelaka, sambu na nzo-nkanda ya mono salaka to sambu mono kele ti mbongo?’ (Bing. 16:5) ‘Keti mono ke vwezaka bantu ya nkaka yina kele ve ti bima bonso mono to bantu ya mpusu ya nkaka?’ (Yak. 2:2-4) ‘Keti mono ke zolaka mambu ya nsi-ntoto yai?’ (1 Yoa. 2:15-17) ‘Keti mono ke sepelaka ti mansoni mpi bansaka ya mubulu?’ (Nk. 97:10; 101:3; Amo. 5:15) Bamvutu na bangiufula yai ke monisa pwelele mambu yina beto fwete soba. Banduku ke sadisaka to ke bebisaka beto. (Bing. 13:20) Na nzo-nkanda to na kisalu, beto ke zingaka ti bantu yina ke sadisaka beto ve na kuvanda ti mabanza ya Nzambi. Kansi, beto lenda zwa banduku ya mbote na dibundu. Banduku yai na dibundu ta sadisa beto na “kumonisa zola mpi na kusala bisalu ya mbote.”—Baeb. 10:24, 25. w19.06 12 § 13-14

Lukanu ya Yehowa vandaka ve nde bantu kukutana ti bampasi. Nsadi ya Yehowa ya kwikama lenda mpi kutuba kukonda kuyindula ntangu yandi ke kutana ti bampasi. (Yobi 6:2, 3) Kana yandi ke tuba mambu ya mbi sambu na Yehowa mpi sambu na beto, beto fwete wa ve makasi nswalu to kusambisa yandi sambu na mambu yina yandi me tuba. Bantangu ya nkaka yo lenda lomba nde bo pesa muntu yina ke kutana ti bampasi bandongisila to ndola. (Bag. 6:1) Inki mutindu bankuluntu lenda sala yo? Bo fwete landa mbandu ya Elihu yina kuditulaka na kisika ya Yobi mpi widikilaka yandi. (Yobi 33:6, 7) Elihu pesaka Yobi ndongisila kaka na nima ya kubakisa mawi na yandi. Bankuluntu yina ke landaka mbandu ya Elihu ta widikila mpangi na dikebi yonso mpi ta sosa kubakisa bampasi na yandi. Na nima, bo ta pesa yandi bandongisila yina ta simba ntima na yandi. w19.06 22-23 § 10-11

Inki mutindu nge ta landa kusadila Yehowa kana bo me buyisa kisalu na beto? Betele ta pesa bankuluntu bantuma mpi lutwadisu ya me fwana. Ata Betele ke mona ve mpila ya kusolula ti bankuluntu, bankuluntu ta sadisa nge mpi dibundu ya mvimba na kulanda kusambila Yehowa. Bo ta pesa lutwadisu yina me katuka na Biblia mpi na mikanda na beto. (Mat. 28:19, 20; Baeb. 10:24, 25) Yehowa silaka nde bansadi na yandi ta dia mbote na kimpeve. (Yez. 65:13, 14; Luka 12:42-44) Nge lenda ndima nde dibundu na yandi ta sala yonso sambu na kupesa nge kikesa na kimpeve. Inki nge ta sala? Na ntangu ya mbangika, sosa kisika mosi ya mbote yina nge ta bumba Biblia mpi mikanda ya nkaka. Sala yonso sambu bantu kumona ve kisika yina nge me bumba mikanda ya bo me niema to yina kele na apareyi. Konso mpangi fwete sala bikesa sambu na kubikala ngolo na kimpeve. w19.07 10 § 10-11

Ntete bantu mingi vandaka kukwikila na Nzambi. Kansi na bamvula me luta nsoba mosi ya nene salamaka. Bantu mingi ke sambilaka diaka ve. Ya kieleka, na bansi ya nkaka bantu mingi ke tubaka nde bo ke sambilaka ve. (Mat. 24:12) Sambu na nki? Sambu bo me kudipesaka na biese to kele ti basusi. (Luka 8:14) Bantu ya nkaka ke ndimaka diaka ve nde Nzambi kele. Bankaka ke kwikilaka na Nzambi kansi bo ke monaka nde dibundu kele mambu ya ntama, yo kele mfunu ve mpi ke wakanaka ve ti siansi. Bo ke ndimaka mambu yina banduku, balongi to bantu ya ke mwangaka nsangu ke tubaka nde luzingu kudibasikilaka kansi bo me zwaka ntete ve banzikisa yina ke ndimisa bo nde Nzambi kele. Bankaka me yambulaka sambu bamfumu ya mabundu ke zolaka mbongo mpi kiyeka. Na bansi ya nkaka, bamfumu ya luyalu me buyisa bisalu ya mabundu. w19.07 20 § 1-2

Yo ke lomba kaka ve nde nge vanda ngolo na nitu sambu na kulanda kuyela na kimpeve. Ya kieleka, bampangi mingi yina kele diaka ngolo ve na nitu ke vandaka kaka ti lukanu ya kulanda kuyela na kimpeve. (2 Bak. 4:16) Ziku nge me sadilaka Yehowa bamvula mingi kansi ntangu yai sante ke mbote ve mpi nge lenda sala ve mingi mutindu nge vandaka kusala ntete. Kana mpidina, kulemba nitu ve. Tula ntima nde Yehowa ke sepelaka ti kisalu ya kwikama yina nge me salaka. (Baeb. 6:10) Kansi ntangu yai, kuvila ve nde kudipesa ya mvimba na kisalu ya Yehowa ke tendula ve mambu mingi yina beto me salaka na kisalu na yandi. Beto ke monisaka nde beto me kudipesa ya mvimba ntangu beto ke vandaka ti mabanza ya mbote mpi ke sadilaka Nzambi na kiteso ya ngolo na beto. (Bakol. 3:23) Yehowa ke bakisaka bandilu na beto mpi ke lombaka beto ve mambu yina beto lenda kuka ve.—Mar. 12:43, 44. w19.08 3 § 6; 5 § 11-12

Yehowa ke sadilaka ‘bisalu ya mbote’ ya bansadi na yandi sambu na kubenda bantu na dibundu na yandi. (Mat. 5:14-15; 1 Pie. 2:12) Kana nkwelani na nge kele ve Mbangi ya Yehowa, bingisaka yandi na balukutakanu. (1 Bak. 14:24, 25) Beto ke tulaka ntima nde kilumbu kele bantu yonso ya dibuta na beto ta kuma Bambangi ya Yehowa. Kansi, ata beto ke sala bikesa na kusadisa bo na kusadila Nzambi, bankaka lenda buya. Kana yo kele mutindu yina, beto lenda kudiyangisa ve mingi sambu na lukanu na bo yina. Sambu beto lenda pusa ve muntu na ngolo na kundima balukwikilu na beto. Kana bantu ya dibuta na beno ke mona mutindu nge kele na kiese sambu nge ke sadilaka Nzambi, yo lenda pusa bo mpi na kusadila yandi. Sambaka sambu na bo, tubilaka bo na mawete mpi landa kusadisa bo. (Bis. 20:20) Tula ntima nde Yehowa ta sakumuna bikesa na nge. Kana bo wila nge, bo ta guluka! w19.08 18-19 § 15-17

Inki Yezu zolaka kutuba? Yandi zolaka kutuba nde beto fwete vanda ti luzingu ya kukonda mindondo to kutula dikebi na lukanu mosi mpamba kansi ve na mambu yina lenda katula beto dikebi. Yezu pesaka mbandu sambu yandi tulaka kisalu ya kusamuna na kisika ya ntete mpi longaka balongoki na yandi na kutula dikebi kaka na kusadila Yehowa mpi Kimfumu na yandi. Beto ke landaka mbandu ya Yezu kana beto ke tula kisalu ya kusamuna na kisika ya ntete, disongidila ‘kulanda kusosa ntete Kimfumu ti lunungu ya Nzambi.’ (Mat. 6:33) Mutindu ya mbote ya kudipesa na kisalu ya kusamuna kele kuvanda ti luzingu ya kukonda mindondo sambu beto zwa ntangu ya kusadisa bantu ya nkaka na kuzaba mpi kuzola Yehowa. Mu mbandu, keti beto lenda yidika manaka ya kisalu na beto ya kinsuni sambu beto samuna mingi konso mposo? Keti beto lenda fiotuna bansaka yina ke bakaka beto ntangu mingi? w19.04 5-6 § 12-13

Na bamvula me luta, mikumba ya bampangi mingi yina me sadilaka Yehowa bamvula mingi sobaka. Yo vandaka mpasi sambu bampangi yai kundima bansoba yango. Yo kele pwelele nde bo vandaka kuzola mingi kisalu na bo yina ya ntama, mingi na kati na bo, salaka bamvula mingi. Bampangi ya nkaka waka “mawa mingi” mpi yo vandaka ve pete sambu bo yikama ti bansoba yai. Na nima ya bantangu, bo yikamaka. Sambu na nki? Sambu bo ke zolaka Yehowa mingi. Bo bakisaka nde bo kudipesaka na Nzambi kansi ve na kisalu, na kiyeka to na mukumba mosi buna. (Bakol. 3:23) Na kudikulumusa yonso, bo kele na kiese ya kulanda kusadila Yehowa na konso kisalu yina. Bo ‘losilaka yandi basusi na bo yonso,’ sambu bo zabaka nde yandi ke kudibanzaka sambu na bo. (1 Pie. 5:6, 7) Kana beto yedisa kikalulu ya kudikulumusa, yo ta natila beto mosi mpi bampangi ya nkaka mambote. Yo ta sadisa beto na kuyikama ti bansoba ya luzingu. Diambu ya kuluta mfunu kele nde beto ke kumaka banduku ya Tata na beto ya zulu. w19.09 6-7 § 15-17

Yehowa pesaka Davidi kiyeka ya kuvanda mfumu ya dibuta na yandi mpi ya dikanda ya mvimba ya Izraele. Ntotila Davidi vandaka ti kiyeka mingi. Bantangu ya nkaka, yandi sadilaka kiyeka na yandi na mutindu ya mbi mpi salaka bifu ya nene. (2 Sam. 11:14, 15) Yandi lemfukilaka Yehowa mpi ndimaka ndola yina Yehowa pesaka yandi. Yandi kangudilaka Yehowa ntima na kisambu. Davidi salaka yonso na kulemfuka na bandongisila ya Yehowa. (Nk. 51:1-4) Diaka, yandi kudikulumusaka na kundima bandongisila yina babakala ti bankento pesaka yandi. (1 Sam. 19:11, 12; 25:32, 33) Davidi bakaka dilongi na bifu na yandi mpi sadilaka Yehowa luzingu na yandi ya mvimba.Yandi zabaka nde kulemfukila Yehowa ke nataka mambote mingi. Bubu yai, beto ke monaka luswaswanu na kati ya bantu yina ke lemfukilaka Yehowa ti bayina ke buyaka bandongisila na yandi ya zola. Bantu yina ke lemfukilaka Yehowa “ta tula milolo ya kiese sambu ntima na bo ta vanda mbote.”—Yez. 65:13, 14. w19.09 17 § 15; 19 § 21

Na 1935, Bambangi ya Yehowa bakisaka pwelele kimvuka ya nene ya bantu yina Yoane monaka na mbona-meso. Bo bakisaka nde kimvuka ya nene ya bantu ta kwenda ve na zulu sambu na kutelema kaka “na ntwala ya kiti ya kimfumu mpi na ntwala ya Mwana-Dimeme.” Kansi kutuba yai vandaka ya kifwani. Ata kimvuka ya nene ya bantu ta zinga na ntoto, bo lenda telema “na ntwala ya kiti ya kimfumu” sambu bo ke ndimaka kiyeka ya Yehowa mpi ke lemfukaka na luyalu na yandi. (Yez. 66:1) Bo lenda telema na “ntwala ya Mwana-Dimeme” sambu bo ke kwikilaka na kimenga ya Yezu. Ngindu yango kele mpi na Matayo 25:31, 32, yina ke tuba nde “makanda yonso” ti bantu ya mbi, ta ‘vukana na ntwala’ ya kiti ya kimfumu ya Yezu. Yo kele pwelele nde, makanda yai yonso, kele ve na zulu kansi na ntoto. Bantendula yai ya mpa vandaka mbote. Yo ke monisa kikuma yina Biblia ke tuba ve nde kimvuka ya nene ta kwenda na zulu. Kaka bantu 144 000 yina kele ti lusilu ya kubaka luzingu ya kukonda nsuka na zulu ta vanda “bantotila” mpi ta yala ti Yezu.—Kus. 5:10. w19.09 28 § 9

Yehowa ke lomba bansadi na yandi na kukabwana ti Babilone ya Nene. Kansi, yo ke lombaka kusala mambu mingi. Lukanu na beto fwete vanda ya kunwanina dibundu ya kieleka disongidila lusambu ya bunkete ya Yehowa. Beto lenda sala yo na mitindu zole. Ya ntete, beto fwete kangama kaka na bansiku ya lunungu ya Yehowa. Beto fwete buya bikalulu ya mbi ya nsi-ntoto mpi bansiku na yo. Mu mbandu, beto fwete ndima ve kuvukisa nitu ya mitindu yonso yina Biblia ke buyisa, bonso makwela ya babakala ti babakala to bankento ti bankento mpi mutindu ya nkaka ya mbi ya kuvukisa nitu. (Mat. 19:4, 5; Bar. 1:26, 27) Ya zole, beto fwete landa kuvukana ti bampangi. Beto ke vukanaka na Banzo ya Kimfumu, na banzo ya bampangi to na kinsweki. Yo vanda beto ke kutana ti mambu ya nki mutindu, beto ta yambula ve kikalulu na beto ya kukwenda na balukutakanu. Ya kieleka, beto fwete vukanaka “diaka mingi kuluta sambu [beto] ke mona kilumbu ke finama.”—Baeb. 10:24, 25. w19.10 16 § 6-7

Yehowa ke zolaka nde beto sepela ti luzingu mpi bansaka lenda sadisa beto na kuvanda na kiese. Nkutu Ndinga ya Nzambi ke tuba nde: “Kima ya kuluta mbote sambu na muntu kele ve, katula kaka kudia, kunwa, mpi kuwa kiese sambu na kisalu na yandi ya ngolo.” (Lon. 2:24) Kansi, bansaka mingi lenda bebisa kinduku na beto ti Nzambi. Yo ke bebisaka bikalulu ya mbote ya bantu mpi ke pusaka bantu na kundima to kuzola mambu yina Nzambi ke buyaka. Beto ke zolaka kukangama kaka na Yehowa, yo yina beto fwete dia ve na “mesa ya Yehowa” mpi na “mesa ya bademo.” (1 Bak. 10:21, 22) Kudia ti muntu ke tendulaka mbala mingi kinduku. Kana beto ke pona bansaka yina ke pusaka bantu na kusala mubulu, kindoki, mansoni to banzala ya nkaka ya kinsuni, yo ta monisa nde beto ke dia madia na mesa ya bademo. Yo ta bebisa kimuntu na beto mpi kinduku na beto ti Yehowa. w19.10 26 § 2; 29-30 § 11-12

Kana muntu yina ke nata maswa ke zola nde mupepe kutwadisa yandi, yandi fwete sala mambu zole. Ya ntete, yandi fwete nata maswa na nzila yina mupepe ke bula. Kana yandi me nata ve maswa na nzila yina mupepe ke bula, maswa ta kwenda ve. Ya zole, yandi fwete telemisa mpi kukangula kibeni bilele ya maswa. Ya kieleka, ata mupepe ke bula, maswa ta kwenda kaka kana mupepe me fuluka na bilele na yo. Kiteso mosi, beto ta landa kusadila Yehowa kana mpeve santu ke sadisa beto. Sambu mpeve santu kusadisa beto, beto fwete sala mambu zole. Ya ntete, beto fwete sala mambu yina mpeve santu ya Nzambi ke lombaka bansadi na yandi na kusala. Ya zole, beto fwete “kangula kibeni bilele na beto,” disongidila beto fwete sadila Yehowa na ngolo na beto yonso. (Nk. 119:32) Mpeve santu ta sadisa beto na kununga mbangika mpi na kukanga ntima na bampasi; yo ta sadisa beto mpi na kulanda kusadila Yehowa na kwikama yonso. w19.11 9 § 8; 10 § 11

Na kilumbu ya nsuka ya luzingu ya Yezu na ntoto, yandi kumaka kisaka-saka. Yandi zabaka nde ntama mingi ve bantu ya mbi ta fwa yandi. Ata mpidina, yandi kudiyangisaka ve sambu na yo. Yandi vandaka kuzola Tata na yandi mingi mpi zolaka kusepedisa yandi. Yezu zabaka nde kana yandi bikala ya kwikama na bampasi yina vandaka kukinga yandi, yandi ta kumisa zina ya Yehowa. Diaka, Yezu zolaka bantu mpi zabaka nde beto ta baka luzingu ya mvula na mvula kana yandi bikala ya kwikama tii na lufwa. Ata Yezu vandaka na mpasi ya ngolo, yandi vandaka na ngemba. Sambu yandi vandaka nduku ya ngolo ya Yehowa, yandi vandaka ti “ngemba ya Nzambi,” disongidila ngemba ya mabanza. Yo taninaka mabanza mpi ntima ya Yezu. (Bafil. 4:6, 7) Ata muntu mosi ve ta kutanaka ti bampasi yina Yezu kutanaka ti yo kansi bantu yonso yina ke landa yandi ta kutana ti bampasi. (Mat. 16:24, 25; Yoa. 15:20) Bonso Yezu, beto lenda kuma mpi kisaka-saka bantangu ya nkaka. w19.04 8 § 1-3

Beto lenda kudiyula nde: ‘Keti mono ke vandaka na kiese ya kuvanda na kitini ya organizasio ya Yehowa yina kele awa na ntoto?’ Bubu yai, Yehowa ke monisaka pwelele nde yandi ke sakumunaka bansadi na yandi. (1 Bate. 5:18) Inki mutindu beto lenda pesa maboko na organizasio yina Yehowa ke sadila? Kana beto ke sadila mambu yina beto ke longuka na Biblia, na mikanda na beto, na balukutakanu ya dibundu, ya nziunga mpi ya distrike. Diaka, beto ke pesaka maboko na organizasio ya Yehowa ntangu beto ke salaka mingi na kisalu ya kusamuna mpi ya kulonga. (1 Bak. 15:58) Beto ke zolaka nde Yehowa kundima bimenga na beto. Beto ke sadilaka Yehowa sambu beto ke zolaka kupesa yandi matondo. Bika beto landa kupesa Yehowa bima na beto ya kuluta mbote sambu beto ke zolaka yandi na ntima ya mvimba. Beto fwete pesa maboko na ntima ya mvimba na organizasio yina Yehowa ke sakumuna bubu yai. Kana beto ke sala mutindu yai, beto ta monisa Yehowa nde beto ke sepelaka ti dibaku yina beto kele na yo ya kusadila yandi mpi ya kuvanda Bambangi na yandi. w19.11 25 § 17-18

Yandi zolaka ve kutuba nde beto ta sala bimangu bonso yandi. Kansi, yandi zolaka kumonisa nde balongoki na yandi ta samuna mpi ta longa nsangu ya mbote na bisika mingi, na bantu mingi mpi na nsungi ya bamvula mingi kuluta yina yandi salaka. Kana nge ke salaka kisalu ya kinsuni, kudiyula bangiufula yai: ‘Keti na kisalu bantu ke zabaka nde mono ke salaka ngolo?’ Keti mono ke manisaka kisalu na mono na ntangu ya mbote mpi ke salaka yo mbote? Kana mvutu kele nde ee, ntembe kele ve nde mfumu na nge ya kisalu ta tudila nge ntima. Diaka, bantu yina nge ke salaka ti bo lenda sepela kuwa nsangu ya mbote. Na yina me tala kisalu ya kusamuna mpi ya kulonga, kudiyula nde: ‘Keti mono ke samunaka ngolo? Keti mono ke kudibongisaka mbote na ntwala sambu na kusolula mbote ti muntu na mbala ya ntete? Keti mono ke vutukilaka nswalu bantu yina ke sepelaka ti nsangu? Keti mono ke samunaka mbala na mbala na mitindu ya kuswaswana?’ Kana mvutu kele nde ee, nge ta sepela na kisalu na nge. w19.12 5 § 14-15

Bankwelani yina me baka lukanu ya kubuta fwete tadila mambu yai zole ya mfunu: Ya ntete, inki ntangu bo ta buta? Ya zole, bana ikwa bo ta buta? Inki kele ntangu ya mbote yina bankwelani lenda solula mambu yai? Sambu na nki mambu yai zole kele mfunu mingi? Yo kele mbote nde bantu yina ke zola kukwelana kusolula mambu ya me tala kubuta na ntwala nde bo kwelana. Sambu na nki? Sambu yo kele mfunu mingi nde bo zole kuvanda ti ngindu mosi na yina me tala kubuta. Diaka, yo ta lomba nde bo tala kana bo kele ya kuyilama na kubuta. Bankwelani ya nkaka ke bakaka lukanu ya kubuta na nima ya mvula mosi to zole ya makwela na bo. Sambu bo ke zolaka kuzinga ntete bo zole mpi kuyikana mbote. Yo ke sadisaka bo na kukuma banduku ya ngolo sambu ntangu bo ta buta, dikebi ya mingi ta kuma na kusansa bana. w19.12 23 § 4-5

Bubu yai, bansadi mingi ya Yehowa ke kutana ti bampasi ya ngolo. Bampangi mingi ke belaka maladi ya ngolo to bo me fwisaka bantu yina bo vandaka kuzola mingi. Bankaka kele na mpasi ya ngolo sambu muntu ya dibuta na bo to nduku na bo me yambula kusadila Yehowa. Bampangi ya nkaka ke kutana ti bampasi ya bisumbula ya lugangu. Bampangi yai yonso kele ti mfunu ya kikesa. Inki mutindu beto lenda sadisa bo? Beto fwete vanda banduku ya mbote. Banduku ya kwikama ke salaka bibansa sambu na kusadisa bampangi na bo. Mu mbandu, munganga mosi songaka mpangi Peter nde yandi ke bela maladi mosi ya ngolo yina ta nata yandi na lufwa. Kathryn, nkento na yandi ke tuba nde: “Mpangi mosi ti nkento na yandi fidisaka beto na munganga, kilumbu yina bo songaka Peter nde yandi kele ti maladi ya ngolo. Bampangi yina tubaka nde bo ta yambula beto ve mpi bo vandaka ti beto ntangu yonso yina beto vandaka ti mfunu ya lusadisu na bo.” Yo kele kiese na kuvanda ti banduku ya mutindu yai, yina lenda sadisa beto na bantangu ya mpasi. w20.01 8 § 1; 9 § 5; 10 § 6

Kana nge vandaka ti balongoki yina vukanaka na shambre ya zulu na Pantekoti ya mvu 33 ya ntangu na beto, nge zolaka kubakisa pwelele nde Nzambi me tula nge mafuta na mpeve santu. (Bis. 2:5-12) Keti Bakristu yonso yina bo ke tulaka mafuta na mpeve santu ke monaka bidimbu ya kuyituka mpi bo ke tulaka bo yonso mafuta na mutindu mosi? Ve. Beto tubila ntangu yina Nzambi lenda tula muntu mafuta. Na Pantekoti ya mvu 33 ya ntangu na beto, Nzambi tulaka ve kaka Bakristu kiteso ya 120 yina vukanaka na shambre yina ya zulu mafuta na mpeve santu. Kaka na kilumbu yina na nima, Nzambi tulaka mpi Bakristu ya nkaka kiteso ya 3 000 mafuta na mpeve santu. Yandi tulaka bo mafuta ntangu bo bakaka mbotika. (Bis. 2:37, 38, 41) Kansi na bamvula yina landaka, Nzambi vandaka ve kutula Bakristu yonso mafuta kaka na ntangu ya mbotika. Mu mbandu, Nzambi tulaka bantu ya Samaria mafuta ntangu fioti na nima ya kubaka mbotika. (Bis. 8:14-17) Nzambi tulaka Korneye mpi bantu ya nzo na yandi mafuta na mutindu mosi ya me swaswana, na ntwala nde bo baka mbotika.—Bis. 10:44-48. w20.01 20-21 § 2-4

Na Baevanzile iya, Yezu bingaka Yehowa nde “Tata” mbala kiteso ya 165. Sambu na nki? Sambu yandi zolaka nde bantu kundima nde Yehowa kele Tata ya zola. (Yoa. 17:25) Beto tadila dilongi yina beto lenda baka na mutindu Yehowa vandaka kusadila Yezu, Mwana na yandi mambu. Ntangu yonso, Yehowa vandaka kuwa bisambu ya Yezu mpi yandi vandaka kupesa mvutu. (Yoa. 11:41, 42) Ata Yezu kutanaka ti bampasi, yandi vandaka kundima nde Tata na yandi ke zolaka yandi mpi vandaka kusadisa yandi. (Luka 22:42, 43) Yehowa Tata ya zola, sadisaka Yezu na kubakisa nde yandi vandaka kutanina yandi. (Mat. 26:53; Yoa. 8:16) Yehowa taninaka ve Yezu na bampasi yonso kansi yandi sadisaka Yezu na kukanga ntima na bampasi. Yezu zabaka nde bampasi yonso yina yandi kutanaka ti yo vandaka sambu na ntangu fioti. (Baeb. 12:2) Yehowa monisaka nde yandi vandaka kuzola Yezu ntangu yandi vandaka kuwidikila Yezu, kupesa yandi bima yina yandi vandaka na yo mfunu, kulonga yandi mpi kusadisa yandi.—Yoa. 5:20; 8:28. w20.02 3 § 6-7, 9

Ntangu beto ke baka lukanu ya kuvukana na diambu to na nsiku mosi buna, beto fwete yindula mutindu lukanu na beto ta vanda ti bupusi na kansansa ya bantu ya nkaka, mingi-mingi bampangi-Bakristu. Beto fwete budisa bo ve sakuba ata fioti. (Mar. 9:42) Diaka, beto ke zolaka ve kulwadisa bantu yina kele ve Bambangi ya Yehowa. Zola ta sadisa beto na kusolula ti bo na luzitu yonso sambu na kupesa Yehowa nkembo. Ya kieleka, beto ta zola ve kuswana ti bantu to kuvweza bansiku na bo. Kuvila ve nde zola kele ngolo. Kana beto kele mawete mpi luzitu, beto ta lembika ntima ya bambeni. Bika bantu yonso kuzaba nde nge kele Mbangi ya Yehowa. (Yez. 43:10) Nge ta nunga mambu ya nkaka kukonda mpasi kana bantu ya dibuta to bantu ya ke zingaka pene-pene na nge ke zaba nde nge ke sambilaka Yehowa. Beto fwete wa ve nsoni sambu na kunwanina kieleka ya me tala lufwa.—Bar. 1:16. w19.04 17-18 § 14-16

Polo kumaka ve Mukristu ntangu mosi ti bantumwa 12 yina vandaka kutambula ti Yezu. Yandi kumaka Mukristu na nima ya lufutumuku ya Yezu. Ata na nima ntumwa Polo kumaka “ntumwa ya makanda,” mukumba ya bantumwa 12 ya Yezu lutaka mukumba na yandi. (Bar. 11:13; Bis. 1:21-26) Polo sepelaka ti mukumba yina yandi vandaka na yo na kisika ya kuwila bantumwa 12 kimpala mpi kulula kinduku ya ngolo yina bo vandaka na yo ti Yezu. Kana beto ke sepela ti bima yina beto kele na yo mpi ke monisa kudikulumusa, beto ta vanda bonso Polo mpi ta monisa luzitu sambu na kiyeka yina Yehowa me pesaka bantu ya nkaka. (Bis. 21:20-26) Yehowa ke ponaka bampangi yina ke twadisaka dibundu na yandi. Ata bo kele ti bifu, Yehowa ke monaka nde bo kele “makabu.” (Baef. 4:8, 11) Kana beto ke zitisa bampangi yai mpi ke lemfuka na kudikulumusa yonso na lutwadisu na bo, kinduku na beto ti Yehowa ta vanda ngolo mpi dibundu ta vanda na ngemba. w20.02 17 § 13-14

Na ntwala ya kulonguka Biblia ti Bambangi ya Yehowa, mbala ya nkaka nge vandaka kuzola Biblia mingi. Mbala ya nkaka nge vandaka kuzola mpi Yezu mingi. Na nima ya kulonguka Biblia ti Bambangi ya Yehowa, ntembe kele ve nde nge me kumaka kusepela mingi ti bo. Kansi mambu yai ya nge ke zolaka ta pusa nge mpenza ve na kudipesa na Yehowa mpi kubaka mbotika. Kima ya ntete yina ta pusa nge na kubaka mbotika kele zola na nge sambu na Yehowa Nzambi. Kana nge ke zola Yehowa mingi kuluta bima yonso, nge ta bika ve nde kima to muntu mosi kukanga nge nzila ya kusadila yandi. Zola na nge sambu na Yehowa ta pusa nge na kubaka mbotika mpi na kulanda kusadila Yehowa mbote na nima ya mbotika. Yezu tubaka nde beto fwete zola Yehowa na ntima na beto ya mvimba, na moyo na beto ya mvimba, na mabanza na beto yonso mpi na ngolo na beto yonso. (Mar. 12:30) Inki lenda sadisa nge na kuzola Yehowa mpi kuzitisa yandi mingi mutindu yina? Kana beto ke yindula zola yina Yehowa ke monisilaka beto, yo lenda pusa beto na kukuma mpi kuzola yandi. w20.03 4 § 4-5

Inki beto fwete sala sambu na kusamuna mbote? Sambu na kusamuna mpi kulonga mbote, beto fwete kudipesa mingi na kisalu ya kusamuna mpi ya kulonga. Kansi, yo ke lombaka mambu mingi kuluta ntangu yina beto ke lutisaka na kisalu yango. Yehowa ke bakaka na mbalu bikuma yina ke pusaka beto na kusamuna. Zola sambu na Yehowa mpi sambu na bantu ke pusaka beto na kusamuna na ntima ya mvimba. (Mar. 12:30, 31; Bakol. 3:23) Kusadila Nzambi na ntima ya mvimba ke tendula kudipesa mpi kusadila ngolo na beto na kisalu na yandi. Kana beto ke baka na mbalu kisalu ya kusamuna, beto ta longa bantu mingi nsangu ya mbote. Mambu ya nkaka lenda kanga beto nzila ya kusamuna mingi. Kansi beto ke zolaka kusamuna. Beto ke salaka ngolo na kuyedisa mayele na beto na kisalu ya kusamuna sambu na kusimba bantima ya bantu. Beto ke tulaka kisalu ya kusamuna na kisika ya ntete. w19.04 2 § 3; 3 § 4, 6

Luvunu ya Satana me yikaka mpasi na luzingu ya bantu. Ziku bantu lenda songa bibuti yina me fwisa mwana na bo nde Nzambi me baka yandi mpi me kumisa yandi wanzio. Keti luvunu yai ke lembikaka bo to ke yikaka bo mpasi? Diaka, bo vandaka kulonga dilongi ya luvunu ya bilungi ya tiya sambu na kumonisa mpasi yina bantu ta mona, mu mbandu kusosa kundimisa bantu nde bantu yina ke telemina malongi ya nzo-nzambi, bo ta yoka bo tiya na zulu ya nti. Mukanda mosi ya ke tendula bampasi yina Bamfumu ya mabundu ya Espania vandaka kupesa bantu ntangu bo vandaka kuyoka bantu na tiya ke tuba nde, bamfumu yina vandaka kuyindula nde yo ta sadisa bantu na kumona na ntwala “mutindu mpasi ya bilungi ya tiya ya kimakulu ta vanda” sambu bo balula ntima na ntwala ya kufwa mpi bo guluka na bilungi ya tiya. Na bansi mingi bantu ke sambilaka ba-nkaka na bo yina me fwaka, ke pesaka bo lukumu mpi ke sosaka lusadisu na bo. Bantu ya nkaka ke zolaka kulembika ba-nkaka na bo sambu ba-nkaka kupesa bo ve ndola. Diambu ya mawa kele nde malongi yai ya luvunu ya Satana ke lembikaka ve bantu. Kansi yo ke pesaka bo boma mpi basusi ya kukonda mfunu. w19.04 14 § 1; 16 § 10