ZINGA MUTINDU BAKRISTU FWETE ZINGA
Zitisa Minsiku ya Yehowa ya Bikalulu ya Mbote
Yehowa Nzambi me tudilaka bantu minsiku ya bikalulu ya mbote. Mu mbandu, yandi me tulaka nsiku nde bakala fwete vanda kaka ti nkento mosi mpi muntu fwete kabula bo ve. (Mt 19:4-6, 9) Yandi ke buyaka mansoni ya mitindu yonso. (1Bk 6:9, 10) Nkutu, yandi me tulaka minsiku ya me tala kulwata mpi kuyidika nitu sambu bansadi na yandi kuvanda ve bonso bantu ya nkaka.—Kul 22:5; 1Tm 2:9, 10.
Bubu yai, bantu mingi ke buyaka minsiku ya Yehowa. (Bar 1:18-32) Bo ke bikaka nde bangindu ya bantu ya nkaka kutwadisa mutindu na bo ya kulwata, ya kuyidika nitu, mpi bikalulu na bo. Bantu mingi ke monisaka pwelele bikalulu na bo ya mbi mpi bo ke vwezaka bantu yina ke salaka mambu ya mbote.—1Pi 4:3, 4.
Sambu beto kele Bambangi ya Yehowa, beto fwete zitisa minsiku na yandi ya bikalulu ya mbote na kikesa yonso. (Bar 12:9) Inki mutindu? Na mayele yonso, beto fwete zabisa bantu mambu yina yandi ke zolaka. Kansi, beto fwete sala mpi bikesa sambu na kulanda kuzitisa minsiku na yandi na luzingu na beto. Mu mbandu, ntangu beto ke pona bilele to mutindu na beto ya kuyidika nitu, beto lenda kudiyula nde: ‘Keti mono ke monisaka nde mono ke landaka minsiku ya Yehowa to ya nsi-ntoto? Keti bilele na mono to mutindu na mono ya kuyidika nitu ke monisaka nde mono ke waka Nzambi boma?’ To ntangu beto ke pona emisio to filme ya kutala, beto lenda kudiyula nde: ‘Keti Yehowa ta sepela ti yo? Inki bikalulu yo ke siamisaka? Keti bansaka ya kulutisila ntangu yina mono ke ponaka lenda bebisa bikalulu na mono ya mbote? (Nk 101:3) Keti yo lenda budisa bampangi to bantu ya nkaka dibaku?’—1Bk 10:31-33.
Sambu na nki beto fwete zitisa minsiku ya Yehowa ya bikalulu ya mbote? Kubika fioti, Yezu Kristu ta fwa bantu ya mbi mpi ta katula mambu yonso ya mbi. (Eze 9:4-7) Kaka bantu yina ke salaka luzolo ya Yehowa ta guluka. (1Yn 2:15-17) Yo yina, beto zitisa minsiku ya Yehowa ya bikalulu ya mbote sambu bantu yina ta mona bikalulu na beto ya mbote, kupesa yandi nkembo.—1Pi 2:11, 12.
Keti bilele na mono to mutindu na mono ya kuyidika nitu ke monisaka nde mono ke zitisaka minsiku ya bikalulu ya mbote?
BENO TALA VIDEO KUMA NDUKU YA YEHOWA—BAKALA MOSI, NKENTO MOSI, MPI NA NIMA BENO PESA MVUTU NA BANGIUFULA YAI:
Sambu na nki yo kele mbote na kuzitisa minsiku ya Yehowa?
Sambu na nki bibuti fwete yantika kulonga bana minsiku ya Yehowa ya bikalulu ya mbote ntangu bo kele baleke?
Inki mutindu baleke mpi bambuta ke sadisaka bantu ya nkaka na kubaka balusakumunu ya ntima-mbote ya Nzambi?