Luzingu ya ngemba na insi yampa

Tala kifwanisu yai na zulu ya trakiti yai. Inki mabanza yau kebuta na ntima na nge? Keti ntima na nge kezolaka ve ngemba, kyese mpi mambote yau kemonisa? Inga. Kansi, keti yau kele kulota ndosi na kukwikila nde kilumbu luzingu ya mpidyai tavanda na ntoto?

Mbala yankaka mpidina bantu mingi keyindulaka. Makyelaka ya bubu kele bitumba, ngondana, nzala, kimbêfo, bununu,​—beto suka kaka pana. Kansi, beto kele ti bikuma yambote ya kutula kivuvu. Na kutubilaka bilumbu kekwisa, Bible ketuba nde “Bonso nsilulu nandi [yina ya Nzambi], beto kevingila mazulu yampa ti ntoto yampa kuna lunungu fwete yala”.—2 Petelo 3:13; Esaïe 65:17.

“Mazulu yampa” yina ti “ntoto yampa”, na Bible, yau ketendula ve mazulu yampa ti ntoto yampa yai kemonika na meso. Ntoto ti mazulu yai kemonika salamaka ya kulunga, mpi na kutadila Bible yau tabikala kimâkulu. (Nkunga 89:36, 37; 104:5) “Ntoto yampa” tavanda kikanda ya bantu ya lunungu tazinga na ntoto, mpi “mazulu yampa” tavanda kimfumu ya zulu ya lunungu mpi ya kulunga, luyalu yina tayala kikanda ya bantu yina na ntoto. Kansi, keti yau kele ndosi ve na kukwikila nde “ntoto yampa”, to insi yampa ya nkembo, lenda salama?

Kuvila ve nde luzingu yai ya kitoko vandaka na lukanu yantete ya Nzambi sambu na ntoto. Yandi tulaka bakwedi yantete na Edeni, paladisu ya ntoto, mpi yandi pesaka bau inswa ya kitoko. Yandi tubilaka bau nde: “Beno buta, beno kuma mingi, beno fulusa ntoto, beno yala yau.” (Genèse 1:28) Inga, lukanu ya Nzambi vandaka nde bakala ti nkento kuvanda ti bana mpi nde bau kumisa ntoto yamvimba paladisu. Ata bau bakaka nanima lukanu ya kukolama na Nzambi, na kumonisaka mpidina nde bau lungaka ve na kubaka luzingu ya mvula na mvula, lukanu yantete ya Nzambi sobaka ve. Mpi yau fwete lungisama na insi yampa.​—Esaïe 55:11.

Nkutu, ntangu nge kesambaka kisambu ya Mfumu, to Tatetu, mpi nde nge kelombaka nde Kimfumu ya Nzambi kwisa, nge kesambaka sambu Luyalu nandi ya zulu katula mambi na ntoto mpi yau yala na insi yampa. (Matai 6:9) Beto fwete kwikila nde Nzambi tandima kisambu yina, sambu Ndinga nandi kesila nde: “Bankwa lunungu ta-baka ntoto, ye bau tavanda muna kamâkulu.”​—Nkunga 37:29.

Luzingu na insi yampa ya Nzambi

Kimfumu ya Nzambi tavanda nto ya balusakumunu ya mingi sambu na ntoto; yau tafulusa bantu na mambote ya Nzambi bumbilaka bau tuka luyantiku. Kimbeni ti bangindu yambi na mpangi imene! Konso muntu takuma nduku ya mfinangani nandi. Na Bible, Nzambi kelaka nde yandi ‘tamanisa mvita nsuka tii nsuka yankaka ya ntoto’. “Dikanda mosi ve tatobula mbele na dikanda yankaka, ye bau talonguka dyaka ve mvita”.​—Nkunga 46:9; Esaïe 2:4.

Ntoto tatomisama bonso kilanga ya paladisu. Bible ketuba nde: “Ntoto makanga ti ntoto ya kuyuma tayangalala, ye kibansala ya makanga tavanda na kyese ye tamena matiti bonso Safran. ( . . . ) Sambu masa tabasika na ntoto makanga, ye bambu na kimbansala ya makanga. Ye ntoto ya mwini ngolo takituka bonso zanga ya masa ya kufika matiti, ye ntoto ya kuyuma bonso banto ya masa.”​—Esaïe 35:1, 6, 7.

Nzala tavanda dyaka ve. “Kyeleka ntoto tabuta mbutu na yau”, mpila Bible ketuba. (Nkunga 67:6; 72:16). Ngangi kesila beto nde konso muntu tamona mambote ya kisalu nandi: “Kyeleka bau takuna nti ya vinu ye bau tadya mbuma na yau. ( . . . ) Bau takuna ve sambu muntu yankaka kudya yau.”​—Esaïe 65:21, 22.

Na insi yampa ya Nzambi, banzo ya nene yina kekutikaka bantu mingi sika mosi tavanda dyaka ve, tubanzo ya bibondu tavanda dyaka ve, sambu Nzambi mebaka lukanu: “Kyeleka bau tatunga banzo ye tavanda muna ( . . . ) Bau tatunga ve sambu muntu yankaka kuvanda muna.” Bible kesila dyaka nde: “Bau tamona mpasi ya mpamba ve.” (Esaïe 65:21-23) Mpidina, bantu tavanda ti kisalu kepesa mbutu mpi ya kyese. Luzingu tavanda ve kiseku.

Na ntangu na yau, Kimfumu ya Nzambi tavutula bangwizani ya ngemba yina vandaka na kilanga ya Edeni na kati ya bambisi, mpi na kati ya bantu ti bambisi. Bible ketuba nde: “Ingo talala kisika mosi na mwana-nkombo, na mwana-ngombe, na mwana-nkosi yina mebasika mendefo, na bambisi yina kedyâka mbote, yonso tavanda kisika mosi; ye mpi fimwana bakala tatambwisa yau.”​—Esaïe 11:6-9; Osée 2:18.

Yindula fyoti. Na paladisu ya ntoto, bimbêfo yonso ti bifu yonso ya nitu tabelulama! Ndinga ya Nzambi kepesa beto kivuvu yai: “Muntu mosi ve tatuba: ‘mono ke bela.’” (Esaïe 33:24) “[Nzambi] takunguna mansanga yonso na meso na bau, ye lufwa tavanda dyaka ve, ye matanga, ye kudila, ye mpasi tavanda dyaka ve. Mambu ya ntama mevila.”​—Nzaikusu 21:4.

Mambote yai kele nantwala na nge

Kyeleka na kuwa bansilulu ya Nzambi metadila luzingu na insi yampa, ntima na nge ke na kyese. Ye mpi ata bankaka lenda tala yonso yina bonso kaka ndosi, mambote ya mpidina kele ve ndosi sambu yau mekatuka na Ngangi na beto ya zola.​—Nkunga 145:16; Michée 4:4.

Sambu na kuzinga mvula na mvula na paladisu ya ntoto, beto fwete lungisa mambu melombama. Yezu tubaka nde: “Luzingu ya mvula na mvula ketendula: nde bau longuka na kuzaba, nge, Nzambi mosi kaka ya kyeleka, ti yina nge tindaka, Yezu Kristu.”​—Yoane 17:3.

Mpidina, kana beto zola kibeni zinga na insi yampa yina Nzambi mesila, beto fwete ntete longuka na kuzaba luzolo ya Nzambi mpi nanima kusadila yau. Sambu yau kele kyeleka nde “insi keluta ti nzala na yau dyaka, kansi yina kesala luzolo ya Nzambi tabikala kimâkulu” mpi tabaka mvula na mvula mambote kekatuka na Ngangi na beto.​—1 Yoane 2:17.