Nsangu ya mbote yina bo kezola nde nge wa

NTANGU Yezu vandaka na zulu ya ntoto, balongoki na yandi kwisaka na yandi mpi bo yulaka yandi mutindu yai: “Inki kidimbu ta monika yina ta songa nde nge [kele awa, mpi nde nsuka ya ngidika ya bima yai melunga, NW]?” Yandi vutulaka nde bamvita tasalamaka na bansi mingi, nzala tavanda, maladi, ntoto tanikana, mambu ya mbi takuma mingi, bamfumu ya mabundu ya luvunu takusa bantu mingi, bantu tamenga mpi tanyokula balongoki na yandi ya kyeleka, bantu mingi tazolaka dyaka ve lunungu. Ntangu mambu yai zolaka kuyantika na kulungana, yo zolaka kusonga nde Kristu kele awa na mutindu mosi ya kukonda kumonana mpi nde Kimfumu ya zulu mekuma penepene. Yai zolaka kuvanda nsangu mosi ya mbote mpenza! Ebuna, Yezu yikaka dyaka bangogo yai ya tavanda mpi mosi na kati ya kidimbu: “Bo ta longaka Nsangu yai ya Mbote ya Kimfumu na nsi-ntoto ya mvimba, na mpila nde bantu ya makanda yonso kuwa yo. Ebuna na nima, nsuka ya ntoto ta kwisa.”​—⁠Matayo 24:​3-14.

Bidimbu yango kele mambu ya mbote ve, kansi mambu ya yo ketendula kele mbote, sambu yo kesonga nde Kristu kele awa ti beto. Mambu ya beto mekatuka kutanga awa na zulu, yantikaka na kumonana na mvu 1914, yina mezabanaka mingi na inza ya mvimba! Bantangu ya Bamimpani kusukaka na dati yai, ebuna beto kotaka na nsungi ya luyalu ya bantu yina tasuka ntangu Luyalu ya Mvu-Funda (Difunda) ya Kristu tayantika.

Ntembe kele ve nde yo vandaka nsungi ya luyalu mosi yina fwete nata na luyalu yankaka, mutindu yo kemonana na Nkunga 110, Nk. 110 verse 1 ti 2, mpi na Kusonga 12:​7-12. Na baverse yina, bo kemonisa beto nde yo lombaka nde Kristu kufonga na diboko ya kibakala ya Nzambi na zulu tii kuna ntangu ya yandi takuma Ntotila talunga. Na nima, yo lombaka nde mvita kusalama na zulu ebuna bo losa Satana na ntoto. Yo lombaka mpi nde mpasi kukota na ntoto, na nima, Kristu kuyantika kuyala na kati ya bambeni na yandi. Mambi tamana kimakulu na nsadisa ya “mpasi mosi ya ngolo,” yina takwenda tii na Har–​Magedoni, na nima na yo Mvu-Funda ya Luyalu ya Kristu ya ngemba tayantika.​—⁠Matayo 24:​21, 33, 34; Kusonga 16:​14-16.

Biblia ketuba nde: “Nge fweti zaba mambu yai nde: Na bilumbu ya nsuka ta vanda mpasi mingi. Bantu ta zolaka bantu ya nkaka ve, bo ta zolaka kaka mbongo; bo ta kuditulaka, bo ta vandaka lulendo mingi; bo ta vwenzaka Nzambi, bo ta tulaka ntu-ngolo na batata ti bamama na bo; bo ta zabaka kupesa mersi ve; bo ta zitisaka mambu ya Nzambi ve; bo ta vandaka nku mingi, bo ta zingaka kaka na kimbeni, bo ta kumaka songi-songi, bo ta waka makasi nswalu, bo ta zolaka kusala bantu ya nkaka mpasi, bo ta zolaka ve mambu ya mbote; bo ta zolaka kuteka bantu ya nkaka; bo ta vandaka na kifu ya kusala mambu kukonda kuyindula ntete; ntima na bo ta vanda me fuluka na lulendo mingi; bo ta zolaka kiese ya nsi-ntoto, kansi Nzambi ve; bo ta songaka na meso ya bantu nde bo kele na kinzambi, kisi na ntima na bo, bo ke buyaka ngolo ya kieleka ya kinzambi. Kuvanda kimvuka mosi ve ti bantu ya mutindu yina.” ​—⁠2 Timoteo 3:​1-5.

Bantu yankaka lenda tuba nde mambu ya mutindu mosi kuvandaka mpi na ntangu ya ntama, kansi dyambu ya kyeleka kele nde yo mebikaka kusalama ntete ve nsungi mosi. Mutindu bantu ya kelongukaka nkenda ti bantu ya kemwangaka bansangu kutubaka, mambu yina kesalamaka banda na 1914, mesalamaka ntete ve na nkenda ya bantu. (Tala na lutiti 7.) Mambu ya mpasi mekumaka mingi mpenza kuluta na ntangu ya ntama. Dyaka, tala mambu ya beto fwete tadila sambu na yina metala mambu yankaka ya kesonga kidimbu ya Kristu ya bilumbu ya nsuka: Bambangi kelonga kuvanda ya Kristu ti Kimfumu na yandi na kiteso mosi ya mesalamaka ntete ve. Kele ve ti bantu memonaka dezia mpasi sambu na kisalu ya kusamuna bonso yina Bambangi ya Yehowa ke na kumona bubu yai. Bamingi na kati na bo, bo fwaka bo na bakan ya konsatrasio ya Nazi. Tii bubu yai, na bisika mingi bo mebuyaka kisalu ya Bambangi ya Yehowa, kansi na bisika yankaka bo kekangaka bo, ketulaka bo na baboloko, bo kenyokulaka bo, mpi bo kefwaka bo. Mambu yai yonso kele na kati ya kidimbu yina Yesu pesaka.

Bonso bo meyitaka kutuba yo na Kusonga 11:​18, ‘[makanda] mewaka makasi’ sambu na Bambangi ya Yehowa ya kwikama, mpi dyambu yai kesonga nde Yehowa tasonga ‘makasi na yandi’ na makanda yina. Verse kaka yina mosi ketuba nde Nzambi ta ‘fwa bantu yina ke bebisaka ntoto.’ Ata na nsungi mosi ve kati na nkenda ya bantu, ngolo ya ntoto ya kutanina luzingu mebebaka mutindu yo mebeba bubu yai. Kansi, bubu yai mambu kele mutindu yankaka! Bantu ya siansi mekebisaka nde kana muntu kulanda na kubebisa ntoto, mpila ya kuzinga na zulu ya ntoto tavanda dyaka ve. Kansi, Yehowa “yidikaka yo sambu bantu kuzinga muna,” mpi yandi takatula bantu yina kebebisaka ntoto na ntwala nde bo bebisa ntoto yonso.​—⁠Yezaya 45:⁠18.

BALUSAKUMUNU YA NTOTO NA NSADISA YA KIMFUMU

Ngindu ya bantu ya kuzinga na ntoto na nsi ya Kimfumu ya Nzambi lenda monana dyambu mosi ya mpasi sambu na bantu mingi ya kekwikilaka na Biblia, yina keyindulaka nde bantu yonso yina taguluka takwenda na zulu. Biblia kemonisa nde kaka bantu fyoti mpamba takwenda na zulu mpi nde bantu yina tazinga mvula na mvula na ntoto tavanda kibuka mosi ya nene yina ntalu na yo mezabanaka ve. (Nkunga 37:​11, 29; Kusonga 7:​9, NW; Kus. 14:​1-5) Mbikudulu mosi ya Biblia yina kele na mukanda ya Daniele, kemonisa nde Kimfumu ya Nzambi yina tavanda na nsi ya luyalu ya Kristu tayalumuka na ntoto ya mvimba mpi tayala yo.

Na mukanda yina, Biblia ketubila Kimfumu ya Kristu na kifwani nde yo kele ditadi mosi ya nene yina kukatukaka na ngumba ya kifwani ya kimfumu ya Yehowa. Ditadi yango kwisaka kubwila kiteki, yo panzaka-panza kiteki yina kele kifwani ya bansi ya kuluta ngolo ya ntoto, mpi “ditadi yina bwilaka kiteki . . . kumaka ngumba ya nene, yo fulukaka ntoto yonso.” Mbikudulu kelanda na kutuba mpidiyai: “Ntangu ya bantotila yina ta yala, Nzambi ya zulu ta tula ntotila mosi yina ta yalaka tii kuna; ntotila yina bantotila ya nkaka ta bedisaka yandi ve, kansi yandi ta fwa bantotila yonso ebuna yandi ta yalaka tii kuna.”​—⁠Daniele 2:​34, 35, 44.

Bambangi ya Yehowa kezola kutubila nge mambu yina ketadila Kimfumu yai mpi kivuvu yina Masonuku kepesaka sambu na luzingu ya mvula na mvula na zulu ya ntoto ya kukonda mvindu mpi ya kitoko. Bamiliyo ya bantu yina kele na luzingu bubu yai, ti bankaka mingi kibeni yina kele bubu yai na maziamu tabaka okazio ya kuzinga kimakulu na zulu ya ntoto. Na nima, na nsi ya Luyalu ya Kristu Yezu ya Mvu-Funda Mosi, Yehowa talungisa lukanu na yandi yina yandi vandaka na yo na kisina ntangu yandi gangaka ntoto mpi ntangu yandi tulaka bantu zole ya ntete na zulu na yo. Bantu talemba ve ata fyoti na kuzinga na Paladisu yai ya ntoto. Mutindu Nzambi pesaka Adami kisalu na masamba ya Edeni, yandi tapesa mpi bantu mukumba ya kubongisa ntoto ti banti, mpi bambisi yina tavanda na zulu na yo. “Ebuna bo ta mona kiese na bisalu ya maboko na bo.”​—⁠Yezaya 65:22; Kuyantika 2:⁠15.

Beto lenda pesa baverse mingi sambu na kumonisa mutindu luzingu yango tavanda ntangu Nzambi tapesa mvutu ya kisambu yai ya Yezu longaka beto: “Kimfumu na nge kwisa, luzolo na nge kusalama awa na ntoto bonso na zulu.” (Matayo 6:10) Kansi, ntangu yai beto kekinga nde mambu yai kulungana: “Mono waka ndinga ya ngolo katukaka na kiti ya kimfumu nde: ‘Ntangu yai Nzambi ke zinga na kati ya bantu! Yandi ta zinga ti bo, bo ta vanda bantu na yandi. Yandi mosi Nzambi ta vandaka ti bo, yandi ta vandaka Nzambi na bo. Yandi ta kusula mansanga yonso na meso na bo. Lufwa ta vandaka diaka ve, bantu ta lwataka mpidi diaka ve, bo ta dilaka diaka ve, bo mpi ta waka diaka mpasi ve. Na ntangu yina mambu ya ntama ta vanda me vila.’ Ebuna muntu yina me vanda na kiti ya kimfumu tubaka nde: ‘Ntangu yai mono ke sala bima yonso ya mpa.’ Yandi tubilaka mono mpi nde: ‘Sonika mambu yai, sambu mambu yai ya mono ke tuba kele ya kieleka, nge lunga tula ntima na yo.’”​—⁠Kusonga 21:​3-5.

[Bangogo sambu na kubenda dikebi ya kele na lutiti 15]

‘Mpasi ta vanda mingi,’

KANSI ‘na nima, nsuka takwisa’

[Kifwanisu ya kele na lutiti 18]

Pays-Bas

[Kifwanisu ya kele na lutiti 18]

Nigeria