Kuta Kimbangi Kukonda Boma na Teritware ya Mumbongo

1. Sambu na nki beto fwete lemba nitu ve kana beto kewa boma na kuta kimbangi na teritware ya mumbongo?

¹ Keti nge kewaka boma na kuta kimbangi na teritware ya mumbongo? Kana mpidina, kulemba nitu ve, sambu ata Polo yina kuvandaka nsamuni ya kikesa mpi ya kukonda boma, vandaka na mfunu ya ‘kubaka kikesa’ sambu na kusamuna. (1 Tes. 2:2) Beto tatadila ntangu yai mambu ya mpasi yina bansamuni mingi kekutanaka ti yo mpi bangindu ya mefwana sambu na kununga yo.

2. Sambu na nki beto fwete wa ve boma nde beto tapesa bantu yina kesala makasi?

² Keti Kuzenga Kisalu ya Bantu Yina Kesala Tapesa Bo Makasi? Na bisika mingi ya mumbongo, bantu ya kisalu kevandaka ti mukumba ya kusadisa konso muntu yina kekota. Bo kevandaka mpi luzitu, sambu bo lenda yindula nde nge mekwisa kusumba. Kana nge kesolula ti bo na mutindu mosi ya luzitu mpi ya mbote, nge tapusa bo na kusadila nge mambu na luzitu yonso.

3. Inki beto lenda sala sambu na kupesa ve bantu ya mekwisa kusumba makasi?

³ Keti Mono Fwete Ta Kimbangi na Ntwala ya Bantu Mingi ya Mekwisa Kusumba? Kana mpila kele, kuta ve kimbangi ntangu bantu kele mingi na magazini, mumbandu ntangu bo mekatuka kukangula. Vingila tii ntangu mfumu ya kisalu to nsadi mosi kele yandi mosi na ntwala ya kupusana penepene na yandi. Sadila bangogo ya nkufi ya kukotila na masolo.

4. Inki beto lenda tuba ntangu beto kesamuna na bateritware ya mumbongo?

⁴ Inki Mono Fwete Tuba? Kana bantu ya kisalu kele mingi, solula ti mfumu na bo. Nge lenda tuba nde: “Yo kevandaka mpasi na kukutana ti bantu ya mumbongo na banzo na bo, yo yina beto kekwisa kutala beno na bisika ya kisalu. Mono mezaba nde beno kele na kisalu; mono tatuba mambu mingi ve.” Bantangu yankaka, yo lenda vanda mbote na kutubila ve makabu ya luzolo ya mbote, mingimingi ntangu beto kebakisa nde bo lenda mona beto bonso bantu yina ketekaka mikanda, katula kaka kana bo yula beto kisika mbongo ya kesimbaka kisalu na beto kekatukaka. Na kutadilaka mumbongo yina bo kesala, nge lenda lomba mfumu ya kisalu nswa ya kusolula na bunkufi ti bansadi yankaka. Vutukila bangogo yina ya kukotila na masolo. Kana nge mona nde nsadi mosi kele ti kisalu mingi, fyotuna bangogo na nge ya kukotila na masolo mpi bikila yandi trakiti. Kana mpila ya kusolula ti bantu ya kisalu kele ve, ziku bo lenda zabisa nge na kutudila bo mikanda na kisika yina bo kepemaka to na kisika yankaka.

5. Sambu na nki beto fwete ta kimbangi na teritware ya mumbongo kukonda boma?

⁵ Yezu mpi Polo longaka bantu na bisika na bo ya mumbongo kukonda boma; nge lenda sala yo mpi. (Mat. 4:18-21; 9:9; Bis. 17:17) Samba Yehowa na kusadisa nge na kuvanda ntima-madidi mpi kikesa. (Bis. 4:29) Bantu kevandaka mingi na teritware ya mumbongo, yo yina meka mutindu yai ya kuta kimbangi mpi nge tabaka mambote.