Mutindu ya Kusadila Kamukanda Yai

Na kamukanda yai, nge ta kuta verse mosi ya Biblia mpi malongi ya bo me tubila sambu na konso kilumbu. Ata nge lenda tanga verse mpi malongi yango konso ntangu yina, bantu mingi ke monaka mbote na kutadila yo na suka, sambu bo lenda yindula bangindu yina kilumbu ya mvimba. Kutadila verse ya kilumbu na dibuta kele mfunu mingi. Mabuta ya Betele na ntoto ya mvimba ke salaka yo na suka na ntangu ya kudia.

Mambu ya beto me tubila awa me katuka na banimero ya Nzozulu ya Nkengi (w) ya avril 2023 tii na mars 2024. Ntalu to bantalu yina kele na nima ya nimero ya Nzozulu ya Nkengi ke monisa lutiti to balutiti ya Nzozulu ya Nkengi kisika disolo yango kele. Ntalu to bantalu yina ke landa kele baparagrafe kisika bo me baka malongi. (Tala lupangu yina kele awa na nsi.) Nge lenda zwa malongi ya nkaka ya ke tadila diambu ya bo ke tubila na disolo ya Nzozulu ya Nkengi yina beto bakaka malongi yango.