Bankunga ya Kimfumu Ke Pesaka Kikesa

Polo mpi Silasi yimbaka bankunga sambu na kukumisa Nzambi ntangu bo vandaka na boloko. (Bis 16:25) Na bilumbu na beto mpi, bampangi yimbaka bankunga ya Kimfumu ntangu bo vandaka na kan ya konsatrasio na Allemagne (na Sachsenhausen) mpi ntangu bo nataka bo na mbanza Sibérie. Bambandu yai ke monisa nde bankunga ke pesaka Bakristu yina ke kutana ti bampasi kikesa.

Kubika fioti, bandinga mingi ta baka mukanda ya mpa ya bankunga; ntu-diambu na yo ta vanda ‘Yimbila Yehowa na Kiese Yonso.’ Kana beto me zwa yo, beto sala yonso sambu na kuyimba bankunga yina na lusambu ya dibuta sambu beto kanga bangogo na yo na ntu. (Efe 5:19) Na nima, mpeve santu ta sadisa beto na kuyibuka yo ntangu beto ta kutana ti bampasi. Bankunga ya Kimfumu ke sadisaka beto na kulanda kutula dikebi na kivuvu na beto. Yo ke pesaka beto kikesa ntangu beto ke kutanaka ti bampasi. Ntangu mambu kele mbote, bankunga yina ke sadisaka beto na ‘kuyimbila Yehowa na kiese yonso’ sambu ntima na beto kele na kiese. (1Bs 15:16; Nk 33:1-3) Yo yina beto sala yonso sambu na kusadila mbote bankunga na beto ya Kimfumu.

BENO TALA VIDEO NKUNGA YINA PESAKA BAMPANGI KIKESA, MPI NA NIMA BENO PESA MVUTU NA BANGIUFULA YAI:

• Inki pusaka mpangi Frost na kusonika nkunga?

• Inki mutindu nkunga yina pesaka bampangi kikesa na kan mosi ya konsatrasio na Allemagne?

• Inki bantangu bankunga ya Kimfumu lenda pesa nge kikesa?

• Inki bankunga ya Kimfumu nge ta zola kukanga na ntu?