Bamvutu na Bangyufula na Beno

◼ Konso muntu fwete sala nki sambu balukutakanu kusalama na mutindu yina tasadisa beto na kulonguka mbote? (Kul. 31:12)

Sambu na luzitu ya mudindu sambu na Yehowa mpi ngidika na yandi ya balukutakanu ya dibundu, bo kesyamisa beto yonso na kukuma na ntwala mpi na kuvanda ya kuyilama sambu na kulongama. Yo kele mbote na kuvanda na bakiti ya ntwala, mpi na kubika bakiti ya nima sambu na bantu yina kele ti bana ya fyoti mpi bayina kekwisaka bantangu yankaka na nsukinina. Na ntwala nde lukutakanu kuyantika, beto fwete tula baapareyi to telefone na beto na vibreur to na mutindu yina tasala nde yo vwalangasa ve dikebi ya bawi. Makelele tavanda fyoti mpi ya ngolo ve kana bawi yonso kumonisa luzitu ya mefwana banda na luyantiku tii na nsuka ya lukutakanu.—Lo. 5:1; Filp. 2:4.

Ntangu bantu ya mpa meyantika kukwisa na balukutakanu, mpangi mosi ya dibundu yina mezabana ti bo lenda vanda kisika mosi ti bo. Kusala mutindu yina tavanda mbote mingimingi kana bo kele ti bana ya fyoti yina kelomba nde bo longa bo. Kukwisa na balukutakanu lenda vanda dyambu ya mpa sambu na dibuta yina. Kana yo kele mpidina, ntembe kele ve nde bo tasepela kuvanda na bisika ya nima, kisika yina bo tavwalangasa ve mingi bantu yankaka kana yo kelomba nde bibuti kubasika mwa fyoti na nganda sambu na kulungisa bampusa ya bana na bo ya fyoti. (Bing. 22:6, 15) Mabuta yina kele na bana ya fyoti fwete vanda ve ti bana na nganda to na kisika yankaka yina bana lenda vanda na kimpwanza ya kusala makelele. Mbala mingi yo kevandaka mbote nde kibuti kubasika na nganda sambu na kupesa mwana disipline to kulungisa bampusa na yandi yankaka mpi na nima kuvutuka ti mwana yango na kati ya Nzo Kimfumu.

Bampangi yina keyambaka bantu kesadisaka sambu mambu kusalama na mutindu yina mefwana na nzo ya lusambu. Bo kesadisaka mabuta mpi bantu yina kekwisaka bantangu yankaka na nsukinina na kuzwa bisika ya mefwana. Bo kesadilaka takte mpi mayele ntangu bo kesadisaka bampangi yankaka na kuvanda na bisika ya mbote kuzanga kukatula dikebi ya bawi kukonda mfunu. Bo kesadilaka luswasukusu ntangu bo kesosaka kuyidika mambu ya kekatula dikebi yina lenda basika na kintulumukina. Ntangu mwana mosi kesala mubulu mpi yo kekatula dikebi ya bankaka, bampangi yina keyambaka bantu lenda sadisa bo na mawete yonso.

Bantu yonso ya mekwisa na lukutakanu sambu na kusambila lenda sadisa sambu mambu kusalama na mutindu yina kesadisa na kulonguka mambu ya metala Yehowa mpi lukanu na yandi ya kutula nsi-ntoto ya mpa ya ngemba mpi ya lunungu.—Baeb. 10:24, 25.