Beno Longa Bana na Beno na Kukumisa Yehowa
1. Keti bana ya fyoti lenda kumisa Yehowa?
1 Nkunga 148:12, 13 kesyamisa bana-babakala ti bana-bankento na ‘kukumisa’ zina ya Yehowa. Biblia kele ti bambandu mingi ya bana ya fyoti yina kusalaka mutindu yina. Mu mbandu, “leki Samuele vandaka kusadila kaka Mfumu Nzambi.” (1 Sam. 2:18) “Mwana-nkento mosi ya fioti” muntu kusongaka nkento ya Namani nde profete ya Yehowa yina kuvandaka na Izraele lendaka kugulusa Namani na maladi na yandi ya lepre. (2 Bant. 5:1-3) Ntangu Yezu kukotaka na tempelo mpi kusalaka mambu ya kuyituka, “bana” babakala bantu kutubaka na ndinga ya ngolo nde: “Lukumu kuvanda na Mwana ya Davidi!” (Mat. 21:15) Inki mutindu bibuti lenda longa bana na bo na kukumisa Yehowa?
2. Sambu na nki yo kele mfunu nde bibuti kupesa mbandu mosi ya mbote na bana bo?
2 Na Mbandu: Na ntwala ya kulonga kyeleka na ntima ya bana na bo, yo vandaka kulomba nde batata ya Izraele kuzola ntete Yehowa mpi kuvanda ti minsiku ya Yehowa na ntima na bo mosi. (Kul. 6:5-9) Kana beno ketubila kisalu ya kusamuna na mutindu ya kepesa kikesa to na mutindu ya mbote, mpi beno kekotisa yo na manaka na beno ya konso mposo, bana na beno tamona nde kisalu ya kusamuna kele mfunu mpi mbote.
3. Inki mutindu mpangi mosi ya nkento kubakaka mambote na mbandu ya bibuti na yandi?
3 Mpangi-nkento mosi keyibuka na kyese yonso nde: “Ntangu mu vandaka kuyela, kusamuna konso mposo kuvandaka na kati ya mambu yina dibuta na beto vandaka kusala mbala na mbala. Mu vandaka kumona nde bibuti na munu vandaka kuzola mpenza kisalu ya kusamuna. Ntangu beto vandaka kuyela, beto vandaka kutadila kisalu ya kusamuna nde yo kele kima mosi ya mbote kibeni.” Mpangi yai ya nkento kukumaka nsamuni ya mebaka ntete ve mbotika ntangu yandi vandaka ti bamvula nsambwadi mpi ntangu yai yandi mesala dezia bamvula kuluta 32 na kisalu ya ntangu yonso.
4. Kulonga bana malembe-malembe ketendula inki?
4 Longa Bo Malembe-Malembe: Beno pesa bana na beno mwa kima ya kusala ntangu beno kesamuna ti bo. Ziku bo lenda bula na kyelo mosi, kupesa trakiti na muwi, to kutanga verse mosi. Yo tayika kyese na bo mpi tasadisa bo na kutula ntima na mayele na bo ya kuzabisa nsangu ya Kimfumu. Na ntangu bo keyela, bo fwete yantika kusala mambu mingi na kisalu ya kusamuna. Yo yina, sadisa bo na kuyela mpi na kutadila balukanu ya bo lenda baka sambu na kutomisa kisalu na bo.
5. Inki kele mfunu sambu mwana kulungisa mambu ya bo kelombaka sambu na kukuma nsamuni ya mebakaka ntete ve mbotika?
5 Kana nge keyindula nde bana na nge melungisa mambu ya bo kelombaka sambu na kukuma bansamuni ya mebakaka ntete ve mbotika mpi kana bo mosi memonisa mpusa ya kuyantika kusamuna, kusukinina ve na kusolula ti bankuluntu. Kukuma bansamuni tasadisa bo na kubakisa mukumba yina bo kele na yo ya kukumisa Yehowa. Kuvila ve nde sambu na kukuma bansamuni, yo kelombaka ve nde bana kuzaba mambu kiteso mosi ti bambuta. Keti mwana na nge kebakisa malongi ya luyantiku ya Biblia? Keti yandi kezitisaka minsiku ya bikalulu ya mbote ya Biblia? Keti yandi kele na mpusa ya kusamuna mpi ya kuzabana bonso Mbangi ya Yehowa? Kana yo kele mpidina, bankuluntu lenda tala kana yandi kelungisa mambu ya bo kelombaka sambu na kukuma nsamuni ya mebaka ntete ve mbotika.—Tala mukanda Beto Mevukana Sambu na Kusala Luzolo ya Yehowa, na balutiti 79-82.
6 Sambu na kulonga bana na kukumisa Yehowa na ntima na bo, yo kelombaka kusala bikesa. Kansi, bima mingi ve kepesaka bibuti kyese mingi kuluta kyese yina bo kewaka na kumona bana na bo keyela na kimpeve. Kima ya kuluta mfunu kele nde Yehowa kesepelaka ntangu bana kezabisaka nsangu ya mambu ya kuyituka ya yandi mesalaka.
6. Sambu na nki yo kele mfunu nde bibuti kulonga bana na bo?