Keti Bansiku ya Biblia na Yina Me Tala Mambu ya Mbote mpi ya Mbi Me Manaka Ngala?
Bantu mingi, yo vanda bayina ke tubaka nde bo kele Bakristu ke yindulaka nde bansiku ya bikalulu ya mbote ya kele na Biblia mpi ya ke tubilaka mambu ya kuvukisa nitu mpi makwela me manaka ngala. Sambu na kuwakanisa mambu yai ti mutindu mambu ke salama bilumbu yai, mabundu ya nkaka me sobaka malongi na bo na yina me tala bikalulu ya mbote mpi ya mbi. Keti bansiku ya Biblia na yina me tala mambu ya mbote mpi ya mbi kele kaka mfunu? Ee. Disolo yai ke sadisa beto na kuzaba nde yo kele kaka mfunu.
Bantu kele na mfunu ya bansiku ya Nzambi na yina me tala mambu ya mbote mpi ya mbi
Nzambi salaka bantu sambu bo landa lutwadisu na yandi. Biblia ke tuba nde: “Muntu yina ke tambula kele ve ti kiyeka ya kutwadisa kitambi na yandi mosi.” (Yeremia 10:23) Ata Yehowaa Nzambi me salaka beto ti makuki ya kubaka balukanu, yandi me pesaka ve kiyeka to makuki ya kuzaba inki kele mbote mpi inki kele mbi sambu na beto. Yo yina, yandi ke zola nde beto tudila yandi ntima.—Bingana 3:5.
Bansiku ya Nzambi na yina me tala bikalulu ya mbote kele na Biblia. Beto tadila bikuma zole yina ke salaka nde bansiku yango kuvanda ti valere ya mingi.
Nzambi salaka beto. (Nkunga 100:3) Yehowa Nzambi Muntu Me Salaka beto. Yo yina, yandi me zaba mbote-mbote bima yina beto ke vandaka ti yo mfunu sambu na kuvanda ti sante ya mbote, mabanza ya mbote mpi na kiese. Yandi me zaba mpi bampasi yina ta kumina beto kana beto me buya kuzitisa bansiku na yandi. (Bagalatia 6:7) Diaka, Yehowa ke zolaka nde beto vanda ti luzingu ya mbote kibeni. Yo yina, Biblia ke tubaka nde Nzambi kele “Muntu yina ke longa nge sambu na mambote na nge mosi, Muntu yina ke twadisa nge na nzila yina nge fwete tambula.”—Yezaya 48:17.
Bampusa na beto lenda vidisa beto nzila. Bantu mingi ke monaka nde bo lenda zaba mambu ya mbote mpi ya mbi kana bo ke landa mambu yina ntima na bo ke songa bo, disongidila kana bo ke lungisa banzala yina bo kele ti yo. Kansi Biblia ke tuba nde: “Ntima kele luvunu kuluta konso kima ya nkaka mpi yo kele mbi kibeni.” (Yeremia 17:9) Kana beto ke bika ve nde mayele ya Nzambi kutwadisa ntima na beto, yo ta pusa beto na kusala mambu na mutindu yina beto ta wa mawa na nima.—Bingana 28:26; Longi 10:2.
Keti bamfumu ya mabundu fwete buya kutadila mambu yina Biblia ke tubaka nde yo kele mbote mpi mbi?
Ve. Biblia ke longaka kieleka na yina me tala Nzambi mpi bikalulu yina yandi ke zola nde beto vanda ti yo. (1 Bakorinto 6:9-11; Bagalatia 5:19-23) Yandi ke zolaka nde bantu kuzaba mambu yina. (1 Timoteo 2:3, 4) Yo yina, bamfumu ya mabundu fwete longa bantu mambu yina Ndinga ya Nzambi ke tuba.—Tito 1:7-9.
Bantu mingi yina ke zolaka ve kuzitisa bansiku ya Bikalulu ya mbote yina kele na Biblia ke kwendaka kusosa bamfumu ya mabundu sambu bo “zabisa bo mambu yina bo ke zola kuwa.” (2 Timoteo 4:3) Kansi Ndinga ya Nzambi ke pesa lukebisu yai ya pwelele: “Mawa na bantu yina ke tuba nde mbote kele mbi mpi mbi kele mbote.” (Yezaya 5:20) Ya masonga, Nzambi ta pesa bamfumu ya mabundu yina ke longaka ve na siki-siki yonso mambu yina Nzambi ke tubaka nde yo kele mbote mpi mbi ndola.
Keti bansiku ya bikalulu ya mbote ya kele na Biblia ke pusaka bantu na kusambisa bantu ya nkaka?
Ve. Bantu yina ke zola kusepedisa Nzambi ke landaka mbandu ya Yezu Kristu mpi malongi na yandi. Yezu longaka balongoki na yandi nde bo fwete sambisa ve bantu ya nkaka kansi nde bo fwete zola bantu yonso mpi kuzitisa bo.—Matayo 5:43, 44; 7:1.
Balongoki ya Yezu fwete zitisa bansiku ya Nzambi ya bikalulu ya mbote na luzingu na bo ya mvimba. Kansi, bo fwete ndima mpi nde bantu ya nkaka lenda ndima ve kuzitisa bansiku yina. (Matayo 10:14) Yezu pesaka ve balongoki na yandi nzila ya kusadila politiki to bametode ya nkaka sambu na kupusa bantu na kuzitisa bansiku ya Nzambi.—Yoane 17:14, 16; 18:36.
Inki mambote beto ta baka kana beto ke zitisa bansiku ya Nzambi?
Kana beto ke sala bikesa sambu na kuzitisa bansiku ya Nzambi na yina me tala mambu ya mbote mpi ya mbi, beto ta baka mambote bubu yai mpi na bilumbu ke kwisa. (Nkunga 19:8, 11) Na kati ya mambote yango, beto lenda tanga:
a Yehowa kele zina ya Nzambi mutindu Biblia ke monisa yo.—Nkunga 83:18.