DISOLO YINA KELE NA LUTITI YA ZULU | MUTINDU YA KUBAKA MAMBOTE MINGI NA KUTANGA BIBLIA
Sambu na Nki Kutanga Biblia?
“Mu vandaka kuyindula nde Biblia ke mpasi na kubakisa.”—Jovy
“Mu vandaka kumona nde yo ta lembisa mono.”—Queennie
“Ntangu mu monaka mutindu Biblia kele nene, nzala ya kutanga yo manaka.”—Ezekiel
Keti nge me bakaka dezia dibanza ya kutanga Biblia kansi nge vutukaka nima sambu nge yindulaka bonso bantu yai ya beto me katuka kutubila? Sambu na bantu mingi, kutanga Biblia ke lembisaka nitu. Ebuna kana bo zabisa nge nde Biblia lenda sadisa nge na kuvanda ti luzingu mosi ya mbote mpi ya kiese? Ebuna kana bo songa nge nde kele ti bametode yina lenda sadisa nge na kutanga yo na mutindu yina lenda sepedisa nge? Keti nge ta zola kuzaba mambote yina Biblia lenda natila nge?
Beto tadila mambu yina bantu ya nkaka me tubaka sambu na mambote yina bo bakaka ntangu bo yantikaka kutanga Biblia.
Ezekiel yina me katuka kulungisa bamvula 20 ke tuba nde: “Mono vandaka ntete bonso muntu yina ke nata kamio kukonda kuzaba kisika yandi ke kwenda. Kansi kutanga Biblia me sadisaka mono na kuvanda ti luzingu mosi ya mbote. Yo kele ti bandongisila ya mbote yina mono lenda sadila konso kilumbu.”
Frieda, yina me katuka mpi kulungisa bamvula 20, ke tuba nde: “Mu vandaka kusala mambu kukonda kuyindula. Kansi kutanga Biblia me sadisaka mu na kudiyala mpi na kuwakana mbote ti bantu. Yo yina bubu yai mu me kumaka ti banduku mingi.”
Nkento mosi ya bamvula kuluta 50 na zina ya Eunice ke tuba mutindu yai sambu na Biblia: “Yo ke sadisaka mu na kukuma muntu ya mbote mpi na kusoba bikalulu na mu ya mbi.”
Mutindu bantu yai mpi bantu mingi ya nkaka ya ke tangaka Biblia me bakisaka yo, kutanga Biblia lenda sadisa nge na kuvanda ti luzingu ya mbote kuluta. (Yezaya 48:17, 18) Biblia lenda sadisa nge na (1) kubaka balukanu ya mbote, (2) kupona banduku ya mbote, (3) kudiyangisa ve kuluta ndilu, mpi (4) diambu ya kuluta mbote, kulonguka kieleka na yina me tala Nzambi. Bandongisila yina kele na Biblia me katukaka na Nzambi, yo yina yo ta natila nge kaka mambote kana nge sadila yo. Nzambi ke pesaka ve bandongisila ya mbi.
Diambu ya mfunu kele kuyantika kutanga Biblia. Inki bametode lenda sadisa nge na kuyantika kutanga Biblia kukonda mpasi mpi na mutindu yina lenda pesa nge kiese mingi?