Kubuya Kudia Misuni mpi Kusadila Bima ya Ke Katukaka na Bambisi—Inki Biblia Ke Tuba?

Na ntoto ya mvimba bantu ke tula dikebi mingi na kukonda kusadila misuni mpi bima ya ke katukaka na bambisi.

• Kimvuka mosi (The Vegan Society) ke tuba nde: “Kukonda kusadila misuni ti bima ya ke katukaka na bambisi kele dibanza mpi mutindu ya kuzinga yina ke salaka nde bantu kubuya, kana mpila kele, konso kima yina bo lenda sala ti bambisi, yo vanda kudia yo, kusadila yo bilele to konso kima ya nkaka.”

Bantu ya nkaka ke kumaka kuzinga mutindu yina sambu bo ke zolaka nde bambisi kuzinga mbote mpi sambu bo ke zolaka kukeba ntoto mpi sante na bo, to sambu na mambu ya bo ke kwikilaka na dibundu na bo.

• Kisadilu mosi (Britannica Academic) ke tuba nde: “Kukonda kudia misuni ti bima yina ke katukaka na bambisi me swaswana ti madia ya nkaka sambu mbala mingi bantu ke monaka yo bonso lukwikilu mosi buna, lukanu ya muntu fwete baka na mabanza, mpi mutindu yina konso muntu fwete soba nsi-ntoto sambu yo kuma mbote kuluta.”

Keti kukonda kusadila misuni mpi bima yina ke katukaka na bambisi lenda sala nde ntoto kuvanda mbote na bilumbu ke kwisa? Inki Biblia ke tuba?

Mutindu Muntu Yina Salaka beto ke tadilaka bantu mpi bambisi

Biblia ke tuba pwelele nde, sambu na Yehowa Nzambi,a Muntu Yina Salaka beto, bantu kele mfunu mingi kuluta bambisi mpi nde yandi pesaka bantu kiyeka na zulu na yo. (Kuyantika 1:27, 28) Na nima ya ntangu, yandi pesaka bantu nswa ya kudia bambisi. (Kuyantika 9:3) Kansi, yandi ke zolaka ve ata fioti nde bantu kuniokula bambisi.—Bingana 12:10.

Na kutadila Biblia, kudia musuni ya mbisi to ve kele lukanu ya muntu yandi mosi.b Lukanu ya beto ke baka na diambu yai ta kumisa beto ve bantu ya kuluta mbote na meso ya Nzambi. (1 Bakorinto 8:8) Ata muntu mosi ve fwete tuba mambu ya mbi sambu na lukanu yina muntu ya nkaka ke baka sambu na bima ya kudia.—Baroma 14:3.

Kinsweki sambu na kuzinga mbote na bilumbu ke kwisa

Biblia ke tendula nde mutindu ya beto ke zola kuzinga ta manisa ve bampasi ya nsi-ntoto. Beto ke monaka bampasi mingi sambu na mambu ya politiki, luzingu ya bantu mpi mambu ya me tala mumbongo ya nsi-ntoto yai. Ata muntu mosi ve lenda manisa mambu yai. Biblia ke tuba nde:

• “Kima yina kele nioka-nioka, bo lenda tandula yo ve.”—Longi 1:15.

Muntu Yina Salaka beto ta manisa bampasi ya beto ke mona bubu. Biblia ke tubilaka na mutindu ya kifwani mambu yina yandi ta sala.

• “Ebuna, mono monaka zulu ya mpa ti ntoto ya mpa; sambu zulu ya ntama ti ntoto ya ntama vilaka, mpi nzadi-mungwa vandaka diaka ve.”—Kusonga 21:1.

Nzambi ta katula baluyalu ya bantu to “zulu ya ntama,” sambu na kutula “zulu ya mpa” disongidila Kimfumu na yandi ya kele luyalu ya zulu. Kimfumu na yandi ta katula “ntoto ya ntama,” disongidila bantu ya mbi, mpi yo ta yala “ntoto ya mpa,” to bantu yina ke lemfukaka na luzolo yonso na luyalu na yandi.

Kaka na luyalu ya Kimfumu ya Nzambi bantu ta longuka mutindu bo lenda zinga na ngemba ti bambisi mpi kuzitisa bima ya kele na ntoto.—Yezaya 11:6-9.