‘Bika Nde Luzolo ya Nzambi Kusalama’
1. Inki kele ntu-dyambu ya lukutakanu ya sipesiali ya kilumbu mosi ya mvula ya kisalu 2012, mpi sambu na nki yo mefwana nde beto tadila ntu-dyambu yango?
1 Yehowa megangaka beto na luzolo na yandi mosi. (Kus. 4:11) Yo yina, beto lenda kuka ve ata fyoti kulungisa lukanu ya luzingu na beto kana beto kesosa ve kuzaba mpi kusala luzolo ya Nzambi. Dyambu yai kele ve pete sambu beto fwete nwana ti bampusa ya ntima na beto ya “kusala konso mambu yina ya nitu na beto ti mabanza na beto vandaka kuzola” to ya “kuzinga mutindu bamimpani ke zolaka kuzinga.” (Ef. 2:3; 1 Pie. 4:3; 2 Pie. 2:10) Nkutu, kukonda lusadisu ya Nzambi, ‘Satana lenda kanga beto na mpila nde beto landa luzolo na yandi.’ (2 Tim. 2:26) Manaka ya lukutakanu na beto ya sipesiali ya kilumbu mosi ya mvula ya kisalu 2012, tasadisa beto yonso na kusala mambu ya kewakana ti dyambu mosi na kati ya mambu tatu ya mfunu yina Yezu kulongaka beto na kusamba, disongidila nde, “luzolo na nge kusalama.”—Mat. 6:9, 10.
2. Manaka ya lukutakanu tapesa bamvutu na nki bangyufula?
2 Bangyufula Yina Lukutakanu Tapesa Bamvutu: Ntangu nge kelanda manaka ya lukutakanu, sosa bamvutu na bangyufula yai: Katula kuwa Ndinga ya Nzambi, nki dyambu yankaka ya mfunu beto fwete sala? Inki mutindu beto lenda landa na kuzaba luzolo ya Nzambi sambu na beto? Sambu na nki beto fwete vanda ti luzolo ya kusadisa bantu ya mitindu yonso? Inki mutindu beto lenda zwa luzingu mosi ya mbote, yina kepesa kyese? Baleke, Inki beno fwete sala sambu na kundimisa Yehowa? Kusala luzolo ya Nzambi kenataka nki mambote? Sambu na nki beto fwete pesa bankaka kikesa mpi kusyamisa bo kukonda kusukinina?
3. Inki mutindu beto lenda baka mambote mingi na manaka yai ya kimpeve?
3 Sala yonso sambu na kuvanda na lukutakanu mpi tula mpenza dikebi na masolo yonso. Ntembe kele ve nde mumonisi ya Betele to nkengi-ntambudi mosi tavanda mutubi ya nzenza na lukutakanu yai. Na ntwala nde manaka kuyantika to na nima, kuwa boma ve na kusolula ti yandi mpi ti nkento na yandi, kana yandi mekwelaka. Kana nge mevutuka na nzo, kukuma ve ‘muntu yina kewaka kaka na kuwa,’ kansi beno tadila dyaka manaka ya lukutakanu na dibuta; beno tadila mpi mutindu beno lenda sala mambu mingi dyaka na kuwakana ti luzolo ya Nzambi.—Yak. 1:25.
4. Sambu na nki yo kele mfunu nde beto sosa kusala ntete luzolo ya Nzambi na luzingu na beto?
4 Ntama mingi ve, Yehowa tafwa bantu yina kelandaka bampusa na bo mosi mpi kebuyaka kusala luzolo na yandi. (1 Yoa. 2:17) Yo yina, beto ketonda Yehowa mutindu yandi meyidika malongi yai na ntangu ya mbote sambu na kusadisa beto na kusosa kusala ntete luzolo na yandi na luzingu na beto!