Mutindu ya Mbote ya Kutadila Bifu
Don ti Margareta sepelaka ntangu mwana na bo ya nkento ti dibuta na yandi kwisaka kutala bo. Na ntwala nde bo kwenda, Margaret yina zabaka kulamba mbote-mbote, lambaka makaroni ti fromaze, madia yina bantekolo na yandi zole vandaka kuzola mingi.
Ntangu bantu yonso vandaka, Margaret nataka dilonga ya madia mpi tulaka yo na kati-kati ya mesa. Ntangu yandi kangulaka mufiniku, yandi yitukaka na kumona kaka supu ya fromaze na kati ya dilonga! Margaret vilaka na kutula makaroni!b
Yo vanda beto kele bambuta to beto me zaba mambu mingi, beto yonso ke salaka bifu. Yo lenda vanda beto tubaka mambu kukonda kuyindula, beto salaka kima mosi na ntangu ya mbi, to beto vilaka kima mosi. Sambu na nki beto ke salaka bifu? Inki mutindu beto lenda nunga yo? Inki mutindu beto lenda buya kusala yo? Mutindu ya mbote ya kutadila bifu ta sadisa beto na kupesa bamvutu na bangiufula yai.
MUTINDU NA BETO YA KUTADILA BIFU MPI MUTINDU NZAMBI KE TADILAKA YO
Kana beto me sala kima mosi ya mbote, beto ke waka kiese ntangu bantu ke sikisaka beto mpi ke ndimaka nde beto me fwana na kubaka lukumu. Kana beto me sala kifu, yo vanda ya kukonda kuzaba to bantu ya nkaka monaka yo ve, keti beto fwete ndima yo ve mutindu beto ke ndimaka mambu ya mbote ya beto ke salaka? Kusala mutindu yina ke lombaka kudikulumusa.
Kana beto ke kudimona mfunu mingi, beto ta kuma kumona mpamba bifu na beto, kupesa bantu ya nkaka foti, to nkutu kubuya nde beto salaka ve kifu yina. Kusala mutindu yai ke nataka mbala mingi bampasi. Yo lenda sala nde beto yidika ve diambu yango mpi beto pesa bantu ya nkaka foti. Ata beto me bumba bifu na beto bubu yai, beto fwete vila ve nde nsuka-nsuka, “konso muntu na kati na beto ta samba na ntwala ya Nzambi sambu na yandi mosi.”—Baroma 14:12.
Nzambi ke tadilaka bifu na mutindu ya mbote. Mukanda ya Bankunga ke tuba nde Nzambi “ke wilaka bantu mawa mpi ke fwilaka bo nkenda;” yandi “ta monisa ve bifu na beto ntangu yonso, yandi ta vandaka mpi ve na makasi kimakulu.” Yandi ke zabaka nde beto kele bantu ya kukonda kukuka, mpi ke bakisaka bifu yina beto ke butukaka ti yo, yandi “ke yibukaka nde beto kele mfututu.”—Nkunga 103:8, 9, 14.
Diaka, bonso tata ya mawa, Nzambi ke zolaka nde beto bana na yandi, beto tadila bifu mutindu yandi ke tadilaka yo. (Nkunga 130:3) Ndinga na yandi ke pesaka beto bandongisila mingi mpi lutwadisu yina ke sadisaka beto na kununga bifu na beto mosi mpi ya bantu ya nkaka.
MITINDU YA KUNUNGA BIFU
Mbala mingi, kana muntu me sala kifu, yandi ke lutisaka ntangu mingi mpi ke sadilaka ngolo na yandi sambu na kupesa bantu ya nkaka foti to kumonisa nde mambu yina yandi tubaka to salaka vandaka mbi ve. Kansi, kana mambu ya nge me tuba me pesa muntu ya nkaka mpasi, sambu na nki ve kulomba ndolula, kuyidika mambu, mpi kutanina kinduku na beno. Keti nge me salaka diambu ya mbi yina me natilaka nge mosi to muntu ya nkaka bampasi? Na kisika ya kuwa makasi to kupesa bankaka foti, sambu na nki ve kusala yonso sambu na kuyidika mambu? Kulanda kutuba nde foti kele na muntu ya nkaka ta sala nde mavwanga kumana ve mpi yo landa kaka na kukuma ngolo. Na kisika ya kusala mutindu yai, baka dilongi na diambu yango, yidika yo, mpi sala mambu yina nge fwete sala.
Kansi, kana muntu ya nkaka me sala kifu, yo ke vandaka mpasi ve na kusala mambu ya ke monisa nde beto me sepela ve. Yo kele mbote na kulanda ndongisila yai ya Yezu Kristu: “Yo yina, mambu yonso yina beno ke zola nde bantu kusadila beno, beno mpi beno fwete sadila bo yo.” (Matayo 7:12) Kana nge me sala kifu, ata ya fioti, ntembe kele ve nde nge ta zola bantu ya nkaka kuwila nge mawa to nkutu kulolula nge na ntima ya mvimba. Yo yina, sambu na nki ve kusala yonso sambu na kumonisila bankaka ntima-mbote ya mutindu mosi?—Baefezo 4:32.
MINSIKU YINA LENDA SADISA NA KUSALA VE BIFU MINGI
Diksionere mosi ke tuba nde, beto ke salaka bifu sambu na “mutindu ya mbi ya kutadila mambu, kukonda kuzaba mambu mbote, to kukonda kutudila yo dikebi.” Beto fwete zaba nde bantangu ya nkaka, beto yonso ke monisaka bikalulu yai. Kansi, beto ta sala ve bifu mingi kana beto ke tadila mwa minsiku ya mfunu ya Biblia.
Munsiku mosi kele na Bingana 18:13, yo ke tuba nde: “Kana muntu kupesa mvutu na diambu mosi na ntwala nde yandi wa banzikisa, yo kele buzoba mpi nsoni.” Ee, kubaka mwa ntangu ya kuwidikila mambu na bunda mpi kutadila mambu ya nge ke zola kutuba ta kanga nge nzila ya kutuba to kusala mambu kukonda kuyindula to na makasi. Kutula dikebi ya mingi na kuzaba mambu kele mfunu mingi sambu yo ke sadisaka na kutadila ve mambu na mutindu ya mbi mpi na kusala ve kifu.
Munsiku ya nkaka ya Biblia ke tuba nde: “Kana mpila kele, beno sala yonso sambu na kuzinga na ngemba ti bantu yonso.” (Baroma 12:18) Sala yonso sambu na kuzinga na ngemba mpi kuwakana ti bantu ya nkaka. Ntangu nge ke sala ti bantu ya nkaka, vanda ntima-nda, luzitu mpi sala yonso sambu na kusikisa bo mpi kupesa bo kikesa. Kana nge ke sala mutindu yai, nge lenda lolula kukonda mpasi mambu ya mbi ya muntu me tuba to me sala kukonda kuyindula, mpi nge lenda yidika na mawete yonso bifu ya nene.
Baka dilongi na bifu yina nge me sala. Na kisika ya kusosa kutuba nde mambu yina nge salaka to tubaka vandaka mbi ve, mona yo bonso dibaku ya kuyedisa bikalulu ya mbote. Keti yo ke lomba nde nge monisa mingi ntima-nda, ntima-mbote, to kikalulu ya kudiyala? Inki nge ke tuba sambu na mawete, ngemba, mpi zola? (Bagalatia 5:22, 23) Mambu yai lenda sadisa nge na kuzaba mambu yina nge fwete sala ve na mbala ya nima. Vanda muntu ya ke bakaka balukanu, kusosa ve kudiyangisa mingi. Kusekisa mwa fioti lenda sadisa na kumanisa mavwanga.
KUTADILA BIFU NA MUTINDU YA MBOTE KE NATAKA MAMBOTE
Kutadila bifu na mutindu ya mbote ta sadisa beto na kununga yo kukonda mpasi ntangu yo me salama. Beto mosi ta vanda na ngemba mpi beto ta vanda na ngemba ti bantu ya nkaka. Kana beto ke sala yonso na kubaka dilongi na bifu na beto, beto ta kuma mayele mingi mpi bantu ta zola beto mingi. Beto ta kuma ve mawa-mawa mpi beto ta yindula ve mambu ya mbi sambu na beto mosi. Kuzaba nde bantu ya nkaka mpi ke salaka bifu ta sadisa beto na kuvanda pene-pene ti bo. Kima ya kuluta mfunu, beto lenda baka mambote ya kulanda mbandu ya zola ya Nzambi mpi luzolo na yandi ya kulolula na ntima ya mvimba.—Bakolosai 3:13.
Keti kifu ya Margaret, yina beto tubilaka na luyantiku, manisaka kiese ya dibuta na bo? Ata fioti ve. Bantu yonso tadilaka yo na mutindu ya mbote, mingi-mingi Margaret, mpi bo sepelaka ti madia yina, ata yo vandaka ve ti makaroni! Bamvula mingi na nima, bantekolo yina tubilaka diaka bana na bo madia yina bo diaka na dibuta, yina bo ke vilaka ve mpi yo ke yibusaka bo mambu ya mbote ya ba-nkaka na bo. Ata mpidina, yo vandaka kaka kifu!