Keti Nge Kele ‘Kapita ya Mambote ya Nzambi Yina Beto Mefwana Ve na Kubaka’?
“Beno zolana ngolo bonso bana ya tata mosi ti mama mosi, na yina metala zola ya kimpangi, beno zolana ngolo beno na beno.”—ROMA 12:10.
1. Inki balusilu beto kekuta na Ndinga ya Nzambi?
NDINGA YA NZAMBI kesila mbala na mbala nde Yehowa tasadisa beto na ntangu beto kele ya kulemba to na mawa na ntima. Mu mbandu, tala bangogo yai ya kepesa kikesa: “[Yehowa] ke sadisaka bantu yonso yina ke zola kubwa, bantu yina me lemba yandi ke pesaka bo ngolo.” “Bantu yina ke na mawa na ntima, yandi ke katulaka bo mawa, yandi ke sansaka bamputa na bo.” (Nk. 145:14; 147:3) Dyaka, Tata na beto ya zulu yandi mosi ketuba nde: “Mono Mfumu Nzambi, mono kele Nzambi na nge; mono muntu [“kesimba diboko na nge ya kitata,” NW], mono muntu ke tubila nge nde: ‘Kuwa boma ve, mono ke sadisa nge!’”—Yez. 41:13.
2. Inki mutindu Yehowa kepesaka lusadisu na bansadi na yandi?
2 Inki mutindu Yehowa, yina kezingaka na zulu, ‘kesimbaka diboko na beto’? Inki mutindu yandi ‘kepesaka beto ngolo kana bampasi ya ngolo melembisa beto’? Yehowa Nzambi kepesaka lusadisu ya mutindu yai na mitindu mingi. Mu mbandu, yandi kepesaka bantu na yandi “ngolo ya nene” na nzila ya mpeve santu na yandi. (2 Kor. 4:7; Yoa. 14:16, 17) Bansadi ya Nzambi kebakaka mpi ngolo na nsangu yina kele na Ndinga na yandi ya kupemama, Biblia. (Baeb. 4:12) Keti kele dyaka ti mutindu yankaka yina Yehowa kepesaka beto ngolo? Beto tabaka mvutu na mukanda ya Ntete ya Piere.
“Mambote ya Nzambi Yina Beto Mefwana Ve na Kubaka Yina Kemonanaka Mutindu na Mutindu”
3. (a) Ntumwa Piere ketuba nki na yina metala bampasi? (b) Inki bo ketubila na kitini ya nsuka ya mukanda ya ntete ya Piere?
3 Ntangu yandi sonikilaka Bakristu ya kupakulama na kimpeve, ntumwa Piere kutubaka nde bo kele ti kikuma ya mbote ya kuvanda na kyese sambu na balusakumunu mingi yina kevingila bo. Na nima yandi yikaka nde: “Ata beno ke na mawa bubu yai sambu na bampasi yai ya mutindu na mutindu ya beno ke mona.” (1 Pie. 1:1-6) Tala bangogo “mutindu na mutindu.” Yo kemonisa nde bampasi tavanda ve ya mutindu mosi. Ata mpidina, Piere kesuka ve pana na kubikaka nde bampangi na yandi kudiyula kana bo takuka kukanga ntima na mimekamu ya kuswaswana ya mutindu yina. Kansi, Piere kemonisa nde Bakristu lenda ndima mpenza nde Yehowa tasadisa bo na kukanga ntima na konso mimekamu yina bo takutana na yo, yo vanda ya nki mutindu. Lusilu yina kepesama na kitini ya nsuka ya mukanda ya Piere kisika ntumwa ketubila mambu ya ketala “nsuka ya mambu yonso.”—1 Pie. 4:7.
4. Sambu na nki bangogo ya 1 Piere 4:10 kepesa beto kikesa?
4 Piere ketuba nde: “Na kiteso yina konso muntu mebakaka dikabu, beno sadila yo na kusadilana beno na beno bonso bakapita ya mbote ya mambote ya Nzambi yina beto mefwana ve na kubaka yina kemonanaka mutindu na mutindu.” (1 Pie. 4:10, NW) Piere kesadila dyaka bangogo “mutindu na mutindu.” Na kutuba ya kyeleka, yandi ketuba nde, ‘Bampasi kekwisaka na mitindu mingi ya kuswaswana, kansi Nzambi kemonisaka mpi mambote na yandi yina beto mefwana ve na kubaka na mitindu mingi ya kuswaswana.’ Sambu na nki bangogo yai kepesa kikesa? Yo kemonisa nde ata bampasi na beto tavanda nki mutindu, Nzambi tamonisaka ntangu yonso mutindu mosi ya mambote na yandi yina beto mefwana ve na kubaka yina tawakana ti bampasi yango. Kansi, keti nge memona na bangogo ya Piere mutindu Yehowa kemonisilaka beto mambote na yandi yina beto mefwana ve na kubaka? Yandi kesalaka yo na nzila ya bampangi Bakristu.
“Kusadilana Beno na Beno”
5. (a) Konso Mukristu fwete sala inki? (b) Inki bangyufula kebasika?
5 Ntangu yandi tubilaka bantu yonso ya dibundu ya Bukristu, Piere sonikaka nde: “Kima ya ntete, beno fweti zolana ngolo mpenza na kati na beno.” Na nima yandi keyika nde: “Na kiteso yina konso muntu mebakaka dikabu, beno sadila yo na kusadilana beno na beno.” (1 Pie. 4:8, 10, NW) Yo yina, konso muntu na dibundu fwete vukana na kupesa bampangi Bakristu kikesa. Bo mepesaka beto mukumba ya kima mosi ya mfunu ya Yehowa, mpi beto kele ti mukumba ya kukabula yo na bankaka. Inki kima yango ya bo mepesaka beto? Piere ketuba nde yo kele “dikabu.” Dikabu kele inki? Inki mutindu beto ‘kesadilaka yo na kusadilana beto na beto’?
6. Inki kele mwa makabu yina Nzambi mepesaka Bakristu?
6 Ndinga ya Nzambi ketuba nde: “Makabu yonso ya mbote mpenza ke katukaka na zulu.” (Yak. 1:17) Ya kyeleka makabu yonso yina Yehowa kepesaka bantu na yandi kele mutindu yandi kemonisilaka bo mambote na yandi yina beto mefwana ve na kubaka. Dikabu ya kuluta mfunu yina yandi mepesaka beto kele mpeve santu. Dikabu yango kesadisaka beto na kuyedisa bikalulu yina kesepedisaka Nzambi bonso zola, bumbote, mpi mawete. Ebuna, bikalulu ya mutindu yai kepusaka beto na kumonisa zola ya masonga na bampangi Bakristu mpi kusadisa bo na luzolo yonso. Mayele ti nzayilu ya kyeleka kele mpi na kati ya makabu ya mbote yina beto kebakaka na lusadisu ya mpeve santu. (1 Kor. 2:10-16; Gal. 5:22, 23) Ya kyeleka, beto lenda tadila ngolo, ngangu, mpi mayele na beto yonso bonso makabu yina beto lenda sadila sambu na kupesa lukumu mpi nkembo na Tata na beto ya zulu. Nzambi mepesaka beto mukumba ya kusadila mayele ti bikalulu na beto bonso mwaye ya kumonisa mambote ya Nzambi yina beto mefwana ve na kubaka na bampangi na beto Bakristu.
“Beno Sadila Yo na Kusadilana”—Inki Mutindu?
7. (a) Bangogo “na kiteso” kemonisa nki? (b) Inki bangyufula beto fwete kudiyula, mpi sambu na nki?
7 Sambu na makabu ya beto mebakaka, Piere ketuba dyaka nde: “Na kiteso yina konso muntu mebakaka dikabu, beno sadila yo.” Bangogo “na kiteso” kemonisa nde mutindu mpi nene ya bikalulu ti mayele lenda vanda ve kiteso mosi. Ata mpidina, bo kesyamisa konso muntu nde yandi “sadila yo [disongidila, konso dikabu yina yandi mebakaka] na kusadilana beno na beno.” Dyaka, bangogo “beno sadila yo . . . bonso bakapita ya mbote” kele ntuma. Yo yina, beto fwete kudiyula nde: ‘Keti mono kesadila mpenza makabu yina bo mepesaka mono sambu na kupesa kikesa na bampangi na mono Bakristu?’ (Fwanisa ti 1 Timoteo 5:9, 10.) ‘To keti mu kesadilaka makuki yina Yehowa mepesaka mono kaka sambu na mambote na mono mosi, ziku sambu na kuzwa bimvwama to kukuma muntu ya nene?’ (1 Kor. 4:7) Kana beto kesadila makabu na beto ‘na kusadilana beto na beto,’ beto tasepedisa Yehowa.—Bing. 19:17; tanga Baebreo 13:16.
8, 9. (a) Inki kele mwa mitindu yina Bakristu ya ntoto ya mvimba kesalaka sambu na mambote ya bampangi na bo Bakristu? (b) Inki mutindu bampangi ya babakala ti ya bankento ya dibundu na beno kesadisanaka?
8 Ndinga ya Nzambi ketubila mitindu mingi yina Bakristu ya mvu-nkama ya ntete kusadilanaka bo na bo. (Tanga Roma 15:25, 26; 2 Timoteo 1:16-18.) Mutindu mosi bubu yai, Bakristu ya kyeleka kezitisaka na ntima ya mvimba ntuma yai ya kusadila makabu na bo sambu na mambote ya bampangi na bo Bakristu. Beto tadila mwa mitindu yina bo kelungisa yo.
9 Bampangi-babakala mingi kelutisaka bangunga mingi konso ngonda sambu na kubongisa masolo ya balukutakanu. Na balukutakanu, ntangu bo ketubilaka bimvwama ya kimpeve yina bo zwaka ntangu bo vandaka kulonguka Biblia, bangogo na bo ya mayele kesyamisaka bantu yonso na dibundu na kukanga ntima. (1 Tim. 5:17) Bampangi-babakala mingi mpi ya bankento mezabanaka sambu na tiya mpi mawa na bo sambu na bampangi na bo Bakristu. (Roma 12:15) Bankaka kekwendaka kutala mbala na mbala bayina kenyokwama na mabanza mpi kesambaka ti bo. (1 Tes. 5:14) Bankaka kesonikaka na dikebi yonso mwa bangogo ya masonga ya kesyamisa bampangi Bakristu yina kenwana ti mpasi. Bankaka dyaka, kesadisaka na zola yonso bayina kele ti bandilu na nitu sambu bo kwenda na balukutakanu ya dibundu. Mafunda ya Bambangi kepesaka maboko na kisalu ya kusadisa na kutunga dyaka banzo ya bampangi Bakristu yina bisumbula mebebisaka. Zola yina bampangi yai ya babakala ti ya bankento kemonisaka, mpi lusadisu yina bo kepesaka, kele mitindu yina Nzambi kemonisaka ‘mambote na yandi yina beto mefwana ve na kubaka yina kemonanaka mutindu na mutindu.’—Tanga 1 Piere 4:11.
Inki Kima Meluta Mfunu?
10. (a) Polo vandaka kudibanza na nki bitini zole ya kisalu na yandi sambu na Nzambi? (b) Inki mutindu beto kelandaka mbandu ya Polo bubu yai?
10 Nzambi mepesaka kaka ve bansadi na yandi dikabu yina bo fwete sadila sambu na mambote ya bampangi na bo Bakristu, kansi yandi mepesaka bo mpi nsangu yina bo fwete zabisa na bantu yankaka. Ntumwa Polo kubakisaka bitini yai zole ya kisalu na yandi sambu na Yehowa. Yandi sonikilaka dibundu ya Efezo na yina metala “kisalu ya kapita ya mambote ya Nzambi yina beto mefwana ve na kubaka” yina bo pesaka yandi sambu na mambote na bo. (Ef. 3:2, NW) Kansi, yandi tubaka mpi nde: “Beto ke tubaka mutindu Nzambi me zola, sambu yandi me ndimaka beto, ebuna yandi me pesaka beto Nsangu ya Mbote.” (1 Tes. 2:4) Bonso Polo, beto mpi kebakisaka nde Nzambi mepesaka beto kisalu ya kusala bonso bansamuni ya Kimfumu ya Nzambi. Kana beto kesala na kikesa yonso kisalu ya kusamuna, pana beto kesala ngolo sambu na kulanda mbandu ya Polo yina kuvandaka nsamuni ya kikesa ya nsangu ya mbote. (Bis. 20:20, 21; 1 Kor. 11:1) Beto mezaba nde kusamuna nsangu ya Kimfumu lenda gulusa luzingu ya bantu. Kansi, na ntangu yina mosi beto kesalaka mpi ngolo sambu na kulanda mbandu ya Polo na kusosaka mabaku ya “kunatila [bampangi Bakristu] lusadisu yina ke katukaka na Mpeve ya Nzambi.”—Tanga Roma 1:11, 12; 10:13-15.
11. Inki mutindu beto fwete tadila mukumba na beto ya kusamuna mpi ya kupesa kikesa na bampangi na beto?
11 Inki kisalu meluta mfunu mingi na kati ya bisalu yai zole ya Bukristu? Kuyula ngyufula ya mutindu yai kele bonso kudiyula nde: Inki dipapu meluta mfunu mingi na kati ya mapapu zole ya ndeke? Mvutu kele pwelele. Ndeke fwete sadila mapapu yonso zole sambu na kupumbuka mbote. Mutindu mosi, beto fwete sala bitini yai yonso zole ya kisalu na beto na Nzambi sambu na kuvanda Bakristu yina mefwana. Yo yina, na kisika ya kutadila mukumba na beto ya kusamuna nsangu ya mbote mpi ya kupesa kikesa na bampangi Bakristu bonso nde yo kewakana ve, beto ketadilaka yo kaka mutindu ntumwa Piere ti Polo kutadilaka yo, disongidila bonso mikumba yina kesalaka kumosi. Na nki mutindu?
12. Inki mutindu beto kevandaka bantu yina Yehowa kesadilaka?
12 Sambu beto kele baevanzelizatere, beto kesadilaka mayele yonso ya kulongila yina beto lenda vanda na yo sambu na kusimba ntima ya bantu ti nsangu ya ngolo ya Kimfumu ya Nzambi. Na mutindu yina, beto ketulaka kivuvu sambu na kusadisa bo na kukuma balongoki ya Kristu. Kansi, beto kesadilaka mpi konso mayele ti makabu yankaka yina beto lenda vanda na yo sambu na kusosa kupesa kikesa na bampangi Bakristu na nzila ya bangogo ya kepesa kikesa mpi ya mambu yina lenda sadisa bo. Yonso yai kele mutindu ya kumonisa mambote ya Nzambi yina beto mefwana ve na kubaka. (Bing. 3:27; 12:25) Na mutindu yina, beto ketulaka ntima na kusadisa bo sambu bo bikala balongoki ya Kristu. Na bisalu yai yonso zole, disongidila kulonga bantu mpi ‘kusadilana beto na beto,’ beto kele ti dibaku ya kitoko ya kuvanda bantu yina Yehowa kesadilaka.—Gal. 6:10.
“Beno Zolana Ngolo”
13. Inki lenda salama kana beto ‘kesadilana ve beto na beto’?
13 Polo kulongisilaka bampangi na yandi Bakristu nde: “Beno zolana ngolo bonso bana ya tata mosi ti mama mosi, na yina metala zola ya kimpangi, beno zolana ngolo beno na beno.” (Roma 12:10) Ya kyeleka, kuzola bampangi na beto kepusa beto na kusala na ntima ya mvimba bonso bakapita ya mambote ya Nzambi yina beto mefwana ve na kubaka. Beto kebakisaka nde kana Satana kununga na kukanga beto nzila ya ‘kusadilana beto na beto,’ yandi talembisa bumosi na beto. (Kol. 3:14) Ebuna, kukonda bumosi tasala nde beto konda kikesa na kisalu ya kusamuna. Na kutuba mosi ya kifwani, Satana mezaba mbote nde yandi fwete bebisa kaka mosi na kati ya mapapu na beto sambu beto kuka ve kupumbuka.
14. Banani kebakaka mambote kana beto ‘kesadilana beto na beto’? Pesa mbandu.
14 ‘Kusadilana beto na beto’ tanata kaka ve mambote na bantu yina kebakaka mambote ya Nzambi yina beto mefwana ve na kubaka, kansi mpi na bantu yina kepesa yo. (Bing. 11:25) Beto baka mbandu ya Ryan mpi nkento na yandi Roni, ya bwala Illinois, na États-Unis. Ntangu bo waka nde mupepe mosi ya ngolo ya bo bingaka Katrina kubebisaka banzo mingi ya bampangi na bo Bakristu, zola ya bukristu kupusaka bo na kuyambula bisalu ti nzo na bo, mpi na kusumba kamio mosi ya okazio yina kevandaka ti bawago bonso nzo. Ebuna bo yidikaka kamio yango mpi kusalaka nzyetelo ya bakilometre 1400 tii na Louisiane. Bo zingaka kuna kuluta mvula mosi mpi bo pesaka ntangu, ngolo ti bimvwama na bo sambu na kusadisa bampangi na bo. Ryan, yina kele ti bamvula 29, ketuba nde: “Kupesa maboko na kisalu yai kupusaka mono penepene na Nzambi. Mu monaka mutindu Yehowa kekudibanzaka sambu na bantu na yandi.” Yandi keyika nde: “Kusala ti bampangi yina kele bambuta kulongaka mono mambu mingi ya metala mutindu ya kudibanza sambu na bampangi. Mu longukaka mpi nde beto baleke beto kele ti kisalu mingi ya kusala na organizasio ya Yehowa.” Roni, yina kele ti bamvula 25, ketuba nde: “Mu kemonisa ntonda na mutindu mu vukanaka na kisalu yina ya kusadisa bankaka. Mu kewa kyese mingi yina mu mewaka ntete ve na luzingu na munu. Mu mezaba nde na bilumbu yina kekwisa, mu talanda na kubaka mambote na eksperiansi yai ya kitoko.”
15. Inki bikuma ya mbote beto kele na yo ya kulanda na kusala bonso bakapita ya mambote ya Nzambi yina beto mefwana ve na kubaka?
15 Ya kyeleka, kulemfuka na bantuma ya Nzambi ya kulonga nsangu ya mbote mpi ya kupesa bampangi Bakristu kikesa kenatilaka bantu yonso balusakumunu. Bantu yina beto kesadisaka kebakaka ngolo na kimpeve, ebuna beto mpi kewaka kyese ya masonga yina kekatukaka kaka na kupesa. (Bis. 20:35) Zola kekumaka mingi na dibundu ya mvimba na ntangu konso muntu ketudilaka bankaka dikebi ya masonga. Dyaka, zola yina kevandaka na kati na beto kemonisaka pwelele nde beto kele Bakristu ya kyeleka. Yezu kutubaka nde: “Kana beno ke zolana beno na beno, bantu yonso ta zaba nde beno kele balonguki na mono.” (Yoa. 13:35) Kuluta yonso, lukumu kekwenda na tata na beto ya zola, Yehowa, sambu mpusa na yandi ya kupesa kikesa na bantu yina kele na yo mfunu kemonanaka na bansadi na yandi yina kele na ntoto. Yo yina, beto kele mpenza ti bikuma ya mbote ya kusadila dikabu na beto “na kusadilana” beto na beto “bonso bakapita ya mbote ya mambote ya Nzambi yina beto mefwana ve na kubaka”! Keti nge talanda na kusala buna?—Tanga Baebreo 6:10.
Keti Nge Keyibuka?
• Na nki mitindu Yehowa kepesaka bansadi na yandi ngolo?
• Inki bo mepesaka beto?
• Tanga mwa mitindu yina beto lenda sadila bampangi Bakristu.
• Inki tapusa beto na kulanda kusadila dikabu na beto sambu na ‘kusadilana beto na beto’?
[Bifwanisu ya kele na lutiti 17]
Keti nge kesadilaka “dikabu” na nge sambu na kusadila bankaka, to sambu na kudipesa kyese?
[Bifwanisu ya kele na lutiti 19]
Beto kesamunaka nsangu ya mbote na bankaka mpi kesadisaka bampangi Bakristu
[Kifwanisu ya kele na lutiti 20]
Yo mefwana nde beto sikisa bampangi yina kesalaka kisalu ya kusadisa bankaka sambu na mpeve na bo ya kuditambika