Kitini 10
Ntoto yampa ya kitoko yina Nzambi tatula
1, 2. Inki tamonana na nima ntangu bitumba ya Har-maguédon takomba ntoto?
NTANGU bitumba ya Nzambi ya Har-maguédon takomba ntoto, inki dyambu tamonana na nima? Ebuna nsungi mosi ya kitoko yampa tayantika. Bayina taguluka na Har-maguédon, mutindu bau yitaka monisa kwikama na bau na luyalu ya Nzambi, bau takota na ntoto yampa. Yau tavanda nsungi mosi yampa ya kyese ntangu Nzambi tanokisa balusakumunu na dibuta ya bantu!
2 Nansi ya lutwadisu ya Kimfumu ya Nzambi, bayina taguluka tayantika na kubongisa paladisu. Bau tatambika ngolo na bau mvimba na bisalu ya tapesa bau mambote mingi. Ntoto tayantika na kukuma kisika mosi ya kitoko, ya ngemba, mpi kivandilu mosi ya kufwana sambu na bantu.
Lunungu tayinga mambi
3. Inki dyambu ya kyese tasalama kaka na nima ya Har-maguédon?
3 Mambu yonso yai tasalama na lufwa ya nsi yai ya Satana. Mabundu ya luvunu tavanda dyaka ve, makambu ya kuponapona nde yai ke muntu ya nene yai ke muntu ya fyoti tavanda dyaka ve, to baluyalu tavanda dyaka ve. Ba publicités ya busatana sambu na kukusa bantu tavanda dyaka ve; mambu yonso ya munkiti takubwa kumosi ti nsi ya Satana. Yindula fyoti: mupepe yonso ya imbi ya nsi yai ya Satana takatuka! Inki kyese!
4. Tendula fyoti nsobana yina tasalama sambu na yina ketadila malongi.
4 Ebuna, bangindu yonso ya kubeba ya luyalu ya bantu tayingama na malongi ya takatuka na Nzambi sambu na kubongisa bantu. “Bana na nge yonso tavanda bantu yina talongama na Jéhovah.” (Isaya 54:13) Na lusadisu ya malongi yai ya vedila mvula na mvula, “ya kyeleka ntoto tafuluka na nzayilu ya Jéhovah mutindu masa kefulukaka na mbu.” (Isaya 11:9) Bantu talonguka dyaka ve bamambu ya imbi, kansi “bantu yonso ya ntoto talonguka lunungu.” (Isaya 26:9) Bangindu ya mbote ya bisalu ya kubongisa bantu tavanda bamambu yina ya tasalama lumbu na lumbu.—Bisalu 17:31; Filipo 4:8.
5. Inki dyambu takumila mambi mpi bantu ya imbi?
5 Mpidina, kugonda bantu tavanda dyaka ve, mubulu, kukanga bantu na kingolongolo to enlèvement, kuyiba, mpi mambi yankaka tasalama dyaka ve. Ata muntu mosi tamona mpasi ve sambu na lufwa ya bantu yankaka. Bingana 10:30 ketuba nde: “Bantu ya mbote tazinga kimakulu na ngemba, kansi bantu ya imbi tabikala ve na ntoto yai.”
Mavimpi ya kulunga tavutulama
6, 7. (a) Na inki bamambu ya mpasi ya ngolo luyalu ya Kimfumu ya Nzambi tatula nsuka? (b) Inki mutindu Yezu monisaka yau ntangu yandi vandaka awa na ntoto?
6 Na kati ya ntoto yampa, bamambu yonso ya imbi ya basikaka na nima ya mbendumuka ya luyantiku takatulama. Mumbandu, luyalu ya Kimfumu takatula maladi yonso mpi kununa. Bubu yai, ataku nge ke na mavimpi ya mwa mbote, kansi dyambu ya mpasi kele nde na ntangu nge keyela mpi kekuma mbuta, meso na nge tabanda kukuma mpimpa, meno na nge tabanda kubeba, makutu na nge tabanda kuwa dyaka mbote ve, mpusu na nge ya nitu tabanda kukuma misisamisisa, binaka na nge ya kati tabanda kulemba, ebuna nsuka tii nge takufwa.
7 Kansi, bampasi yai ya beto bakaka na bibuti na beto ya ntete tavanda bamambu ya ntama nswalu. Keti nge keyibuka inki Yezu salaka sambu na yina ketadila mavimpi ntangu yandi vandaka awa na ntoto? Bible ketuba nde: “Bau natilaka yandi bibuka ya bantu yina ketambulaka ya kunyeka, bantu ya kufwa-meso, bantu ya makulu-kifu, babàbá, mpi bantu yankaka ya maladi; bau kwendaka kutula bau na makulu ya Yezu, ebuna yandi belulaka bau. Bantu yankaka mingi yitukaka ntangu bau monaka nde, babàbá ketuba, bantu ya makulu-kifu ketambula, bantu ya vandaka tambula ya kunyeka ketambula mbote, mpi bantu ya meso-kufwa kemona.”—Matai 15:30, 31.
8, 9. Tendula fyoti kyese yina ntoto yampa tanata ntangu mavimpi ya kulunga tavutulama.
8 Yau tavanda kyese mosi ya nene na ntoto yampa ntangu bamaladi na beto yonso tamana! Bampasi yina kebasikaka sambu na kukonda mavimpi ya mbote tatungisa beto dyaka ve. “Ata muntu mosi tatuba dyaka ve nde mono kebela.” “Na ntangu yina, meso ya bantu kufwa-meso tamona, makutu ya bantu ya kufwa-makutu takanguka. Na ntangu yina bantu ya makulu-kifu tapumbuka bonso mbambi, babàbá takuma kutuba na ndinga ya ngolo na kyese.”—Isaya 33:24; 35:5, 6.
9 Keti yau tavanda dyambu ya kyese ve ntangu nge tavumuka konso suka na kumona nde nge ke na mavimpi ya mbote ya kuluta mutindu nge vandaka na kilumbu meluta? Keti yau tavanda dyambu ya kyese ve sambu na minunu na kumona nde bau kekuma batoko lumbu na lumbu ya keluta, tii ntangu bau takuma na kikalulu ya kulunga malembemalembe na nitu mpi na mpeve na bau mutindu Adam na Eva vandaka ntete na luyantiku? Lusilu ya Bible kele nde: “Bika nde nsuni na yandi kukuma pete-pete kuluta mutindu yandi vandaka na buleke; bika nde yandi baka ngolo.” (Yobo 33:25) Keti yau tavanda dyambu ya kyese ve na kulosa baluneti ya maladi ya meso, bisadilu ya makutu yina kesadilamaka sambu na kuwa, mabaya yina kesadilamaka sambu na kudyatisa muntu ya makulu-kifu, velo yina ketambwisaka muntu ya makulu-kubukana, mpi bankisi! Balupitalu, badoktelo, to minganga yina kesansaka maladi ya meno tavanda dyaka na mfunu ata fyoti ve.
10. Inki takumila lufwa?
10 Ata muntu mosi na kuvandaka na mavimpi ya mbote tazola kufwa ata fyoti ve. Yempi, bantu tavanda dyaka ve na kukonda kulunga yina bau bakaka na bibuti na bau ya ntete mpi lufwa. “Kristu fwete yala tii ntangu Nzambi tatula bambeni yonso nansi ya makulu nandi. Mbeni ya nsuka ya takatulama kele lufwa.” “Dikabu ya Nzambi kepesa kele luzingu ya mvula na mvula.”—1 Korinte 15:25, 26; Roma 6:23; tala mpi Isaya 25:8.
11. Inki mutindu Nzayikusu kemonisa na bunkufi balusakumunu ya ntoto yampa?
11 Na kumonisaka na bunkufi mambote yina ya Nzambi tanokisila dibuta ya bantu na kati ya Paladisu, mukanda ya nsuka ya Bible ketuba nde: “Yandi [Nzambi] takunguna mansanga yonso na meso na bau, lufwa tavanda dyaka ve, ntantu tavanda dyaka ve, kudila mpi mpasi tavanda dyaka ve, sambu mambu ya ntete imene kuluta.”—Nzayikusu 21:3, 4.
Bafwa tafutumuka
12. Inki mutindu Yezu monisaka Kiyeka nandi ya bunzambi ya lufutumuku?
12 Yezu salaka yau kuluta bankisi na kubelusa bantu ya maladi mpi na kutedimisa muntu ya makulu-kufwa. Mpi yandi futumusaka bantu yina vandaka na mazyami. Mpidina yandi monisaka kiyeka ya nene ya kufutumusa bafwa, kiyeka ya Nzambi pesaka na yandi. Keti nge keyibuka dyaka kilumbu yina Yezu kwisaka na nzo ya muntu mosi yina mwana nandi ya nkento vandaka mefwa? Yezu tubaka na mwana nkento yina vandaka ya kufwa nde: “Mwana nkento, mono ketubila nge nde: Telama!” Inki salamaka? “Kaka na ntangu yina, mwana nkento telamaka mpi yantikaka na kutambula.” Na kumonaka yau, “bantu yina vandaka pana yitukaka ngolo.” Bau lendaka ve kubumba kyese na bau!—Malako 5:41, 42; tala mpi Luka 7:11-16; Yoane 11:1-45.
13. Bantu ya inki mutindu tafutumuka?
13 Na ntoto yampa, “lufutumuku tavanda sambu na balunungu mpi bau ya konda lunungu.” (Bisalu 24:15) Na ntangu yina, Yezu tasadila Kiyeka yina Nzambi pesaka yandi ya kufutumusa bafwa sambu yandi tubaka nde: “Mono ke lufutumuku mpi luzingu. Yina kekwikila mono, ata yandi kufwa, yandi tavutuka na luzingu.” (Yoane 11:25) Yandi tubaka mpi dyaka nde: “Bayina yonso ya kele na mazyami [na ngindu ya Nzambi] takuwa ndinga nandi [ya Yezu], ebuna bau tabasika.”—Yoane 5:28, 29.
14. Sambu lufwa tavanda dyaka ve, inki yankaka mpi takatulama kumosi?
14 Ntoto tavanda na kyese mingi ntangu kibuka ya bafwa tafutumuka na kuzinga mpi na kuvukana na bankundi na bau! Bansangu ya lufwa tavanda dyaka ata fyoti ve ya tapesa ntantu na bantu yina taguluka. Na sika na yau, talenda vanda dyambu yankaka ya kuswaswana: bansangu yampa ya mazina ya bantu yina tafutumuka tapesa kyese na bankundi na bau. Yempi, madilu tavanda dyaka ve, maziku, mpi mazyami tavanda dyaka ve!
Ya kyeleka ntoto ya ngemba
15. Inki mutindu mbikudulu ya Mika talungana na nsansa na yau ya kyeleka?
15 Ngemba ya kyeleka tavanda na mitindu yonso ya luzingu mvimba. Bitumba, bantu yina kebasisaka bitumba, mpi ba izine to bakompani yina kesalaka minduki tavanda bima ya ntangu ya ntama. Sambu na inki? Sambu nkabwana ya ba nsi, ya makanda, ya bantu tavila to tavanda dyaka ve. Ebuna, na mutindu mosi ya kulunga, “bau tabaka dyaka mbele ya mvita ve, dikanda mosi mpi yankaka tayilama dyaka ve sambu na kunwana mvita. Bantu talonguka mvita dyaka ve.”—Mika 4:3.
16. Inki mutindu Nzambi tamanisa bitumba?
16 Lusilu yai lenda vanda ya ngituka na kumona mutindu bantu vandaka tyamuna menga ya bantu mingi mbala na mbala na bitumba na nkenda ya bantu. Kansi yau kumaka mpidyai sambu bantu kotaka nansi ya luyalu ya bantu mpi ya bampeve ya imbi. Na ntoto yampa, nansi ya luyalu ya Kimfumu, mambu yai tasalama: “Beno kwisa tala mambu Jéhovah mesala . . . Yandi mesukisa bitumba tii na nsuka ya ntoto. Yandi mebuka babuta mpi batolotolo mpi makonga; yandi meyoka makalu [ya bitumba] tiya.”—Nkunga 46:8, 9.
17, 18. Na kati ya ntoto yampa, inki ngwizani tavanda na kati ya bantu mpi bambisi?
17 Muntu mpi mbisi tavanda mpi na ngemba, mutindu bau vandaka na Edeni. (Genese 1:28; 2:19) Nzambi tubaka nde: “Na kilumbu yina, mono tawakana na bambisi ya mfinda mpi na bandeke ya zulu mpi na banyama yina kekudibendaka na ntoto. Mono takatula minduki mpi bambele ya kunwanina. Ebuna . . . mono tabika bantu na mono na kuzinga na ngemba.”—Ozea 2:18.
18 Ngemba yina tavanda nene inki mutindu? “Ntambu tavanda sika mosi ti mwana-dimeme na mwa ntangu, mpi mwana-ngo talala sika mosi ti mwana-nkombo, mwana-ngombe mpi mwana-ntambu tazinga sika mosi; mwana ya fyoti tavanda ntwadisi na bau.” Bambisi tavanda dyaka ve kigonsa sambu na bantu to sambu na bau mosi. Ata “nkosi mpi takudya matiti bonso ngombe”!—Isaya 11:6-9; 65:25.
Ntoto takituka Paladisu
19. Ntoto takituka inki?
19 Ntoto ya mvimba takituka kivandilu ya paladisu sambu na bantu. Yau yina Yezu pesaka lusilu na muntu yina vandaka kwikila yandi nde: “Nge tavanda ti mono na Paladisu.” Bible ketuba nde: “Nseke tavanda na kyese mingi, ntoto-makanga tasepela, bintuntu tayantika na kumena na ntoto ya zelozelo . . . bamasa tabasika mingi na ntoto-makanga, kisika ya zelozelo takuma mazanga ya masa.”—Luka 23:43; Isaya 35:1, 6.
20. Inki mutindu nzala tanyokula dyaka bantu ve?
20 Nansi ya Kimfumu ya Nzambi, nzala tanyokula dyaka ba millions ya bantu ve. “Bankeni tabuta mingi na nsi mpi na bangumba bima tafuluka mingi.” “Banti tabuta bambuma, bilanga tabasisa bima, ebuna, konso muntu tazinga na ngemba na ntoto na yandi.”—Nkunga 72:16; Ezekiel 34:27.
21. Inki takuma sambu na dyambu ketadila kukonda kisika ya kulala, tubanzo ya mpambampamba, mpi kimfinangani ya imbi?
21 Ata fyoti bunsukami tavanda dyaka ve, bantu takonda kisika ya kulala ve, tubanzo ya mpambampamba, to bamfinangani ya ketungisama na bamambu ya mubulu tavanda dyaka ve. “Bau tatunga banzo, bau tazinga muna; bau takuna bilanga ya vinu, bau tadya bambuma na yau. Banzo ya bau tatunga mpi bilanga ya bau takuna, yau tavanda sambu na bau mosi kansi sambu na bantu yankaka dyaka ve.” “Bau tazinga konso muntu nansi ya nti nandi ya vinu mpi nansi ya nti nandi ya figi, ata muntu ya tapesa bau boma tavanda ve.”—Isaya 65:21, 22; Mika 4:4.
22. Inki mutindu Bible ketendula balusakumunu ya luyalu ya Nzambi?
22 Bantu tasakumunama na mambu yonso yai, mpi kuluta dyaka, na kati ya Paladisu. Nkunga 145:16 ketuba nde: “Nge [Nzambi] kekangula diboko na nge mpi nge kefulusa nsatu ya bima yonso ya kezinga ntangu bau ke na nzala.” Mbikudulu mosi ya Bible ketuba nde: “Bankwa dikulumusa tayala nsi, mpi bau tamona kyese na ngemba ya mingi. Balunungu tayala nsi mpi bau tavanda muna mvula na mvula.”—Nkunga 37:11, 29.
Kukatula bampasi ya ntama
23. Inki mutindu Kimfumu ya Nzambi takatula bampasi yonso yina beto kutanaka na yau?
23 Luyalu ya Kimfumu ya Nzambi takatula bampasi yonso yina dibuta ya bantu kutanaka na yau na bamvula mafunda sambanu ya meluta. Byese ya ntangu yina taluta ntama kibeni bampasi yina bantu kutanaka na yau na luzingu na bau. Luzingu tatungisama dyaka ve na kuyindulaka bampasi ya ntangu ya ntama. Bangindu mpi bisalu ya kubongisa bantu ya tasalama lumbu na lumbu tavanda bamambu ya luzingu ya takuvwanza malembemalembe bangindu ya bampasi yina bantu kutanaka na yau.
24, 25. (a) Inki mambu Isaya bikulaka ya talungana? (b) Inki mutindu beto kendima nde bangindu ya ntangu ya ntama tavila?
24 Nzambi ya kekudibanzaka sambu na beto ketuba nde: “Mono kesala mazulu yampa [luyalu yampa ya tayala bantu yonso tuka mazulu] mpi ntoto yampa [kibuka ya bantu ya lunungu]; mpi bamambu ya ntama bantu tayindula yau dyaka ve, mpi yau takwisila bau mpi na ntima ve. Beno yangalala, beno sepela ntangu yonso sambu na bamambu ya mono kesala.” “Ntangu yai ntoto yonso kepema, yau ke na ngemba; bantu yonso ketula milolo ya kyese.”—Isaya 14:7; 65:17, 18.
25 Mpidina na nzila ya Kimfumu nandi, Nzambi takatula bamambu yonso ya imbi yai ya mezinga mingi. Na luzingu ya kukonda nsuka ya mvimba yandi tamonisa nde yandi kekudibanza mingi sambu na beto na kunokisilaka beto balusakumunu na mpila nde yandi kubongisa konso mpasi yina beto kutanaka na yau na ntangu ya ntama. Bampasi ya ntangu ya ntama yina beto kutanaka na yau takatulama na ngindu, kana bonso nde beto yindula yau yonso.
26. Sambu na inki Nzambi tafuta beto bampasi ya ntama?
26 Yai ke mutindu Nzambi tafuta beto bampasi yina beto vibidilaka na nsi yai. Yandi kezaba nde yau ke kifu na beto ve mutindu beto butamaka na kikalulu ya kukonda kulunga, sambu beto bakaka yau na bibuti na beto ya ntete. Yau ke kifu na beto ve mutindu beto butamaka na kati ya nsi ya Satana, sambu kana Adam na Eva vandaka kwikama, nga beto zobutamaka na kati ya paladisu. Mpi na mawa ya nene Nzambi tabongisa dyaka bampasi ya ntama yina kotilaka beto.
27. Inki bambikudulu kulungana na yau ya kitoko tasalama na ntoto yampa?
27 Na ntoto yampa, bantu tazayangalala na kimpwanza yina bikulamaka na Roma 8:21, 22 nde: “Bima yonso yina Nzambi salaka kotaka na kimpika yina nataka lufwa, ebuna yau tabaka kimpwanza ya nkembo ya bana ya Nzambi. Beto zaba nde, tii ntangu yai bima yonso ya Nzambi salaka kedila ngolo, mpi kemona mpasi.” Ebuna bantu tazamona kulungana ya mvimba ya kisambu yai nde: “Bika kimfumu na nge kukwisa! Bika luzolo na nge kusalama na ntoto bonso na zulu!” (Matai 6:10) Bamambu ya kitoko yina tavanda na kati ya Paladisu ya ntoto tavanda bonso bamambu yina ke na mazulu.
[Bifwanisu ya kele na lutiti 23]
Na ntoto yampa, minunu tavutuka na ngolo ya butoko
[Kifwanisu ya kele na lutiti 24]
Maladi yonso mpi buntembidi yonso ya nitu tamana na kati ya ntoto yampa
[Kifwanisu ya kele na lutiti 25]
Na kati ya ntoto yampa, bafwa tafutumuka
[Kifwanisu ya kele na lutiti 26]
“Bau talonguka ata fyoti dyaka ve bitumba”
[Bifwanisu ya kele na lutiti 27]
Bantu mpi bambisi tavanda na ngemba ya nene na kati ya Paladisu
[Kifwanisu ya kele na lutiti 27]
‘Nzambi takangula diboko nandi mpi talungisa nsatu ya bima yonso ya kezinga’
[Kifwanisu ya kele na lutiti 28]
Kimfumu ya Nzambi tabongisa sambu na bantu yonso bampasi yina beto vibidilaka