“Kubanga Ve, Kibuka Ya Fyoti”

“Kubanga ve, kibuka ya fyoti, sambu Tata na beno mendima na kupesa beno kimfumu.”​—⁠LUKA 12:​32, NW.

“BENO landa na kusosa Kimfumu ya [Nzambi].” (Luka 12:​31, NW) Ntangu Yezu kutubaka bangogo yai na balongoki na yandi, yandi kumonisaka ntuma mosi yina ketambwisaka mabanza ya Bakristu kubanda na ntangu na yandi tii na ntangu na beto. Kimfumu ya Nzambi fwete kubaka mpenza kifulu ya ntete na kati ya luzingu na beto. (Matayo 6:33) Kansi, na kati ya nkenda ya Luka, Yezu kubasisaka bangogo ya kemonisa zola mpi nsyamisa na kibuka mosi ya kuponama ya Bakristu. Yandi kutubaka nde: “Kubanga ve, kibuka ya fyoti, sambu Tata na beno mendima na kupesa beno kimfumu.” (Luka 12:​32, NW) Bonso Ngungudi ya Mbote, Yezu kuzabaka nde bantangu ya mpasi vandaka na ntwala ya balongoki na yandi ya zolwa. Kansi, bau vandaka ti kikuma ata mosi ve ya kubanga kana bau landaka na kusosa Kimfumu ya Nzambi. Na yau, nsyamisa ya Yezu kuvandaka ve ntuma ya ngolo. Kansi, yau kuvandaka lusilu mosi ya zolwa yina vandaka kupesa bau nsyamisa mpi kikesa.

² Yezu vandaka kutuba na balongoki na yandi, mpi yandi kubingaka bau “kibuka ya fyoti.” Yandi vandaka kutuba mpi na bayina ya Yehowa tandima na ‘kupesa kimfumu.’ Na kutesaka bau ti bambidi ya bantu yina tandima Yezu na bilumbu ya nima, kibuka yango kuvandaka mpenza fyoti. Bau kutadilamaka mpi ya kuluta mfunu sambu bau kuponamaka sambu na makwisa mosi ya mbalu, sambu na kisalu ya kimfumu. Tata na bau Yehowa, Ngungudi ya Nene, mebinga kibuka ya fyoti sambu bau kubaka difwa na bau ya zulu sambu na kuyala kumosi ti Kristu na kati ya Kimfumu ya Mesiya.

Kibuka ya Fyoti

³ Ebuna, banani yango kesala kibuka ya fyoti yina mebaka kivuvu ya kuluta kitoko ya mutindu yai? Kele balongoki ya Yezu Kristu yina kusolamaka na mpeve santu. (Bisalu 2:​1-4) Na kumonaka bau bonso bayimbi ya zulu ti nsambi ya nsinga na maboko na bau, ntumwa Yoane kusonikaka nde: “Ye mono monaka, mpi tala, Mwana ya Dimeme ya kutelema na Ngumba Sioni, mpi kumosi ti yandi bantu mafunda nkama mosi makumi iya na iya yina kuvandaka ti zina na yandi mpi zina ya Tata na yandi ya kusonama na bambunsu na bau. Kele bayina mekudibebisaka ve ti bankento; ya kyeleka, bau kele bamwense. Kele bayina kelandaka Mwana ya Dimeme bifulu yonso ya yandi kekwendaka. Bau kusumbamaka na kati ya bantu bonso mayita sambu na Nzambi mpi sambu na Mwana ya Dimeme, mpi na munoko na bau luvunu kuvandaka ve ata fyoti; bau kele na lusembo ve.”​—⁠Kusonga 14:​1, 4, 5, NW.

⁴ Kubanda na Pentekoti ya mvu 33 T.B., bansolami yai, ya mebutuka na mpeve kesalaka kisalu ya bangenzi ya Kristu awa na ntoto. (2 Korinto 5:20) Bubu yai, kaka ndambu na kati na bau kesikila na kusalaka kumosi bonso mpika ya kwikama mpi ya mayele. (Matayo 24:​45, NW; Kusonga 12:17) Mingimingi, kubanda 1935, mafuku ya “mameme ya nkaka,” Bakristu yina kele na kivuvu ya kuzinga na ntoto mevukanaka na bau. Bau kesadisa bau na kisalu ya kusamuna nsangu ya mbote na ntoto ya mvimba.​—⁠Yoane 10:⁠16.

⁵ Nkadilu ya ndambu ya kibuka ya fyoti yina kele ntete awa na ntoto kele inki? Na kuzabaka nde bau tabaka ‘Kimfumu yina tanikana ve,’ bau kesadila Nzambi kisalu ya busantu, na nkadilu ya kubanga mpi ya wonga. (Baebreo 12:​28, NW) Na mbatalala yonso, bau kezaba nde bau kele na dibaku ya nene mpi ya kitoko yina kepesa bau kyese ya kukonda nsuka. Bau mesengumuna “ditadi ya ntalu ya mbalu mingi” ya Yezu kutubilaka ntangu yandi vandaka kutubila Kimfumu. (Matayo 13:​46, NW) Bonso mpasi ya nene kefinama, bansolami ya Nzambi metelama nkatu kubanga. Ata nkutu mambu ya nene kezola kubwila bantu na ntangu ya “kilumbu ya nene mpi ya nkembo ya Yehowa,” bau kele ve na kubanga ya mbi ya makwisa. (Bisalu 2:​19-21) Sambu na inki kubanga?

Ntalu na Bau Kekita Kaka

⁶ Na bamvula yai mekatuka kuluta, ntalu ya bamambere ya kibuka ya fyoti ya kele ntete awa na ntoto kele na kukita kaka. Yau kumonanaka pwelele na lapolo ya Lusungiminu ya 1994. Na kati ya mabundu penepene na 75000 ya bansadi ya Yehowa yina kele na nza ya mvimba, kaka bantu 8617 kumonisaka nde bau kele bamambere ya ndambu na kudyaka dimpa mpi na kunwaka vinu. (Matayo 26:​26-30) Kansi, ntalu ya bantu kuvandaka na Lusungiminu kuvandaka na kimvuka 12288917. Bakristu ya kusolama kuzaba nde yau fwete kusalama mpila yina. Yehowa metulaka ndilu na ntalu, bantu 144000, sambu bau kusala kibuka ya fyoti, mpi yandi kuvukisaka bau kubanda na Pentekoti ya mvu 33 T.B. Yau yina, yau kulombamaka nde kubingama ya kibuka ya fyoti kusuka ntangu ntalu na bau kukumaka penepene na kulunga, mpi kyeleka kele nde kubingama yina ya bantu ya kusakumunama kusukaka na mvu 1935. Kansi, yau kubikulamaka nde na ntangu ya nsuka, mameme ya nkaka takuma mingi sambu na kuvanda “kibuka ya nene, yina ata muntu ve lenda kutanga, ya mekatuka na bansi yonso mpi na makanda mpi na bantu mpi na bandinga yonso.” Kubanda 1935, Yehowa kele na kuvukisa kibuka ya nene yango, yina kele na kivuvu ya kubaka luzingu ya mvula na mvula na paladisu awa na ntoto.​—⁠Kusonga 7:​9, NW; Kus. 14:​15, 16; Nkunga 37:⁠29.

⁷ Bamingi na kati ya bamambere ya kibuka ya fyoti ya kele dyaka awa na ntoto kele na bamvula ya kubutukila kuluta 70, 80 to 90. Mwa ndambu na kati na bau mekumaka na bamvula kuluta 100. Ata bau kele na bamvula ikwa, bau yonso kezaba nde, na nzila ya lufutumuku ya zulu, bau tavukana ti Yezu Kristu mpi tayala ti yandi na Kimfumu na yandi ya nkembo. Bamambere ya kibuka ya nene tavanda bantu yina tayalama na Kristu Ntotila awa na ntoto. Bika nde konso muntu kuyangalala na mambu ya Yehowa mebongisa sambu na bayina kezolaka yandi. Yau metala beto ve ata fyoti na kusola kivuvu ya beto kezola kuvanda na yau. Kele Yehowa muntu kebakaka lukanu sambu na yau. Bibuka yau zole lenda kuyangalala na kivuvu sambu na makwisa, ata bau tavanda na Kimfumu ya zulu to na paladisu ya ntoto na nsi ya Kimfumu yina.​—⁠Yoane 6:​44, 65; Efezo 1:​17, 18.

⁸ Bamambere 144000 ya kibuka ya fyoti mesala “Izraele ya Nzambi,” yina meyingaka Izraele ya kinsuni na balukanu ya Nzambi. (Galatia 6:16) Na yau, ndambu mesalama na bamambere ya nsuka ya dibuta yina ya kimpeve ya kele dyaka na ntoto. Bamambere ya ndambu yango kele na kutulama bidimbu sambu na kundimama kimakulu na Yehowa. Na mbonameso mosi, ntumwa Yoane kumonaka kusalama ya dyambu yango, yandi kusonikaka nde: “Mono kumonaka wanzyo ya nkaka kebasika na ndambu ya ntangu kebasikaka, yandi vandaka na maboko ti kidimbu ya Nzambi ya moyo; mpi yandi vandaka kutuba na ndinga ya ngolo na bawanzyo iya ya bau kupesaka kiyeka ya kubebisa ntoto ti nzadi nde: ‘Beno bebisa ntete ve ntoto to nzadi to banti, tii kuna beto tatula bidimbu na bambunzu ya bampika ya Nzambi na beto.’ Mpi mono waka ntalu ya bayina kutulamaka bidimbu: mafunda nkama mosi makumi iya na iya, ya kutulamaka bidimbu na makanda yonso ya bana ya Izraele [ya kimpeve].” (Kusonga 7:​2-4, NW) Sambu kisalu yina ya kutula bidimbu na Izraele ya kimpeve mekuma mpenza penepene na nsuka na yau, yau kele kidimbu ya kemonisa nde kubika fyoti mambu ya ngituka tasalama. Yau kesongidila nde, “mpasi ya nene,” ntangu mipepe iya ya mbungulu tayambulama na zulu ya ntoto, mefinama mpenza.​—⁠Kusonga 7:⁠14.

⁹ Bamambere ya kibuka ya nene yina mevukisamaka ketangama bubu yai na mafuku. Dyambu ya kyese ya inki mutindu yai sambu na ndambu! Ata nkutu ntalu ya bamambere ya kibuka ya fyoti ya kele dyaka awa na ntoto kelanda na kukita, bau melonga mpi mebongisa na kati ya kibuka ya nene, babakala ya mefwana na kubaka mikumba sambu na kuyela ya kimvuka ya Nzambi na ntoto. (Yezaya 61:⁠5) Bonso Yezu kumonisaka yau, baguluki ya mpasi ya nene tavanda.​—⁠Matayo 24:⁠22.

“Kubanga Ve”

¹⁰ Satana ti bawanzyo na yandi ya mbi melosamaka na nzyunga ya ntoto. Yandi ti bansadi na yandi mesadilama sambu na kunwanisa na nku yonso bansadi ya Yehowa. Ndwanisa yina, ya kuyitaka kutubilama na Biblia, metendulama bonso ndwanisa ya Gogi ya Magogi. Banani kibeni Dyabulu kesosa kunwanisa? Ndambu ya bamambere ya kibuka ya fyoti, Izraele ya kimpeve ya Nzambi, bayina kele na ngemba “na katikati ya ntoto,” mpila yina ve? (Ezekiele 38:​1-12) Yau kele mpila yina kibeni, kansi ndambu ya kalasi ya kusolama ya kwikama, kumosi ti bankundi na bau ya kwikama, mameme ya nkaka, tamona mutindu ndwanisa ya Satana tapesa nzila na ‘kisalu ya ngituka, kisalu ya nene,’ yina Yehowa Nzambi tasala. Yandi takotila bantu na yandi, mpi yau tabasisa luyantiku ya “kilumbu ya nene mpi ya wonga ya Yehowa.” (Yezaya 28:21; Yoele 2:31) Bubu yai, mpika ya kwikama mpi ya mayele kele na kulungisa kisalu mosi ya mfunu mingi, kisalu ya kugulusa luzingu, na kukebisaka bantu na yina metala kwisa ya kisalu yina ya nene ya Yehowa. (Malashi 4:5; 1 Timoteo 4:16) Keti nge kesala kisalu yango na kikesa yonso, na kuvukanaka na kusamuna nsangu ya mbote ya Kimfumu ya Yehowa? Keti nge talanda kusala mingi bonso nsamuni ya Kimfumu ya kukonda boma?

¹¹ Na kutalaka nkadilu ya nza ya bubu yai, ntangu melunga mpenza nde kibuka ya fyoti kulanda bangogo ya Yezu kutubaka na bau nde: “Kubanga ve, kibuka ya fyoti”! Nkadilu ya kikesa ya mutindu yai kele mfunu sambu na kutadilaka mambu yonso ya kesalama na kuwakana ti lukanu ya Nzambi. Konso mambere ya kibuka ya fyoti kezaba mfunu ya kuvibidila tii na nsuka. (Luka 21:19) Bonso Yezu Kristu, Mfumu mpi Longi ya kibuka ya fyoti, kuvibidilaka mpi yandi kudimonisaka ya kwikama tii na nsuka ya luzingu na yandi awa na ntoto, kiteso mosi konso mambere ya ndambu fwete kuvibidila mpi kumonisa kwikama.​—⁠Baebreo 12:​1, 2.

¹² Bansolami yonso fwete kuvanda na mboninu ya mambu kiteso mosi ti yina ntumwa Polo kuvandaka na yau. Tala mutindu nsamuni yai ya kusolama kutubilaka lufutumuku na ntwala ya bantu yonso kele na kuwakana ti nsyamisa ya Yezu ya kukonda kubanga. Polo kusonikaka nde: “Yibuka nde Yezu Kristu kufutumukaka na bafwa mpi nde yandi kuvandaka nkuna ya Davidi, na kuwakana ti nsangu ya mbote ya mono kelonga; sambu na yau mono kele na kunyokwama mbi kibeni tii na kukangama na bansinga bonso nsadi ya mambi. Kansi Ndinga ya Nzambi mekangama ve. Yau yina, mono kelanda kuvibidila mambu yonso sambu na mambote ya bansolami, sambu nde bau mpi kubaka lugulusu yina kele na kuwakana ti Kristu Yezu, kumosi ti nkembo ya mvula na mvula. Ntela yai kele ya kwikama: Ya kyeleka, kana beto kufwa kumosi ti yandi, beto tazinga kumosi ti yandi; kana beto landa kuvibidila kumosi ti yandi, beto tayala mpi kumosi ti yandi; kana beto kubuya yandi, yandi mpi tabuya beto; kana beto kele ya kwikama ve, yandi tabikala ya kwikama, sambu yandi lenda ve kudibuya yandi mosi.”​—⁠2 Timoteo 2:​8-13, NW.

¹³ Bonso ntumwa Polo, bamambere ya ndambu ya kibuka ya fyoti ya kusolama kendima mpenza kuvibidila bampasi ntangu bau kesamuna nsangu ya ngolo ya mesonama na kati ya Ndinga ya Nzambi. Balukwikilu na bau kele mpenza ya ngolo, mpamba ve bau kelanda kutula ntima na balusilu ya lugulusu ya Nzambi ti kubaka na bau ya “koloa ya luzingu” kana bau kumonisa kwikama tii na lufwa. (Kusonga 2:10) Na nima ya lufutumuku mpi mbaluka ya mbala mosi, bau tavukana ti Kristu sambu na kuyala kumosi ti yandi bonso bamfumu. Yai ndungunu ya inki mutindu sambu na kwikama ya bau landaka kumonisa na kunungaka nza!​—⁠1 Yoane 5:​3, 4.

Kivuvu Mosi ya Kuswaswana

¹⁴ Kivuvu ya lufutumuku ya kibuka ya fyoti melunda kele ya kuswaswana. Na inki mutindu? Ntetentete, yau keyita lufutumuku ya kimvuka ya “bantu ya lunungu ti bantu ya kukonda lunungu.” (Bisalu 24:​15, NW) Ya kyeleka, lufutumuku ya bansolami kele na ndonga mosi ya lukumu, mutindu yau memonisama pwelele na bangogo yina kele na 1 Korinto 15:​20, 23 (NW) nde: “Kristu kufutumukaka na kati ya bafwa, mayita ya bayina kelala na kati ya lufwa. Kansi konso muntu na ndonga na yandi mosi: Kristu mayita, mpi bayina kele bantu ya Kristu na ntangu ya kumonana na yandi.” Na kuvandaka na mvibidulu mpi lukwikilu bonso yina ya Yezu kumonisaka, kibuka ya fyoti kezaba mambu ya kekinga bau na nsuka ya luzingu na bau na ntoto, mingimingi kubanda ntangu Mfumu ya kyeleka kwisaka na tempelo na yandi sambu na mfundusu na 1918.​—⁠Malashi 3:⁠1.

¹⁵ Polo kepesa beto kikuma ya nkaka ya kutadila lufutumuku yina bonso ya kuswaswana. Mutindu yau memonisama na 1 Korinto 15:​51-53 (NW), yandi kusonikaka nde: “Tala! mono kesonga beno diswekamu mosi ya santu: Beto yonso ve talala na kati ya lufwa, kansi beto yonso tabalulama, na mbala mosi, na mbweta ya disu, na ntangu ya mpungi ya nsuka. . . . Sambu, yina kele na nitu ya lenda kupola fwete kubaka nitu ya lenda ve kupola, mpi yina kele na nitu ya lenda kufwa fwete kubaka kukonda kufwa.” Bangogo yai ketadila bamambere ya kibuka ya fyoti yina kefwa na ntangu ya kumonana ya Kristu. Na kukondaka kulala ntangu mingi na kati ya lufwa, bau kebaka kukonda kufwa, “na mbala mosi, na mbweta ya disu.”

¹⁶ Na nsadisa ya mbakisa yai, beto lenda kuzaba ntendula ya bangogo ya ntumwa Yoane yina kele na Kusonga 14:​12, 13. Yandi kusonikaka nde: “Awa kele kisika mvibidulu ya basantu fwete kumonisama pwelele, bayina kelundaka bansiku ya Nzambi mpi lukwikilu na Yezu. Mpi mono kuwaka ndinga kukatukaka na zulu kutubaka nde: ‘Sonika: Bafwa ya kefwa na kuwakana ti Mfumu kubanda ntangu yai kele bayangi. Mpeve ketuba nde ee, bika bau kuvunda na bisalu na bau, sambu mambu ya bau kusalaka kelanda bau, NW.’ ”

¹⁷ Nsendo ya kuswaswana ya inki mutindu kele na kukinga ndambu ya kibuka ya fyoti! Lufutumuku na bau takwisa nswalu, kaka na nima ya lufwa na bau. Nsobana ya nkembo ya inki mutindu bau tasala ntangu bau tabaka biyeka na bau na kisika ya kimpeve! Lukembisu yango ya kibuka ya fyoti meyantikaka kusalama mpi kulungana ya bambikudulu ya nene ya Biblia mekuma penepene na nsuka, na yau, ndambu ya bamambere ya kibuka ya fyoti yina kele dyaka awa na ntoto kele mpenza na kikuma ya “kukonda kubanga.” Mpi kukonda kubanga na bau kesyamisa bamambere ya kibuka ya nene, yina fwete kukuna nkadilu ya mutindu mosi ya kukonda kubanga sambu bau kele na kivuvu ya kugulusama na nsungi ya kuluta mpasi ya ntoto memonaka ntete ve.

¹⁸ Kutubila bisalu mesalama na kibuka ya fyoti kepusa bamambere na yau mpi bamambere ya kibuka ya nene na kulanda kubanga Nzambi ya kyeleka. Ntangu ya mfundusu na yandi mekuma, mpi ntangu ya mbote yai mebikala kele ya mbalu. Ya kyeleka, ntangu ya kubaka balukanu ya mbote mebikala fyoti sambu na bantu ya nkaka. Ata mpila yina, beto kebanga ve nde lukanu ya Nzambi tabela. Yau tanunga kibeni!

¹⁹ Bandinga ya ngolo ya zulu meyita kuwakana, na kutubaka nde: “Kimfumu ya nza mekuma kimfumu ya Mfunu na beto mpi ya Kristu na yandi, mpi yandi tayala bonso mfumu mvula na mvula mpi kimakulu.” (Kusonga 11:​15, NW) Ya kyeleka, Yehowa, Ngungudi ya Nene, ketwadisa mameme na yandi na “banzila ya lunungu sambu na zina na yandi.” (Nkunga 23:⁠3) Kibuka ya fyoti kele na kutwadisama nkatu kubwa tii na nsendo na bau ya zulu. Kansi mameme ya nkaka taguluka na mpasi ya nene mpi tavanda na luzingu ya mvula na mvula awa na ntoto yina tayalama na Kimfumu ya nkembo ya Nzambi yina tatambwisama na Kristu Yezu. Yau yina, bangogo ya Yezu kutubilamaka na kibuka ya fyoti, ntembe kele ve nde bansadi yonso ya Nzambi ya kele awa na ntoto kele na kikuma ya kuwa bangogo na yandi yai nde: “Kubanga ve.”

[Study Questions]

1. Sambu na inki Yezu kutubaka bangogo yai: “Kubanga ve, kibuka ya fyoti?”

2. Banani kesala kibuka ya fyoti, mpi sambu na inki bau kele na dibaku ya mbote?

3. Inki mbonameso ya nkembo ya kibuka ya fyoti Yoane kumonaka?

4. Inki kisalu kibuka ya fyoti kele na yau bubu yai awa na ntoto?

5. Nkadilu ya ndambu ya kibuka ya fyoti kele inki mpi sambu na inki bau fwete kubanga ve?

6, 7. (a) Sambu na inki ntalu ya bamambere ya kibuka ya fyoti ya kele dyaka awa na ntoto kele fyoti mpenza? (b) Inki mutindu konso muntu na kati na bau fwete kutadila kivuvu ya yandi kele na yau?

8. Kutulama bidimbu na bantu 144000 mebikala dyaka na ntangu ikwa, mpi inki tasalama ntangu yau tasuka?

9. Inki mutindu kibuka ya fyoti fwete kutadila ntalu ya bamambere ya kibuka ya nene ya kelanda kuyela?

10. (a) Inki ndwanisa tabasikila bansadi ya Nzambi, mpi yau tanata inki dyambu? (b) Inki bangyufula meyufulama sambu na konso muntu na kati na beto?

11. Sambu na inki nkadilu ya kikesa kele mfunu bubu yai?

12. Bonso Yezu, inki mutindu Polo kusyamisaka Bakristu ya kusolama na kukonda kubanga?

13. Inki balukwikilu ya ngolo bamambere ya kibuka ya fyoti kele na yau, mpi yau kepusa bau na kusala inki?

14, 15. Na inki mutindu kivuvu ya lufutumuku ya kibuka ya fyoti kele ya kuswaswana?

16, 17. Na kutadilaka kivuvu na bau ya lufutumuku, inki mutindu bakristu ya kusolama mesakumunama mpenza bubu yai?

18, 19. (a) Sambu na inki ntangu ya beto kele na kuzinga kele ya kusala nswalunswalu? (b) Sambu na inki bansolami ti mameme ya nkaka fwete kubanga ve?

[Caption on page 1]

[Bangyufula]

[Caption on page 1]

Keti Nge Lenda Kutendula?

◻ Sambu na inki beto fwete kuzaba mbote nde ntalu ya bamambere ya ndambu ya kibuka ya fyoti fwete kukita?

◻ Nkadilu ya ndambu ya bansolami kele inki bubu yai?

◻ Sambu na inki Bakristu lenda ve kuvanda na kubanga, ata nkutu ndwanisa ya Gogi ya Magogi mefinama?

◻ Sambu na inki kivuvu ya lufutumuku ya bantu 144000 kele ya kuswaswana, mingimingi bubu yai?