Sante

Biblia kele ve mukanda ya ke tubilaka kimunganga. Kansi, yo kele ti bandongisila yina lenda sadisa nge na kuvanda ti sante ya mbote. Beto tadila mwa minsiku ya Biblia yina lenda sadisa nge na kuvanda ti sante ya mbote.

KEBA NITU NA NGE

MUNSIKU YA BIBLIA: “Ata muntu mosi ve ke mengaka nitu na yandi mosi, kansi yandi ke disaka yo mpi ke kebaka yo.”—Baefezo 5:29.

MAMBU YINA YO KE TENDULA: Munsiku yai ya Biblia ke siamisa beto na kusala yonso sambu na kukeba sante na beto. Rapore mosi ke monisa nde bantu mingi ke belaka sambu bo me ponaka luzingu mosi ya mbi. Yo yina, kana beto ke sala mambu ya mbote, beto lenda vanda ti sante ya mbote.

MAMBU YA NGE LENDA SALA:

Madia. Diaka madia yina ke tungaka nitu mpi nwaka masa mingi.
Salaka Ngalasisi. Kana nge ke sala ngalasisi, nge lenda vanda ti sante ya mbote, nge vanda mbuta to leke, nge vanda ti kifu na nitu to maladi ya ke manaka ve. Bantu ya ke zolaka nge to munganga lenda pesa nge bandongisila ya kusala ngalasisi kansi nge lenda bakila yo mambote kaka kana nge ke sadila yo.
Lalaka Mingi. Kana muntu ke lalaka ve mingi, yandi lenda bela maladi ya ngolo. Bantu mingi ke lalaka ve mingi sambu bo ke salaka mambu ya nkaka na ntangu bo fwete lala. Kansi kana nge ke lala mingi, nge ta vanda ti sante ya mbote.

BUYA BIKALULU YA MBI

MUNSIKU YA BIBLIA: “Beto katula na nitu na beto mvindu yonso ya kinsuni mpi ya mpeve.”—2 Bakorinto 7:1.

MAMBU YINA YO KE TENDULA: Beto ta vanda ti sante ya mbote kana beto ke sadila ve bima yina ke bebisaka nitu, mu mbandu makaya sambu yo ke nataka maladi mpi lufwa.

MAMBU YA NGE LENDA SALA: Tula kilumbu yina nge ta yambula yo mpi sonika yo na kalandrie na nge. Kansi na ntwala nde kilumbu yango kulunga, katula makaya, pipe, alimete mpi bima ya nkaka ya nge vandaka kusadila sambu na kunwa makaya. Kukwenda ve bisika yina bantu ke nwaka makaya. Songa banduku mpi bantu ya dibuta na nge nde nge me baka lukanu ya kubuya makaya sambu bo sadisa nge.

MINSIKU YA NKAKA YA BIBLIA

Muntu mosi ke tanga Biblia — Sambu na kuzwa Biblia, nge lenda solula ti Mbangi mosi ya Yehowa na kisika yina nge ke zingaka

SALA MAMBU NA MUTINDU YA MBOTE.

“Kana nge tunga nzo ya mpa, nge fwete tunga mpi kamwa-lupangu sambu na ludi na nge, mpidina nge ta nata ve mfuka ya menga na nzo na nge sambu muntu lenda katuka na ludi mpi kubwa.”—KULONGA 22:8.

YALA MAKASI NA NGE.

“Muntu yina ke waka ve makasi nswalu kele ti luswasukusu mingi, kansi muntu ya lupupu ke monisaka buzoba na yandi.”—BINGANA 14:29.

BUYA KUDIA MINGI.

“Kuta kinduku ve na bantu yina . . . ke diaka mbiki.”—BINGANA 23:20.