Marsi

Zola ya Nzambi mpi ya Ndinga na yandi ke siamisaka beto na kulemfukila Yehowa ata ntangu banduku to bantu ya dibuta ke pusa beto na kusala mambu ya me tala bafwa yina kele ve na Biblia. Ziku bo lenda tuba nde beto ke zolaka ve to ke zitisaka ve bafwa sambu na kupesa beto nsoni. To bo lenda tuba nde mambu ya beto me sala ta pusa bafwa na kusala bantu mbi. Na Caraïbes, bantu mingi ke kwikilaka nde na nima ya lufwa, “mpeve” ya muntu yina lenda landa kuzinga sambu na kupesa ndola na bantu yina niokulaka yandi. Mukanda mosi ke tuba nde, nkutu “mpeve” yina lenda “nata mpasi na dikanda.” Na Afrika, bantu ke vandaka ti kikalulu ya kupelisa tiya mpimpa ya mvimba na nzo ya muntu yina me fwa. Sambu na nki? Bantu ya nkaka ke tubaka nde yo ke kulaka bampeve ya mbi. Bambangi ya Yehowa ke ndimaka ve malongi yonso ya luvunu to ke salaka ve mambu yina ke mwangaka luvunu ya Satana!—1 Bak. 10:21, 22. w19.04 16 § 11-12

Yezu longaka minsiku yina ta sadisa balongoki na yandi na kusadila bantu ya nkaka mambu ya mbote, mu mbandu Munsiku ya Wolo. Beto yonso ke zolaka nde bantu kusadila beto mambu ya mbote. Yo yina, beto fwete sadila bantu ya nkaka mambu ya mbote. Mpidina, bo mpi ta sadila beto mambu ya mbote. Ebuna, kana bantu me sadila beto mambu ya mbi? Yezu longaka mpi balongoki na yandi na kutula ntima nde Yehowa ta ‘zenga mambu na lunungu sambu na bayina ke didilaka yandi mpimpa ti mwini.’ (Luka 18:6, 7) Bangogo yai kele lusilu yina ke monisa nde Nzambi na beto ya lunungu ke bakisaka bampasi yina beto ke kutanaka ti yo na bilumbu yai ya nsuka mpi yandi ta sala mambu na lunungu na ntangu ya me fwana. (2 Bate. 1:6) Kana beto ke landa minsiku yina Yezu longaka, beto ta sadila bantu ya nkaka mambu ya mbote. Kana bo me sadilaka beto mambu ya mbi na nsi-ntoto yai ya Satana, kubakisa nde Yehowa ta sadila beto mambu ti lunungu ke pesaka beto kikesa. w19.05 5 § 18-19

Kana nge kele mwana ya nzo-nkanda, banduku na nge lenda kwikila nde bima kudibasikilaka. Nge ta sepela kulonga bo kieleka, kansi nge lenda yindula nde nge ta kuka ve. Yo yina nge fwete vanda ti kikalulu ya kulonguka. Nge fwete longuka ti balukanu zole: (1) kukumisa lukwikilu na nge ngolo nde Nzambi muntu gangaka bima yonso (2) kutomisa mayele na nge ya kulonga bantu kieleka. (Bar. 1:20) Nge lenda kudiyula nde, ‘Inki vandaka bangindu ya banduku na mono yina ke ndimisaka bo nde bima kudibasikilaka?’ Na nima, sala bansosa na mikanda na beto. Mpidina, yo ta vanda ve mpasi na kutubila balukwikilu na nge. Bantu mingi ke ndimaka nde bima kudibasikilaka sambu muntu mosi yina bo ke zitisaka longaka yo. Kana nge me zwa kikuma mosi to zole yina nge lenda songa bo, nge ta pesa mvutu ya mbote na muntu yina ke zola kuzaba.—Bakol. 4:6. w19.05 29 § 13

Ntangu profete Eliya tinaka bantu yina zolaka kufwa yandi, yandi lembaka nitu mpi lombaka lufwa. Yehowa tindaka wanzio mosi ya ngolo sambu na kupesa yandi kikesa. Wanzio pesaka yandi lusadisu ya me fwana. Yandi pesaka Eliya madia ya tiya mpi siamisaka yandi na kudia yo. (1 Bant. 19:5-8) Disolo yai ke monisa kieleka mosi ya mfunu: Mbala mingi, kima ya fioti yina beto ke sadilaka bantu lenda vanda mfunu mingi. Yo lenda vanda madia, dikabu to kusonikila muntu message sambu na kumonisila yandi zola. Kana beto ke kuka ve kusolula ti mpangi mambu yina ke pesa yandi mpasi, beto lenda pesa yandi kaka lusadisu ya me fwana. Na mutindu ya kuyituka, Yehowa sadisaka Eliya na kusala nzietelo ya nda tii na Ngumba ya Horebi ntama ti bantu yina zolaka kusala yandi mbi. Inki dilongi beto lenda baka? Kana beto ke zola kupesa kikesa na bana yina bo me bebisaka, beto fwete sadisa bo ntete na kuvanda na lutaninu. Yo vanda na banzo na bo to na Nzo ya Kimfumu. w19.05 16 § 11; 17 § 13-14

Yindula nde nge ke tanga kapu 12 ya mukanda ya Zekaria, yina ke tubila lufwa ya Mesia. (Zek. 12:10) Verse 12 ke tuba nde: “Dibuta ya nzo ya Natani” waka mpasi mingi sambu na lufwa ya Mesia. Na kisika ya kuluta ntinu, pema mpi kudiyula nde: ‘Inki kuwakana kele na kati ya nzo ya Natani ti Mesia?’ Nge lenda sala mwa bansosa. Referanse mosi na kati-kati ya lutiti ta nata nge na 2 Samuele 5:13, 14, kisika Biblia ke tuba nde Natani vandaka mwana ya ntotila Davidi. Referanse ya zole na kati-kati ya lutiti ke nata na Luka 3:23, 31, baverse yai ke monisa nde Yezu vandaka mutekolo ya Natani nkaka ya Maria. Bansangu yina ta sepedisa nge mpenza! Nge me zaba nde Biblia tubaka nde Yezu ta butuka na dikanda ya Davidi. (Mat. 22:42) Kansi Davidi butaka bana-bakala kuluta 20. Yo ke yitukisa na kuzaba nde Zekaria monisaka nde bantu ya nzo ya Natani vandaka ti kikuma ya mbote ya kudiyangisa sambu na lufwa ya Yezu. w19.05 30 § 17

Inki beto fwete sala? Kana beto ke longuka mbala na mbala, beto ta ndima kibeni bakieleka yina beto me zabaka na Biblia. Beto ta ndima kibeni nde bansiku ya Yehowa kele mbote. Beto ta vanda bonso nti yina misisa me kotaka mingi na ntoto mpi beto ta “vanda na lukwikilu ya ngolo.” (Bakol. 2:6, 7) Kuvila ve nde ata muntu mosi ve ta kumisa lukwikilu na nge ngolo, yo yina, landa kukumisa ngolo yina ke twadisaka mabanza na nge ya mpa. Samba mbala na mbala; lomba Yehowa lusadisu ya mpeve santu na yandi. Yindula mingi kibeni, landa kutadila mbote mabanza mpi bikuma yina ke pusaka nge na kusala mambu. Pona banduku ya mbote, kangama ti bantu yina lenda sadisa nge na kusoba kimuntu mpi mabanza na nge. Mpidina, nge ta kuditanina na mambu ya mbi ya nsi-ntoto ya Satana mpi nge ta yambula kibeni “bangindu mpi konso kima ya kunanguka yina ke kangaka nzayilu ya Nzambi.”—2 Bak. 10:5. w19.06 13 § 17-18

Mutindu Ruti kangamaka ti Naomi, beto mpi fwete sadisa bantu yina me fwisa. (Ruti 1:16, 17) Paula ke tuba nde: “Kaka na nima ya lufwa ya bakala na mono, mono zwaka lusadisu ya mingi. Kansi, na nima ya bilumbu bantu vutukilaka bisalu na bo. Luzingu na mono sobaka kibeni. Yo ke sadisaka mingi kana bantu kubakisa nde muntu yina me fwisa kele na mfunu ya lusadisu bangonda to nkutu bamvula mingi na nima.” Ya kieleka, bantu yonso kele ve kiteso mosi. Bantu ya nkaka ke yikamaka nswalu kansi sambu na bankaka yo ke vandaka mpasi mingi-mingi kana bo ke yibuka kisalu yina bo vandaka kusala kumosi. Mutindu konso muntu ke waka mpasi me swaswana. Beto vila ve nde Yehowa me pesaka beto dibaku mpi mukumba ya kusadisa bantu yina me fwisa bankwelani na bo. w19.06 24 § 16

Kana bo me buyisa kisalu na beto, beto fwete zaba “ntangu ya kuvanda pima.” (Lon. 3:7) Beto fwete bumba kinsweki, mu mbandu bazina ya bampangi, kisika ya balukutakanu, mutindu kisalu ya kusamuna ke salamaka mpi mutindu beto ke zwaka madia ya kimpeve. Beto ta songa ve bamfumu ya leta mambu yai; yo vanda banduku to bantu ya dibuta na beto yina kele na insi na beto to na bansi ya nkaka. Kana beto me songa bo, beto ta tula luzingu ya bampangi na kigonsa. Kubika ve nde mambu ya fioti-fioti kukabisa beto. Satana ke zabaka nde kana bantu ya nzo mosi me kabwana, nzo yina lenda zinga ve. (Mar. 3:24, 25) Yandi ke sosaka kukabisa beto ntangu yonso. Na mutindu yina, beto ta nwana beto na beto na kisika ya kunwanisa yandi. Ata bampangi yina me yelaka na kimpeve fwete keba na kubwa ve na mutambu yai. Kana beto ke sala ngolo na kuyidika makambu ti bampangi, beto ta kabwana ve.—Bakol. 3:13, 14. w19.07 11-12 § 14-16

Mbala mingi, bantu ke ndimaka nsangu na beto sambu na mambu yina beto ke tubaka ve kansi mutindu beto ke tubilaka yo. Bo ke sepelaka ti nsangu na beto sambu beto ke vandaka mawete mpi ke tudilaka bo dikebi na masonga yonso. Beto ke pusaka bo ve na kundima bangindu na beto. Kansi, beto ke sosaka kubakisa bangindu yina bo ke vandaka na yo sambu na dibundu mpi beto ke sosaka kubakisa mawi na bo. Mu mbandu, ntangu Polo vandaka kusolula ti Bayuda, yandi vandaka kusadila Masonuku sambu na kuyindula ti bo. Kansi ntangu yandi vandaka kusolula ti bantu ya ke longukaka filozofi, na Areopage na Grèce, yandi tubilaka ve mbala mosi Biblia. (Bis. 17:2, 3, 22-31) Inki mutindu beto lenda landa mbandu ya Polo? Kana beto me kutana ti muntu mosi ya ke ndimaka ve Biblia, yo ta vanda mbote ve na kusadila yo mbala mosi ntangu beto ke solula ti yandi. Kana nge me bakisa nde muntu mosi ke wa nsoni sambu bantu ke mona yandi ke tanga Biblia, songa yandi na kutanga Biblia na mutindu yina lenda benda ve dikebi ya bantu ya nkaka, mu mbandu na telefone na nge. w19.07 21 § 5-6

Na mayele yonso, Satana kusaka bantu ya Izraele na kusambila biteki. Yandi sadilaka bampusa na bo ya kuzwa madia. Ntangu bantu ya Izraele kotaka na Ntoto ya Lusilu, yo lombaka nde bo soba mutindu ya kusala bilanga. Na Ezipte, bo vandaka kusadila masa ya Nile sambu na kulosa na bilanga. Kansi na Ntoto ya Lusilu sambu na kusala bilanga, yo lombaka nde bo sadila masa ya mvula to malulu na kisika ya kubaka masa na nzadi. (Kul. 11:10-15; Yez. 18:4, 5) Yo yina, yo lombaka nde bantu ya Izraele kulonguka mitindu ya nkaka ya kusala bilanga. Kansi sambu na nki Yehowa kebisaka bo na kusambila ve banzambi ya luvunu ntangu yandi vandaka kutubila bo mutindu ya mpa ya kusala bilanga? Yehowa zabaka nde bantu ya Izraele ta longuka mitindu ya nkaka ya kusala bilanga na mimpani yina vandaka kuzinga na nziunga na bo. Bantu yina ya Kanana vandaka kukwikila nde Baale vandaka ngangi ya zulu mpi yandi muntu vandaka kunokisa mvula.—Kut. 25:3, 5; Baz. 2:13; 1 Bant. 18:18. w19.06 3 § 4-6

Ntangu ntumwa Polo, Silasi, Luka mpi Timoteo kumaka na Filipi, bantu mingi vandaka kusepela ti nsangu ya Kimfumu. Yo yina, bampangi yai iya ya kikesa kangulaka dibundu mpi balongoki yonso yantikaka kuvukana, ziku na nzo ya mpangi Lydia yina vandaka kuyamba banzenza. (Bis. 16:40) Ntama mingi ve, dibundu yai ya mpa kutanaka ti mbangika. Satana pusaka bambeni ya kieleka na kumenga kibeni kisalu ya kusamuna ya Bakristu yai ya kwikama. Bo kangaka Polo ti Silasi, bo bulaka bo mpi tulaka bo na boloko. Ntangu bo basisaka Polo ti Silasi na boloko, bo kwendaka kutala Bakristu yina ya mpa mpi pesaka bo kikesa. Na nima, Polo, Silasi ti Timoteo katukaka na mbanza, ziku Luka bikalaka pana. Inki bampangi ya dibundu yai ya mpa salaka? Yehowa sadisaka bo na kulanda kusala kisalu na yandi. (Bafil. 2:12) Polo waka kiese mingi sambu na bo. w19.08 8 § 1-2

Keti nge me kwenda kuzinga kisika ya nkaka? Muntu yina ke kwendaka kisika ya nkaka ke basisaka mbongo mingi. Yo yina, yandi lenda baka bamfuka. Sambu na kubaka ve bamfuka mingi, sumba kaka bima yina kele mfunu. (Bing. 22:3) Kana diambu mosi ke yangisa nge, mu mbandu kusansa mbefo, yo lenda vanda mpasi na kuzaba mbongo ikwa nge ta defa. Na diambu yai, kuvila ve nde ‘kisambu mpi kubondila’ lenda sadisa nge na kubaka balukanu ya mbote. Sambu na kupesa mvutu na bisambu na nge, Yehowa lenda pesa nge ngemba yina ta ‘tanina ntima na nge mpi mabanza na nge’ mpi lenda sadisa nge na kubaka balukanu ya mbote. (Bafil. 4:6, 7; 1 Pie. 5:7) Pona banduku ya mbote. Tela banduku na nge mutindu nge ke kudiwa mpi mambu ya ke yangisa nge, mingi-mingi bayina me kutanaka ti mambu yina nge ke kutana ti yo. Kusala mutindu yina ta sadisa nge na kudiwa mbote. (Lon. 4:9, 10) Kufwa ve kinduku ti banduku yina nge vandaka ti bo ntete na ntwala nde nge kwenda na bwala yina ya mpa. w19.08 22 § 9-10

Sambu na nki Yehowa fwanisaka bitumba ya nene ya nsuka ti Megido? Bantu vandaka kunwana bitumba mingi na Megido mpi na balweka ya Yizrele. Na mabaku ya nkaka, Yehowa sadisaka bansadi na yandi na kununga bitumba yina. Mu mbandu, “pene-pene ya bamasa ya Megido” Nzambi sadisaka Baraki, zuzi ya Izraele, na kununga basoda ya Kanana yina Sisera vandaka kutwadisa. Baraki mpi profete ya nkento Debora tondaka Yehowa sambu yandi gulusaka bo na mutindu ya kuyituka. Bo yimbaka nde: ‘Bambwetete na zulu nwanisaka Sisera. Yo yina, O Yehowa, bika nde bambeni na nge yonso kufwa, kansi bika nde bantu yina ke zolaka nge kuvanda bonso ntangu yina ke basika na nkembo na yo.’ (Baz. 5:19-21, 31) Mutindu mosi, na Armagedoni, bambeni ya Nzambi ta fwa kansi bantu yina ke zolaka yandi ta guluka. Bitumba ya Baraki me swaswana ti bitumba ya Armagedoni. Na Armagedoni, bansadi ya Nzambi ta nwana ve mpi ta vanda ve ti binwaninu. Biblia ke tuba nde: “Beno ta vanda ngolo kana beno bikala pima mpi beno tula ntima” na Yehowa mpi na basoda na yandi ya zulu.—Yez. 30:15; Kus. 19:11-15. w19.09 9 § 4-5

Mutindu mosi ya kukwenda na Yezu kele kulonguka mambu yina yandi tubaka mpi salaka. (Luka 1:1-4) Ata muntu mosi ve lenda longuka na kisika na beto, beto fwete sala yo beto mosi. Diaka, beto ke kwendaka na Yezu ntangu beto ke bakaka mbotika sambu na kukuma balongoki na yandi. Mutindu ya nkaka ya kukwenda na Yezu kele kusosa lusadisu na bankuluntu. Yezu ke sadilaka “makabu” yai ya bantu sambu na kutanina mameme na yandi. (Baef. 4:7, 8, 11; Yoa. 21:16; 1 Pie. 5:1-3) Beto fwete sala bikesa sambu na kusosa lusadisu na bo. Beto fwete vingila ve nde bankuluntu kuzaba bangindu na beto mpi mambu yina beto kele na yo mfunu. Mpangi Julian ke tuba nde: “Mono solulaka ti bo, bo pesaka mono lusadisu ya kuluta mbote.” Bankuluntu, bonso bayina zole ya sadisaka Julian lenda sadisa beto na kuzaba “mabanza ya Kristu” disongidila kubakisa mpi kukuma ti mabanza mpi bikalulu ya Kristu. (1 Bak. 2:16; 1 Pie. 2:21) Bankuluntu ke pesaka beto lusadisu ya kuluta mbote. w19.09 21 § 4-5

Biblia ke tubila babakala ti bankento ya nkaka ya kwikama yina mpeve santu twadisaka, ata mpidina bo kele ve na kati ya bantu 144 000. Mu mbandu, Yoane Mbotiki mpi Davidi. (Mat. 11:11; Bis. 2:34) Bo ti bantu mingi ya nkaka ta futumuka sambu na kuzinga na paladisu awa na ntoto. Bantu yai yonso ti kimvuka ya nene ya bantu ta monisa kwikama na bo na Yehowa mpi na luyalu na yandi. Nzambi me vukisaka ntete ve bantu mingi ya makanda yonso na kusambila yandi mutindu yandi ke sala yo na bilumbu na beto. Ata beto ta zinga na zulu to na ntoto, beto fwete sadisa bantu mingi na kuvanda na kimvuka ya nene ya “mameme ya nkaka.” Ntama mingi ve, na mpasi ya nene, Yehowa ta fwa baluyalu mpi mabundu yina ke niokula bantu. Bantu yonso ya kimvuka ya nene ta vanda ti dibaku ya kitoko ya kusadila Yehowa kimakulu na ntoto.—Kus. 7:14. w19.09 31 § 18-19

Sambu nsi-ntoto ya Satana me kuma na nsuka, kwikama na beto na Nzambi mpi na Kimfumu ta mekama diaka ngolo kuluta. Ziku bantu ta landa kaka kuvweza beto. Yo lenda salama mingi-mingi kana beto kota ve na mambu ya politiki. Beto fwete kumisa ngolo kwikama na beto bubu yai sambu beto bikala ya kwikama na mpasi ya nene. Na mpasi ya nene, nsoba mosi ta salama sambu na bampangi yina ke twadisaka beto. Na ntangu mosi buna, Bakristu yonso yina bo me tulaka mafuta ya kele ntete na ntoto ta kwenda na zulu sambu na kunwana bitumba ya Armagedoni. (Mat. 24:31; Kus. 2:26, 27) Yo ke tendula nde Nto-Kimvuka ta vanda diaka ve ti beto awa na ntoto. Ata mpidina, bo ta yidika kimvuka ya nene. Bampangi ya me fwana na kati ya mameme ya nkaka ta twadisa bisalu. Yo ta lomba nde beto monisa kwikama mutindu beto ta lemfukila bampangi yai mpi kulanda lutwadisu yina Nzambi ta pesa na nzila na bo. Beto ta guluka kaka kana beto ke landa lutwadisu na bo! w19.10 17 § 13-14

Naomi zolaka Yehowa mpi sadilaka yandi na kwikama. Kansi na nima ya lufwa ya bakala mpi ya bana na yandi zole ya babakala, Naomi sobaka zina na yandi, yandi bakaka zina “Mara,” disongidila “Bululu.” (Ruti 1:3, 5, 20, noti na nsi ya lutiti, 21) Bokilo na yandi Ruti kangamaka ngolo ti yandi na ntangu yina ya mpasi. Ruti sadisaka yandi mingi mpi vandaka kutubila yandi mambu yina lembikaka yandi. Ruti sadilaka bangogo ya pete mpi ya mbote sambu na kusadisa mpi kumonisila Naomi zola na yandi. Kana mpangi mosi me fwisa nkwelani, yandi ke vandaka na mfunu ya lusadisu. Bankwelani ke vandaka bonso banti zole yina ke yela kisika mosi. Na nima ya bamvula, misisa na yo ke kangama-kangamaka. Kana bo me tumuna nti mosi mpi yo me fwa, yina ya nkaka ke vandaka diaka ngolo mingi ve. Kiteso mosi, kana muntu me fwisa nkwelani, yandi ke vandaka na mpasi ya ngolo bamvula mingi. w19.06 23 § 12-13

Katula kupona bansaka ya mbote, beto fwete tula mpi dikebi na bantangu yina beto ke lutisaka na bansaka. Kana ve, beto ta kuma kulutisa ntangu mingi na bansaka na kisika ya kudipesa mingi na kisalu ya Yehowa. Ya ntete, na mbala ya nima yina nge ta sala yo, sosa kuzaba bantangu yina nge ke lutisa. Nge lenda sonika mpi ntalu ya bangunga yina yo me baka nge na mposo mosi. Sonika bantangu yina nge ta lutisaka na kutala televizio, na kukota na Internet, to kubula bansaka na telefone. Kana nge me mona nde bansaka ke baka nge ntangu mingi, soba. Tula mambu ya kuluta mfunu na kisika ya ntete mpi na nima bika mwa ntangu sambu na bansaka. Diaka, samba Yehowa na kusadisa nge sambu nge lungisa lukanu yina nge me baka. Kana nge sala mpidina, nge ta vanda ti ntangu mpi ngolo ya kusala kulonguka na nge mosi, kuvukana na lusambu ya dibuta, balukutakanu ya dibundu mpi kusamuna sambu na kusadila Yehowa. Mpidina bansaka ta pesa nge kiese sambu nge me tula ntete Yehowa na kisika ya ntete. w19.10 30 § 14, 16; 31 § 17

Pene-pene ya mvu 55 ya ntangu na beto, bampangi ya dibundu ya Korinto bakaka lukanu mosi ya mbote. Bo waka nde bampangi ya Yeruzalemi mpi ya Yudea vandaka na mpasi, bo vukisaka mbongo sambu na kusadisa bo. (1 Bak. 16:1; 2 Bak. 8:6) Bangonda fioti na nima, ntumwa Polo waka nde bampangi ya Korinto pesaka ve mbongo yina. Mbala ya nkaka makabu na bo kumaka ve na ntangu ya mbote sambu bo vukisa yo ti makabu ya mabundu ya nkaka mpi bo nata yo na Yeruzalemi. (2 Bak. 9:4, 5) Bampangi ya Korinto bakaka lukanu ya mbote mpi Polo sikisaka bo sambu na lukwikilu na bo ya ngolo mpi sambu bo vandaka na mpusa ya ngolo ya kukaba. Kansi yo lombaka mpi nde yandi siamisa bo na kulungisa lukanu na bo. (2 Bak. 8:7, 10, 11) Mambu yai ke longa beto nde bantangu ya nkaka yo lenda vanda mpasi ata sambu na Bakristu ya kwikama na kulungisa balukanu na bo. Sambu na nki? Sambu beto kele bantu ya kukonda kukuka beto lenda pusa bilumbu ya kulungisa balukanu na beto. To mambu ya kukonda kukana lenda sala nde beto kuka ve kulungisa yo.—Lon. 9:11. w19.11 26-27 § 3-5

Mutindu kitaninu ya nene ke taninaka nitu, lukwikilu ke taninaka beto na mambu ya nsi-ntoto yai mu mbandu, mansoni, mubulu mpi mambu ya nkaka yina ke fwaka minsiku ya Nzambi. Beto ke nwanaka bitumba ya kimpeve ti bambeni na beto mpi bampeve ya mbi. (Baef. 6:10-12) Inki mutindu nge lenda zaba nde lukwikilu na nge ta vanda ngolo kana nge me kutana ti mumekamu? Ya ntete, nge fwete samba Nzambi sambu yandi sadisa nge. Na nima, nge fwete sadila Ndinga ya Nzambi sambu yo sadisa nge na kudimona mutindu Nzambi ke monaka nge. (Baeb. 4:12) Biblia ke tuba nde: “Tula ntima na nge ya mvimba na Yehowa, mpi kutula ve ntima na mayele na nge mosi ya kubakisa mambu.” (Bing. 3:5, 6) Na kutadila verse yai, yindula diambu mosi yina kuminaka nge mpi nki nge salaka? Mu mbandu, keti nge vandaka na mpasi ya mbongo? Keti nge yibukaka lusilu ya Yehowa yina kele na Baebreo 13:5 ya ke tuba nde: “Mono ta bikisa nge ve ata fioti mpi mono ta yambula nge ve ata fioti”? Keti lusilu yina ndimisaka nge nde Yehowa ta sadisa nge? Kana mpidina, yo ke monisa nde nge ke taninaka mbote kitaninu na nge ya lukwikilu. w19.11 14 § 1, 4

Bibuti fwete lutisa ntangu mingi ti mwana na bo. Kana bankwelani ke buta pembeni-pembeni, bo ta kuka ve kutudila konso mwana dikebi ya me fwana. Bankwelani ya nkaka yina me butaka bana mingi pembeni-pembeni, ke tubaka nde yo ke vandaka kizitu ya ngolo. Mama lenda lemba mingi mpi kukuma kudiyangisa. Yo lenda pesa yandi mpasi na kulonguka, kusamba mpi kusamuna mbala na mbala. Yo lenda vanda mpi mpasi sambu yandi tula dikebi na balukutakanu mpi kubakila yo mambote. Ya kieleka, bakala yina ke zolaka nkento na yandi ta sala yonso sambu na kusadisa yandi na kutanina bana na balukutakanu mpi na nzo. Diaka, yandi lenda sadisa nkento na yandi na bisalu ya nzo. Yandi fwete twadisa Lusambu ya Dibuta mbala na mbala mpi kusala yonso sambu konso muntu na dibuta kubakila yo mambote. Diaka, yandi fwete samunaka mbala na mbala ti dibuta na yandi. w19.12 24 § 8

Inki mambote Yubile vandaka kunatila bantu ya Izraele? Mu mbandu, kana muntu mosi ya Izraele vandaka ti mfuka ya mingi mpi yandi tekaka ntoto na yandi sambu na kufuta yo, bo vandaka kuvutudila yandi ntoto na yandi na mvula ya Yubile. Muntu yango lenda “vutuka na ntoto na yandi” mpi na nima bana na yandi lenda baka ntoto yina. Diaka, kana muntu ya Izraele kele ti mfuka ya mingi mpi ke kuka ve kufuta yo, yandi vandaka kukuma mpika to kuteka mwana na yandi na kimpika sambu na kufuta mfuka yina. Na Yubile, mpika yina fwete “vutuka na dibuta na yandi.” (Levi 25:10) Mambu yai vandaka kusala nde ata muntu mosi ve kubikala mpika kimakulu. Diaka, Yehowa tubaka nde: “Ata mpidina, muntu mosi ve na kati na beno fwete kuma nsukami, sambu Yehowa ta sakumuna nge kibeni na insi yina Yehowa Nzambi na nge ke pesa nge na kubaka bonso dikabu.” (Kul. 15:4) Mambu yai me swaswana kibeni ti ya ke salama bubu yai! Bamvwama ke landa kaka kukuma bamvwama mpi bansukami ke bikala kaka bansukami. w19.12 8-9 § 3-4

Ntangu Yezu kutanaka ti bampasi ya ngolo, yandi sambaka “ti kudila ya ngolo mpi mansanga.” (Baeb. 5:7) Bisambu na yandi ya masonga kumisaka ngolo lukanu na yandi ya kulanda kulemfukila Yehowa. Sambu na Yehowa, bisambu ya Yezu vandaka bonso ndumbu ya nsudi ya kitoko. Na luzingu na yandi ya mvimba, Yezu pesaka Tata na yandi kiese mingi mpi yandi nwaninaka luyalu ya Tata na yandi. Beto lenda landa mbandu ya Yezu kana beto ke sala yonso sambu na kulemfuka na minsiku ya Yehowa na kwikama yonso. Ntangu beto ke kutanaka ti bampasi, beto ke sambaka Yehowa na masonga yonso sambu yandi sadisa beto sambu beto ke zolaka kusepedisa yandi. Beto ke zabaka nde Yehowa ta ndima ve bisambu na beto kana beto ke sala mambu yina yandi ke mengaka. Kansi kana beto ke sala mambu yina Yehowa ke zolaka, bisambu na beto ya masonga ta vanda bonso ndumbu ya nsudi ya kitoko na ntwala ya Yehowa. Diaka, kwikama mpi bulemfu na beto ta sepedisa Tata na beto ya zulu. w19.11 21-22 § 7-8

Na 1919, Yezu ponaka kimvuka mosi ya fioti ya bampangi-babakala yina bo me tulaka mafuta sambu na kuvanda “mpika ya kwikama mpi ya mayele.” Mpika yai ke twadisaka kisalu ya kusamuna mpi ke pesaka balongoki ya Kristu ‘madia na ntangu ya me fwana.’ Satana mpi bantu na yandi ke salaka yonso sambu na kufwa kisalu ya mpika ya kwikama mpi ya mayele. Kukonda lusadisu ya Yehowa, mpika yai ta kuka ve kusala kisalu yai. Bitumba zole salamaka na ntoto ya mvimba, bo landaka kuniokula mpi kubangika bansadi ya Yehowa mpi mpasi ya mbongo kotaka na ntoto ya mvimba. Ata mpidina, mpika ya kwikama mpi ya mayele landaka kupesa madia ya kimpeve na balongoki ya Kristu yina kele na ntoto. Bubu yai, beto kele ti madia mingi ya kimpeve yina bantu ke bakaka ya ofele na bandinga kuluta 900. Yo ke monisa kibeni nde Nzambi ke sadisa mpika ya kwikama. Kisalu ya kusamuna ke monisa pwelele mpi nde Yehowa ke sakumuna bansadi na yandi. Ya kieleka, bo ke samuna nsangu ya mbote “na ntoto ya mvimba.”—Mat. 24:14. w19.11 24 § 15-16

Na kilumbu ya kufika masumu, nganga-nzambi ya nene vandaka ntete kuyoka ndumbu na ntwala ya kupesa bimenga. Kusala mutindu yina vandaka kundimisa yandi nde Nzambi me ndima yandi mpi bimenga yina yandi ke pesa. Mambu yai ke longa beto nki? Ntangu Yezu vandaka na ntoto, yo lombaka nde yandi sala diambu mosi ya mfunu mingi kuluta kugulusa bantu na ntwala nde yandi pesa kimenga ya luzingu na yandi. Yo lombaka nde yandi lemfukila Yehowa na kwikama yonso ntangu yandi vandaka na ntoto sambu Yehowa kundima kimenga na yandi. Mpidina, Yezu zolaka kumonisa nde kusala luzolo ya Yehowa kele mutindu ya mbote ya kuzinga. Yezu monisaka nde luyalu to mutindu ya kuyala ya Tata na yandi kele mbote. Ntangu Yezu vandaka na ntoto, yandi lemfukaka na minsiku ya Yehowa na mutindu ya kukuka. Ata ntangu Yezu kutanaka ti bampasi, lukanu na yandi vandaka kaka ya kunwanina luyalu ya Tata na yandi.—Bafil. 2:8. w19.11 21 § 6-7

Ntangu Yezu kutanaka ti bampasi na kisalu ya kusamuna, bantumwa na yandi ya kwikama kudimonisaka banduku ya mbote kibeni. (Bing. 18:24) Yezu monaka banduku ya mutindu yai bantu ya mfunu mingi. Ntangu Yezu vandaka kulonga, ata mpangi na yandi mosi ve kwikilaka na yandi. (Yoa. 7:3-5) Na ntangu mosi buna, bampangi na yandi yindulaka nde yandi me kuma kilawu. (Mar. 3:21) Kansi, na mpimpa yina yitaka lufwa ya Yezu, yandi songaka bantumwa ya kwikama mambu yina kele na mukapu ya bubu. Bantangu ya nkaka bantumwa salaka mambu yina pesaka Yezu mpasi kansi yandi tulaka ve dikebi na bifu na bo, yandi bakisaka nde bo vandaka kukwikila na yandi. (Mat. 26:40; Mar. 10:13, 14; Yoa. 6:66-69) Na mpimpa ya nsuka yina Yezu lutisaka ti bo na ntwala nde bo fwa yandi, yandi songaka bantumwa nde: “Mono ke binga beno banduku, sambu mono me zabisaka beno mambu yonso ya mono waka na Tata na mono.” (Yoa. 15:15) Ntembe kele ve nde banduku ya Yezu pesaka yandi kikesa mingi. w19.04 11 § 11-12

Inki mutindu Mukristu ke zabaka nde Nzambi me binga yandi na kukwenda na zulu? Mvutu kele pwelele na mambu yina ntumwa Polo songaka Bakristu ya Roma “yina bo me bingaka sambu na kuvanda basantu.” Katula mambu yina yandi tubaka ya kele na mukapu ya bubu, Polo songaka bo nde: “Beno bakaka ve mpeve ya kimpika yina ke pesa beno diaka boma, kansi beno bakaka mpeve yina Nzambi ke pesaka sambu na kundima beno bonso bana na yandi, na nzila ya mpeve yina beto ke tubaka na ndinga ya ngolo nde: ‘Aba, Tata!’” (Bar. 1:7; 8:15) Nzambi ke sadilaka mpeve santu na yandi sambu na kusadisa Bakristu yina yandi me tula mafuta na kubakisa pwelele nde yandi me binga bo na kukwenda na zulu. (1 Bate. 2:12) Bakristu yina Yehowa me bingaka na kukwenda na zulu ke vandaka ve ti badute ata fioti nde Yehowa me tulaka bo mafuta. (1 Yoa. 2:20, 27) Bakristu yina bo me tulaka mafuta ke vandaka ve na mfunu nde muntu mosi kusonga bo nde Nzambi me pona bo. w20.01 22 § 7-8

Zola kele na kisina ya “nsiku ya Kristu.” (Bag. 6:2) Zola pusaka Yezu na kusala mambu yonso. Kuwila bantu mawa ya ngolo ke monisaka zola. Mawa pusaka Yezu na kulonga bantu mingi, na kubelula bambefo, na kudisa bantu yina vandaka na nzala mpi na kufutumuna bafwa. (Mat. 14:14; 15:32-38; Mar. 6:34; Luka 7:11-15) Na luzolo yonso, Yezu tulaka bampusa ya bantu ya nkaka na kisika ya ntete. Yezu monisaka zola ya mingi ntangu yandi pesaka luzingu na yandi sambu na bantu. Beto lenda landa mbandu ya Yezu kana beto ke tula bampusa ya bantu ya nkaka na kisika ya ntete. Beto lenda landa mpi mbandu na yandi ntangu beto ke wila bantu ya teritware na beto mawa. Kana mawa ya mutindu yai ke pusa beto na kusamuna mpi kulonga nsangu ya mbote, pana beto ke lemfuka na nsiku ya Kristu. w19.05 4 § 8-10

Yezu katulaka bantu na kimpika ya malongi ya luvunu ya bantwadisi ya mabundu. Na ntangu yina, Bayuda mingi vandaka na kimpika ya bansiku ya bantu mpi ya malongi ya luvunu. (Mat. 5:31-37; 15:1-11) Bantwadisi yina vandaka kumonisa nde bo vandaka kusadisa bantu na kusadila Nzambi vandaka ve kusadila Nzambi na masonga, yo yina bo vandaka bonso bifwa-meso. Sambu bo buyaka Mesia mpi nsemo ya kimpeve yina yandi natilaka bo, bo vandaka kaka na mudidi mpi na masumu. (Yoa. 9:1, 14-16, 35-41) Sambu Yezu longaka kieleka mpi pesaka mbandu ya mbote, yandi monisaka bantu ya kudikulumusa mutindu bo lenda katuka na kimpika ya malongi ya luvunu. (Mar. 1:22; 2:23–3:5) Diaka, Yezu katulaka bantu na kimpika ya disumu. Kimenga ya Yezu me pesaka Nzambi dibaku ya kulolula masumu ya bantu yina ke kwikilaka na kimenga yina mpi ke ndimaka yo.—Baeb. 10:12-18. w19.12 10 § 8; 11 § 10-11

Yehowa ke sadilaka mpeve santu na yandi sambu yo sadisa Bakristu yonso yina yandi me tula mafuta na kubakisa kibeni pwelele nde yandi me pona bo. Na mutindu yina, mpeve santu kele “kidimbu [kima yina bo me simbisa to lusilu]” sambu na kundimisa Bakristu yina bo me tulaka mafuta nde bo ta zinga mvula na mvula na zulu kansi na ntoto ve. (2 Bak. 1:21, 22) Keti Mukristu yina bo me tula mafuta ke bakaka mbala mosi lufutu na yandi na zulu? Ve. Yandi ke zabaka kaka nde Nzambi me pona yandi na kuzinga na zulu. Kansi yandi fwete vila ve ndongisila yai: “Bampangi, beno sala ngolo kibeni sambu na kuzikisa beno mosi nde kubinga yina bo me bingaka beno mpi kusola yina bo me solaka beno kele ya kieleka, sambu kana beno ke landa kusala mambu yai, beno ta bwa ve ata fioti.” (2 Pie. 1:10) Ata Nzambi me binga Mukristu mosi yina yandi me tula mafuta na kukwenda na zulu, Mukristu yina ta baka lufutu na yandi kaka kana yandi bikala ya kwikama tii na nsuka.—Bafil. 3:12-14; Baeb. 3:1; Kus. 2:10. w20.01 21-22 § 5-6

Banduku ya Yobi wilaka ve Yobi mawa sambu bo bakisaka ve bampasi na yandi. Yo yina bo bakilaka Yobi nswalu bangindu ya mbi mpi bo tubaka nde yandi kele muntu ya mbi. Inki lenda sadisa beto na kusala ve kifu ya mutindu yai? Yibuka nde Yehowa mpamba me zaba kikuma ya bampasi ya muntu. Widikila na dikebi mambu yina muntu ya kele na mpasi ke tuba. Katula kuwidikila yandi; sosa kubakisa mpasi na yandi. Mpidina, nge ta kuditula na kisika na yandi. Mawa ta pusa beto na kutuba ve mambu ya mbi sambu na bampasi yina bantu ya nkaka ke kutana ti yo. Muntu yina ke tubaka mambu ya mbi ke tungaka ve dibundu kansi yandi ke panzaka yo. (Bing. 20:19; Bar. 14:19) Yandi lenda lwadisa mpangi yina kele na mpasi. (Baef. 4:31, 32) Yo ta vanda mbote na kutula dikebi na bikalulu ya mbote ya mpangi yango mpi kuyindula mutindu beto lenda sadisa yandi na bampasi na yandi. w19.06 21-22 § 8-9