Keti Ngogo “Mukristu” Ke na Kuvidisa Ntendula na Yo?
KUVANDA Mukristu ketendula inki? Inki mvutu nge tapesa? Bo yulaka ngyufula yai na bantu ya bo ponaka kisakasaka na bansi ya kuswaswana, ebuna tala bamvutu ya bo pesaka:
“Kulanda Yezu mpi kusala mambu bonso yandi.”
“Kuvanda muntu ya mbote mpi kuzaba kukabila bankaka.”
“Kundima Kristu bonso Mfumu mpi Ngulusi.”
“Kukwenda na Misa, kusamba ti Shapele, mpi kubaka Mbundana ya Santu.”
“Mu kendima ve nde sambu na kuvanda Mukristu yo kelomba kaka kukwenda na nzo-Nzambi.”
Ata ba diksionere mpi kepesaka bantendula mingi ya kuswaswana mpi ya mpasi. Ya kyeleka, yo vandaka kisalu ya mpasi na kusala nde ngogo “Mukristu” kuvanda na bantendula kumi. Yo keyantika na ntendula yai: “kukwikila na to kuvanda muntu ya dibundu ya Yezu Kristu” tii na ntendula yai “muntu ya bikalulu ya mbote.” Yo kele kima ya kuyituka ve kana bantu mingi kemonaka mpasi na kutendula nki kuvanda Mukristu kezo tendula.
Kimpwanza ya mabanza
Bubu yai, na kati ya bantu yina mezabanaka mpenza nde bo kele Bakristu, ata na kati ya bayina kesambilaka kisika mosi, nge lenda mona bangindu mingi ya kuswaswana ya metala mambu bonso: mutindu bo sonikaka Biblia na ngolo ya Nzambi, dilongi ya ketubaka nde bima yonso ya kezingaka kubasikaka yo mosi, kukota ya dibundu na mambu ya politiki, mpi kusolula mambu ya metala lukwikilu ya muntu ti bantu yankaka. Masolo ya metala bikalulu ya bantu, bonso kubasisa mavumu, kulala bakala na bakala, ti bantu yina mekwelaka ve kansi ya kezingaka kumosi; kevandaka masolo mosi ya kekabisaka mpenza bantu. Dibanza ya kuluta mbote kele ya kubikila konso muntu kimpwanza ya kuyindula.
Mu mbandu, ntama mingi ve, zulunalu mosi (Christian Century) kutubaka nde tribinale mosi ya nzo-Nzambi ya Misioni ku votaka nde bo kele ti nswa yina dibundu mepesaka bo ya “kupona nkuluntu mosi ya mezabanaka na bantu yonso nde yandi kelalaka ti babakala sambu na kukota na kimvuka ya bantu yina ketwadisaka bo.” Bantu yankaka yina kelongukaka mambu ya metala mabundu ketubaka nkutu nde lukwikilu na Yezu kele ve mfunu mingi sambu na kuguluka. Lapolo mosi ya kele na zulunalu mosi (The New York Times) ketuba nde bo kekwikilaka nde Bayuda, Bamizuluma, ti bankaka “lenda vanda na kivuvu ya kukota na zulu [mutindu Bakristu ketulaka kivuvu].”
Kana mpila kele, yindula ntete nde muntu mosi ya kekwikilaka na bangindu ya Marx kekotila ngolo bangindu ya kapitalisme, to demokrate yina kemonisa nde kidiktatire kele mbote, to dyaka muntu yina ketaninaka mambu metala kisika ya kuzinga kekotila dibanza ya kufwa bamfinda ya mvimba. Nge tatuba nde, “ya kyeleka muntu yina lenda vanda ve Marxiste ya kyeleka to demokrate to nkutu muntu ya ketaninaka kisika ya bantu kezingaka.” Yo lenda vanda kyeleka. Kansi, kana nge tadila bangindu ya kuswaswana yina bantu ya mezabanaka nde bo kele Bakristu kevandaka na yo, nge takutana ti malongi ya kewakanaka ve ata fyoti, mpi yina kewakana ve na mambu yina Muntu yina kusalaka Bukristu, Yezu Kristu, vandaka kulonga. Inki bangindu na bo ya kuswaswana kesonga na yina metala Bukristu na bo ya mekabwana-kabwanaka?—1 Korinto 1:10.
Mutindu beto tamona yo, kikesa ya kusosa kubalula malongi ya Bukristu sambu yo wakana na bangindu ya ntangu yina bantu kezinga meyantikaka tuka ntama. Inki mutindu Nzambi ti Yezu Kristu kekudiwaka sambu na mambu yai ya kebalukaka mutindu yina? Keti mabundu yina kelongaka malongi yina ya ketubila ve Kristu na masonga yonso lenda kudibinga nde bo kele Bakristu? Na disolo yina melanda beto tatubila bangyufula yai.