“Ta Kimbangi Mbote-Mbote”
1. Inki mbandu ya mbote ntumwa Polo pesaka na kisalu ya kusamuna?
1 “Lungisa mbote-mbote kisalu na nge.” (2 Tim. 4:5) Ntembe kele ve nde ntumwa Polo pesaka Timoteo ndongisila yai na masonga yonso. Nkutu, yantika na mvu 47 tii na 56 ya ntangu na beto, Polo salaka banzietelo tatu ya kimisionere. Mukanda ya Bisalu ke tuba mbala mingi nde Polo vandaka kuta “kimbangi mbote-mbote.” (Bis. 23:11; 28:23) Inki mutindu beto lenda landa mbandu ya Polo bubu yai?
2. Inki mutindu beto lenda ta kimbangi mbote-mbote ntangu beto ke samuna nzo na nzo?
2 Nzo na Nzo: Sambu na kukutana ti bantu yina me waka ntete ve nsangu ya mbote, yo lenda lomba nde beto kwenda kutala bo na bantangu ya kuswaswana. Munkwa ya nzo lenda vanda na nzo na nkokila to na bawikendi. Beto fwete sala ngolo sambu na kusolula ti bantu na konso nzo, mpi kuvutukila mbala na mbala bantu yina ke monanaka ve. Inki nge lenda sala kana bikesa na nge ke buta ve mbuma? Ziku kusonikila bo mukanda to kubinga bo na telefone ta buta mbuma ya mbote.
3. Inki mabaku nge kele na yo ya kuta kimbangi na bantu yonso mpi na dibaku ya mbote?
3 Na Bantu Yonso mpi na Dibaku ya Mbote: Bubu yai, bansadi ya Yehowa ke zabisaka “mayele” ya kieleka na bantu yonso yina ke widikilaka bo. Bantangu ya nkaka yo ke salamaka na “babalabala” to na “bazandu.” (Bing. 1:20, 21) Ntangu beto ke salaka mambu na beto ya konso kilumbu, keti beto ke bakisaka mfunu ya kuta kimbangi? Keti bantu lenda tuba nde beto ke ‘kudipesaka ya mvimba na kuzabisa ndinga’? (Bis. 18:5) Kana yo kele mpidina, pana beto ke lungisa mukumba na beto ya “kuta kimbangi mbote-mbote.”—Bis. 10:42; 17:17; 20:20, 21, 24.
4. Inki mutindu kisambu mpi kuyindulula ke sadisaka beto na kuta kimbangi mbote-mbote?
4 Kansi, bantangu yankaka, bifu na beto mosi to nsoni lenda kanga beto nzila ya kuta kimbangi. Ntembe kele ve nde Yehowa ke bakisaka bandilu na beto. (Nk. 103:14) Ata mpidina, kana beto me kutana ti mambu ya mutindu yai, beto lenda lomba yandi kikesa ya kuta kimbangi. (Bis. 4:29, 31) Diaka, ntangu beto ke longuka beto mosi mpi ke yindulula Ndinga ya Nzambi, beto lenda sosa mutindu ya kuyedisa ntonda sambu na mbalu ya nene ya nsangu ya mbote. (Bafi. 3:8) Yo ta pusa beto na kusamuna nsangu na kikesa mpenza!
5. Inki mutindu beto lenda pesa maboko na kulungana ya mbikudulu ya Yoele?
5 Profete Yoele bikulaka nde, bantu ya Nzambi ta “kwenda kaka na ntwala” mpi ata kima mosi ve ta kanga bo nzila ya kusala kisalu ya kusamuna na ntwala nde kilumbu ya Yehowa, ya nene ti ya boma, kukwisa. (Yoe. 2:2, 7-9) Bika beto kudipesa ya mvimba na kisalu yai ya ta salamaka diaka ve: kisalu ya kuta kimbangi!