Bagalatia 6:9—“Beto Lemba Ve na Kusala Mambu ya Mbote”

“Beto yambula ve kusala mambu ya mbote, sambu na ntangu yina me fwana, beto ta katula bambuma kana beto yambula ve.”—Bagalatia 6:9, Mbalula ya Nsi-Ntoto ya Mpa.

“Beto lemba ve na kusala mambu ya mbote. Sambu, kana beto ke sala kaka, beto ta katula bambuma na ntangu ya mbote.”—Bagalatia 6:9, Bible en Kituba.

Ntendula ya Bagalatia 6:9

Ntumwa Polo ke siamisa Bakristu na kulanda kusala mambu yina kele ya mbote na meso ya Nzambi. Kana bo sala yo, bo lenda tula ntima nde Nzambi ta futa bo.

“Beto yambula ve.” Bo lenda balula bangogo yai nde “beto lemba ve.” Ngogo ya ndinga ya kisina lenda pesa mpi ngindu ya kulemba ve nitu to kukonda kikesa. Na mutindu yandi kudikotisaka na bangogo yina, ntumwa Polo ke ndima nde bantangu ya nkaka yandi mpi vandaka ya kulemba.—Baroma 7:21-24.

“Mambu ya mbote,” ke tadila mambu yonso yina Mukristu fwete sala na kisalu ya Nzambi. Yo ke tadila mpi mambu yina muntu ke salaka sambu na kusadisa bampangi na yandi Bakristu mpi bantu ya nkaka.—Bagalatia 6:10.

“Na ntangu yina me fwana, beto ta katula bambuma kana beto yambula ve.” Polo ke yibusa batangi na yandi nde ntangu mingi lenda luta na ntwala nde bo mona mbuma ya mambu ya mbote ya bo ke sala, kaka mutindu ntangu mingi ke lutaka na ntwala nde bima ya kuyela na bilanga. Ntangu yandi ke tubila kubuka, Polo ke wakanisa verse yai ti kieleka yai ya mfunu mingi ya kele na verse 7: “Konso kima yina muntu ke kuna, yandi ta katula yo mpi.” Na kutuba ya nkaka, kana Mukristu ke sala mambu yina kele ya mbote na meso ya Nzambi, yandi ta baka bambuma mingi, ti luzingu ya mvula na mvula mpi.—Baroma 2:6, 7; Bagalatia 6:8.

Mambu ya Bo Ke Tubila na Baverse ya Kele na Ntwala mpi na Nima ya Bagalatia 6:9

Ntumwa Polo sonikaka mukanda yai na Bakristu yina vandaka kuzinga na Galatia pene ya bamvu 50-52 ya ntangu na beto. Yandi salaka yo sambu na kutanina Bakristu na bupusi ya mbi ya bantu yina vandaka kutuba nde bo kele Bakristu kansi bo vandaka kubebisa kieleka ya me tala Yezu. (Bagalatia 1:6, 7) Balongi yai ya luvunu vandaka kutuba nde Bakristu fwete zitisa Nsiku yina Nzambi pesaka na dikanda ya ntama ya Izraele na nzila ya Moize. (Bagalatia 2:15, 16) Polo tendulaka nde Nsiku ya Moize lungisaka kisalu na yo mpi yo vandaka kulomba diaka ve nde bantu ya ke sambila Nzambi kuzitisa yo.—Baroma 10:4; Bagalatia 3:23-25.

Ntangu Polo siamisaka bampangi Bakristu na kulanda “kusala mambu ya mbote,” yandi vandaka kutubila ve kuzitisa Nsiku ya Moize. Kansi, yandi vandaka kusiamisa bo na ‘kulungisa nsiku ya Kristu,’ yina ke tadila mambu yonso ya Yezu longaka ya me tala kusadila bantu mambu ya mbote.—Bagalatia 6:2; Matayo 7:12; Yoane 13:34.

Tala video yai ya nkufi sambu na kumona na bunkufi mambu yina kele na mukanda ya Bagalatia.