Beto Sambila Nzambi Bonso Yandi Kezodilaka

YEZU sambilaka na bangogo yai: “Yai ketendula luzingu ya mvula na mvula: bau longuka na kuzaba nge, nge, Nzambi mosi kaka ya kyeleka, ye yina nge tindaka, Yezu Kristu.” (Yoane 17:⁠3). Inki nzayilu yau vandaka tubila? Na kutadila ndinga ya Paul, “Nzambi . . . kezola nde bantu ya mitindu yonso kuguluka ye kuma na nzayilu yambote ya kyeleka.” (1 Timote 2:⁠4) Bible kebingama Ndinga ya kuzinga kebalula mutindu yai nsuka ya mukapu yina: “ye kuma na nzayilu ya kulunga ya kyeleka [ya bunzambi].”

Mpidina, Nzambi kezola nde beto vanda ti nzayilu ya kulunga ya yandi mpi ya balukanu nandi, nzayilu yina kekatuka na kyeleka ya bunzambi. Ndinga ya Nzambi, Masonuku ya Musantu, kele nto ya kyeleka yina. (Yoane 17:17; 2 Timote 3:​16, 17) Yina kelonguka, na nsadisa ya Bible, na kuzaba Nzambi mbote kibeni kekuditanina ntangu yina na kufwanana ti bantu yina Loma 10:​2, 3 ketubila, bayina vandaka “ti kikesa sambu na Nzambi, kansi ve na nzayilu ya kulunga”; to na Basamaria, na bayina Yezu tubaka: “Beno kesambila, beno, yina beno zaba ve.”​—⁠Yoane 4:⁠22.

Na yau, kana beto kesosa kundimama na Nzambi, beto fwete diyufula bangyufula yai: Inki Nzambi ketuba sambu na yandi mosi? Inki mutindu yandi kezola beto sambila yandi? Inki kele balukanu nandi, mpi inki mutindu beto lenda sala bonso yau kelomba? Kana beto kele na nzayilu ya kulunga ya kyeleka, beto lenda pesa mvutu na bangyufula yai. Pana beto takuka kusambila Nzambi mpila yandi kezodilaka.

Beto keba na kukonda kuzitisa Nzambi

“BAYINA kezitisa mono, mono tazitisa bau,” mpila Bible ketuba. (1 Samuel 2:30) Yina ketuba nde Nzambi kele ti muntu yina kele ti yandi kiteso mosi, keti yandi kezitisa Nzambi? Keti yandi kezitisa Nzambi, yina, bonso kesala yau Ansiklopedi yampa ya katolika (angl.), kebinga Maria “mama ya Nzambi,” “Muvukisi . . . na kati ya Ngangi ti Bigangwa nandi”? Ikele ve, sambu mambu yina kefinga Nzambi. Ata muntu mosi ve kele kiteso mosi ti Nzambi; mpi yandi kele ve ti mama, sambu Yezu kele ve Nzambi. Dyaka, “Muvukisi” kele ve, sambu Nzambi solaka “muvukisi mosi kaka na kati ya Nzambi ti bantu,” Yezu.​—⁠1 Timote 2:5; 1 Yoane 2:​1, 2.

Ntembe kele ve nde dilongi ya Butatu kepukumuna bantu sambu na yina metala kiyeka ya Nzambi. Yau kekangisa bau nzila ya kubaka nzayilu ya kulunga ya Mfumu ya nza yamvimba, Jéhovah Nzambi, mpi ya kusambila yandi bonso yandi kezodilaka. Kansi, bonso monisaka yau teyolozye Hans Küng, “sambu na nki kusosa kuyika konso inki na bumosi mpi [na] ngwisana [ya Nzambi], yina lenda kaka kusulumuna ngindu ya bumosi ti ya ngwisana”? Kansi ikele yau yina dilongi ya Butatu kusalaka.

Bayina kekwikilaka na Butatu “kumonaka mbote ve na kulunda Nzambi na nzayilu ya kulunga.” (Loma 1:28) Paul keyika na mukapu yina nde: “Nzambi bikaka bau na mabanza na bau yambi, sambu na kusala yina ya lunga ve.” Banzila 29 tii 31 ketubila mwa mambu yina ‘lunga ve’: ‘kufwakana, kuswana, kukonda kwikama na balusilu, kukonda zola, kukonda mawa.’ Bima yina kesadilamaka na mabundu yina kendimaka Butatu.

Mumbandu, bantu kekwikilaka na Butatu kebangikaka mbala mingi mpi kwendaka tii na kufwa bayina vandaka buya na kukwikila na dilongi yina. Tala kibeni kima yina “lunga ve”: nde bakatolika kufwa bakatolika yankaka, ba orthodoxes bau na bau, bamisyoni bau na bau, mpi yonso yina na zina ya Nzambi mosi ya Butatu.

Kansi, nsangu ya Yezu kele pwelele: “Na yai bau yonso tazaba nde beno kele balongoki na mono: kana beno kele na zola na kati na beno.” (Yoane 13:35) Masonuku ketuba dyaka nde: “Mu mambu yai bana ya Nzambi ye bana ya Diable ikele kumonika: konsonani ya sala lunungu ve ikele ya Nzambi ve, ye konsonani ya zola ve mpangi nandi.” Bible kefwanikisa bayina kefwa bampangi na bau na lukwikilu na “Kayini ya katukaka na nkwa mbi [Satana] ye kufwaka mpangi ya yandi.”​—⁠1 Yoane 3:​10-12.

Mpidina, kulongama ya malongi ya kupitakana sambu na Nzambi kele na kisina ya mambu kefwa bansiku nandi. Inga, yina mesalamaka na kati ya kikristu yamvimba kelungana na mambu ya teyolozye ya Danemark Søren Kierkegaard: “Kikristu (chrétienté) metula nsuka na bukristu (christianisme) kukonda kibeni kubakisa yau.”

Kimpeve ya bantu ya kikristu kele kiteso mosi na yina Paul tubaka: “Na munoko bau tuba bau zaba Nzambi, kansi bau kebuya yandi na bisalu na bau, sambu bau kele bantu yambi, ya konda bulemvu ye lenda ve kusala mambu yambote ata fyoti.”​—⁠Tito 1:⁠16.

Kubika fyoti, Nzambi tatula nsuka na ngidika yai yambi mpi yandi tasambisa kikristu kekwikilaka na Butatu. Yau tabedisama, sambu yau kezitisa ve Nzambi na bisalu yau kesala mpi na malongi yau kelonga.​—⁠Matai 24:​14, 34; 25:​31-34, 41, 46; Nzayikusu 17:​1-6, 16; 18:​1-8, 20, 24; 19:​17-21.

Beto buya Butatu busantu

MPILA kele ve ya kubalula bakyeleka ya bunzambi. Na yau, sambu na kusambila Nzambi bonso yandi kezodilaka, beto fwete buya Butatu. Dilongi yina kewakana ve na lukwikilu mpi na malongi ya bambikudi, ya Yezu, ya bantumwa mpi ya bakristu yantete. Yau kewakana ve na yina Nzambi ketuba sambu na yandi mosi na Ndinga nandi: “Mono kele Nzambi, Nzambi yankaka kele ve ye muntu mosi ve kele kiteso mosi na mono.”​—⁠Esaïe 46:​9, Jé.

Yau kesadisa Nzambi na kima mosi ve na kumonisaka yandi na mpila ya kupitakana mpi ya diswekamu. Kansi, mutindu Nzambi mpi balukanu nandi kele mpimpa na mabanza ya bantu, kiteso mosi mbeni ya Nzambi, Satana Diabulu, ‘nzambi yansi yai,’ kemona kyese. Ikele yandi kele na kisina ya malongi ya luvunu yina ‘kefwa ngangu ya bantu.’ (2 Korinte 4:⁠4) Sambu na bamfumu ya mabundu ya kikristu, yina kezola kutanina nkembo na bau na bantu mingi, bau mpi kemona kyese na dilongi ya Butatu, sambu bau kekwikidisa na bantu nde kaka bateyolozye lenda bakisa yau.​—⁠Yoane 8:⁠44.

Nzayilu ya kulunga ya Nzambi kepesaka nsyamisa ya nene. Yau kekatula beto na kimpika ya malongi yina kewakana ve na Ndinga ya Nzambi, mpi na mabundu ya bantu mebika lukwikilu.” Dyaka Yezu tubaka nde: “Beno tazaba kyeleka, ye kyeleka tavulusa beno.”​—⁠Yoane 8:⁠32.

Kana beto zitisa Nzambi bonso Nzambi Nkwa-Ngolo mpi nde beto sambila yandi bonso yandi kezodilaka, beto lenda tina mfundusu yandi tasala kubika fyoti na kikristu mebika lukwikilu mpi kuvanda na kivuvu ya kubaka mambote nandi ntangu ngidika yai tavila: “Nsi keluta ye nzala na yau, kansi yina ya sala luzolo ya Nzambi tazinga mvu ye mvu.”​—⁠1 Yoane 2:⁠17.

[Kifwanisu ya kele na lutiti 31]

Kiteki yai, ya nkulunkulu, ya beto kemona na Fransa, kemonisa nkembo mepesama na mwese Maria na Butatu. Lukwikilu na Butatu kele na kisina ya lusambu ya Maria, “Mama ya Nzambi”