Bo Tubaka na Ntwala Sambu na Mambu Yina Takwisa

NTANGU ntumwa Piere kutubilaka mambu yina takumina muntu ti ntoto, yandi sonikaka nde: “Beto ke vingila nde Nzambi kubasisa zulu ya mpa ti ntoto ya mpa, yina ya yandi silaka beto; kuna bantu yonso ta lemfuka kaka na Nzambi konso ntangu.” (2 Piere 3:13) Lusilu ya “zulu ya mpa ti ntoto ya mpa” kupesamaka ntetentete na nzila ya profete Yezaya. (Yezaya 65:17; 66:22) Ntangu yandi vutukilaka mbikudulu yai, Piere kumonisaka nde na ntangu na yandi yo lunganaka ntete ve.

Na nima, penepene ya mvu 96 T.B., Kusonga yina kupesamaka na nzila ya ntumwa Yoane kuwakanisaka ‘ntoto yina ya mpa’ ti balusakumunu yina Kimfumu ya Nzambi tanata. (Kusonga 21:1-4) Mambu yina Yezu ti ntumwa Polo kutubaka ya metala mambu ya tasalama na nsi-ntoto na ntwala ya kukwisa ya Kimfumu ya Nzambi ke na kulungana ntangu yai. Yo yina, beto lenda vingila nde kubika fyoti Kimfumu yina tatula nsi-ntoto ya mpa. Nsi-ntoto yina ya mpa tavanda nki mutindu? Mukanda ya Yezaya ketela beto.

Balusakumunu na Nsi-Ntoto ya Mpa

Ngemba mpi Bumosi na Lusambu na Nsi-Ntoto ya Mvimba. “Bambele na bo ya bitumba bo ta kumisa yo bansengo, makonga na bo ta kuma bakupukupu. Bantu ta kwenda diaka ve na bitumba, bo ta yilama mpi ve sambu na kunwana bitumba.”​—Yezaya 2:2-4.

Ngemba na Kati ya Bantu mpi Bambisi. “Bantambu ta vandaka na ngemba ti bana-mameme, bankoi ta pemaka kisika mosi ti bana-bankombo; bana-bangombe ti bana-bantambu ta zingaka kisika mosi, mwana ya fioti ta nataka bo. Bangombe ti bampakasa ta diaka kisika mosi, bana na bo ta lalaka kifulu mosi. Bantambu ta diaka matiti bonso bangombe. . . . Na Sioni, ngumba ya Nzambi, ata kima ya mpasi to ya mbi ta vandaka ve; ntoto ta fulukaka na mambu yai: kuzaba Mfumu Nzambi, mutindu nzadi-mungwa ke fulukaka na masa.”​—Yezaya 11:6-9.

Madia Mingi Sambu na Bantu Yonso. “Awa na ngumba ya Sioni, Mfumu Nzambi, [Yehowa], ta sadisa fete mosi ya madia ya kitoko mpenza ti ya vinu ya kuluta kitoko.”​—Yezaya 25:6.

Lufwa Tavanda Dyaka Ve. “Yandi [Nzambi] ta sukisa lufwa kimakulu! Yandi ta katula mansanga na meso ya bantu yonso, yandi ta katula mpi nsoni ya bo vandaka kumonisa bantu na yandi na nsi-ntoto ya mvimba. Yandi mosi Mfumu Nzambi . . . muntu me tuba.”​—Yezaya 25:8.

Bantu Yina Mefwaka Tafutumuka. “Bantu na nge bayina me fwaka, bo ta zinga diaka, bamvumbi na bo ta vanda diaka na moyo. Bo ta telama, bayina me lala na maziamu, bo ta yimba bankunga ya kiese. . . . Nge Mfumu Nzambi ta pesa ngolo ti moyo na bantu yina me fwaka.”​—Yezaya 26:19.

Mesia Zuzi Mosi ya Lunungu. “Yandi ta zengaka ve makambu mutindu ya yandi ke mona na meso to sambu na bituba-tuba ya yandi ke wa; kansi yandi ta sambisaka bansukami na masonga, yandi ta nwaninaka bantu ya mawa.”​—Yezaya 11:3, 4.

Bifwa-Meso ti Bifwa-Makutu Tabeluka. “Meso ya bantu ya kufwa-meso ta mona, makutu ya bantu ya kufwa-makutu ta kanguka.”​—Yezaya 35:5.

Ntoto ya Kuyuma Tabuta Bambuma. “Nseke ke na kiese mingi, ntoto ya kuyuma ke sepela, bintuntu me yantika kumena na ntoto ya zelo na zelo. Ntoto ke tula milolo ya kiese, yo ke yimba bankunga, yo ke kina.”​—Yezaya 35:1, 2.

Ntoto ya Mpa. “Mono ke sala zulu ya mpa [luyalu ya mpa ya zulu] ti ntoto ya mpa [kimvuka ya bantu ya mpa ya lunungu]; makambu ya ntama bantu ta yindula yo diaka ve, yo ta kwisila bo mpi ve na mabanza. Beno mona kiese, beno sepela ntangu yonso sambu na mambu ya mono ke zola kusala! . . . Bo [bantu ya tazinga na nsi-ntoto ya mpa ya Nzambi mesilaka] ta tunga banzo, bo ta zinga muna; bo ta kuna bilanga ya vinu, bo ta dia bambuma na yo. Banzo ya bo ta tunga ti bilanga ya bo ta kuna, yo ta vanda sambu na bo mosi kansi sambu na bantu ya nkaka diaka ve. Bantu na mono ta zinga mingi bonso banti ke zingaka mingi, ebuna bo ta mona kiese na bisalu ya maboko na bo. Bisalu ya bo ta sala yo ta vanda ya mpamba ve, bana ya bo ta buta bo ta butuka ve sambu na kufwa. Mono Mfumu Nzambi ta sakumunaka bo ti bana na bo tii kuna sambu bo kele bantu na mono. Ntangu bo me binga mono ntete ve, mono ta vanda me ndima bo ntama; ntangu bo me manisa ntete ve na kusamba, mono ta vanda me wila bo ntama.” “Mutindu zulu ya mpa ti ntoto ya mpa ya mono ke sala mutindu yo ta zinga tii kuna, mutindu yo yina mpi bana na beno bantu na mono bo ta zinga tii kuna, zina na bo ta vila ve. Mono Mfumu Nzambi muntu me tuba.”​—Yezaya 65:17-25; 66:22.

Bo Tubaka na Ntwala Sambu na Mambu Yina Takwisa

Mukanda ya Yezaya mpamba ve kutubilaka na ntwala balusakumunu ya bilumbu kekwisa. Biblia mefuluka ti bambikudulu mingi yina ketendula bima ya kitoko yina Nzambi tamonisa na nzila ya Kimfumu na nsi ya luyalu ya Kristu.a Keti nge tazola kuzinga na ntoto yai ya takuma paladisu? Mpila kele! Tanga nge mosi mambu yina ya Biblia kelonga mpenza na yina metala balukanu ya mbote yina Nzambi mebakaka sambu na bilumbu kekwisa, mpi longuka nki mutindu nge lenda bakila yo mambote. Bambangi ya Yehowa tavanda na kyese ya kusadisa nge.

[Noti na nsi ya lutiti]

[Kifwanisu ya kele na lutiti 8]

Bantu tazinga na ngemba bo na bo mpi ti bambisi

[Kifwanisu ya kele na lutiti 9]

Bafwa tafutumuka

[Kifwanisu ya kele na lutiti 10]

Ntoto ya mvimba tavanda paladisu