INKI BETO LENDA SALA KANA NTALU YA BIMA KE MATA?
Yikama ti Mambu Mpila yo Ke Salama
Kana ntalu ya bima ke mata malembe-malembe, beto lenda mona yo ve, mingi-mingi kana salere na beto ke mata mpi. Kansi, kana ntalu ya bima ke mata nswalu mpi salere na beto ke soba ve, beto lenda kuma kudiyangisa mingi mpi kukuma ti basusi, mingi-mingi kana beto kele ti dibuta.
Beto lenda kanga ve nzila nde bima kumata ntalu. Kansi, kana beto ke yikama ti mambu yango, yo ta natila beto mambote.
SAMBU NA NKI YO KELE MFUNU?
Sambu na bantu yina ke zabaka nde bo lenda kanga ve nzila nde bima kumata ntalu, yo lenda vandila bo ve mpasi na . . .
kuvanda ntima madidi. Kana beto kele ntima madidi, yo ta sadisa beto na kumona mambu pwelele mpi kubaka balukanu ya mbote.
kusala mambu na mayele. Mu mbandu, yo ta vanda ve mayele kana beto ke buya kufuta bamfuka to kana beto ke sumba bima ya kukonda mfunu.
kubuya kuswana ti bantu ya dibuta sambu na mbongo.
kutala nki bo lenda sala sambu na kusumba bima ya bo kele ti yo mfunu. Yo lenda lomba nde bo sala badepense fioti mpi kuzaba nki bima bo kele mpenza ti yo mfunu.
INKI NGE LENDA SALA?
Yikama nswalu ti mambu ya ke salama. Na bantangu yina ntalu ya bima ke mata nswalu, yo ta vanda mbote na kusala badepense fioti kana mpila ta vanda. Kusosa kuzinga na mutindu yina ke wakana ve ti makuki na nge kele bonso nsusu ya ke sosa kumina kima ya kele ve na nene ya mungungu na yandi. Na nsuka, yo ke lembisaka mingi. Ya kieleka, nge ke zolaka kulungisa mbote bampusa ya dibuta nge. Kansi kuvila ve nde: Dibuta na nge kele na mfunu nde nge zola bo, nge lutisa ntangu ti bo mpi nge tudila bo dikebi kuluta bima yonso ya nkaka.
Kusosa kuzinga na mutindu yina ke wakana ve ti makuki na nge kele bonso nsusu ya ke sosa kumina kima ya kele ve na nene ya mungungu na yandi