Mambu ya Mbote Mpi ya Mbi: Biblia—Mukanda Yina Beto Lenda Tudila Ntima

Beto lenda tuba ve nde mambu ya beto ke sala kele mbote kaka sambu beto mpi bantu ya nkaka ke mona nde yo kele mbote. Biblia ke monisa sambu na nki kuyindula mutindu yina kele mbi mpi yo ke yika mambu ya nkaka. Yo ke sadisaka beto na kuzaba mambu ya mbote mpi ya mbi. Kuzaba mambu yai ke sadisaka beto na kuvanda na kiese.

LUTWADISU YINA BETO KELE NA YO MFUNU

Na Biblia, Yehowaa Nzambi ke tuba nde yandi salaka bantu sambu bo kuditwadisa ve bo mosi kansi sambu yandi twadisa bo. (Yeremia 10:23) Yo yina yandi me pesaka beto minsiku ya mambu ya mbote mpi ya mbi ya kele na Biblia. Yandi ke zolaka bantu mpi yandi ke zolaka ve nde beto baka balukanu ya mbi yina lenda natila beto bampasi na luzingu. (Kulonga 5:29; 1 Yoane 4:8) Kima kuluta mfunu, sambu yandi Muntu Salaka beto, yandi kele na mayele mpi yandi me zaba mambu yina kele mfunu sambu na kupesa beto bandongisila ya kuluta mbote na diambu yai. (Nkunga 100:3; 104:24) Ata mpidina, Nzambi ke pusaka ve bantu na ngolo na kulanda minsiku na yandi.

Yehowa pesaka Adami ti Eva, bakala mpi nkento ya ntete bima yonso yina bo vandaka ti yo mfunu sambu bo vanda mpenza na kiese. (Kuyantika 1:28, 29; 2:8, 15) Yandi pesaka bo mpi bansiku ya pete yina yandi vandaka kuvingila nde bo zitisa. Kansi yandi pesaka bo nzila ya kupona bo mosi kana bo ta lemfuka na minsiku yango to ve. (Kuyantika 2:9, 16, 17) Diambu ya mawa kele nde, Adami ti Eva ponaka na kusala mambu ya bo me zola na kisika ya kulemfukila minsiku ya Nzambi. (Kuyantika 3:6) Inki mbuma yo me butaka? Keti bantu ke zingaka mbote sambu bo ke salaka mambu yina bo ke mona mbote to mbi? Ve. Disolo ya Luzingu ya bantu me monisaka nde kukonda kulemfuka na minsiku ya Nzambi ke nataka ve ngemba mpi kiese.—Longi 8:9.

Biblia ke pesaka beto lutwadisu yina beto kele na yo mfunu sambu na kubaka balukanu ya mbote yina lenda sadisa beto ata beto ke zingaka na konso kisika yina. (2 Timoteo 3:16, 17; tala lupangu “Mukanda Sambu na Bantu Yonso.”) Tala mutindu Biblia ke salaka yo.

Tala sambu na nki bo ke bingaka Biblia nde “ndinga ya Nzambi.”—1 Batesalonika 2:13. Tala video Nani Kele Munkwa-Biblia? na jw.org.

SAMBU NA NKI BANTU YA NKAKA KE TUDILAKA BIBLIA NTEMBE

Bantu ya nkaka ke tubaka nde Biblia kele ve mukanda ya me fwana na kusonga beto mambu ya mbote mpi ya mbi. Bo lenda basisa bantembe yai.

Ntembe: “Biblia kele mbele ya makasi zole.”

Kieleka: Ntete yo lenda monana nde bitini ya nkaka ya Biblia ke wakanaka ve ti bitini ya nkaka. Kansi kana beto longuka mutindu mpi ntangu bo sonikaka yo, beto ta mona nde yo ke wakanaka.

Sambu na kumona mwa bambandu ya ke monisa yo, tanga disolo “Y a-t-il des contradictions dans la Bible?” na jw.org.

Ntembe: “Bantu ya ke sambilaka kele bantu ya ntete ya ke salaka mambu ya mbi, yo yina Biblia lenda vanda ve mukanda ya fwete songa beto mambu ya mbote mpi ya mbi.”

Kieleka: Beto fwete pesa ve Biblia foti sambu na bikalulu ya mbi ya bantu ya ke sadilaka ve malongi na yo. Biblia tubaka na ntwala nde bantu mingi (bamfumu ya mabundu mpi kele na kati ya bantu yango) ta tuba nde bo ke landaka Biblia kansi bo ta sala mambu yina yo ke buyisaka. Yo tubaka mpi nde sambu na bo, “bantu mingi ta vweza” malongi ya Biblia.—2 Piere 2:1, 2.

Sambu na kuzaba mbandu mosi ya ke monisa mutindu bamfumu ya mabundu ke landaka ve mambu yina Biblia ke longaka, tanga disolo “Keti Dibundu Kele Kaka Nzila ya Nkaka ya Kusala Mumbongo?” na jw.org.

Ntembe: “Biblia ke pusaka bantu na kuzitisa ve bantu ya nkaka.”

Kieleka: Biblia ke siamisaka beto na kuzitisa bantu ya nkaka. Yo ke buyaka mambu yai. . .

kudimona na zulu ya bantu ya nkaka.—Bafilipi 2:3.
kukonda bantu ya nkaka luzitu sambu bo ke kwikilaka ve na mambu ya mpila mosi ti beto.—1 Piere 2:17.
kupusa bantu ya nkaka na ngolo na kundima bangindu na beto.—Matayo 10:14.

Biblia ke monisaka nde Nzambi ke sadilaka bantu ntangu yonso mambu na mutindu ya mbote mpi na mawete mpi yandi ke zolaka nde beto sala mpi mpidina.—Baroma 9:14.

Sambu na kuzaba mambu mingi, tanga disolo “Kuzitisa Mambu ya Ke Salaka nde Bantu Kuvanda Ve Kiteso Mosi—Mutindu Biblia Lenda Sadisa” na jw.org.

BIBLIA KE SONGAKA BETO MAMBU YINA NZAMBI KE ZOLAKA NDE BETO SALA

Biblia ke tubilaka kinduku yina Nzambi ke salaka ti bantu banda na luyantiku. Mambu yina yo ke tubaka ke sadisaka beto na kubakisa mambu yina Nzambi ke monaka nde yo kele mbote mpi mbi, mambu yina lenda natila beto mambote mpi yina kele kigonsa sambu na beto. (Nkunga 19:7, 11) Malongi yina kele na Biblia ke vandaka ntangu yonso ya kieleka mpi yo ke sadisaka beto na kubaka balukanu ya mbote na mambu ya mbote mpi ya mbi na luzingu na beto ya konso kilumbu.

Mu mbandu, tala ndongisila ya kele na Bingana 13:20: “Muntu yina ke tambulaka ti bantu ya mayele ta kuma mayele, kansi muntu yina [ke kangama] ti bazoba ta suka mbi.” Diambu yai kele kieleka bubu yai kaka mpila yo vandaka na ntangu ya ntama. Biblia me fuluka ti bandongisila ya mfunu ya mutindu yai.—Tala lupangu “Bandongisila ya Biblia Ke Manaka Ve Ngala.”

Kansi nge lenda kudiyula nde, ‘Inki ke ndimisa nde bandongisila ya Biblia lenda sadisa mono bubu yai?’ Disolo ya ke landa ta tubila bambandu ya bantu ya bilumbu na beto.

a Yehowa kele zina ya Nzambi.—Nkunga 83:18.

BANDONGISILA YA BIBLIA KE MANAKA VE NGALA

Ata bo manisaka kusonika Biblia bamvula kiteso ya 2 000 me luta, bandongisila na yo kele kaka mfunu tii bubu yai. Bampusa ya ntete-ntete ya bantu me sobaka ve disongidila tii bubu yai bantu ke zolaka kuzinga mbote mpi na kiese. (Longi 1:9) Bandongisila ya Biblia ya ke manaka ve ngala lenda sadisa beto na kulungisa bampusa yango.

Kuvanda Masonga

“Beto ke zola kuditwadisa na masonga na mambu yonso.”—Baebreo 13:18.
“Bika muyibi kuyiba diaka ve, kansi yandi sala kisalu ya ngolo.”—Baefezo 4:28.

Kuwakana ti bantu ya nkaka

“Konso muntu kulanda na kusosa, mambote na yandi mosi ve, kansi ya muntu ya nkaka.”—1 Bakorinto 10:24.
“Beno landa kukanga-ntima na mambu ya bantu ya nkaka mpi beno landa kulolulana na ntima ya mvimba.”—Bakolosai 3:13.

Kubaka Balukanu

“Muntu ya kukonda mayele ke ndimaka mambu yonso, kansi muntu ya mayele ke tadilaka konso kitambi na yandi.”—Bingana 14:15.
“Muntu ya mayele ke monaka kigonsa mpi ke bumbanaka, kansi bantu yina me konda mayele ke kwendaka kaka na ntwala mpi bo ke kutanaka ti bampasi.”—Bingana 22:3.