Keti Ndinga ya Nzambi Ke Vandaka ti Ngolo na Luzingu na Nge?

Kutanga Biblia konso kilumbu lenda sadisa beto na kuvanda ti “misisa ya ngolo” mpi na ‘kuvanda ngolo na lukwikilu.’ (Bakol. 2:6, 7) Sambu Ndinga ya Yehowa kuvanda ti ngolo na luzingu na beto, beto fwete yindulula yo mpi kusadila bansiku na yo. (Baeb. 4:12; Yak. 1:22-25) Mukanda ya Yozue 1:8 ke monisa mambu tatu ya kusala sambu na kutanga mbote: (1) Tanga Ndinga ya Nzambi “mpimpa ti mwini.” (2) Tanga yo na ndinga ya nsi, disongidila kutanga na vitesi yina ke pesa nge nzila ya kuyindulula, ya kumona na mabanza kisika mambu salamaka mpi mutindu yo salamaka. (3) Sadila “mambu yina kele na mukanda yango.” Kusadila bangindu yai ta sadisa beto na kununga mpi na kusala mambu na mayele na luzingu na beto.