Nsangu ya mbote yina bau kezola zabisa nge

Kilumbu mosi, balongoki kwisaka kukuta Yezu mpi bau yufulaka yandi nde: “Inki tavanda kidimbu ya kumonana na nge mpi ya nsuka ya ngidika ya bima ya ntangu yai?” Kristu vutulaka na bau nde bitumba tavanda na kati ya ba nsi mingi, nzala, maladi, mpi kunikana ya ntoto tavanda. Kukulula nsiku takuma mingi mpi bantwadisi ya mabundu ya luvunu tavwalangasa bantu mingi. Yezu bikulaka dyaka nde balongoki nandi ya kyeleka takutana na mbangika mpi nde bantu tamenga bau. Ntangu mambu yina yonso tayantika na kulungana, yau tavanda kidimbu nde Kristu ke na kati na beto ya kukonda kumonana mpi nde Kimfumu ya zulu mefinama. Keti yau fwanaka vanda ve nsangu ya nene? Nsangu ya mbote? Yau yina Yezu zabisaka mambu yankaka yai na kusamuna ya kemonisa kidimbu nde: “Nsangu ya mbote yai ya kimfumu tasamunama na ntoto ya mvimba ya bantu sambu na kitemwe na makanda yonso, ebuna na nima nsuka takwisa.”​—⁠Matai 24:​3-14.

Bamambu yina ke na kuvwalangasa ntoto ya mvimba tuka makumi mingi ya bamvu ke na dyambu ata mosi ve ya kuyangidisa kibeni; kansi, bonso yau ke kidimbu (ya kumonana ya kristu) yau lunga yangidisa beto. Yau yina Yezu tubaka nde: “Ntangu mambu yina tayantika na kubwa, beno vanda ya kusungama, beno nangula ntu, sambu lugulusu na beno tavanda mefinama.” (Luka 21:28) Mambu yai yantikaka na kubwa mpi na kulungana na 1914. Dati yai lungisaka nsuka ya ntangu ya Bampani mpi luyantiku ya nsungi ya ndilu na kati ya luyalu ya bantu mpi Luyalu ya mvula funda ya Kristu.

Kana nde nsungi ya ndilu tavanda, ikele ntembe ve; sambu yau kemonana na Nkunga 110, nzila ya kutanga 1 mpi 2, mpi Nzayikusu 12:7-12. Mikapu yina kemonisa nde Kristu fwetele vanda na diboko ya kibakala ya Nzambi kuna na zulu tii ntangu ya kuvutuka nandi. Ebuna mpi nde na ntangu yina mvita fwana salama na zulu, mvita yina fwana suka na kubela to na défaite ya satana, mpi yandi fwetele losama na ntoto. Sambu na yina ketadila Kristu, yandi fwete yala na kati ya bambeni nandi na nsungi mosi, yina bunda na yau lenda luta ve bunda ya mbandu to ya génération mosi. Ebuna na nsuka ya mambu ya imbi yonso, “mbungulu ya nene” fwete kwisa, mbungulu yina nsuka na yau tavanda na Har–​Maguédon sambu na ngidika yai ebuna na nima fwana kwisa luyalu ya ngemba, Luyalu ya mvula funda ya Yezu Kristu.​—⁠Matai 24:​21, 33, 34; Nzayikusu 16:​14-16.

“Kansi nge fwete zaba mambu yai,” mutindu yau metubilama na Bible nde: “na bilumbu ya nsuka tavanda ntangu ya mpasi. Sambu bantu takudizola, tazola mbongo, takuditombola, tavanda na lulendo, tatuba imbi, talemfuka na bibuti ve, takonda matondo, takonda kwikama, tavweza Nzambi, takonda zola ya kyeleka, tavanda bambeni mingi, tatuba kitemwe ya luvunu, takonda diyala, tavanda na makasi, tazola ve mambu ya mbote, bangyekudi, ntu ngolo, tafuluka na lulendo, banduku ya byese kansi ya Nzambi ve, bau takudimonisa bonso bau ke na vumi, kansi bau kevweza ngolo na yau; katuka na kati na bau.” (2 Tim. 3:​1-5) Ikele na bantu yankaka ketuba nde Nkenda ya bantu memonaka bansungi ya mpidyai.

Kansi, ngindu ya bahistorye mpi ya bantendudi to ba commentateurs kele mpidina ve. Na ngindu na bau ata mbala mosi ve na kati ya Nkenda bantu mekutanaka na nsungi ya kyadi ya mpidyai bonso yai bau mekota na kati na yau tuka 1914. Ata mbala mosi ve bau mekutanaka na bampasi ya nene ya mpidyai. Na yina ketadila mambu yankaka ya kemonisa kidimbu nde beto ke na bilumbu ya nsuka, tala mambu ya beto fwete zikisa mbotembote: Kusamunama na ntoto ya mvimba kumonana ya Kristu mpi ya Kimfumu nandi meyalumuka na mutindu mosi ya nene ya yau mesalamaka ntete ve na Nkenda ya bantu. Bambangika sambu na kisalu ya kusamuna mebasikaka ntete ve bonso mutindu ba Témoins de Jéhovah kutanaka na yau mpi bau ke kukutana na yau bubu yai. Kati na bau, bankama na bankama gondamaka na baboloko ya ba nazi. Bubu yai dyaka ba nsi mingi mekandikila lusambu na bau; na ba nsi yankaka bau kekangakanga bau, ketula bau na baboloko, kenyokula bau mpi kefwa bau. Yina yonso kemonisa kidimbu yina Yezu pesaka.

Mutindu yau mezabisama na Nzayikusu 11:​18, “makanda medasukila” ba Témoins de Jéhovah ya kwikama; yina mpi ke kidimbu kemonisa nde “kudasuka” ya Jéhovah mpi mekuma penepene na kubwila makanda yina. Kaka na mukapu yina ya Bible yau kezabisa dyaka nde Nzambi “tabebisa bayina kebebisa ntoto.” Ata na nsungi mosi ve na nkenda, bantu memonaka ntete kubeba ya ntoto na mutindu mosi ya ntitisa na mpila nde yau lunga tanina dyaka ve luzingu ya bantu. Bubu yai, kigonsa yango kele! Bantu ya mayele to ya science ke na kukebisa mbala na mbala nde: kana bantu kubuya na kusukisa bisalu na bau ya kubebisa ntoto, mweta na beto tavanda dyaka na bantu ve mpi yau tabikala ya mpamba. Kansi, bonso beto yitaka kutubila yau na ntwala, Jéhovah ‘gangaka ntoto sambu nde bantu kuzinga pana.’ Yandi tafwa bayina kebebisa ntoto na ntwala nde bau manisa na kubebisa ntoto.​—⁠Isaya 45:⁠18.

BYESE YA NTOTO NANSI YA LUTWADISU YA KIMFUMU

Ngindu ya kutuba nde bantu tazingaka na ntoto bonso bantu ya Kimfumu to ya Luyalu ya Nzambi na ntembe ve lenda yitukisa bayina yonso kekwikilaka nde bantu ya mbote yonso takwenda na zulu. Na kulanda Masonuku, ikele kaka ndambu fyoti ya bantu takwenda na zulu. Sambu na bayina yonso ya tazinga awa na ntoto mvula na mvula, bau tavanda kibuka mosi ya nene yina ntalu na bau mezabana ve. (Nzayikusu 14:​1-5; 7:9; Nkunga 37:29) Na kutadila mbikudulu mosi ya Bible na mukanda ya Daniel, Kimfumu ya mesiya ya Nzambi, tafuluka na ntoto ya mvimba, na mpila nde yau vanda na nsi ya luyalu na yau.

Na mbikudulu yina, Kimfumu ya Kristu memonisama na kifwani ya ditadi mosi ya metumuka na ngumba, kifwani ya luyalu ya Jéhovah. Ditadi yango mebula mpi mepanza kiteki yina kefwanisa makanda ya ngolo; mpi, “sambu na yina ketadila ditadi yina kubulaka kiteki, yau kitukaka ngumba mosi ya ndá, mpi yau fulusaka ntoto ya mvimba.” Mbikudulu kefula dyaka na kutuba mpidyai nde: “Na bilumbu ya bantotila yina, Nzambi ya zulu tatula kimfumu. Bau takatula yau ata fyoti ve. Yau tafwa mpi tadyata bimfumu yai yonso, ebuna yau mosi tabikala mvula na mvula.”​—⁠Daniel 2:44.

Ikele sambu na Kimfumu yina mpi kivuvu ya Bible ya luzingu ya kukonda nsuka na ntoto yina takatulama na bampasi yonso, mpi yina takituka sika ya kitoko na kuzinga, nde ba Témoins de Jéhovah kezodila kusolula ti nge. Bamiliyo ya bantu yina ke na kuzinga bubu yai, mpi bamiliyo na bamiliyo ya bafwa yina melala na mazyami, bau tapesama nzila sambu na kukumisa ntoto kisika na bau ya kuzinga kimãkulu. Ebuna, na ntangu yina, nansi ya Luyalu ya Mvula Funda ya Yezu Kristu, lukanu ya luyantiku ya Jéhovah talungana, yina kuvandaka tuka luyantiku, ntangu yandi gangaka ntoto mpi dibuta ya ntete ya bantu. Bantu talemba paladisu ya ntoto yina ata fyoti ve. Mutindu Adam kubakaka kisalu na kati ya kilanga ya Eden, kiteso mosi mpi na ntangu yina kekwisa bantu tavanda na kisalu mosi ya nene ya kusala: kusansa ntoto, bimenina mpi bambisi. Ebuna bantu ‘tayangalala kibeni na kisalu ya maboko na bau.’​—⁠Isaya 65:​22, Segond; Genese 2:15.

Beto lenda pesa mikapu yankaka ya Bible yina kemonisa inki mutindu luzingu tavanda na ntangu kisambu yina Yezu longaka beto tabaka mvutu na yau: “Bika kimfumu na nge kukwisa! Bika luzolo na nge kusalama awa na ntoto bonso na zulu!” (Matai 6:10) Kansi beto telama mwa fyoti na mikapu yai: “Mono kuwããka ndinga ya ngolo kukatuka na kiti ya kimfumu ketuba nde: ‘Ntangu yai Nzambi kezinga na kati ya bantu! Yandi tazinga ti bau, mpi bau tavanda bantu na yandi. Yandi mosi Nzambi tavanda sika mosi ti bau, yempi yandi tavanda Nzambi na bau. Yempi yandi takunguna mansanga yonso na meso na bau, lufwa tavanda dyaka ve, ntantu tavanda dyaka ve, kudila mpi tavanda dyaka ve, mpi bau takuwa dyaka mpasi ve. Na ntangu yina mambu ya ntama tavila.’ Ebuna Yina ya kuvandaka na kiti ya kimfumu tubaka nde: ‘Tala, mono kesala bima yonso yampa!’ Yandi tubilaka mono nde: ‘Sonika, sambu mambu yai yonso ke ya kwikama mpi ya kyeleka.’ ”​—Nzayikusu 21:​3-5.

[Bangogo sambu na kubenda dikebi ya kele na lutiti 15]

“Ntangu ya mpasi,” KANSI “lugulusu na beno mefinama”