Mutindu ya Kuyedisa Zola Sambu na Nzambi mpi Sambu na Nkweno

Ata Nsiku ya Moize ke tadila ve Bakristu, bansiku na yo zole ya kuluta nene: kuzola Nzambi mpi nkweno na beto ke tubila na bunkufi mambu yina Yehowa ke lombaka beto. (Mat 22:37-39) Beto ke butukaka ve ti zola yina. Beto fwete yedisa yo. Inki mutindu? Mutindu mosi ya mfunu ya kusala yo kele kutanga Biblia konso kilumbu. Ntangu beto ke tadila bikalulu ya kimuntu ya Nzambi ya kele na Biblia, beto ta mona “kitoko ya Yehowa.” (Nk 27:4) Kana beto sala mutindu yina zola na beto sambu na Yehowa ta yela mpi bangindu na beto ta kuma bonso ya yandi. Yo ta pusa beto na kulemfuka na bansiku ya Nzambi, tanga mpi nsiku ya ke tadila zola ya kuditambika sambu na bampangi. (Yoa 13:34, 35; 1Yn 5:3) Yai mitindu tatu yina ta sadisa beto na kusepela mingi ti lutangu ya Biblia:

• Sadila mawi na nge mpi kudikotisa na disolo. Yindula nde nge vandaka pana. Inki nge zolaka kumona, kuwa, mpi nki nsudi nge zolaka kuwa? Inki zolaka kuvanda mawi ya bantu yina vandaka pana?

  

• Soba bametode. Yai mwa bambandu: Nge lenda tanga na ndinga ya ngolo disolo ya muntu mosi yina Biblia ke tubilaka to nge lenda pona konso kapu yina. Mu mbandu, nge lenda sadila Bangindu ya Ngika A7 to B12 na Mbalula ya Nsi-Ntoto ya Mpa sambu na kutanga mambu ya Yezu. Nge lenda tanga kapu ya mvimba ya mukapu ya lumbu. Nge lenda tanga mikanda ya Biblia na ndonga mutindu bo sonikaka yo.

  

• Tanga sambu na kubakisa. Kana beto ke tanga ata kapu mosi konso kilumbu, ke bakisa yo mpi ke yindulula, yo ta vanda mbote mingi kuluta na kisika ya kutanga bakapu mingi kaka sambu na kumanisa Biblia ya mvimba. Tadila mutindu disolo yango lutaka. Tadila mambu ya nkaka. Sadila bakarti mpi bareferanse yina kele na kati-kati. Sala bansosa na diambu yina nge me bakisa ve. Kana mpila kele, ntangu nge ke yindulula, sala bangunga ya kiteso mosi ti yina nge bakaka na kutanga.