Longi 3:11—“Yandi Me Tulaka Konso Kima na Ntangu na Yo”

“Yandi me salaka bima yonso kitoko na ntangu na yo. Yandi me tulaka nkutu na ntima na bo ngindu ya kuzinga mvula na mvula; ata mpidina bantu ta bakisaka ve ata fioti kisalu yina Nzambi ya kieleka me salaka katuka luyantiku tii na nsuka.”—Longi 3:11, Mbalula ya Nsi-Ntoto ya Mpa.

“Yandi me tulaka konso kima na ntangu na yo. Yandi me pesaka beto nzala ya kuzaba mambu ke kwisa na ntwala, kansi yandi me pesaka beto mayele ya kufwana ve na kuzaba mambu ya yandi ke salaka.”—Longi 3:11, Biblia en Kituba.

Ntendula ya Longi 3:11

“Yandi me salaka bima yonso kitoko na ntangu na yo.” Ngogo ya Kiebreo ya bo me balula awa nde “kitoko” ke suka ve kaka na kima mosi ya ke monana kitoko na meso. Bo lenda balula yo mpi nde “ya kuyidika mbote,” “mbote,” to “ya kufwana.” (Longi 3:11, noti na nsi ya lutiti) Bima ya kitoko ya Nzambi me salaka me suka kaka ve na bima yina yandi me salaka kansi yo ke tadila mpi mambu yonso ya yandi ke salaka sambu na kulungisa luzolo na yandi.—Daniele 2:21; 2 Piere 3:8; Kusonga 4:11.

“Yandi me tulaka nkutu na ntima na bo ngindu ya kuzinga mvula na mvula.” Nzambi salaka bantu sambu bo zinga mvula na mvula. (Nkunga 37:29) Yo yina, yo kele mbote mutindu yandi tulaka mpi nzala yina na na kati na bo. Kansi, bakala ti nkento ya ntete, disongidila Adami ti Eva, kolamaka na Nzambi mpi bo kudinatilaka lufwa mpi bo natilaka bana na bo lufwa. (Kuyantika 3:17-19; Baroma 5:12) Ata mpidina, Nzambi ke sila nde yandi ta “lungisa nzala ya konso kima ya kele na luzingu,” ata mpi nzala ya bantu ke vandaka ti yo ya kuzinga mvula na mvula. (Nkunga 145:16) Bibia ke tendula mutindu Yehowa me yidikaka mambu sambu bantu kuvanda diaka ti kivuvu ya kuzinga mvula na mvula.—Baroma 6:23.

“Bantu ta bakisaka ve ata fioti kisalu yina Nzambi ya kieleka me salaka katuka luyantiku tii na nsuka.” Mayele ya Nzambi kele mudindu mpi mingi kibeni yo yina Biblia ke tubaka nde muntu mosi ve lenda “bakisa” yo. (Baroma 11:33) Ata mpidina, Nzambi ke zolaka kusonga lukanu na yandi na bantu yina ke zolaka kusepedisa yandi.—Amosi 3:7.

Mambu ya Bo Ke Tubila na Baverse ya Kele na Ntwala mpi na Nima ya Longi 3:11

Salomo, ntotila ya Izraele ya ntama, muntu yina zabanaka nde yandi vandaka ti mayele yina katukaka na Nzambi, muntu sonikaka mukanda ya Longi. Yo kele ti bandongisila ya mbote ya ke monisa mambu yina kele mfunu mingi na luzingu mpi mambu yina kele na mfunu ve. (Longi 1:2, 3; 2:1, 17; 7:1; 12:1, 13) Na kapu 3, Salomo ke tubila ndambu ya mambu to bacycle yina ke monanaka mingi na luzingu. Yo ke tubila bisalu mingi. (Longi 3:1-8, 10) Nzambi me pesaka bantu kimpwanza ya kupona nki bisalu bo ta sala mpi nki ntangu bo ta sala yo. (Kulonga 30:19, 20; Yozue 24:15) Salomo ke tendula nde bantu lenda sepela ti mbuma ya bisalu na bo kaka kana bo ke sala mambu na kuwakana ti luzolo ya Yehowa mpi kana bo ke zitisa ntangu ya yandi me tulaka. Salomo ke binga yo “dikabu ya Nzambi.”—Longi 3:1, 12, 13.

Tala video yai ya nkufi sambu na kumona na bunkufi mambu yina kele na mukanda ya Longi.