“Beno Zola Kimvuka ya Mvimba ya Bampangi”

Bo sonikaka bangogo yai ya kupemama kiteso ya bamvula funda zole me luta. (1 Pie. 2:17) Kansi yo kele mfunu mingi bubu yai! Inki mutindu beto lenda zola kimvuka yai ya nene ya bampangi ya nsi-ntoto ya mvimba? Mpi na nsi-ntoto yai ya kukonda zola, inki mutindu beto lenda zikisa nde zola na beto ke kulumuka ve? (Mat. 24:12) Na nima ya kutala video Toute la communauté des frères, keti nge lenda pesa bamvutu na bangiufula yai?

(1) Na nki ntangu beto kotaka na kimvuka ya bampangi ya nsi-ntoto ya mvimba? (2) Tanga bisalu tatu ya beto ke salaka kumosi ti bampangi ya insi-ntoto ya mvimba. (3) Inki mutindu bampangi na beto ke monisaka kikesa na kisalu ya kusamuna (a) na babwala ya nkaka ya Alaska, yina kele ti bangumba mpi bamfinda ya kukonda banzila, (b) na mabungu ya nene ya Eropa, mpi (c) na bamfinda ya nene ya Pérou? (4) Sambu na nki kisalu ya kusamuna kele kisalu mosi ya sipesiali? (5) Pesa bambandu ya ke monisa mutindu Bambangi ya Yehowa pesanaka kikesa mpi sadisanaka (a) ntangu ntoto nikanaka, (b) ntangu mupepe ya ngolo bwisaka banzo, mpi (c) ntangu bamvita salamaka? (6) Na nki mambu beto lenda monisa kidimbu ya nene yina bantu ke zabilaka kimpangi na beto ya Bukristu? (Yoa. 13:35) (7) Kutunga kumosi Banzo ya Kimfumu ke pesaka beto nki mambote? (8) Inki mutindu bampangi na beto ya Eropa ya Esti ti ya Russie bikalaka pene-pene ya Yehowa ntangu bo buyisaka kisalu na beto kuna? (9) Inki bikesa ya kuyituka bampangi mingi salaka sambu na kukwenda na balukutakanu ya distrike, mpi sambu na nki? (10) Inki mutindu video yai me kumisa ngolo lukanu na nge ya (a) kusambila Yehowa kumosi ti bampangi na nge na balukutakanu ya Bukristu? (b) kusadisa bankaka na bantangu ya mpasi? mpi (c) kusamuna na kwikama yonso konso ntangu mpi bisika yina mwaye me monana? (11) Inki mutindu mpi nki ntangu beto lenda sadila video yai na kisalu ya kusamuna?

Beto me ndimaka kukota na kimvuka ya Bampangi ya nsi-ntoto ya mvimba sambu beto ke zolaka Yehowa. Yo yina, beto ke zolaka kulonguka mambu ya Yehowa mpi kulonga yo na ba nkaka. Beto ke zolaka mpi bantu yina Yehowa ke zolaka. Kana beto me sadisa bo na bantangu ya mpasi, beto ke vingilaka ve nde Yehowa kutonda beto. Kansi, beto ke tondaka Nzambi sambu kimvuka na beto ya bampangi ya nsi-ntoto ya mvimba kele dikabu ya me katuka na yandi. Mutindu nsuka ya nsi-ntoto yai ya kukonda zola me finama, bika beto fula na kumonisa zola sambu na kimvuka ya mvimba ya bampangi!