Kisalu Yina Bo Yidikaka Mbote Butaka Mbuma

María Isabel, kele toko mpi nsamuni ya kikesa yina ke zingaka na mbanza ya San Bernardo na Chili na Amerika ya Sudi. Yandi ti dibuta na yandi kele Bamapuche. Na kiese yonso, dibuta ya mvimba pesaka maboko sambu na kukangula dibundu ya mpa na ndinga ya Mapuche yina bo ke bingaka mpi Mapudungun.

Ntangu bo zabisaka nde Lusungiminu ya lufwa ya Kristu ta salama mpi na ndinga ya Mapudungun mpi nde bo basisaka balutiti 2 000 ya baemvitasio na ndinga yina, yo pusaka María na kuyindula. Inki yandi lendaka kusala sambu na kupesa lusadisu? Yandi yibukaka bambandu ya Bambangi ya nkaka ya batoko yina basisaka bambuma ya mbote ntangu bo taka kimbangi na banduku ya nzo-nkanda mpi na balongi na bo. Yandi zabisaka bibuti na yandi diambu yina, mpi kumosi bo bakaka lukanu nde María Isabel kuyindula na mutindu yina yandi ta kabula baemvitasio na ekole. Inki mutindu yandi zolaka kusala yo?

Ntete-ntete, María Isabel lombaka bamfumu ya ekole nswa ya kutula emvitasio mosi na kielo ya lupangu ya ekole. Bo ndimaka mpi sikisaka yandi sambu na dibanza na yandi. Kilumbu mosi na suka, mfumu ya ekole yina pesaka luzayisu na ndinga ya ngolo sambu na emvitasio yina!

Na nima, María Izabel lombaka mpi balongi yonso nswa ya kupesa emvitasio na konso nzo-nkanda. Na nima ya kubaka nswa, yandi vandaka kuyula na konso nzo-nkanda bana yina kele Bamapuche. Yandi ke tuba nde: “Mono yindulaka nde bo zolaka kuvanda ziku bantu 10 to 15 mpamba, kansi bo vandaka mingi mpenza yo yina mono kabulaka baemvitasio 150!”

“YANDI YINDULAKA NDE MUNTU YINA VANDAKA MBUTA”

Nkento mosi monaka lutiti ya emvitasio na kielo ya lupangu ya ekole mpi yulaka kana yandi fwete solula ti nani sambu na mambu yina me tala emvitasio yina. Yandi yitukaka ngolo ntangu bo nataka yandi na mwana-nkento mosi ya bamvula kumi! María Isabel ke tuba ti kuseka nde: “Yandi yindulaka nde muntu yina vandaka mbuta.” Na nima ya kupesa nkento yina emvitasio mpi kutendudila yandi na bunkufi, María Isabel lombaka yandi adresi na mpila nde yandi ti bibuti na yandi kukwenda kutala nkento yina sambu na kuzabisa yandi mambu mingi ya me tala Kimfumu ya Nzambi. Bansamuni 20 ya ndinga Mapudungun vandaka na kiese mingi ya kumona na Lusungiminu nkento yina kumosi ti bantu 26 ya Mapuche yina sepelaka mpi na emvitasio. Ntangu yai kimvuka yina kele dibundu yina kele ti bansamuni mingi!

Ata nge kele ti bamvula ikwa, keti nge lenda sala mutindu mosi sambu na kubingisa banduku na nge ya nzo-nkanda to ya kisalu na Lusungiminu, na diskure ya bantu yonso, to na lukutakanu ya distriki? Sala bansosa na mikanda na beto sambu na kuzaba masolo yina lenda sadisa nge na mutindu ya kusala diambu ya mutindu yina. Diaka, lomba Yehowa mpeve santu na yandi sambu na kusadisa nge na kubaka kikesa ya kulonga mambu ya me tala yandi. (Luka 11:13) Kana nge sala mpidina, nge mpi lenda yituka ngolo mpi kubaka kikesa na mbutu yina nge ta baka na kisalu yina nge me yidika mbote.