Yezaya 40:31—“Bantu Yina Ke Tulaka Kivuvu na Yehowa Ta Baka Diaka Ngolo”

“Kansi bantu yina ke tulaka kivuvu na Yehowa ta baka diaka ngolo. Bo ta pumbuka na mapapu bonso bango-zulu. Bo ta baka ntinu mpi ngolo na bo ta mana ve; bo ta tambula mpi ta lemba ve.”—Yezaya 40:31, Mbalula ya Nsi-Ntoto ya Mpa.

“Kansi bayina ke tulaka ntima na Mfumu Nzambi, bo ke yikaka diaka ngolo na bo. Bo ke pumbukaka bonso bakumbi-kumbi. Bo ke bakaka ntinu, kikesa na bo ke manaka ve; bo ke tambulaka mingi, kulemba ve.”—Yezaya 40:31, Bible en Kituba.

Ntendula ya Yezaya 40:31

Yehowaa Nzambi ke ndimisa bantu yina ke sambilaka yandi nde yandi ta pesa bo ngolo yina bo kele na yo mfunu sambu na kununga to kunwana ti konso diambu yina bo ke kutana ti yo.

“Bantu yina ke tulaka kivuvu na Yehowa ta baka diaka ngolo.” Bantu yina kele ti kivuvu, to ke tulaka ntima, na makuki mpi na luzolo ya Nzambi kele ti yo ya kusadisa bansadi na yandi, lenda tula ntima nde yandi ta sadisa bo. (Bingana 3:5, 6) Mutindu mosi yina Nzambi lenda pesa bantu ya ke sambilaka yandi ngolo kele na nzila ya mpeve santu.—Luka 11:13.

“Bo ta pumbuka na mapapu bonso bango-zulu.” Kutuba yai ya kifwani ke monisa mambu yina ngolo Nzambi lenda sadisa muntu na kusala. Ngo-zulu ke sadilaka mipepe ya tiya ya ke tombuka, yina bo ke bingaka thermiques, sambu na kupumbuka. Kana ngo-zulu me zwa mupepe yina, yo ke tandulaka mapapu na yo mpi ke balukaka na kati na yo, ebuna yo ke landaka kutombuka na zulu. Ntangu banzo-zulu ke katukaka na mupepe mosi ya thermique mpi ke kwendaka na mupepe ya nkaka, yo lenda bikala na zulu bangunga mingi, mpi kusadila ngolo fioti ntangu yo ke pumbuka sambu na kukwenda na kisika ya yo me zola.

“Bo ta baka ntinu mpi ngolo na bo ta mana ve.” Bampasi ya luzingu lenda lembisa beto na nitu mi na bangindu, kansi ngolo ya Nzambi lenda sadisa beto sambu beto landa kukanga ntima. Yo lenda pesa beto kikesa ya kusala mambu ya mbote ata beto ke kutana ti bampasi ya ngolo. Ntumwa Polo kutanaka ti bampasi ya ngolo; yandi sonikaka nde: “Sambu na mambu yonso, mono kele ti ngolo na nzila ya muntu yina ke pesaka mono ngolo.”—Bafilipi 4:13.

Mambu ya Bo Ke Tubila na Baverse Yina Ke na Ntwala ya mpi na Nima ya Yezaya 40:31

Nzambi pesaka profete Yezaya mpeve santu sambu na kusonika mambu yai na mvu-nkama ya nana na ntwala ya ntangu na beto. Ata verse yai ke tubila bansadi yonso ya kwikama ya Nzambi, yo ke monana nde, Yehowa salaka nde bo sonika yo sambu na kupesa kikesa na Bayuda yina bo zolaka kunata na Babilone mpi kusala bamvula 70 kuna. Ntangu Bayuda vutukaka na bwala na bo na nima ya kimpika, bo monaka mutindu mambu yina Nzambi tubaka lungangaka. (Yezaya 40:1-3) Nzambi pesaka bo ngolo sambu bo sala nzietelob yina ya nda mpi ya mpasi katuka na Babilone tii na Yeruzalemi na mvu 537 na ntwala ya ntangu na beto.—Yezaya 40:29.