Kapu 32

Inki Mepesama Nzila na Kisabatu?

YAI kele Kisabatu ya nkaka ya Yezu kekota na sinagoga mosi penepene na Nzadi ya Galilea. Muntu mosi ya kukauka diboko ya kibakala kele pana. Balongi ya Bansiku ti Bafarize ketala mbotembote sambu na kumona kana Yezu tabelula yandi. Nsukansuka bau meyufula nde: “Keti Bansiku na beto ke pesa muntu nzila na kubelula muntu na [kisabatu, NW]?”

Bamfumu ya mabundu ya Bayuda kekwikilaka nde kubelula mepesama nzila na Kisabatu kaka kana luzingu kele na kigonsa. Mu mbandu, bau kelongaka nde na Kisabatu nswa mepesama ve na kuvutula mukwa to na kukangisa kitembe ya lele na kisika yina mebukana. Ebuna balongi ya Bansiku ti Bafarize keyufula Yezu sambu na kusosa kikuma ya kufundila yandi.

Kansi, Yezu, mezaba bangindu na bau. Na mbala mosi, yandi mebakisa nde bau kele na mboninu ya mbote ve mpi ya kuswaswana ti ya Masonuku na yina metala kuvwenza nsiku ya kebuyisa kisalu na Kisabatu. Na yau, Yezu mebasisa ntembe na kutubila muntu ya kukauka diboko nde: “Kwisa kutelama awa na meso ya bantu yonso.”

Ntangu yai, na kubalukaka na Bafarize, Yezu metuba nde: “Kana muntu mosi na kati na beno ke na dimeme, ebuna dimeme yango kubwa na dibulu na [kisabatu, NW], nki yandi ta sala? Keti yandi ta kwenda kubaka yo ve ti kubasisa yo na dibulu?” Sambu dimeme kemonisa kimvwama ya mbongo, bau lenda kubikisa yau ve na kati ya dibulu tii mbasi, mbala ya nkaka yau tafwa mpi yau kunata mvidisa. Dyaka, Masonuku ketuba nde: “Muntu ya lunungu kekebaka moyo ya kitwisi na yandi.” (NW)

Na kufwanisaka, Yezu melanda nde: “Muntu kele mfunu mingi kuluta dimeme! Mpidina, yo kele nsiku ve na [kusala kima ya mbote na kisabatu, NW].” Bamfumu ya dibundu kekuka ve na kubuya dibanza ya ndonga, ya ntima ya mawa ya mutindu yina, mpi bau mebikala nye.

Ti nsoni, mpi mpasi na ntima sambu na buzoba na bau ya kukonda kundima, Yezu ketala muntu na muntu. Na nima, yandi metubila muntu yango nde: “Tandula diboko na nge.” Mpi yandi metandula yau ye diboko mebeluka.

Na kisika ya kuwa kyese nde diboko ya muntu yango mebeluka, Bafarize mekwenda na nganda mpi mbala mosi bau mesala mfundu ti bantu ya Erode sambu na kusosa kufwa Yezu. Ngatu, kibuka yai ya politiki ya kele ti bamambere ya dibundu ya Basaduse na kati. Na kutuba ya mbote, bantu yai ya politiki ti Bafarize kewakanaka ve bau na bau, kansi bau kele ya kuvukana sambu na kuyina Yezu. Matayo 12:​9-14; Marko 3:​1-6; Luka 6:​6-11; Bingana 12:10; Kubasika 20:​8-10.

▪ Ntembe na kati ya Yezu ti bamfumu ya dibundu ya Bayuda meluta na inki mvwandilu?

▪ Inki bamfumu ya dibundu ya Bayuda yai kekwikilaka na yina metala kubelula na Kisabatu?

▪ Inki kingana Yezu mesadila sambu na kubuya bangindu na bau ya luvunu?