Februari

Na Biblia, ngogo “lunungu” ke tendula kusala mambu yina kele mbote na meso ya Nzambi mpi kusala yo kukonda kupona-pona. Yindula mutindu mambu yina Yezu salaka monisaka lunungu. Na bilumbu ya Yezu, bamfumu ya mabundu ya Bayuda vandaka kumenga bantu yina vandaka ve Bayuda, bo vandaka kuvweza bantu ya nkaka mpi bo vandaka kuzitisa ve bankento. Kansi Yezu vandaka kusadila bantu yonso mambu ya mbote mpi kukonda kupona-pona. Yandi ndimaka bantu yina vandaka ve Bayuda, yina monisaka lukwikilu na kulanda yandi. (Mat. 8:5-10, 13) Yandi longaka bantu yonso kukonda kupona-pona, yo vanda bansukami to bamvwama. (Mat. 11:5; Luka 19:2, 9) Yandi vandaka ve makambu ngolo to kuvweza bankento. Kansi, yandi vandaka mawete mpi vandaka kuzitisa bankento, ata bayina bantu vandaka kumona mpamba. (Luka 7:37-39, 44-50) Beto ta landa mbandu ya Yezu kana beto ke sadila bantu ya nkaka mambu kukonda kupona-pona mpi ke longa bantu yonso yina ke zola kuwidikila disongidila kukonda kutadila kimvwama to kinsukami na bo mpi mabundu na bo. Bampangi-babakala ke landaka mbandu ya Yezu ntangu bo ke zitisaka bankento. Kana beto ke sala mutindu yai, beto ke lemfuka na nsiku ya Kristu. w19.05 2 § 1; 5 § 15-17

Bubu yai mpi bankuluntu ya kwikama fwete vanda mawete, kusadila bangogo ya mbote ntangu bo ke sadila Biblia sambu na kupesa kikesa na bantu yina kele na mfunu na yo. Keti bankuluntu mpamba fwete pesa kikesa na bana yina bo me bebisaka? Ve. Beto yonso kele ti mukumba ya ‘kulanda kupesana kikesa.’ (1 Bate. 4:18) Mingi-mingi bampangi-bankento ya kuyela na kimpeve fwete pesa kikesa na bampangi-bankento yina kele na mfunu yo. Ya kieleka, Yehowa Nzambi kele bonso mama yina ke lembikaka mwana na yandi. (Yez. 66:13) Biblia kele ti bambandu ya bankento yina pesaka kikesa na bantu yina vandaka na mpasi. (Yobi 42:11) Yehowa ke vandaka na kiese ntangu bampangi-bankento ya kuyela na kimpeve ke pesaka kikesa na bampangi-bankento yina ke niokwama na mabanza. Ziku, na kingenga nkuluntu mosi to bankuluntu zole lenda lomba mpangi-nkento mosi ya kuyela na kimpeve na kusadisa mpangi-nkento mosi yina ke niokwama. Ya kieleka, beto fwete kudikotisa ve na mambu yina bampangi ke zola ve kutuba.—1 Bate. 4:11. w19.05 16-17 § 10-12

Na ntwala nde komite ya kusambisa kusalama, sambu na nki bankuluntu fwete baka banzikisa ya bambangi zole? Sambu yo kele mambu yina Biblia ke lombaka. Kana nsumuki me tuba ve masonga, bankuluntu fwete lomba bambangi zole na kutuba mutindu mambu salamaka sambu yo sadisa bo na kuzenga makambu. (Kul. 19:15; 1 Tim. 5:19) Kana yandi me buya, bankuluntu fwete ndima mambu yina bambangi me tuba. Kana bambangi kele zole, ya ntete me funda mpi ya zole me ndimisa diambu yango, bankuluntu fwete sala komite ya kusambisa. Kana mbangi mosi kele ve, yo ke tendula ve nde mbangi yina ya nkaka me kusa. Ata bambangi zole ve ta tuba diambu yango, bankuluntu lenda zaba nde disumu ya nene salamaka. Bankuluntu ta lembika bantu yina bo me pesa mpasi mpi bo fwete tanina dibundu na bantu yina ke vukisaka nitu ti bana.—Bis. 20:28. w19.05 11 § 15-16

Yo kele mfunu nde bibuti kulonga bana mutindu ya kulonguka. Bo fwete zaba mutindu ya kuyidika balukutakanu to mutindu ya kusala bansosa sambu na ngiufula mosi yina bo me yula bo na nzo-nkanda. (Baeb. 5:14) Kana bo ke longuka na nzo, bo ta bakisa malongi yina bo ta longa na balukutakanu ya dibundu to ya nene. Ya kieleka, nda ya malongi fwete wakana ti bamvula mpi mayele ya konso mwana. Beto fwete longa mpi balongoki na beto ya Biblia mutindu ya kulonguka. Beto ke sepelaka kumona bo ke tenda bamvutu ntangu bo ke yidika kulonguka na bo to balukutakanu ya dibundu. Kansi, beto fwete longa balongoki na beto mutindu ya kusala bansosa mpi ya kulonguka na mudindu. Mpidina ntangu bo ta kutana ti diambu ya mpasi, bo ta zaba bo mosi mutindu ya kusala bansosa na mikanda na beto sambu na kuzwa bandongisila ya mfunu. w19.05 26 § 2; 28 § 10-11

Lukanu ya Satana kele ya kusoba mabanza na beto. Yandi ke sadilaka malongi ya mutindu na mutindu sambu na kubebisa kieleka ya Ndinga ya Nzambi. Satana ke sadilaka bangiufula bonso yina yandi yulaka Eva na kilanga ya Edeni nde: “Keti Nzambi tubaka kibeni nde . . . ?” (Kuy. 3:1) Na nsi ntoto yai ya Satana ke yala, beto ke waka bantu mingi ke kudiyula nde: ‘Keti Nzambi ke buyaka kibeni nde babakala to bankento kukwelana bo na bo? Keti Nzambi ke buyaka kibeni nde bantu kusala nkinsi ya lubutuku mpi ya kilumbu ya kubutuka? Keti Nzambi ke buyaka kibeni nde beno vutula ve menga? Keti Nzambi ya zola ke buyisaka beno kibeni na kukangama ve ti bantu yina bo me basisaka na dibundu?’ Beto fwete ndima mambu yina beto ke kwikilaka. Kana beto ke bika na mabanza bangiufula yina ke meka lukwikilu na beto, beto ta kuma ti baketi-keti. Baketi-keti yango lenda bebisa mabanza mpi lukwikilu na beto. w19.06 12-13 § 15-17

Yehowa ke zolaka beto mingi. (Yoa. 3:16) Beto fwete landa mbandu ya zola ya Tata na beto. Yo yina beto fwete ‘kuditula na kisika ya bankaka, kumonisa zola ya kimpangi, mawa ya nene, mpi kudikulumusa’ na bantu yonso kansi mingi-mingi na “bampangi na beto na lukwikilu.” (Bag. 6:10) Kana bampangi ke kutana ti bampasi, beto fwete sadisa bo. Inki mutindu beto lenda lembika nkwelani yina me fwisa? Kima ya ntete ya mfunu kele kusolula ti yandi ata yo ta vanda mpasi to nge ta konda kima ya kutuba. Paula, yina bakala na yandi fwaka na kintulumukina ke tuba nde: “Mono me bakisaka nde lufwa ke kumisaka bantu kisaka-saka. Bo ke vandaka na boma nde mambu yina bo ta tuba lenda vanda mbi. Kansi kutuba ve ata kima kele mbi kibeni.” Ziku muntu yina me fwisa ke zolaka nde bo songa yandi kima mosi ya mbote. Paula ke tuba nde: “Mono ke sepelaka kana banduku kutuba kaka nde ‘yo me pesa beto mpasi.’” w19.06 20 § 1; 23 § 14

Kana bo me buyisa kisalu na beto, bankuluntu ta baka bangidika sambu balukutakanu kubenda ve dikebi ya bambeni. Bo lenda lomba nge na kuvukana na kimvuka mosi ya fioti mpi kusoba bantangu mpi bisika ya balukutakanu. Kisalu ya kusamuna ta salama na kutadila kisika yina beto ke zinga. Sambu beto ke zolaka Yehowa mpi ke zolaka kuzabisa bantu ya nkaka mambu ya Kimfumu na yandi, beto ta zwa dibaku ya kulonga. (Luka 8:1) Emily Baran, muntu ya ke longukaka mambu ya me lutaka tubaka sambu na Bambangi ya Yehowa yina kutanaka ti mbangika na Union soviétique nde: “Ntangu bamfumu songaka Bambangi na kuyambula kusamuna, bo yantikaka kulonga bantu ya ke zingaka pene-pene na bo, banduku ya kisalu mpi banduku na bo. Ntangu bo nataka bo na bisika ya bo ke sadisaka bantu bisalu ya ngolo, Bambangi kumaka kulonga bantu ya boloko.” Ata bamfumu buyisaka kisalu na beto kuna, bampangi yambulaka ve kusamuna. Nge lenda baka lukanu ya mutindu mosi. w19.07 11 § 12-13

Inki mutindu beto lenda sadisa bantu yina ke sambilaka ve na kuzola Nzambi mpi na kukuma balongoki ya Kristu? Beto fwete zaba nde mutindu muntu ke ndimaka nsangu na beto ke tadila kisika yina yandi yelaka. Mu mbandu, bantu ya Eropa ke ndimaka ve nsangu mutindu mosi ti bantu ya Asie. Sambu na nki? Sambu na Eropa bantu mingi ke zabaka mwa mambu ya Biblia mpi ke zabaka nde Nzambi muntu gangaka bima yonso. Kansi na Asie, bantu mingi ke zabaka mambu fioti to nkutu kima ve na yina me tala Biblia mpi ke kwikilaka ve na Ngangi. Vanda ti mabanza ya mbote. Konso mvula bantu yina ke sambilaka ve ke kumaka Bambangi ya Yehowa. Bantu mingi vandaka dezia ti bikalulu ya mbote kansi bo yambulaka kusambila sambu na bikalulu ya mbi ya bamfumu ya mabundu. Bankaka vandaka ti mwa bikalulu ya mbote kansi mingi na kati na bo vandaka ti bikalulu ya mbi mpi yo lombaka nde bo yambula yo. Yehowa ta sadisa beto na kuzwa bantu yina kele “ti nkadilu ya mbote sambu na kubaka luzingu ya mvula na mvula.”—Bis. 13:48; 1 Tim. 2:3, 4. w19.07 20-21 § 3-4

Yo vanda kivuvu na beto kele ya kuzinga mvula na mvula na zulu to na paladisu na ntoto, beto fwete landa kusala ngolo sambu na kubaka lufutu na beto. Yo vanda beto ke kutana ti konso diambu yina, beto fwete tala ve bima yina kele na nima mpi kubika ve nde ata kima mosi kukanga beto nzila ya kuyela na kimpeve. (Bafil. 3:16) Ata bivuvu na beto ke lungana ve nswalu, ata nitu kele diaka ngolo ve, ata beto me kangaka ntima na bampasi mpi na mbangika bamvula mingi, beto fwete “kudiyangisa ve sambu na konso kima yina.” Kansi beto zabisa Nzambi na kisambu mambu ya ke yangisa beto, ebuna yandi ta pesa beto ngemba yina beto yindulaka ve. (Bafil. 4:6, 7) Muntu ya ke bakaka ntinu ke salaka diaka ngolo ntangu yandi me kuma pene ya ndilu ya nsuka, beto mpi fwete tula dikebi mingi na lufutu yina beto ta baka na nsuka ya ntinu na beto sambu na luzingu. Na kiteso yina ngolo mpi luzingu na beto ke pesa nzila, beto fwete sala ngolo mpi kutula dikebi na mambu ya mbote yina kele na ntwala. w19.08 7 § 16-17

Beto lenda konda kima ya kutuba na ntwala ya mpangi yina me fwisa. Bantangu ya nkaka, mansanga na beto ke tubaka mambu mingi. Ntangu Lazare nduku ya Yezu fwaka, Maria, Marta mpi bantu ya nkaka dilaka sambu na mpangi mpi nduku na bo yina bo vandaka kuzola. Bilumbu iya na nima ntangu Yezu kumaka, yandi mpi “basisaka mansanga,” ata yandi zabaka nde yandi ta futumuna Lazare. (Yoa. 11:17, 33-35) Mansanga ya Yezu monisaka mutindu Tata na yandi kudiwaka. Maria ti Marta ndimaka nde Yezu vandaka kuzola dibuta na bo mpi ntembe kele ve nde yo pesaka bo kikesa. Mutindu mosi, kana bampangi ke bakisa nde beto ke zolaka bo, bo ta kudimona na kati ya bampangi yina ke zolaka bo mpi ke tudilaka bo dikebi. Bantangu ya nkaka beto fwete widikila bo na dikebi yonso. Kubuyisa ve mpangi na kutuba mambu yina kele na ntima na yandi mpi kuwa ve kiseku na “mambu ya mpamba-mpamba” yina yandi ke tuba. (Yobi 6:2, 3) Yo lenda vanda susi sambu bantu ya dibuta yina kele ve Bambangi ya Yehowa ke pusa yandi na kusala diambu mosi ya mbi. Yo yina samba ti yandi. Lomba “Muntu ya ke waka kisambu” na kupesa yandi ngolo mpi kusadisa yandi na kubakisa mambu pwelele.—Nk. 65:2. w19.04 18-19 § 18-19

Yo vanda beto ke salaka kisalu ya ntangu yonso na teritware to na Betele, beto ke zolaka mingi bantu mpi kisika yina beto ke salaka. Kana yo ke lomba nde beto katuka, beto ke waka mpasi mingi. Beto ke yambulaka bantu yina beto vandaka kuzola mingi, ke kudiyangisaka sambu na bo, mingi-mingi kana beto ke katuka sambu na mbangika. (Mat. 10:23; 2 Bak. 11:28, 29) Kusoba kisalu to kuyambula yo ke pesaka mpasi mingi sambu beto ta soba mutindu ya kuzinga. Bampangi yina kisalu me suka lenda kutana ti mpasi ya mbongo. Bo ke kudimonaka mfunu ve, ke kudiwaka kukonda lutaninu mpi ke lembaka nitu. Inki lenda sadisa bo? Kukwenda pene-pene na Yehowa. (Yak. 4:8) Inki mutindu bo lenda sala yo? Bo fwete tudila Yehowa ntima sambu yandi ke “waka kisambu.” (Nk. 65:2) Sambu Yehowa ke salaka “mingi kibeni kuluta mambu yonso yina beto ke lombaka to ke yindulaka.” (Baef. 3:20) Yandi ke pesaka beto mambu mingi kuluta yina beto ke lombaka sambu beto nunga bampasi mpi yandi lenda sala mingi kibeni kuluta yina beto yindulaka. w19.08 21 § 5-6

Bantu ya nkaka ke bingaka bitumba yina bantu ke nwana ti babombe to kisumbula mosi ya ngolo nde “Armagedoni.” Kansi Biblia ke tendula nde Armagedoni kele bitumba ya mbote yina ta nata kiese. (Kus. 1:3) Bitumba ya Armagedoni ta bebisa ve ntoto kansi yo ta gulusa bantu. Inki mutindu? Bitumba ya Armagedoni ta gulusa bantu ntangu yo ta fwa baluyalu ya nsi-ntoto. Bantu ya mbi ta fwa kansi bantu ya mbote ta guluka. Diaka, yo ta gulusa bantu na mutindu yo ta tanina ntoto sambu yo beba ve. (Kus. 11:18) Ngogo “Armagedoni” kele kaka mbala mosi na Masonuku mpi yo me katuka na ngogo mosi ya Kiebreo yina ke tendula “Ngumba ya Megido.” (Kus. 16:16; noti na nsi ya lutiti) Megido vandaka mbanza mosi na Izraele ya ntama. (Yoz. 17:11) Armagedoni kele ve kisika mosi na ntoto. Yo ke tendula ntete-ntete kuvukana ya “bantotila ya ntoto ya mvimba” sambu na kunwanisa Yehowa.—Kus. 16:14. w19.09 8 § 1-3

Nkento yina vandaka mpenza na mfunu ya kubeluka. Yandi kwendaka na minganga mingi sambu na kubeluka kansi na nima ya bamvula 12, yandi belukaka kaka ve. Na kutadila Nsiku, yandi vandaka mvindu. (Levi 15:25) Na nima yandi waka nde Yezu ke belula maladi yonso, yo yina yandi kwendaka na Yezu. Ntangu yandi monaka Yezu, yandi simbaka lele ya zulu ya Yezu mpi na mbala mosi yandi belukaka. Yezu sukaka ve kaka na kubelula nkento yina kansi Yezu vutulaka diaka lukumu na yandi. Mu mbandu, ntangu bo vandaka kusolula, Yezu bingaka yandi: “Mwana na mono.” Yo pesaka nkento yina ngolo mpi kikesa kibeni! (Luka 8:44-48) Simba nde nkento yina muntu salaka bikesa sambu na kukwenda na Yezu. Bubu yai, beto mpi fwete sala bikesa sambu na kukwenda na Yezu. Yezu ta sala ve kimangu sambu na kubelula bambefo yina ke kwenda na yandi. Kansi yandi ke lomba beto nde: “Beno kwisa na mono, . . . ebuna mono ta pesa beno kikesa.”—Mat. 11:28. w19.09 20 § 2-3

Profete Zekaria tubaka na ntwala diambu ya mutindu mosi. Yandi tubaka nde: “Na bilumbu yina bantu kumi ya bandinga yonso ya makanda ta simba, ee, bo ta simba ngolo mvwela ya Muyuda mosi, mpi bo ta tuba nde: ‘Beto ke zola kukwenda ti beno, sambu beto me wa nde Nzambi kele ti beno.’” (Zek. 8:23) Bambangi ya Yehowa bakisaka nde sambu na kuvukisa bantu ya bandinga yonso, bo fwete longa nsangu ya mbote na bandinga mingi. Bubu yai beto ke sala ngolo na kubalula mikanda na bandinga mingi. Ya kieleka, Yehowa ke vukisa kimvuka ya nene ya bantu ya makanda yonso na mutindu ya kuyituka. Beto ke tonda Yehowa sambu madia ya kimpeve kele na bandinga mingi mpi kimvuka ya nene ya me katuka na bisika mingi ke sambila yandi na bumosi. Bantu me zabaka mbote Bambangi ya Yehowa sambu bo ke samunaka na kikesa mpi ke zolaka bampangi na bo. Yo ke kumisa ngolo lukwikilu na beto!—Mat. 24:14; Yoa. 13:35. w19.09 30-31 § 16-17

Na mpasi ya nene, bantu ta wa mpasi mingi ntangu bo ta mona bima yina bo vandaka kutudila ntima ke beba mpi ke fwa. Bo ta wa “mpasi” ti boma ya ngolo sambu yo ta vanda nsungi ya kuluta mudidi ya luzingu ya bantu. (Sef. 1:14, 15) Na ntangu yina, yo ke monana kibeni nde luzingu ta vanda mpasi kuluta ata sambu na bansadi ya Yehowa. Sambu beto ke kotaka ve na mambu ya nsi-ntoto, ziku beto ta kutana ti bampasi, mu mbandu kukonda bima ya kuzingila. “Mpika ya kwikama mpi ya mayele” ke sadisaka beto smbu na mpasi ya nene beto bikala ya kwikama. (Mat. 24:45) Yandi ke salaka yo na mitindu mingi, mu mbandu: lukutakanu ya distrike ya 2016 tii 2018 yina kwisaka na ntangu ya me fwana. Lukutakanu yai siamisaka beto na kuyedisa bikalulu yina kele mfunu na ntangu yai ya kilumbu ya Yehowa me kuma pene-pene. w19.10 14 § 2; 16 § 10; 17 § 12

Kana beto me mina dezia madia, beto ke vandaka diaka ve ti kiyeka na madia yango, nitu yo mosi ke sadilaka yo mutindu yo me zola, bima ya ke tungaka nitu yina kele na madia ke kumaka bitini ya nitu na beto. Kana beto dia madia ya mbote, beto ta vanda ti sante ya mbote kansi madia ya mbi lenda bedisa beto. Beto ta bakisa kaka na nima ya bantangu mingi nde beto kele ti sante ya mbote to ve. Mutindu mosi mpi, beto kele ti kiyeka ya kupona bansaka, beto mosi ke ponaka bansaka yina beto ke zola. Kansi na nima, beto ke vandaka diaka ve ti kiyeka na mambu yina yo ta sala na luzingu na beto, bansaka ya mbote ta sadisa beto na kudiwa mbote kansi ya mbi ta bebisa bikalulu na beto. (Yak. 1:14, 15) Mbala ya nkaka, beto ta mona ve nswalu mambu ya mbi yina bansaka ya mbi ta sala na kimuntu na beto, kansi na nima ya bantangu yo lenda monana pwelele. Yo yina Biblia ke tuba nde: “Konso kima yina muntu ke kuna, yandi ta katula yo mpi; sambu muntu yina ke kuna sambu na nsuni na yandi ta katula lufwa na nsuni na yandi.” (Bag. 6:7, 8) Yo kele mfunu nde beto buya bansaka yonso ya mbi yina Yehowa ke mengaka.—Nk. 97:10. w19.10 30 § 12-14

Yehowa monisilaka beto zola ntangu yandi pesaka Mwana na yandi bonso kimenga. (Yoa. 3:16) Inki mutindu beto lenda monisa zola bonso Yehowa? Kana beto ke bakisa nde bampangi yonso kele mfunu mingi mpi ke yambaka na kiese yonso “dimeme yina me vila” ntangu yandi me vutukila Yehowa. (Nk. 119:176; Luka 15:7, 10) Beto ke monisaka nde beto ke zolaka bampangi ntangu beto ke sadisa bo kana bo kele na mfunu ya lusadisu. (1 Yoa. 3:17) Yezu lombaka balongoki na yandi na kumonisa zola ya kuditambika. (Yoa. 13:34, 35) Nsiku ya Yezu kele ya mpa sambu yo ke lombaka beto na kumonisa zola yina bantu ya Izraele ya vandaka na nsi ya Nsiku monisaka ve, disongidila beto fwete zola bampangi mutindu Yezu zolaka beto. Yo ke lombaka zola ya kuditambika. Beto fwete zola bampangi ata nkutu kuluta beto mosi. Beto fwete zola bo ata yo ke lomba nde beto fwa sambu na bo, mutindu Yezu salaka sambu na beto. w19.05 4 § 11-13

Sambu mpeve santu kusadisa beto, beto fwete dindamana na kulomba yo. (Luka 11:13) Kingana ya Yezu yina kele na Luka 11:5-9 ke sadisa beto na kubakisa sambu na nki Yehowa ta pesa beto mpeve santu. Muntu yina Yezu tubilaka na kingana vandaka na mfunu ya kuyamba mbote munzenza na yandi. Yo lombaka nde yandi pesa munzenza yina kwisaka na kati-kati ya mpimpa madia kansi yandi vandaka ve ti yo. Yezu tubaka nde nduku na yandi pesaka yandi sambu yandi landaka kaka kulomba madia. Inki Yezu zolaka kutuba? Kana muntu ya kukonda kukuka ndimaka kusadisa nduku na yandi yina dindamanaka, yo ke monisa nde Tata ya ntima-mbote yina kele na zulu ta sadisa beto kana beto ke landa kulomba yandi mpeve santu. Yo yina, beto fwete samba mpi kundima nde Yehowa ta pesa beto mpeve santu kana beto ke lomba yandi yo. (Nk. 10:17; 66:19) Beto fwete ndima nde beto ta nunga Satana ata yandi ke landa kunwanisa beto. w19.11 13 § 17-19

Yezu zabaka nde bantangu ya nkaka yandi ti bantumwa na yandi fwete pema. Kansi, bantu mingi na bilumbu ya Yezu mpi bubu yai kele bonso mvwama yina Yezu tubilaka na kingana na yandi. Mvwama yina kuditubilaka nde: “Kudiyangisa ve, dia, nwa, wa kiese.” (Luka 12:19; 2 Tim. 3:4) Yandi yindulaka nde mambu ya ntete mpi ya kuluta mfunu na luzingu kele kupema mpi biese. Kansi Yezu ti bantumwa na yandi vandaka kuyindula ve mutindu yina. Bubu yai, beto ke landaka mbandu ya Yezu. Na bilumbu yina beto ke kwendaka ve na kisalu, beto ke pemaka mpi ke bumbaka ntangu ya kusala mambu ya mbote bonso kulonga nsangu ya mbote mpi kukwenda na balukutakanu. Beto ke zabaka nde kisalu ya kukumisa bantu balongoki mpi kukwenda na balukutakanu kele mfunu mingi kuluta, yo yina beto ke salaka yonso sambu na kusala yo mbala na mbala. (Baeb. 10:24, 25) Ata beto kele na konzie, beto ke landaka kukwenda mbala na mbala na balukutakanu na konso kisika yina beto kele mpi beto ke sosaka mabaku ya kusolula ti bantu mambu ya Biblia.—2 Tim. 4:2. w19.12 7 § 16-17

Yehowa me pesaka beto nswa ya kubaka balukanu. Yandi ke longaka beto mutindu ya kubaka balukanu ya mbote mpi ke sadisaka beto na kulungisa balukanu yina ke sepedisaka yandi. (Nk. 119:173) Kana beto ke sadila mayele yina kele na Ndinga ya Nzambi, yo ta sadisa beto na kubaka balukanu ya mbote. (Baeb. 5:14) Ata beto me baka balukanu ya mbote, yo lenda vanda mpasi na kulungisa yo. Beto tadila bambandu yai: Leki mosi ya bakala me baka lukanu ya kutanga Biblia ya mvimba. Yandi me sala yo mwa bamposo kansi na nima yandi me yambula kutanga. Mpangi-nkento mosi me baka lukanu ya kukuma mupasudi-nzila ya ntangu yonso kansi yandi ke pusa kaka bilumbu ya kuyantika kusala kisalu yango. Kimvuka ya bankuluntu me baka lukanu ya kusala baviziti mingi ya kingungudi na bampangi ya dibundu kansi bo me lungisa yo ve. Bambandu yai ya beto me tubila awa me swaswana kansi yo ke wakana na diambu mosi. Diambu yango kele nde bampangi yai yonso lungisaka ve mbote balukanu na bo. w19.11 26 § 1-2

Yezu fwanisaka ntangu na beto ti “bilumbu ya Noa” mpi beto me zaba nde beto ke zinga na “bantangu ya mpasi mpi ya nku.” (Mat. 24:37; 2 Tim. 3:1) Yo yina, bankwelani ya nkaka me bakaka lukanu ya kuvingila ntete na ntwala ya kubuta sambu bo kudipesa mingi na kisalu ya Yehowa. Ntangu bankwelani ya mayele ke baka lukanu ya kubuta mpi ke tadila bana ikwa bo ta buta, bo ke ‘tadilaka mbongo yina yo ta lomba.’ (Luka 14:28, 29) Bankwelani yina kele ti bana ke tubaka nde kusansa bana ke lombaka mbongo mingi. Diaka, yo ke lombaka ntangu mpi ngolo. Yo yina, yo kele mfunu nde bankwelani kudiyula bangiufula yai: ‘Keti yo ta lomba nde beto zole kusala kisalu sambu na kulungisa bampusa ya dibuta na beto? Keti beto me zaba mambu yina dibuta na beto kele na yo kibeni mfunu? Kana beto zole kusala kisalu, nani ta tanina bana na beto? Nani ta zabisaka bo bangindu mpi ta longaka bo mutindu ya kusala mambu?’ Bankwelani yina ke tadilaka mbote bangiufula yai, ke sadilaka ndongisila yina kele na mukapu ya bubu. w19.12 23-24 § 6-7

Ntumwa Polo kutanaka ti mambu mingi ya mpasi. (2 Bak. 11:23-28) Yandi vandaka mpi kunwana ti “nsende na nsuni,” ziku maladi yina vandaka kuyangisa yandi. (2 Bak. 12:7) Diaka, yandi lembaka nitu ntangu Demasi, nduku na yandi ya kisalu yambulaka yandi “sambu [Demasi] zolaka ngidika yai ya bima.” (2 Tim. 4:10) Ata Polo vandaka Mukristu ya kikesa yina bo me tulaka mafuta mpi sadisaka bantu ya nkaka, bantangu ya nkaka yandi vandaka kulemba nitu. (Bar. 9:1, 2) Polo bakaka kikesa mpi lusadisu yina yandi vandaka na yo mfunu. Inki mutindu? Yo kele pwelele nde Yehowa sadilaka mpeve santu na yandi sambu na kupesa Polo kikesa. (2 Bak. 4:7; Bafil. 4:13) Yehowa sadilaka mpi Bakristu ya nkaka sambu na kupesa yandi kikesa. Polo tubaka nde banduku na yandi ya nkaka ya kisalu vandaka ‘lusadisu yina pesaka yandi kikesa.’ (Bakol. 4:11, noti na nsi ya lutiti.) Mu mbandu, Aristarke, Tisike mpi Marko. Bo pesaka Polo kikesa mpi sadisaka yandi na bantangu ya mpasi. w20.01 8 § 2-3

Yezu monisaka mpi nde muntu yina kele ve Mukristu ya bo me tulaka mafuta lenda bakisa ve mbote-mbote mutindu bo ‘ke butukaka mbala zole’ to ‘ke butukaka na mpeve.’ (Yoa. 3:3-8) Inki nsoba ke salamaka na mabanza ya Bakristu yina bo me tula mafuta? Na ntwala nde Yehowa kutula bo mafuta, bo vandaka ti kivuvu ya kuzinga mvula na mvula na ntoto. Bo vandaka kuvingila na kiese yonso ntangu yina Yehowa ta katula mambu yonso ya mbi na ntoto mpi ta kumisa ntoto Paladisu. Ziku bo vandaka kuyindula mutindu bo ta yamba mpangi to nduku na bo yina me fwaka. Ntangu Nzambi tulaka bo mafuta, mabanza na bo sobaka. Inki bo kumaka kuyindula? Yo ke tendula ve nde bo vandaka diaka ve kusepela ti kivuvu ya kuzinga mvula na mvula na ntoto. Bo sobaka ve mabanza na bo sambu bo kumaka kuniokwama na mabanza mpi na mawi. Bo kumaka ve kuyindula mbala mosi nde kuzinga mvula na mvula na ntoto ta vanda ve kitoko. Kansi Yehowa ke sadilaka mpeve santu na yandi sambu na kusoba mutindu na bo ya kuyindula mpi kivuvu yina bo vandaka kuzola. w20.01 22 § 9-11

Na nsi ya Nsiku yina Nzambi pesaka dikanda ya Izraele, bantu yina vandaka ti kiyeka vandaka kusambisa mambu ya kimpeve mpi mambu yina ke wakana ve ti lusambu ya Yehowa. Kansi na nsi ya “nsiku ya Kristu,” bankuluntu ke sambisaka kaka muntu yina me sala disumu. (Bag. 6:2) Bo ke zabaka nde Nzambi me pesaka bamfumu ya leta mukumba ya kusambisa mambu mpi bantu yina ke salaka mambu ya mbi. Bo ke zabaka mpi nde leta kele ti kiyeka ya kupesa muntu ndola to ya kutula yandi na boloko. (Bar. 13:2-4) Inki mutindu bankuluntu ke sambisaka muntu yina me sala disumu ya nene? Bo ke sadilaka Biblia sambu na kuzaba mambu mpi kubaka balukanu. Bo ke vilaka ve nde zola kele na kisina ya nsiku ya Kristu. Zola ke pusaka bankuluntu na kudiyula nde: Inki beto fwete sala sambu na kusadisa mpangi yina me sala disumu? Na yina me tala nsumuki, zola ke pusaka bankuluntu na kusosa kuzaba: Keti yandi me balula ntima? Keti beto lenda sadisa yandi na kuvutukila kinduku na yandi ti Yehowa? w19.05 7 § 23-24

Yezu zabaka nde Tata na yandi muntu salaka yandi mpi ke taninaka yandi, yo yina yandi tubaka mambu ya kele na mukapu ya bubu. Yezu tudilaka Tata na yandi ntima ya mvimba mpi Yehowa pesaka yandi bima ya kinsuni yina yandi vandaka na yo mfunu sambu na kuzinga. Diambu ya kuluta mfunu kele nde Yehowa lungisaka bampusa ya Yezu ya kimpeve. (Mat. 4:4) Yehowa ke lungisaka bampusa na beto ya kimpeve. Na Ndinga na yandi, Yehowa me monisaka kieleka na yina me tala yandi, lukanu na yandi, lukanu ya luzingu mpi mambu yina yandi ta sala na bilumbu ke kwisa. Ntangu beto yantikaka kulonguka kieleka, yandi tudilaka beto dikebi, mu mbandu yandi sadilaka bibuti na beto to bantu ya nkaka na kusadisa beto na kuzaba yandi. Yandi ke landaka kusadisa beto na nzila ya bankuluntu yina ke zolaka beto mpi bampangi ya nkaka ya kuyela na kimpeve. Diaka, Yehowa ke longaka beto na nzila ya balukutakanu. Mambu yai mpi mambu ya nkaka yina Yehowa ke salaka ke monisa nde yandi kele Tata yina ke tudilaka beto dikebi.—Nk. 32:8. w20.02 3 § 8; 5 § 13

Kimpala ke katulaka ngemba. Beto fwete katula kimpala na bantima na beto mpi beto fwete kuna yo ve na bantima ya bantu ya nkaka. Inki beto fwete sala kibeni sambu na kusadisa bantu ya nkaka na kuvanda ve ti kimpala mpi kutula ngemba? Bikalulu na beto mpi mambu yina beto ke salaka lenda sadisa bankaka na kukuma ti bikalulu ya mbote to ya mbi. Nsi-ntoto yai ke zolaka nde beto kuma ti mpeve ya “kusonga na lulendo yonso” bima yina beto kele na yo. (1 Yoa. 2:16) Kansi kikalulu yai lenda pusa bantu ya nkaka na kuwila beto kimpala. Beto ta kuna ve kimpala na bantima ya bantu ya nkaka kana beto ke tubila ve ntangu yonso bima yina beto kele na yo mpi bima yina beto ke kana kusumba. Beto ta yedisa mpi ve kimpala na ntima ya bantu ya nkaka kana beto ke kudikulumusa ve sambu na mikumba yina beto kele na yo. Kana beto ke benda dikebi ya bantu na mikumba na beto, beto ta kuna kimpala na bantima na bo. Kansi kana beto ke tudila bantu dikebi ya masonga mpi ke mona mambu ya mbote yina bo ke sala, beto ta sadisa bo na kusepela ti bima yina bo kele na yo mpi dibundu ta vanda na ngemba. w20.02 18 § 15-16

Nge lenda longuka mambu ya Yehowa na nsadisa ya bima yina yandi me salaka. (Kus. 4:11) Yindula mutindu Yehowa me salaka banti mpi bambisi, yo ke monisaka nde yandi kele mayele. Yindula fioti mutindu Nzambi me salaka nitu na nge. (Nk. 139:14) Yindula ngolo yina Yehowa me tulaka na ntangu mpi kuvila ve nde yo kele mbwetete mosi kaka na kati ya bamilio ya bambwetete. (Yez. 40:26) Kana nge ke yindula mambu yai, nge ta kuma kuzitisa Yehowa mingi. Ya kieleka, kuzaba nde Yehowa kele mayele mpi ngolo mingi ta sadisa nge na kuyantika kusala kinduku ti yandi. Kansi sambu nge kuma kuzola Yehowa mingi, yo ta lomba nde nge zaba mambu mingi ya me tala yandi. Ndima nde Yehowa ke tudilaka nge kibeni dikebi. Kuvila ve nde “kana nge sosa yandi, yandi ta bika nde nge mona yandi.” (1 Bans. 28:9) Yehowa ke tuba nde: “Mono bendaka nge na mono.” (Yer. 31:3) Kana nge ke bakisa mambu yonso yina Yehowa me salaka sambu na nge, nge ta kuma kuzola yandi mingi. w20.03 4 § 6-7

Ntumwa Polo pesaka mbandu ya mbote ya kutula kisalu ya kusamuna na kisika ya ntete na luzingu na yandi. Ntangu yandi vandaka na Korinto na nzietelo na yandi ya zole, yandi vandaka kulutisa mwa ntangu na kutunga batenta sambu yandi zwa mbongo. Yandi salaka kisalu yai sambu na kulungisa bampusa na yandi ya kinsuni sambu yandi longa nsangu ya mbote na bantu ya Korinto “kukonda kulomba [bo] mbongo.” (2 Bak. 11:7) Ata Polo vandaka kusala kisalu ya kinsuni, yandi landaka kutula kisalu ya kusamuna na kisika ya ntete mpi vandaka kulonga konso Kisabatu. Ntangu mambu ya luzingu na yandi kumaka diaka mbote, Polo tulaka dikebi mingi na kisalu ya kusamuna. Yandi “yantikaka kudipesa ya mvimba na kuzabisa ndinga, yandi vandaka kuta kimbangi na Bayuda sambu na kumonisa nde Yezu kele Kristu.” (Bis. 18:3-5; 2 Bak. 11:9) Na nima, ntangu yandi vandaka na boloko na Roma bamvula zole, Polo taka kimbangi na bantu yina vandaka kutala yandi mpi yandi vandaka kusonika mikanda. (Bis. 28:16, 30, 31) Polo pesaka ve nzila nde ata kima mosi kukatula dikebi na yandi na kisalu ya kusamuna. w19.04 4 § 9