“Nzila ya Nzambi Ke Luzingu” Lukutakanu ya Distrike 1998-1999 Mefinama!
NA Burundi, Congo-Brazzaville ti Congo-Kinshasa mpamba, beto tasala balukutakanu 59 na Augusti ti na Septembri. Ziku na kati ya balukutakanu yai ya bilumbu tatu, mosi tasalama penepene na kifulu ya nge kevandaka. Na bisika mingi, konso kilumbu—Kitanu, Mposo ti Lumingu—lukutakanu tabandaka na 9:30 ya ntwala-midi.
Na Kitanu na suka, beto tatadila mingi balapolo ya kuyela ya kisalu ya kusamuna Kimfumu na bisika mingi na inza. Disolo ya ntu-dyambu, “Nkudulu ya Kristu Kele Nzila ya Lugulusu ya Nzambi,” tatendula ntu-dyambu ya lukutakanu.
Symposium mosi tavanda na nima-midi na ntu-dyambu, “Bibuti—Beno Longa Nzila ya Nzambi na Bana na Beno.” Yau tapesa bangindu ya kusadila sambu na kupusa bana na kuzola mpi kusadila Yehowa. Disolo ya nsuka na nkokila tavanda nde, “Keti Luzingu Kele na Nima ya Lufwa?”
Na Mposo na ntwala-midi, manaka tasonga kisalu ya Bambangi kesalaka sambu na kukumisa bantu balongi. Yau tavanda na masolo tatu ya kulandana. “Beto Sadisa Bantu na Kukota na Nzila ya Luzingu,” “Kununga Bitumba ya Kukumina Bantu,” ti “Beto Longa Balongoki Mambu Yonso ya Kristu Songaka.” Na nsuka ya kitini ya ntwala-midi bangidika tavanda sambu bantu ya mpa kubaka mbotika.
Disolo ya ntete na nima-midi tavanda nde, “Beto Sala ti Kivuvu ya Luzingu ya Kukonda Nsuka.” Yau tapesa beto kikesa ya kusamba sambu na bikuma ya muntu na muntu kele na yau ya kusadila Nzambi. Masolo yai: “Beto Vanda na Ntonda Sambu na ‘Makabu ya Bantu’ Yina Kelongaka Nzila ya Nzambi” ti “Katula Kimuntu ya Ntama Nge Lwata Kimuntu ya Mpa,” kemonisa ntendula ya mvese mosi mosi ya Efezo kapu 4. Na nima, ndongisila ya mbote ya Masonuku tapesama na disolo ya ketuba nde, “Kudipakula Ve Mvindu ya Inza” ti na symposium ya bitini tatu na ntu-dyambu: “Baleke—Beno Landa Nzila ya Nzambi.” Disolo ya nsuka na nkokila tavanda na ntu-dyambu: “Bumuntu ya Ngangi ti Banzila na Yandi.”
Na Lumingu na suka, tavanda ti symposium mosi ya bitini tatu. Yau tatendula bakapu ya nsuka ya mukanda ya Ezekiele ti kulungana ya mbikudulu yina. Ntwala-midi tasuka ti kifwanifwani yina kemonisa kwikama ya batoko tatu ya Baebreo. Lukutakanu takuma benda-bika na nima-midi ti disolo ya bantu yonso: “Nzila Mosi Kaka ya Kenataka na Luzingu ya Mvula na Mvula.”
Ntembe kele ve nde nge tavwama na kimpeve kana nge melanda lukutakanu bilumbu yonso tatu. Beto kebinga nge na tiya yonso na kuvanda na bitini yonso ya lukutakanu, na yau yonso, muntu talomba nge kima ve. Sambu na kuzaba kisika yina kele mfinama na bwala na nge, yula na Nzo ya Kimfumu ya Bambangi ya Yehowa, to sonikila bambasisi ya zulunalu yai.