Sadila Mukanda Zinga Mvula na Mvula! Sambu na Kukumisa Lukwikilu na Nge Ngolo na Yehowa mpi na Yezu

Sambu na kusepedisa Nzambi, balongoki ya Biblia fwete kumisa lukwikilu na bo ngolo. (Ebr 11:6) Beto lenda sadila mukanda Zinga Mvula na Mvula! sambu na kusadisa bo na kukumisa lukwikilu na bo ngolo. Mukanda yai ya kulongukila kele ti baverse ya mfunu yina bo me tendula mambu pwelele. Yo kele ti bangiufula yina ke pusa muntu na kuyindula, bavideo ya ke simba ntima mpi bifwanisu ya kitoko. Kana beto sadisa balongoki na kukuma ti bikalulu yina Bakristu fwete vanda ti yo mpi na kukuma banduku ya Nzambi, beto ta sadisa bo na kununga bampasi yina me fwanana ti tiya.—1Bk 3:12-15.

Bantu ya nkaka ke yindulaka nde bo lenda kuma ve banduku ya Nzambi sambu bo ke monaka yandi ve. Yo yina beto fwete sadisa bo na kuzaba Yehowa mpi na kutudila yandi ntima.

SONGA VIDEO SADILA MUKANDA ZINGA MVULA NA MVULA! SAMBU NA KUKUMISA LUKWIKILU YA LONGOKI NA NGE YA BIBLIA NGOLO NA YEHOWA” MPI NA NIMA BENO PESA BAMVUTU NA BANGIUFULA YAI:

• Inki mutindu beto me zaba nde mpangi-nkento yina kudibongisaka mbote sambu na kulonguka ti longoki na yandi?

• Inki mutindu yandi sadilaka mbote bangiufula ya nkaka sambu na kusadisa longoki na yandi na kubasisa bangindu na yandi na mambu yina kele na Yezaya 41:10, 13?

• Inki mutindu video yina mpangi-nkento songisaka longoki na yandi mpi baverse yina bo tangaka sadisaka longoki?

Bantu mingi ke zabaka ve kimenga ya Yezu mpi bo ke ndimaka ve nde yo kele dikabu yina Yehowa me pesaka bo. (Bag 2:20) Yo yina beto fwete sadisa bo na kumonisa lukwikilu na kimenga ya Yezu.

SONGA VIDEO SADILA MUKANDA ZINGA MVULA NA MVULA! SAMBU NA KUKUMISA LUKWIKILU YA LONGOKI NA NGE YA BIBLIA NGOLO NA YEZU” MPI NA NIMA BENO PESA BAMVUTU NA BANGIUFULA YAI:

• Inki mutindu beto me zaba nde mpangi bakala yina kudibongisaka mbote sambu na kulonguka ti longoki na yandi?

• Inki mutindu yandi sadilaka mambu ya kele na kitini “Tala mpi” sambu na kusadisa longoki na yandi?

• Sambu na nki kusamba sambu na longoki kele mfunu mingi?