Kukabula Baemvitasio ya Lusungiminu Tayantika na Aprili 2

1. Na nki dati beto takabula ba emvitasio ya Lusungiminu mvula yai, mpi nki kele mfunu ya kampanye yai ya kesalamaka konso mvula?

¹ Yantika Aprili 2 tii na Aprili 17, beto takabula baemvitasio sambu na dyambu mosi ya kuluta mfunu ya mvula​—Lusungiminu ya lufwa ya Kristu. Na bamvula meluta, ntangu beto salaka kampanye yai ya kesalamaka konso mvula, bantu mingi ya kesepelaka na kyeleka kundimaka kukwisa na Lusungiminu. Mu mbandu, na kilumbu ya Lusungiminu, nkento mosi kubingaka biro ya filiale mpi kutubaka nde: “Mu mekatuka kukuma na nzo, mpi mu mekuta emvitasio mosi na nsi ya kyelo na mono. Mu kezola kukwenda, kansi mu kezaba ve ntangu mambu yango tasalama.” Mpangi bakala kutendudilaka yandi kisika yandi lendaka kuzwa nsangu yai na emvitasio. Nkento yina kusukisaka na kusilaka nde, “Mu takwenda na nkinsi na beno na nkokila!”

2. Inki beto lenda tuba ntangu beto kepesa emvitasio?

² Inki Mutindu Beto Tasala Yo: Sambu beto kele ve ti ntangu mingi sambu na kusala teritware ya mvimba, yo kele mbote nde masolo na beto kuvanda nkufi. Beto lenda tuba nde: “Mbote na nge. Beto kezola kupesa dibuta na nge emvitasio yai sambu na nkinsi mosi ya mfunu ya kesalamaka konso mvula, yina tasalama na ntoto ya mvimba na Lumingu, Aprili 17. [Pesa muwi emvitasio.] Dati yai kele ya Lusungiminu ya lufwa ya Yezu. Bo tasala diskure mosi ya ofele ya mesimbama na Biblia yina tatendula mutindu beto lenda baka mambote na nkudulu ya Kristu. Emvitasio yai kemonisa kisika mpi ntangu yina lukutakanu yango tasalama na bwala na beto.”

3. Inki mutindu beto lenda binga bantu mingi?

³ Kana dibundu na beno kele ti teritware ya nene, bankuluntu lenda zabisa beno na kubika baemvitasio na banzo yina beno takuta ve bantu; beno lenda kotisa yo na nsi ya kyelo na mpila nde bantu yina keluta kumona yo ve. Sala ngolo na kubingisa bantu yina nge kevutukilaka, bantu ya dibuta, banduku ya kisalu, banduku ya nzo-nkanda, mpi bantu yankaka yina nge mezaba. Kana mpila kele, ntangu nge kekabula baemvitasio na bawikendi, kukabula mpi bazulunalu. Keti nge lenda vanda mupasudi-nzila nsadisi na nsungi ya Aprili mpi kusala mingi na kampanye yai ya kyese?

4. Sambu na inki beto kezola nde bantu ya kesepelaka na kyeleka kukwisa na Lusungiminu?

⁴ Bantu yina kesepelaka kukwisa na Lusungiminu tawa kimbangi mosi ya ngolo kibeni! Bo tabakisa zola ya nene ya Yehowa na mutindu yandi pesaka nkudulu. (Yoa. 3:16) Bo tazaba nki mutindu Kimfumu ya Nzambi tanatila bantu mambote. (Yez. 65:21-23) Beno talomba bo mpi na kusolula ti bampangi yina tayamba bantu sambu na kulomba nde Mbangi mosi kulonguka Biblia ti bo mpi kusadisa bo na kuzaba mambu mingi. Beto kesamba nde, na kampanye yai, bantu mingi ya ntima ya mbote kundima kuvukana ti beto na Lusungiminu!