Wakanisa Bangindu na Nge ti ya Yehowa mpi ya Yezu

1-2. Kuzola Yehowa ke tendula nki mpi nki mutindu Yezu monisaka pwelele nde yandi vandaka kuzola Yehowa?

“NGE fwete zola Yehowa Nzambi na nge na ntima na nge ya mvimba, na moyo na nge ya mvimba, na ngolo na nge yonso, mpi na mabanza na nge yonso.” (Luka 10:27) Yezu monisaka pwelele nde yo vandaka nsiku ya kuluta mfunu na Nsiku ya Moize. Kuvila ve nde kuzola Yehowa ke tendula kuzola yandi na ntima na beto ya mvimba mpi yo ke tadila bampusa na beto mpi mutindu beto ke kudiwaka. Yo ke tendula mpi kudipesa ya mvimba na yandi mpi kusadila ngolo na beto yonso sambu na kusadila yandi. Kansi kuzola Yehowa ke tadila mpi mabanza na beto, disongidila mutindu na beto ya kuyindula. Ya kieleka, beto lenda bakisa ve mbote-mbote bangindu yonso ya Yehowa. Kansi kana beto ke longuka “mabanza ya Kristu,” beto ta bakisa mbote mutindu Nzambi ke yindulaka sambu Kristu ke yindulaka bonso Tata na yandi na mutindu ya kukuka.​—1 Bak. 2:16.

² Yezu vandaka kuzola Yehowa na mabanza na yandi yonso. Yandi zabaka luzolo ya Nzambi sambu na yandi mpi yandi vandaka ti lukanu ya kulungisa luzolo yango ata ntangu yo vandaka kulomba nde yandi niokwama sambu na yo. Yezu vandaka kutula dikebi ya mingi na kusala luzolo ya Tata na yandi, yo yina yandi bikaka ve nde ata kima mosi kukatula dikebi na yandi na kusala luzolo yango.

3. Inki ntumwa Piere longukaka na Yezu mpi nki yandi songaka Bakristu na kusala? (1 Piere 4:1)

³ Piere ti bantumwa ya nkaka vandaka ti dibaku ya nene ya kulutisa ntangu ti Yezu mpi ya kulonguka na Yezu yandi mosi mutindu na yandi ya kuyindula. Ntangu Piere sonikaka mukanda ya 1 Piere, yandi songaka Bakristu na kuvanda ti mabanza ya mutindu mosi ti ya Kristu.a (Tanga 1 Piere 4:1.) Na ndinga ya kisina, Piere sadilaka bangogo “beno lwata binwaninu” sambu na kutubila mutindu basoda vandaka kulwata binwaninu sambu na kuyilama sambu na bitumba. Yo yina kana Bakristu ke wakanisa mabanza na bo to mutindu na bo ya kuyindula ti ya Kristu, bo ta vanda ti munduki mosi ya ngolo yina ta sadisa bo na kunwanisa mpeve ya nsi-ntoto ya Satana mpi banzala ya kusala disumu.​—2 Bak. 10:3-5; Baef. 6:12.

4. Inki beto ta longuka na disolo yai?

⁴ Na disolo yai, beto ta longuka mutindu Yezu ke yindulaka mpi mutindu beto lenda landa mbandu na yandi. Beto ta mona (1) mutindu beto lenda wakanisa bangindu na beto ti ya Yehowa sambu yo ta sadisa beto na kuyindula mutindu mosi ti bampangi, (2) mutindu beto lenda vanda bantu ya kudikulumusa mpi (3) mutindu beto lenda vanda ti mabanza ya mbote kana beto ke samba Yehowa mpi ke tudila yandi ntima.

WAKANISA BANGINDU NA NGE TI YA YEHOWA

5. Na nki mutindu Piere yindulaka ve bonso Yehowa na dibaku mosi?

⁵ Beto tadila dibaku mosi yina Piere wakanisaka ve bangindu na yandi ti ya Yehowa. Yezu songaka bantumwa na yandi nde yandi ta kwenda na Yeruzalemi mpi nde kuna bo ta pesa yandi na maboko ya bamfumu ya mabundu, bo ta niokula yandi mpi bo ta fwa yandi. (Mat. 16:21) Piere zabaka nde Yezu vandaka Mesia yina Nzambi silaka sambu na kugulusa bansadi ya Nzambi. Yo yina mbala ya nkaka yo vandilaka yandi mpenza mpasi na kundima nde Yehowa ta bika nde bo fwa Yezu. (Mat. 16:16) Yo yina, Piere nataka Yezu na lweka mpi songaka yandi nde: “Mfumu, kutuba ve diambu ya mutindu yina; mambu yai ta bwila nge ve.” (Mat. 16:22) Yezu ndimaka ve mambu yina Piere tubaka sambu bangindu ya Piere vandaka ve kuwakana ti ya Yehowa.

6. Inki mutindu Yezu monisaka nde yandi vandaka kuyindula bonso Yehowa?

⁶ Bangindu ya Yezu vandaka kuwakana mbote-mbote ti ya Tata na yandi ya zulu. Yo yina yandi songaka Piere nde: “Luta na nima na mono, Satana! Nge kele kima ya ke budisa mono sakuba, sambu nge ke yindula ve bangindu ya Nzambi, kansi bangindu ya bantu.” (Mat. 16:23) Mbala ya nkaka Piere tubaka mambu yina ti bangindu ya mbote, kansi Yezu buyaka ndongisila na yandi. Kele ti dilongi mosi yina beto lenda baka. Yehowa vandaka kuzola ve nde Yezu kuzinga kukonda kumona bampasi. Na dibaku yina, Piere bakaka dilongi mosi ya mfunu ya kuwakanisa bangindu na yandi ti ya Nzambi.

7. Inki mutindu Piere monisaka na nima nde yandi kumaka kuwakanisa bangindu na yandi ti ya Yehowa? (Tala kifwanisu.)

⁷ Nsuka-nsuka, Piere monisaka nde yandi zolaka kulonguka mutindu ya kuwakanisa bangindu na yandi ti ya Yehowa. Ntangu lungaka sambu Bantu ya Makanda yina bo me yotisaka ve kukuma bansadi ya Nzambi. Nzambi songaka Piere na kukwenda kulonga Korneye yina vandaka na kati ya Bantu ya ntete ya Makanda yina kumaka Bakristu. Bayuda vandaka kuvukana kibeni ve ti Bantu ya Makanda, yo yina yo lombaka nde Piere kusoba mabanza na yandi sambu na kulonga bo nsangu ya mbote. Ntangu Piere bakisaka luzolo ya Yehowa na diambu yai, yandi sobaka mutindu na yandi ya kutadila mambu. Yo yina, ntangu Korneye tindaka bantu na kubinga Piere, yandi “buyaka ve” na kukwenda. (Bis. 10:28, 29) Yandi longaka Korneye ti dibuta na yandi ya mvimba nsangu ya mbote mpi bo bakaka mbotika.​—Bis. 10:21-23, 34, 35, 44-48.

8. Inki mutindu beto lenda monisa nde bangindu na beto ke wakana ti ya Yehowa? (1 Piere 3:8 mpi noti na nsi ya lutiti)

⁸ Bamvula mingi na nima, Piere songaka bampangi na yandi Bakristu na ‘kuyindula mutindu mosi.’ (Tanga 1 Piere 3:8 mpi noti na nsi ya lutiti.) Beto bansadi ya Yehowa, beto lenda yindula mutindu mosi ti bampangi kana beto ke sadila Ndinga ya Nzambi sambu na kuwakanisa mutindu na beto ya kuyindula ti ya yandi. Mu mbandu, Yezu songaka balongoki na yandi na kutula mambote ya Kimfumu na kisika ya ntete na luzingu na bo. (Mat. 6:33) Mpangi mosi na dibundu na beno lenda yindula mambu yai mpi yo lenda pusa yandi na kusala kisalu ya ntangu yonso. Na kisika ya kusonga yandi mambu yina lenda pusa yandi na kulungisa ve lukanu yango, beto fwete sadisa yandi mpi kusonga yandi mambu ya mbote sambu na kisalu yango.

VANDA MUNTU YA KUDIKULUMUSA

9-10. Inki mutindu Yezu monisaka kudikulumusa ya mingi?

⁹ Na mpimpa ya nsuka na ntwala nde bo fwa Yezu, yandi longaka Piere ti bantumwa na yandi ya nkaka dilongi ya mfunu ya kudikulumusa. Ntete, Yezu tindaka Piere ti Yoane sambu na kuyidika bima mpi kisika sambu na kudia ti balongoki na yandi madia ya nsuka na ntwala nde bo fwa yandi. Yo ke monana nde bo yidikaka mpi dilonga ya masa mpi esume ya kuyobisila makulu ya bantu na ntwala ya kudia. Yo vandaka kulomba muntu mosi ya kudikulumusa sambu na kuyobisa bo makulu, kansi nani lendaka kusala yo?

¹⁰ Yezu salaka yo kukonda mpasi mpi yandi monisaka kudikulumusa ya mingi mpenza. Bantumwa na yandi yitukaka mingi sambu yandi salaka kisalu yina bampika vandaka kusala. Yezu katulaka bilele na yandi ya zulu, yandi kangaka esume na luketo na yandi, yandi tulaka masa na dilonga mpi yantikaka kuyobisa bo makulu. (Yoa. 13:4, 5) Mbala ya nkaka yo bakaka yandi mwa ntangu sambu na kuyobisa makulu ya bantumwa na yandi yonso 12, nkutu ti makulu ya Yudasi yina zolaka kuteka yandi. Kansi Yezu salaka yo na kudikulumusa yonso. Na nima, Yezu tendudilaka bo na ntima-nda yonso nde: “Keti beno me bakisa mambu ya mono me sala beno? Beno ke bingaka mono, ‘Longi’ mpi ‘Mfumu,’ mpi beno ke tubaka mbote, sambu mono kele mutindu yina. Yo yina, kana mono, ata mono kele Mfumu mpi Longi, mono me yobisa makulu na beno, beno mpi beno fwete yobisana makulu.”​—Yoa. 13:12-14.

11. Inki mutindu Piere monisaka nde yandi kumaka muntu ya kudikulumusa? (1 Piere 5:5) (Tala mpi kifwanisu.)

¹¹ Piere bakaka malongi mingi na kudikulumusa ya Yezu. Ntangu Yezu vutukaka na zulu, Piere belulaka na mutindu ya kuyituka muntu mosi yina butukaka makulu-kifu. (Bis. 1:8, 9; 3:2, 6-8) Ntangu bantu mingi monaka mutindu yandi belulaka muntu yango, bo kwisaka kuziunga yandi. (Bis. 3:11) Ata Piere yelaka na kisika yina bantu vandaka kuzola mingi lukumu mpi kuvanda ti kiyeka, yandi bikaka ve nde bantu kupesa yandi lukumu. Yandi monisaka kudikulumusa mpi yandi songaka bantu na kupesa lukumu na Yehowa mpi na Yezu. Yandi tubaka nde: “Muntu yai ya beno ke mona mpi me zaba me kuma ngolo na zina [ya Yezu], mpi na nzila ya lukwikilu na beto na zina na yandi.” (Bis. 3:12-16) Na mukanda mosi yina Piere sonikilaka Bakristu, yandi songaka bo na kulwata kudikulumusa. Bangogo yai ke yibusa beto dibaku yina Yezu lwataka esume na luketo na yandi mpi yobisaka makulu ya bantumwa.​—Tanga 1 Piere 5:5.

12. Inki mutindu beto lenda landa kuvanda ya kudikulumusa bonso Piere?

¹² Beto lenda landa mbandu ya Piere kana beto ke landa kuvanda ya kudikulumusa. Kuvila ve nde kudikulumusa ya kieleka ke tendula ve kaka kutuba mambu ya mbote. Bangogo yina Piere sadilaka sambu na kutubila kudikulumusa ke tendula mpi mutindu beto ke kuditadilaka mpi mutindu beto ke tadilaka bantu ya nkaka. Beto ke sadilaka bantu mambu ya mbote sambu beto ke zolaka bo mpi sambu beto ke zolaka Yehowa, kansi ve sambu bo sikisa beto. Kana beto ke sala yonso sambu na kusadila Yehowa mpi bampangi na beto na kiese, yo vanda bantu ke mona beto to ve, beto ta monisa nde beto kele bantu ya kudikulumusa.​—Mat. 6:1-4.

VANDA TI “MABANZA YA MBOTE”

13. Kuvanda ti “mabanza ya mbote” ke tendula inki?

¹³ Kuvanda ti “mabanza ya mbote” ke tendula nki? (1 Pie. 4:7) Mukristu yina kele ti mabanza ya mbote ke salaka yonso sambu na kubaka balukanu yina ke wakana ti bangindu ya Yehowa. Yandi ke zabaka nde kele ve ti kima ya mfunu mingi kuluta kinduku na yandi ti Yehowa. Yandi ke monaka ve nde yandi me luta bantu ya nkaka mpi yandi ke ndimaka nde yandi me zaba ve mambu yonso. Diaka, yandi ke monisaka nde yandi ke tudilaka Yehowa ntima na mutindu yandi ke lombaka yandi lutwadisu mbala na mbala na kisambu.b

14. Inki mutindu Piere tudilaka ve Yehowa ntima na dibaku mosi?

¹⁴ Na mpimpa ya nsuka na ntwala nde bo fwa Yezu, yandi songaka balongoki na yandi nde: “Beno yonso ta bula sakuba sambu na mono na mpimpa yai.” Kansi Piere kuditudilaka ntima mpi yandi songaka Yezu nde: “Ata bantu yonso ya nkaka kubula sakuba sambu na nge, mono ta bula ve sakuba ata fioti!” Kaka na mpimpa yina, Yezu songaka balongoki na yandi ya nkaka nde: “Beno landa na kukengila mpi beno samba ntangu yonso.” (Mat. 26:31, 33, 41) Kana Piere landaka ndongisila yai na ntwala, yandi lendaka kuvanda ti kikesa ya kundima nde yandi kele longoki ya Yezu. Kansi Piere buyaka nde yandi me zaba ve Mfumu na yandi Yezu mpi yandi kudiyangisaka mingi na nima sambu na yo.​—Mat. 26:69-75.

15. Inki sadisaka Yezu na kulanda kuvanda ti mabanza ya mbote na mpimpa ya nsuka na ntwala nde bo fwa yandi?

¹⁵ Yezu vandaka mpenza kutudila Yehowa ntima. Ata yandi vandaka muntu ya kukuka, yandi sambaka mingi na mpimpa ya nsuka na ntwala nde bo fwa yandi. Bisambu yina pesaka yandi kikesa ya kusala mambu na kuwakana ti luzolo ya Yehowa. (Mat. 26:39, 42, 44; Yoa. 18:4, 5) Ntembe kele ve nde na luzingu ya Piere ya mvimba, yandi vilaka ve ata fioti mutindu Yezu sambaka mbala mingi na mpimpa yina.

16. Inki mutindu Piere monisaka nde yandi kumaka mpenza ti mabanza ya mbote? (1 Piere 4:7)

¹⁶ Na nima ya bantangu, Piere kumaka kusamba Yehowa mingi mpi kutudila yandi mpenza ntima. Ntangu Yezu futumukaka, yandi ndimisaka Piere ti bantumwa na yandi ya nkaka nde bo ta baka mpeve santu yina ta sadisa bo na kulungisa mukumba na bo ya kulonga nsangu ya mbote. Kansi, Yezu songaka bo na kuvingila na Yeruzalemi tii kuna bo ta baka mpeve santu. (Luka 24:49; Bis. 1:4, 5) Inki Piere salaka ntangu bo vandaka kuvingila? Biblia ke tuba nde Piere ti Bakristu ya nkaka “vandaka kukwamina na kisambu.” (Bis. 1:13, 14) Na nima na mukanda ya 1 Piere, Piere songaka bampangi na yandi Bakristu na kuvanda ti mabanza ya mbote, na kusamba mpi na kutudila Yehowa ntima. (Tanga 1 Piere 4:7.) Piere kumaka kutudila Yehowa ntima mingi mpi yandi kumaka dikunzi ya dibundu.​—Bag. 2:9.

17. Inki beto fwete landa kusala ata beto kele ti makuki ya nki mutindu? (Tala mpi kifwanisu.)

¹⁷ Beto fwete samba Yehowa mbala na mbala sambu na kuvanda ti mabanza ya mbote. Beto me bakisa nde beto fwete landa kusamba Yehowa ata beto kele ti makuki ya nki mutindu. Yo yina beto fwete samba Yehowa, mingi-mingi ntangu beto ke baka balukanu ya mfunu sambu yandi twadisa beto. Beto fwete tula mpi ntima nde ntangu yonso yandi ke lombaka beto mambu yina kele sambu na mambote na beto.

18. Inki mutindu beto lenda kuma mpenza kuwakanisa mabanza na beto ti ya Yehowa?

¹⁸ Beto ke pesaka Yehowa mersi mingi sambu yandi me salaka beto ti makuki ya kulanda bikalulu na yandi. (Kuy. 1:26) Ya kieleka, beto lenda landa ve ata fioti bikalulu ya Yehowa na mutindu ya kukuka. (Yez. 55:9) Kansi bonso Piere, beto lenda kuma mpenza kuwakanisa bangindu na beto ti ya Yehowa. Beto ta sala yo kana beto ke landa kuwakanisa bangindu na beto ti ya Nzambi, kana beto ke landa kuvanda ya kudikulumusa mpi ti mabanza ya mbote.