Mambu ya Mbote Mpi ya Mbi: Desizio Yina Nge Fwete Baka
Balukanu ya beto ke bakaka na mambu ya mbote to ya mbi lenda sadisa beto na kuvanda ti luzingu ya mbote to ve. Yehowa Nzambi ke zabaka yo mbote. Kikuma yo yina yandi ke zolaka nde beto zitisa minsiku na yandi.
Yehowa ke zolaka nde beto zinga na ngemba mpi na kiese.
“Mono, Yehowa, mono kele Nzambi na nge, Muntu yina ke longa nge sambu na mambote na nge mosi, Muntu yina ke twadisa nge na nzila yina nge fwete tambula. A kana nge tula dikebi na bansiku na mono! Ebuna ngemba na nge ta kuma bonso nzadi mpi lunungu na nge bonso bitembo ya nzadi-mungwa.”—Yezaya 48:17, 18.
Sambu Nzambi muntu salaka beto, yandi ke zaba mutindu ya kuluta mbote ya beto fwete zinga. Yandi ke lomba beto na kulanda lutwadisu na yandi sambu na mambote na beto. Kana beto ke zitisa bansiku ya Nzambi, beto ta kudiyangisa ve sambu na kuzaba kana mambu ya beto ke sala ta natila beto mambote to ve. Beto ta bakaka ntangu yonso balukanu ya mbote, balukanu yina ke nataka ngemba mpi kiese.
Yehowa ke lombaka beto ve na kusala kima yina beto lenda kuka ve kusala.
“Nsiku yai ya mono ke pesa nge bubu yai kele ve mpasi mingi sambu na nge, yo kele mpi ve ntama.”—Kulonga 30:11.
Kuzitisa bansiku ya bikalulu ya mbote ya Nzambi lenda lomba nde beto sala bansoba na mutindu na beto ya kuyindula mpi ya kusala mambu. Kansi Yehowa ke lombaka beto ve mambu ya mpasi. Sambu yandi kele Ngangi na beto, yandi ke zaba mambu yina beto lenda sala to ve. Kana beto me zaba Yehowa, beto ta bakisa nde “bansiku na yandi kele kilo ve.”—1 Yoane 5:3.
Yehowa me tubaka nde yandi ta sadisa bantu yina ke zola kuzitisa minsiku na yandi.
“Mono Yehowa Nzambi na nge, mono ke simba ngolo diboko na nge ya kitata, Mono Muntu ke tubila nge nde, ‘Kuwa boma ve. Mono ta sadisa nge.’”—Yezaya 41:13.
Beto lenda zinga mutindu Nzambi ke zolaka nde beto zinga sambu yandi ta sadisa beto. Yandi lenda sadisa beto na nzila ya Ndinga na yandi Biblia yina ke pesaka beto kikesa mpi kivuvu.
Bantu mingi na ntoto ya mvimba me bakisaka nde kuzitisa minsiku ya Biblia me kumisaka luzingu na bo mbote kuluta. Sambu na nki ve kulonguka bandongisila ya mbote yina Biblia ke pesaka? Nge lenda yantika kulonguka kamukanda yai ya ke tendulaka Biblia: Zinga Mvula na Mvula! nge lenda zwa yo mpi ya ofele na jw.org. Yo kele ti malongi yai:
Mutindu Biblia Lenda Sadisa Nge
Biblia Ke Tubilaka Mambu ya Mbote Sambu na Bilumbu Ke Kwisa
Keti Nge Ke Ndimaka Nde Mambu Yina Biblia Ke Tubaka Kele ya Kieleka?
Ntangu nge ke longuka ndinga ya Nzambi Biblia, nge ta mona nde yo me manaka ve ngala, kansi yo “me fwana na kutudila yo ntima ntangu yonso, bubu yai mpi kimakulu.” (Nkunga 111:8) Kuzitisa minsiku ya bikalulu ya mbote yina kele na Biblia kele mutindu ya kuluta mbote ya kuzinga. Kansi Nzambi ta pusa beto ve na kingolo-ngolo na kusala yo. (Kulonga 30:19, 20; Yozue 24:15) Yo kele lukanu ya konso muntu fwete baka yandi mosi.